1-2. Ta ese Iehova ladana e hadikaia neganai, iena hemami be ede bamona?

 MANI a laloa: Oi ese o lalokau heniamu tauna ta na oi latamu ai e gwaurai herevadia na dia nanamo. Oi na mai dibamu una na koikoi; to, haida ese na e abia dae. Bona ihadika hereana, idia ese ma haida ediai e gwauraia, bona, momo ese na e abia dae. Una neganai emu hemami be ede bamona? Bema oi na taunimanima o lalokau henidiamu bona so uramu ladamu baine dika, unu hereva koikoidia daidiai bo lalometaumu, ani?—Her. 22:1.

² Una haheitalai ese ita e durudamu, Iehova natuna ta ese ia ladana e hadikaia neganai iena hemami ta lalopararalaiamu. Una aneru ese hahine ginigunana Heva vairanai hereva koikoidia e gwaurai neganai, Heva ese na e abi dae. Unu hereva koikoidia daidiai, Adam bona Heva ese Iehova e gwau-edeede henia. Bona taunimanima iboudiai na kara dika taudia ai ela, bona e masemu. (Gen. 3:​1-6; Roma 5:12) Satana ese Eden umana ai e gwaurai hereva koikoidia daidiai tanobada ai hekwakwanai iboudiai—mase, tuari, hisihisi e varamu. Unu hereva koikoidia bona e varamu hekwakwanai ese Iehova lalona e hahisiamu, a? Oibe. To ia na se badumu, badina Baibul ese e hahedinaraiamu “ia na moale Diravana.”—1 Tim. 1:11.

3. Ita ese Iehova ladana baita heatolaia totona dahaka baita kara?

³ Ita ese Iehova ladana baita abia isi totona, ina haheḡani baita badinaia, e gwaumu: “Iehova ladana ba heatolaia.” (Sal.  113:1) Unu baita kara toma dalana na Iehova ena kara namodia baita herevalai. Oi danu Iehova bo heatolaiamu, a? Mai kudouda ibounai ida Dirava ladana baita heatolaia totona, mani badi toi aita herevalai.

IEHOVA LADANA TA IMODAIAMU NEGANAI IA NA E MOALEMU

4. Dahaka dainai Iehova ta imodaiamu neganai ia na e moalemu? Mani haheitalai ta a gwaraia. (Laulau danu ba itaia.)

⁴ Ita ese Tamada guba ai ladana ta imodaiamu neganai ia na e moalemu. (Sal. 119:108) Dia ḡoevadae tauda na baita moale totona ta uramu haida ese bae hanamoda. To Iehova na dia unu bamona. Mani ina haheitalai a laloa. Kekeni maraḡina ta na tamana aiona ai baine hegagiu bona baine gwa: “Tamagu, ina tanobada ai ta dia oi heḡereḡeremu!” Tamana na iena hereva bona kara daidiai e moalemu. Dahaka dainai? Una tama be e uramu natuna ese baine hanamoa dainai e moalemu, a? Lasi, to ia na natuna e lalokau heniamu bona natuna na sibona ena ura ai ena tenkiu bona lalokau e hahedinaraiamu dainai, ia na e moalemu. Ia na e dibamu kekeni na e tubu daemu lalonai unu kara be hahedinaraimu neganai be moalemu. Una heḡereḡerena Tamada hereadaena Iehova ta imodaiamu neganai, ia na e moalemu.

5. Dirava ladana ta imodaiamu neganai edena hereva ta hakoikoiamu?

⁵ Ita ta ta ese Tamada guba ai ta hanamoamu neganai, Satana ese ita latadai e gwaurai herevadia ta hakoikoimu. Satana na e gwaumu ta ese Dirava gwauna na basine hadae diba. Danu, e gwaumu ta ese Dirava na basine badinaia diba. Ia na e gwaumu, ita iboudai na Dirava baita muriamu, badina ia ibadinana kara amo namo ta asita davariamu. (Iobu 1:​9-11; 2:4) To abidadama tauna Iobu na dounu Dirava e badinaia, unu amo e hahedinaraia Satana ena hereva na koikoi. Oi danu Dirava bo badinaiamu, a? Namona na ita ta ta ese Tamada ladana baita imodaia bona hanaihanai ia baita badinaia, unu amo ia baita hamoalea. (Her. 27:11) Una na iseda hahenamo badana.

6. Edena dala ai King David bona Levi taudia baita tohotohodia? (Nehemia 9:5)

⁶ Dirava e lalokau heniamu abidadama taudia na mai kudoudia ibounai ida ia ladana e imodaiamu. King David na e gwa: “Iehova [baina] hanamoa; lalogu idoinai, ia ladana helaḡana [baina] hanamoa.” (Sal. 103:1) David na e laloparara Iehova ladana ta imodaiamu anina na Iehova ta hanamoamu. Iehova ladana ta kamonaiamu neganai, ena kara hereadaedia bona taunimanima daidiai e kara ḡaudia ta lalomu. David na e ura Tamana ladana  helaḡana baine imodaia. Bona una na mai ‘kudouna idoinai’ ida e karaia. Levi taudia danu Iehova e imodaia. Idia na mai manaudia ida unu e kara toma, badina e laloparara Iehova ladana helaḡana ese heimodai iboudiai e hereadia. (Nehemia 9:5 ba duahia.) Oibe mai manaudia bona kudoudia ibounai ida Iehova e hanamoa karana ese ia na e hamoalea.

7. Eda hesiai ḡaukara bona dina ta ta maurina ai Iehova be ede baita imodaia toma?

⁷ Hari ina negai, haida ediai Iehova ta herevalaiamu neganai, namona na bae itaia, ita ese Iehova na ta lalokau heniamu bona ena kara namodia na ta lalodia badamu. Iseda hesiai ḡaukara lalonai, ita na ta uramu taunimanima baita durudia Iehova turana ai baela. Bona bae abia dae Iehova na Tama lalokauna. (Iak. 4:8) Namona na mai moaleda ida Baibul amo Iehova ena lalokau, hahemaoro maoromaoro, aonega, siahu bona ena kara ma haida na taunimanima baita hadibalaidia. Iehova baita imodaia bona baita hamoalea dalana ma ta na ia baita tohotohoa. (Efe. 5:1) Unu amo taunimanima na be dibamu, ina tanobada dikana amo ita na idau, bona be uramu badina bae diba. (Mat. 5:​14-16) Dina ta ta ai taunimanima ida ta herevaherevamu bona ta ḡaukara heboumu neganai, unu badi baita herevalai. Bena kudou maoro taudia na be uramu Dirava bae dibaia. Unu amo Iehova baita imodaiamu bona ia baita hamoaleamu.—1 Tim. 2:​3, 4.

IEHOVA LADANA TA IMODAIAMU NEGANAI IESU NA E MOALEMU

8. Dahaka dainai Iehova i’imodaina karana ai Iesu na haheitalai namona?

⁸ Guba bona tanobada ai, ta na Tamada asi dibana namonamo, to Natuna Iesu mo. (Mat. 11:27) Iesu ese Tamana e lalokau heniamu, bona hanaihanai e imodaiamu. (Ioa. 14:31) Ia do se mase hanuaboinai, tanobada ai ia ese e haḡuḡurua ḡaukarana na Tamana e hamaorolaia, eto: “Oi ladamu danu vada na hadibalaidia.” (Ioa. 17:26) Iesu be edena dala ai unu e kara toma?

9. Iesu be edena parabole amo Tamana ena kara e gwauraia hedinarai ḡoevaḡoeva?

⁹ Iesu ese taunimanima e hadibadia Dirava ladana na Iehova, bona una lada anina danu e hahedinaraia. Iuda taudia na Dirava ladana mai dibadia, una dainai Iesu ese Dirava ena kara ‘e gwaurai hedinarai.’ (Ioa. 1:​17, 18) Heḡereḡere, Heberu Revarevadia ese e hahedinaraiamu, Iehova na hebogahisi Diravana. (Eso. 34:​5-7) Iesu ese boio merona bona tamana parabolena amo Iehova ena hebogahisi karana e hahedinaraia ḡoevaḡoeva. Una parabole ai, boio merona na “dauhai tamana ese e mataia davari,” bena tamana na e heau lao mero aionai e hegagiu dae, bona mai kudouna ibounai ida ena dika e gwauatao. Una tama ena kara amo Iehova ena hebogahisi ta dibaiamu. (Luka 15:​11-32) Oibe, Iesu ese Tamana ena kara na e herevalai ḡoevaḡoeva.

10. (a) Ede ta diba tomamu Iesu ese Tamana ladana na e ḡaukaralaia bona e ura ma haida na unu bae kara toma? (Mareko 5:19) (Laulau danu ba itaia.) (b) Hari Iesu be e uramu ita be dahaka baita kara?

¹⁰ Iesu e ura ma haida danu ia Tamana ladana bae ḡaukaralaia, a? Oibe. Iesu ena negai, tomadiho igunalaidia taudia haida na e laloava Dirava ladana na helaḡa herea dainai bae ḡaukaralaia na taravatu. To una taravatu ese Iesu na se koua Tamana ladana baine ḡaukaralaia. Gerasa taudia edia gabu ai, demoni ese e boloa tauna ta na Iesu ese e hanamoa negana a laloa. Unuseniai e nohova taudia na e gariva dainai Iesu e noia baine raka oho. Una dainai Iesu na una gabu e rakatania. (Mar. 5:​16, 17) To, ia na e urava una gabu taudia ese Dirava ladana na bae dibaia.  Una dainai, e hanamoa tauna e hamaoroa Iehova ese ia dainai e karaia ḡauna na taunimanima baine hadibalaidia. (Mareko 5:19 ba duahia.) a Hari ina negai danu ia na e uramu ita ese ia Tamana ladana na tanobada ibounai lalonai baita herevalaia! (Mat. 24:14; 28:​19, 20) Unu baita kara tomamu neganai, eda King Iesu baita hamoaleamu.

11. Iesu ese ena hahediba e hadibadia dahaka bae ḡuriḡurilaia, bona dahaka dainai una na mai anina bada? (Esekiel 36:23)

¹¹ Iesu na mai dibana Iehova ena ura na ladana baine hahelaḡaia, anina na ladana e hadikaiamu herevadia iboudiai baine hamaoromaorodia. Una dainai ia ese ena hahediba e hamaorodia ini bae ḡuriḡuri toma: “Tamamai e, guba ai o nohomu, Oi ladamu baia hahelaḡaia.” (Mat. 6:9) Iesu na e laloparara una na mai anina bada aneru bona taunimanima iboudiai ediai. (Esekiel 36:23 ba duahia.) Iunives ibounai lalonai Iehova ladana e hahelaḡaia ḡoevaḡoeva tauna na Iesu. To inaina ese ia e arestia neganai, idia na e gwa Iesu na Tamana ladana e hadikaia! To ia enai, ta ese Tamana ladana baine hadikaia na kara dika rohorohona. Una dainai, ia do se arestia neganai, ia ese e lalo-hekwarahilaia bada herea ḡauna badana na una.—Luka 22:​41-44.

12. Edena dala ai Iesu ese Tamana ladana e hahelaḡaia ḡoevaḡoeva?

¹² Iesu na Tamana ladana baine hahelaḡaia helaoreana, ia na haheisi, hegwau heni, bona latanai e gwaurai koikoi herevadia iboudiai e haheaukalai. Ia na e diba ḡau iboudiai lalodiai ia ese Tamana na e badinaia ḡoevaḡoeva, una dainai baine hemarai na asi badina. (Heb. 12:2) Danu, ia na e diba, una nega aukana lalonai, Satana ese ia na e tohoava. (Luka 22:​2-4; 23:​33, 34) Momokani, Satana na e urava Iesu ese Iehova baine rakatania, to ia na se kwalimu. Oibe, Iesu ese e hahedinaraia ḡoevaḡoeva Satana na koikoi tauna bona Iehova e badinaiamu taudia na hahetoho auka hereadia lalodiai Iehova na be badinaiamu.

13. Edena dala ai emu King ba hamoalea?

¹³ Oi o uramu emu King ba hamoalea, a? Namona na hanaihanai Iehova ladana ba imodaia bona ma haida ba durudia ia bae dibaia.  Unu bo kara tomamu neganai, oi na Iesu o tohotohoamu. (1 Pet. 2:21) Iesu heḡereḡerena, oi ese Iehova o hamoaleamu bona o hahedinaraiamu Ia inaina Satana na koikoi tauna.

IEHOVA LADANA TA IMODAIAMU NEGANAI TAUNIMANIMA TA DURUDIAMU BAE MAURI HANAIHANAI

14-15. Taunimanima ediai Iehova ta herevalaiamu neganai, dahaka ḡau namodia e varamu?

¹⁴ Iehova ladana ta imodaiamu neganai, taunimanima ta durudiamu bae mauri totona. Edena dala ai? Satana ese “asi edia abidadama taudia lalodia vada e hadiburadia.” (2 Kor. 4:4) Una dainai, ini koikoi herevadia na e abi daemu: Dirava na lasi, Dirava na daudau bona ia ese taunimanima na se lalodiamu, bona kara dika taudia na e hahisidia hanaihanaimu. Unu koikoi herevadia na Satana ese e ḡaukaralaimu, Iehova ladana baine hadikaia, unu amo taunimanima na Iehova basie hakahikahia. To iseda haroro ḡaukara amo Satana ena hereva ta hakoikoidiamu. Tamada sivaraina momokanina na taunimanima ta hadibalaidiamu neganai, ia ladana helaḡana ta hanamoamu. Bona dahaka e varamu?

¹⁵ Dirava ena Hereva momokani na mai siahuna. Taunimanima ta durudiamu Iehova ena kara korikori e dibamu neganai, ḡau namodia e varamu. Taunimanima na e lalopararamu Satana ena hereva na koikoi bona e dibamu, Tamada lalokauna ena kara na nanamo heherea. Bona idia na e hoamu badina iena siahu na asi hetoana. (Isa. 40:26) Idia na e moalemu badina Ia na hahemaoro ḡoevaḡoeva Diravana. (Deu. 32:4) Iena aonega na dobu herea dainai, idia na ḡau momo e dibamu. (Isa. 55:9; Roma 11:33) Bona e dibamu Iehova na lalokau Diravana dainai una ese e hagoadadiamu. (1 Ioa. 4:8) Iehova e dibaiamu lalonai, e abia daemu, mauri hanaihanai helarona na momokani. Taunimanima ta durudiamu Iehova bae hakahikahia na hahenamo badana! Bema unu baita kara tomamu, Iehova na be moalemu badina ita na ia ida ta “ḡaukara heboumu.”—1 Kor. 3:​5, 9.

16. Haida na Dirava ladana e diba neganai, dahaka e vara?

¹⁶ Taunimanima ta na Iehova ladana ta hadibaiamu neganai, una ese kudou maoro tauna ena mauri na e haidauamu. Heḡereḡere,  haneulato ta ladana Aaliyah, b na e tubu dae tomadihona ai e hadibaia hahediba herevadia na dia Baibul amo. Una dainai ena tomadiho na se moalelaiava bona e laloava Dirava ena amo ia na daudau. To, ia na Witnes taudia ida e stadi matama neganai, e laloparara Dirava na ia turana ai baine halaoa diba. Bona e hoa badina Baibul momo amo Dirava ladana na haida ese e kokia bona gabunai na dagi ladadia, heḡereḡere Lohiabada e atoa. Iehova ladana e dibaia neganai, guna e abiava lalohadaina na e haidaua. Ia na e gwa: “Lau Turagu namona na mai ladana!” Ma e gwa: “Hari lau na na moalemu. Una na hahenamo ta.” Tau ta ladana Steve na miusik tauna bona Iuda tomadihona e badinaiava tauna ta. Ia na se urava tomadiho oreana ma ta ai baine vareai badina tomadiho lalodiai koikoi bada herea e itava. To, sinana e mase murinai Iehova ena Witnes taudia ese e stadi heniava tauna ta ena stadi ai e helai vareai. Dirava ladana e dibaia neganai, e moale bada herea. Ia na e gwa: “Guna, lau na asi dibagu Dirava ladana be daika.” Ma e gwa: “Egu nega ginigunana na laloparara Dirava na momokani e nohomu bona ia na mai ena kara namodia. Una negai na diba lau na Turagu namona ta vada na davaria.”

17. Dahaka dainai oi na o uramu Iehova ladana ba imodaia? (Laulau danu ba itaia.)

¹⁷ Emu haroro bona hahediba ḡaukaradia ai, oi ese Iehova ladana helaḡana be taunimanima o hadibalaidiamu, a? O durudiamu Dirava ena kara bae diba, a? Unu o kara tomamu neganai, oi na Iehova ladana o imodaiamu bona taunimanima o durudiamu bae mauri hanaihanai. Danu, o hahedinaraiamu oi na Iesu Keriso emu King o badinaiamu. Hereadaena be Tamamu lalokauna, Iehova, o hamoaleamu. Oibe, namona na Iehova ‘ladana ba imodaia ela bona hanaihanai.’—Sal. 145:2.