1. Idaunega amo ema bona hari, Iehova e tomadiho heniamu taudia be ia dainai dahaka e kara?

 OI ESE Iehova o lalokau henia badamu, a? A dibamu haerena na oibe! Idaunega amo ema bona hari momo na oi heḡereḡeremu Iehova e lalokau heniamu. (Sal. 104:​33, 34) Bona idia momo na ḡau haida e dadarai Iehova bae tomadiho henia. Idaunega Israel ai Nasiri taudia na unu e kara toma. Idia be daidia? Edia haheitalai amo dahaka ta dibamu?

2. (a) Nasiri taudia be daidia? (Numera 6:​1, 2) (b) Dahaka dainai Israel taudia haida na Nasiri gwauhamatana e karaia?

² Ina hereva “Nasiri” na Heberu herevana ta amo e abia, anina na “E Abia Hidi,” “E Gwauhamatalaia,” bona “E Hahelaḡaia.” Una hereva Nasiri na Israel taudia haida e herevalaidia, idia na mai edia ura ida ḡau haida e dadaraidia Iehova ena hesiai ḡaukara helaḡana bae karaia totona. Mose ena Taravatu henunai tau ta o hahine ta na Iehova baine gwauhamata henia diba Nasiri tauna ai bainela. Bona ede daudauna una gwauhamata baine badinaia na ia sibona ese baine abia hidi. a (Numera 6:​1, 2 ba duahidia.) Una gwauhamata dainai ia na taravatu haida baine badina. Dahaka dainai una Israel tauna na Nasiri gwauhamatana baine karaia? Badina una Israel  tauna na Iehova e lalokau henia bada bona Iena hahenamo e moalelai dainai una gwauhamata e karaia.—Deu. 6:5; 16:17.

3. Edena dala ai hari Dirava ena taunimanima na Nasiri taudia heḡereḡeredia?

³ “Keriso ena taravatu” ese Mose ena taravatu gabuna e abia neganai, una Nasiri gwauhamata na e ore. (Gal. 6:​2, NWT; Roma 10:4) To Nasiri taudia heḡereḡeredia, hari Iehova ena taunimanima na mai lalodia, mai daradia, bona mai goadadia idoinai ia e hesiai heniamu. (Mar. 12:30) Ita na mai eda ura ida eda mauri na Iehova enai ta gwauhamatalaiamu neganai unu ta kara tomamu. Una gwauhamata baita badinaia totona namona na ḡau haida baita dadarai bena Iehova ena ura baita karaia. Ita na Nasiri taudia ese edia gwauhamata e badinaia dalana baita stadilaiamu, unu amo iseda gwauhamata baita badinaia daladia baita dibamu. b (Mat. 16:24) Mani haheitalai haida aita herevalaidia.

MAI EMU URA IDA ḠAU HAIDA BA DADARAI

4. Numera 6:​3, 4 ena hereva heḡereḡerena, Nasiri taudia be dahaka e dadarai?

⁴ Numera 6:​3, 4 ba duahidia. Nasiri taudia na vine huahuana basie ania bona ranuna basie inua. A Israel taudia ma haida be hanaihanai unu aniani e moalelaiva, bona unu na bae moalelai ḡaudia. Baibul na e gwaumu, “vine ranuna, taunimanima lalodia ihamoaledia,” na harihari ḡauna Dirava amo. (Sal. 104:​14, 15) To, Nasiri taudia na mai edia ura ida unu ḡau e dadarai. c

5. Madián bona Marcela be dahaka abi hidi e kara, bona dahaka dainai?

⁵ Nasiri taudia heḡereḡeredia, ita danu ḡau haida baita dadarai Iehova ena hesiai ḡaukara ma haida baita kara totona. Mani Madián bona Marcela edia ekspiriens aita laloa. d Madián na moni ḡaukara namona ta e karaiava dainai, idia na tauani dalanai se dabuva bona ruma badana ta ai e nohova. To idia na e urava Iehova ena hesiai ḡaukara ma haida bae kara. Una dainai edia mauri ai ḡau haida e dadarai. Idia na e gwa, “Guna a hoiva ḡaudia na asia hoiva, unu amo emai moni baia seivi. Ruma maraḡina ta ai a noho bona emai motuka a hoihoilaia.” Una na Madián bona  Marcela ese e karaia abi hidina, badina idia na e ura edia hesiai ḡaukara bae habadaia. Idia na edia abi hidi daidiai e moalemu.

6. Dahaka dainai Kristen taudia ese ḡau haida e dadaraimu? (Laulau danu ba itaia.)

⁶ Hari ina negai, Kristen taudia na mai edia ura ida ḡau haida e dadaraimu unu amo idia na mai edia nega, Iehova ena hesiai ḡaukara ma haida bae kara. (1 Kor. 9:​3-6) Ena be Iehova ese ita na se doridamu ḡau haida baita dadarai, to ia dainai ta dadaraimu ḡaudia haida na ḡaukara namona ta eiava ruma namona ta. Danu, singul taudia haida be lalodia e hadaimu do basie headava, bona headava taudia haida be lalodia e hadaimu natu na do basie havara. Haida be edia bese bona turadia e rakatanidiamu, unu amo pablisa dia momo gabudia baela, unuseniai bae haroro totona. Ita momo na mai eda ura ida abi hidi unu bamodia ta karamu, badina ta uramu Iehova baita hesiai henia mai moaleda ida. Namona na ba diba, Iehova dainai o karamu abi hididia na ia ese e lalodia badamu.—Heb. 6:10.

MAI EDA URA IDA TANOBADA TAUDIA AMO BAITA IDAU

7. Dahaka dainai Nasiri tauna ta ese ena gwauhamata baine badinaia na auka? (Numera 6:5) (Laulau danu ba itaia.)

⁷ Numera 6:5 ba duahia. Nasiri taudia na huidia basie utu. Una toa amo taunimanima na e dibava idia na Iehova ena. Bema Nasiri tauna ta na nega daudau lalonai huina basine utuamu, Israel taudia na be dibamu, ia be daika. Bema ia bamona eiava varavarana ese ena Nasiri gwauhamata be matauraiamu, idia ese ia na be duruamu ena gwauhamata baine badinaia. To Israel taudia haida na unu asie kara toma. Peroveta tauna Amos ena negai, Israel aposteit taudia ese Nasiri taudia na “vine ranuna” e henidiava bona e doridiava bae inu, unu amo edia gwauhamata basie badinaia. (Amos 2:12) Una dainai, Nasiri taudia ese edia gwauhamata bae badinaia bona bae gini siri totona, bae lalo goada na ḡau badana.

8. Benjamin ena haheitalai ese oi be ede e durumu tomamu?

⁸ Ita iboudai danu Iehova ena heduru amo baita gini goada diba, ena be ita haida na hemarai tauda eiava nega haida ta garimu. Norway ai e nohomu Witnes merona ta ladana Benjamin ena haheitalai aita laloa. Ia laḡanina na 10, bona ia e skulimu gabunai, momo na e urava Ukraine ai e varava tuarina bae durua. Maraḡidia na e noidia Ukraine ena flag kalana dabuadia bae kara bona ane ta bae abia. To Benjamin na e plani unu kara lalodiai basine vareai dainai, ia na daudauna ai e gini. Tisa ta ese e itaia bena e boi henia eto: “Harihari aoma ai ame bamomai. Ai na oi a narimumu!”  Benjamin na asi garina ida tisa dekena ela bena e gwa: “Lau na politikol karana ta ai asina vareaimu. Iehova ena Witnes taudia momo na dibura ai e atodiamu badina se uramu tuari ai bae vareai.” Tisa ese Benjamin ena hereva e abia dae bona e hamaoroa unu kara lalodiai na basine vareai. Una murinai, ena klas taudia ese e nanadaia, ‘Dahaka dainai so bamomai?’ Benjamin na e gari dainai kahirakahira e tai, to mai lalo goadana ida klas taudia ediai, tisa enai e gwaurai herevadia na e gwaurai lou. Gabeai, Benjamin ese tamana sinana e hamaorodia ia na Iehova ena heduru amo ena abidadama e herevalaia.

9. Edena dala ai Iehova lalona baita hamoalea?

⁹ Ita na Iehova ena ura ta badinaiamu dainai, tanobada taudia edia amo ta idaumu. Namona na baita lalo goada unu amo ḡaukara gabudiai eiava sikuli gabudiai taunimanima na bae diba, ita na Iehova ena Witnes taudia. Ina tanobada taudia edia kara na e dika e laomu dainai, nega haida be aukamu ita ese Baibul ena hahekau herevadia baita badina bona sivarai namona baita harorolaia. (2 Tim. 1:8; 3:13) To hanaihanai baita helalotao, ita ese Iehova ‘lalona na baita hamoaleamu,’ bema mai lalo goadada ida Dirava asie hesiai heniamu taudia amo baita idaumu.—Her. 27:11; Mal. 3:18.

EMU MAURI AI IEHOVA BAVATOA GUNA

10. Edena negai Nasiri tauna ese Numera 6:​6, 7 ena hereva baine badinaia na auka?

¹⁰ Numera 6:​6, 7 ba duahidia. Nasiri taudia na e mase tauna ta badibadina basiela. Matamanai reana ta na be laloamu una na dia ḡau badana. To Baibul negadiai, Nasiri tauna ta enai una na reana auka baine badinaia bema e mase tauna na ia varavarana ta. Una nega taudia edia kastom ai taunimanima na mase tauna badinai bae noho. (Ioa. 19:​39, 40; Apos. 9:​36-40) Nasiri tauna ta na ena gwauhamata dainai ia ese una kastom na basine badinaia. Anina na, bema ena bese ai ta na baine mase, abidadama goadana ese ia na be duruamu ena gwauhamata baine badinaia. Momokani, Iehova ese idia na e durudia una nega aukana e haheaukalaia.

11. Kristen tauna ena ruma bese lalonai bae vara ḡaudia daidiai abi hidi e karamu neganai, ia be dahaka baine kara? (Laulau danu ba itaia.)

¹¹ Ita Kristen taudia ese eda gwauhamata Iehova enai na ta laloa badamu. Una dainai, eda abi hidi bona kara haida na ruma bese taudia ese basie moalelaimu. Baibul ena  hereva heḡereḡerena ita na ruma bese madunadia ta huadiamu, to idia edia ura basita ato guna, a Iehova ena ura hari baita atoa guna. (Mat. 10:​35-37; 1 Tim. 5:8) Bona Iehova baita hamoalea totona, nega haida ita ese ta karamu abi hididia daidiai varavara na basie moalemu.

12. Alexandru na ena ruma bese lalonai e vara ḡauna dainai ia be dahaka e kara?

¹² Mani Alexandru bona adavana Dorina edia sivarai aita laloa. Idia na laḡani ta Baibul e stadilaia murinai, Dorina na e urava ena Baibul stadi baine hadokoa, bona e urava adavana danu unu baine kara toma. To, Alexandru na mai manauna ida e hamaoroa ia na dounu baine stadi. Una neganai, Dorina na se moale to dounu Alexandru na e fosiava basine stadi. Alexandru na e urava baine laloparara dahaka dainai Dorina na unu e kara tomava, to enai na e auka. Bona nega haida Dorina ena hegwau heni herevadia daidiai ia na e urava ena stadi baine hadokoa. To dounu Alexandru na Iehova e atoa guna bona adavana e lalokau heniava bona e matauraiava. Gabeai, Alexandru ena haheitalai namona ese Dorina e durua ena Baibul stadi e hamatamaia lou, bena dokonai e bapatiso.—Baola jw.org bona ina kaha “Truth Transforms Lives” ai ina vidio Alexandru bona Dorina Văcar: “Lalokau Na E Haheauka Taritarimu; . . . mai Ena Heabi-dae” ba itaia.

13. Edena dala ai Iehova bona eda ruma bese baita lalokau henidia?

¹³ Iehova ese ruma bese e haginia bona ia na e uramu ruma bese iboudiai na bae moale. (Efe. 3:​14, 15) Una dainai bema ita na ta uramu baita moale, namona na Iehova ena dala baita badinadia. Namona na ba diba Iehova ese emu hekwarahi ia itomadiho henina karadia ai na e lalo badamu, bona mai lalokaumu ida emu bese o naridiamu bona o matauraidiamu dainai ia na e moalemu.—Roma 12:10.

HAIDA BAITA DURUDIA NASIRI TAUDIA BAE TOHOTOHODIA

14. Daidia baita hagoadadia?

¹⁴ Hari ina negai, Iehova e tomadiho heniamu taudia iboudiai na ia e lalokau heniamu dainai mai edia ura ida ḡau haida e dadaraimu. To, nega haida una bae kara toma na auka. Edena dala ai baita durudia? Eda hereva amo baita hagoadadia. (Iobu 16:5) Emu kongrigeisin ai, haida be e uramu ḡau haida bae dadarai tiokratik ḡaukaradia ma haida bae kara totona, a? Matamata taudia haida mai dibamu, a? Idia na sikuli ai mai edia lalo goada ida ḡau haida e dadaraimu, ena be nega  haida unu bae kara toma na auka. Eda Baibul stadi bona tadikaka taihu be ede bamona? Idia danu e hekwarahimu Iehova bae badinaia, badina edia bese ese e inai henidiamu. Namona na ba hadibadia, oi ese idia edia lalo goada karana bona Iehova dainai e karamu ḡaudia na o lalo badamu.—File. 4, 5, 7.

15. Haida ese fultaim hesiai ḡaukara e karamu taudia be ede e durudia toma?

¹⁵ Nega haida, ita na ḡau haida baita kara diba fultaim hesiai ḡaukara e karaiamu tadikaka taihu baita durudia totona. (Her. 19:17; Heb. 13:16) Sri Lanka ai taihu burukana ta na unu e kara toma. Iena pension monina e bada neganai, e ura painia taihu rua baine durudia, unu amo moni hekwakwanaina negana lalonai dounu bae painia. Una dainai, ia ese hua ta ta ai taihu edia telefon davana e heniva. Una taihu burukana ena kara na namo herea!

16. Idaunegai Nasiri taudia edia amo dahaka ta dibamu?

¹⁶ Idaunegai Nasiri taudia edia haheitalai namona amo ḡau momo ta dibamu! Una ese danu Tamada Iehova enai ḡau haida e hadibadamu. Heḡereḡere, ia na e dibamu ita na mai momokanida ida ta uramu ia baita hamoalea bona ḡau haida ta dadaraimu eda gwauhamata baita haḡuḡurua. Bona e laloda badamu dainai dala e kehoamu ta ta eda lalokau ia enai baita hahedinaraia. (Her. 23:​15, 16; Mar. 10:​28-30; 1 Ioa. 4:19) Nasiri taudia sivaraidia ese e hahedinaraiamu Iehova dainai ta karamu ḡaudia na ia ese e lalodia badamu. Una dainai, namona na laloda baita hadai mai eda ura ida Iehova baita hesiai henia hanaihanai.