1-2. (a) Dahaka dainai edai na e aukamu ta ena dika baita gwau tao? (b) Edena dala ai Denise na ta ena dika e gwau tao?

 OIEMU ai e aukamu haida edia dika ba gwau tao, a? Ita momo edai na e aukamu unu baita kara toma, bema ta ese ena hereva o kara amo e hahisida badamu. To, ḡau haida baita kara, unu amo basita badu noho badu noho bona dika baita gwau tao. Mani taihu ta ladana, Denise, a ena ekspiriens aita laloa. Ia na ta ena dika e gwau tao ena be enai na e auka. Laḡani 2017 ai, Denise bona ena ruma bese na Iehova ena Witnes taudia edia hedkota matamatana e vadivadia. Bena edia ruma e lou laova neganai, motuka ta ese edia motuka e habampaia. Denise na e mase rea, to matana e kehoa neganai e lalo-parara, natuna na e bero dikadika, a adavana Brian be e mase. Denise na e gwa: “Una nega ai daragu na e doko bona asina diba dahaka baina kara.” Gabeai ia na e kamonai idia e habampadia draivana na asi ena gorere bona ḡau ta ese ena taritari se hadikaia, una dainai lalomaino baine abia totona Iehova e ḡuriḡuri henia.

² Draiva na pulisi ese e abia bona e hamaoroa ia na e ala-ala. Bema kota baine gwa ia na momokani e ala-ala, ia na dibura bainela. To, kota tauna ta ese Denise e hamaoroa iena hereva heḡereḡerena ai una tau bae hahemaoro henia. Denise na e gwa: “Una eksident ai e vara ḡauna iherevalaina egu ai hisihisina na bada, una na vaitani ta ese egu bero gunana e kehoa bena latanai damena e bubu.” Wiki haida muridiai Denise na kota vairanai e helai, ia bona ena famli e hahisidia tauna baine hereva henia totona. Ia be dahaka e gwa? Denise ese diadi e noia una tau baine bogaia hisi. b Denise ena hereva e hadokoa  neganai diadi na e tai. Bona e gwa: “Laḡani 25 diadi ḡaukara na karaia lalonai, ina kota rumana ai nega ta hereva unu bamona asina kamonai. Nega ta asina kamonai asi ena kerere tauna ena famli ese e noigu kerere tauna baina bogaia hisi. Bona iniseniai lalokau bona dika gwau tao herevadia na asina kamonaimu.”

 3. Dahaka dainai Denise na lalona e hadaia una tau ena dika baine gwaua tao?

³ Dahaka dainai Denise na lalona e hadaia una tau ena dika baine gwaua tao? Badina ia na Iehova ese dika e gwau taomu dalana e laloa dobu bona e laloa bada. (Mika 7:18) Ita danu Iehova ese eda dika e gwau taomu dalana baita laloamu neganai baita uramu ma haida edia dika baita gwau tao.

 4. Iehova be e uramu ita be dahaka baita kara? (Efeso 4:32)

⁴ Iehova na e uramu ita ese ma haida edia dika baita gwau tao, ia ese eda dika e gwau taomu na heto. (Efeso 4:32 ba duahia.) Danu ia na e uramu ita na baita noho heḡaeḡae e hahisidamu taudia edia dika baita gwau tao. (Sal. 86:5; Luka 17:4) Ina atikol ai ḡau toi baita herevalaimu, unu ese be durudamu dika baita gwau tao.

EMU HISIHISI NA BASIO LALOA MARAḠI

 5. Hereva Lada-isidia 12:18 heḡereḡerena, ta ese e hahisidamu neganai eda hemami be ede bamona?

⁵ Ta ena hereva o kara dainai baita lalohisihisi badamu bona nega momo unu e vara tomamu bema ia na turada ta o eda bese tauna ta. (Sal. 55:​12-14) Nega haida hisihisina na vaitani ta ese kaia amo e gwadadamu. (Hereva Lada-isidia 12:18 ba duahia.) Reana baita uramu una hisihisi na baita laloa boio o baita laloa maraḡi. To unu ta kara tomamu na vaitani kaia na dounu hegwadana ai ta rakataniamu. Una dainai basita laloa eda hisihisi baita lalodia maraḡimu neganai eda hemami na be namomu.

 6. Ta ese e hahisidamu neganai, dahaka ta karamu?

⁶ Ta ese e hahisidamu neganai, ta badumu. Baibul danu e gwaumu ita na baita badu diba. To danu e sisiba henidamu basita badu noho badu noho. (Sal. 4:4; Efe. 4:26) Dahaka dainai? Badina nega momo eda hemami ese e doridamu kara ta ta karaiamu. Nega momo badu ese ḡau namona ta se havaraiamu. (Iak. 1:20) Bona baita helalotao, e habadudamu neganai, dounu baita badu eiava lasi na ta ta eda abi hidi.

 7. Ta ese e hahisidamu neganai, ededia hemami danu baita abimu?

⁷ Haida ese e hahisidamu negadiai, hemami dikadia ma haida ta abimu. Heḡereḡere, taihu ta ladana Ann ese enai e vara ḡauna na ini e herevalaia toma: “Maraḡigu ai, tamagu ese sinagu e rakatania bona e nariguva hahinena e adavaia. Na mamiava lau na sibogu. Bona natudia e havara neganai, na laloa idia ese gabugu e abia. Na tubu daeva lalonai, na hemamiva ta ese lau na se ura heniguva.” Taihu ta ladana Georgette na adavana ese e rakatania neganai, e abia hemamina na ini e gwauraia toma. “Maraḡimai negana amo ai na tura namodia. Bona a painia hebouva. Ia ese kudougu na e hamakohia.” Ma taihu ta ladana, Naomi be e gwa: “Asina laloa adavagu ese baine hahisigu bada. Una dainai ia ese e hamaorogu, ia na hehuni ai ponografi laulaudia e itava neganai, na hemami ia na lau e koiguva bona se lalokau heniguva.

 8. (a) Ededia badi daidiai haida edia dika baita gwau tao? (b) Dika baita gwau tao ena namo be dahaka? (Ina maua ba itaia, “ Dahaka Baita Kara Bema Ta ese E Hahisida Bada?”)

 ⁸ Haida edia hereva eiava kara na basita biagudia dibamu, to ta kara henidiamu dalana hari baita biagua diba. Bona baita kara henida dalana namona na edia dika baita gwau tao. Dahaka dainai? Badina ita ese Iehova ta lalokau heniamu bona ia na e uramu haida edia dika baita gwau tao. To, bema dika basita gwau taomu bona dounu baita badumu, kerere baita karamu bona eda helt baita hadikaiamu. (Her. 14:​17, 29, 30) Taihu Christine enai e vara ḡauna mani aita laloa. Ia na e gwa: “Na badumu eiava na lalo hisihisimu negadiai, nega momo vairagu na huaiamu bona tauani e hadikamu anianidia na animu. Asina mahuta namonamomu bona egu hemami danu asina biagudiamu. Una dainai, adavagu bona ma haida ida emai hetura karana na e dikamu.

 9. Dahaka dainai basita badu noho badu noho?

⁹ Ena be e hahisidamu tauna na se sorimu, to ia ena kara amo ta abia hisihisina na baita hamaraḡia diba. Edena dala ai? Matamanai tame herevalaia taihuna, Georgette, na e gwa: “Nega e daudau murinai egu badu adavagu gunana enai na e ore. Unu amo lalomaino na abia.” Basita badu noho badu nohomu neganai, kudouda na una kara ese basine hadikaiamu. Danu, eda mauri na ma baita moalelaiamu. (Her. 11:17) To dahaka ba kara bema emu ai na auka e hahisimu tauna ena dika ba gwaua tao?

BASIO BADU NOHO BADU NOHO DALANA

10. Dahaka dainai nega taina baita heni eda badu baine ore totona? (Laulau danu ba itadia.)

¹⁰ Edena dala ai eda badu karana baita haorea? Dala ta na nega taina ba heni emu badu baine ore totona. Heḡereḡere, bero badana ta e abia tauna na medikol heduruna be abiamu murinai, nega taina do be daudaumu bena ena bero na be namomu. Una heḡereḡerena, ita danu nega taina do be oremu bena eda hemami na be namomu, una murinai e hahisida tauna ena dika na mai kudouda idoinai ida baita gwaua taomu.—Koh. 3:3; 1 Pet. 1:22.

11. Edena dala ai ḡuriḡuri karana ese baine durumu dika ba gwau tao?

 ¹¹ Ba ḡuriḡuri, Iehova ese baine durumu dika ba gwau tao totona. c Matamanai tame herevalaia taihuna, Ann, na ḡuriḡuri karana ese e durua dalana e herevalaia, e gwa: “Iehova na noia emai famili lalonai ta ta emai dika baine gwau tao. Bena tamagu bona adavana matamatana edia revareva ta na torea, bona na hamaorodia edia dika na vada na gwau tao.” Ann na e gwa una baine karaia na auka. To ma e gwa: “Na ura Iehova baina tohotohoa bona edia dika baina gwau tao, unu amo tamagu bona adavana ese Iehova bae dibaia.”

12. Dahaka dainai Iehova baita abidadama henia to dia eda hemami? (Hereva Lada-isidia 3:​5, 6)

¹² Iehova bavabidadama henia, dia emu hemami. (Hereva Lada-isidia 3:​5, 6 ba duahidia.) Iehova na hanaihanai mai dibana ita edai dahaka be namo. (Isa. 55:​8, 9) Bona basine hamaorodamu ihadikada ḡauna ta baita karaia. Una dainai bema e hamaorodamu dika baita gwau tao, namona na baita badinaia, una na iseda namo. (Sal. 40:4; Isa. 48:​17, 18) To bema eda hemami baita abidadama heniamu, dika na basita gwau taomu. (Her. 14:12; Ier. 17:9) Tame herevalaia guna taihuna, Naomi, na e gwa: “Matamanai, na lalova adavagu na ponografi laulaudia e itava dainai ena dika na basina gwau tao. Bona baine hahisigu lou eiava e hahisihisigu karana baine laloa boio garina na gariva. Danu na lalova Iehova ese egu hemami na e lalopararalaia. Gabeai na diba, ena be Iehova ese egu hemami na e lalopararalaia, to egu lalohadai na dia Iehova ena lalohadai heḡereḡerena. Ia na mai dibana na abiva hemamidia be dahaka bona nega taina baine daudau murinai egu badu baine ore, to danu ia na e ura adavagu ena dika na baina gwau tao.” d

LALOHADAI NAMODIA BAVABI

13. Roma 12:​18-21 ai, e hadibadamu dahaka baita kara be namo?

¹³ E hahisida badamu tauna ena dika ta gwau taomu neganai, ta uramu kara namodia  ma haida baita hahedinarai. Bema e hahisida tauna na tadikaka ta o taihu ta, ḡau badana na baita herohemaino. (Mat. 5:​23, 24) Basita badu noho badu noho to baita bogaia hisi bona ena dika baita gwau tao. (Roma 12:​18-21 ba duahidia; 1 Pet. 3:9) Dahaka ese baine duruda unu baita kara toma?

14. Baita hekwarahi dahaka baita kara bona dahaka dainai?

¹⁴ Namona na baita hekwarahi e hahisida tauna na Iehova ese e laloamu dalanai baita laloa. Iehova na taunimanima edia kara namodia e lalomu. (2 Sis. 16:9; Sal. 130:3) Vaia, bema taunimanima edia kerere mo baita lalomu, unu kerere mo baita itamu. To bema haida edia kara namodia baita lalomu, una ese be durudamu edia dika baita gwau taomu. Heḡereḡere, tadikaka ta ladana Jarrod na e gwa: “Tadikaka ta ena dika baina gwaua tao na haraḡa bema ena kara namodia mo na lalomu.”

15. Dahaka dainai ta ba hamaoroa oi ese iena dika o gwaua tao na mai ena namo?

¹⁵ Mai anina bada ḡauna ma ta na, e hahisida tauna baita hamaoroa ena dika na vada ta  gwaua tao. Dahaka dainai? Tame herevalaia taihuna, Naomi ena hereva mani a laloa, ia na e gwa: “Adavagu ese e nanadaigu, ‘Egu dika do gwaua tao, a?’ Udugu na e metau baina gwa ‘emu dika na vada na gwaua tao’. Una neganai na laloparara kudougu idoinai ida iena dika na do asina gwaua tao. To gabeai adavagu na hamaoroa iena dika na vada na gwau tao neganai ia na e tai. Bona na hoa badina raruosi emai hemami na e namo. Una nega amo, ia na ma na abidadama henia bona emai hetura karana na e namo lou.”

16. Dika baita gwau tao karana ai dahaka ome diba?

¹⁶ Iehova na e uramu ita na dika baita gwau tao. (Kol. 3:13) To reana edai na e aukamu ma haida edia dika baita gwau tao. Una na baita karaia dibamu bema e hahisida neganai ta abi hemamidia basita lalodia maraḡimu bona baita hekwarahimu eda badu baita haorea. Unu amo lalohadai namodia baita abimu.—Ina maua ba itaia “ Dika Baita Gwau Tao Daladia Toi.”

DIKA IGWAU TAONA KARANA ENA NAMO BA LALOA

17. Dahaka dainai dika baita gwau tao?

¹⁷ Dika baita gwau tao badidia na momo. Haida bini: Ginigunana, ita na Tama hebogahisina, Iehova, ta hamoaleamu. (Luka 6:36) Iharuana, eda tenkiu karana Iehova enai ta hahedinaraiamu. (Mat. 6:12) Bona ihatoina, eda helt bona ma haida ida eda hetura karana na e namomu.

18-19. Dika baita gwau taomu neganai dahaka baine vara diba?

¹⁸ Haida edia dika baita gwau taomu neganai asita lalomu hahenamodia be varamu. Heḡereḡere, matamanai tame herevalaia taihuna Denise enai e vara ḡauna mani a laloa. Ena be una nega ai ia na se diba eksident e havaraia tauna na e urava kota murinai sibona baine hahemase. To, Denise ese ena dika e gwau tao dainai ia na Iehova ena Witnes taudia ida Baibul e stadilaia matama.

¹⁹ Reana baita laloamu ma ta ena dika baita gwaua tao na auka herea, to baita helalotao dika baita gwau taomu neganai hahenamo baita abimu. (Mat. 5:7) Una dainai, namona na iboudai baita hekwarahi Iehova baita tohotohoa, dika baita gwau tao.