Baibul ese e hahedinaraiamu Iehova na vairai bae vara ḡaudia baine gwaurai diba. (Isa. 45:21) To ede baine karaia toma bona edena negai baine karaia sivaraidia iboudiai na se herevalai, bona vairai bae vara ḡaudia haida mo e abidia hidimu baine dibadia. Mani, Iehova ena kara haida aita herevalai.

Iehova e uramu baine kara ḡaudia na asi hetoadia, to ia sibona ese hetoadia e atomu. Iena aonega na asi hetoana dainai ḡau idauidau baine perovetalai diba. (Roma 11:33) Ia na sibona ena ura e biagu ḡoevaḡoevamu dainai, hetoa e atomu dahaka be baine kara dahaka be basine kara.—Isaia 42:14 ida ba haheḡereḡerea.

Iehova e uramu baine karaia ḡauna na e haḡuḡuruamu. Edena dala ai una ese e durudamu baita laloparara ia na heḡereḡere, vairai bae vara ḡaudia baine gwaurai? Isaia 46:10 na e gwaumu: “Matamana negana ai dokona na gwauraia, bona nega gunadia ai do asie vara ḡaudia na gwaurai guna; nato ‘Egu hahealo baine mia, bona egu lalo-hadai idoinai baina haḡuḡurua.’”

Iehova na vairai bae vara ḡaudia baine gwaurai diba badina ia na mai ena siahu e gwauraiamu ḡauna baine haḡuḡurua. Haheitalai na, ita na muvi dokona baita dibaia totona, ita na baita fast fouediamu. To Iehova be dia unu bamona. Ia ese negana e gwauraiamu bena negana e kaumu neganai, e gwauraia ḡauna na e haḡuḡuruamu.—Eso. 9:​5, 6; Mat. 24:36; Apos. 17:31.

Una dainai Baibul ai ini hereva ruaosi “heḡaeḡaelaia” bona “laloa hata” e ḡaukaralaidia, Iehova ese vairai baine kara ḡaudia bae hahedinarai totona. (2 Han. 19:25; Isa. 46:11) Unu hereva na Heberu herevana ta amo e hahanaia bona ina hereva “uro ikarana tauna” ida anidia na tamona. (Ier. 18:4) Uro ikarana tauna ese raro amo uro mai hairaina ta e karaiamu heḡereḡerena, Iehova ese ḡau idauidau baine kara diba ena ura baine haḡuḡurua totona.—Efe. 1:11.

Iehova ese taunimanima edia abi hidi na e matauraimu. Ia na ita ta ta eda mauri ai baine vara ḡauna na se gwauraia hidi, bona taunimanima namodiai ediai e varamu ḡau dikadia na dia iena kerere. Ena be siboda ese abi hidi baita kara diba, to ia na ita e hagoadadamu abi hidi maorona baita karaia.

Mani haheitalai rua aita lalodia. Ginigunana na Nineve taudia. Iehova na e peroveta Nineve hanuana na baine hadikaia, badina edia kara dika na e bada herea. To idia e helalokerehai neganai, Iehova “ese baine hadikadikalaidia eto karana amo e helalokerehai, bena se karaia.” (Iona 3:​1-10) Iehova ese lalona e haidaua badina e itaia Nineve taudia na mai lalodia idoinai ida iena hereva e badinaia.

Haheitalai iharuana na Kurese. Ia e perovetalaia herevana na, ia ese Iuda taudia baine ruhadia bona Iehova ena dubu helaḡa bae haginia lou herevana baine halasia. (Isa. 44:26–45:4) Una na Parasa edia King, Kurese, ese e haḡuḡurua. (Esera 1:​1-4) Ena be Kurese na Dirava momokanina, Iehova, se tomadiho heniava to ia ese e ḡaukaralaia una peroveta herevana baine haḡuḡurua. Una ese e hahedinaraiamu, Iehova ese Kurese ena abi hidi na e matauraia, bona se doria ia baine tomadiho henia.—Her. 21:1.

Iehova na vairai bae vara ḡaudia baine gwaurai totona, ia na ataiai tame herevalai ḡaudia bona ma ḡau haida danu e haerodiamu. Una dainai, ita ta ese Iehova ena lalohadai o hereva na basita lalopararalaidia ḡoevaḡoeva dibamu. (Isa. 55:​8, 9) To, Iehova ena kara ta lalopararalaimu neganai, ta abia daemu, ia e karamu ḡaudia iboudiai, vairai bae vara ḡaudia danu, na hanaihanai mamaoro.