Tamagu bona sinagu na Catholic tomadihona e badinaia goadava taudia. To idia ese Baibul amo Dirava ladana, Iehova, e dibaia neganai, Witnes taudia goadadia ai ela. Una neganai tamagu na au amo Iesu laulauna e karava ḡaukaradia e hadoko. To, ia na kapenta ḡaukara mai dibana dainai emai ruma henuna e haidaua bena Kingdom Hall ginigunana ai e halaoa, San Juan del Monte, Manila ai. Una na Philippines ena kapitol siti.

Lau na 1952 ai na vara, bena laḡani haida muridiai tamagu bona sinagu ese lau kakagu memero foa, bona kekeni toi e stadi henidia heḡereḡerena, lau danu e stadi henigu. Na badava lalonai, tamagu ese e hagoadagu dina ta ta ai Baibul ena karoa ta ta baina duahidia, bona ia ese pablikeisin idauidau amo e stadi heniguva. Nega haida, tamagu bona sinagu ese loaloa naria tadikakadia bona Brens amo e siaidiava tadikakadia e abidia daeva emai ruma ai. Ai na mai moalemai ida, unu tadikaka edia ekspiriens namodia a hakala heniva, bona unu ese e hagoadamai emai mauri ai haroro ḡaukara baia laloa bada.

Tamagu bona sinagu edia haheitalai amo ḡau momo na diba. Idia ese Iehova e badinaia goadava. Sinagu na gorere amo e mase. Una murinai, lau bona tamagu na 1971 ai a painia hebou. To laḡani 1973 ai tamagu e mase, una neganai lau laḡanigu na 20. Tamagu bona sinagu na haboiodia neganai, na mamia lau na ḡau ta lasi bona sibogu. To Baibul ai “se idaumu bona se mareremu” helarona ese e durugu, hemami ai bona lauma dalana ai na gini goada. (Heb. 6:19) Tamagu e mase murinai, se daudau lau ese spesol painia na hamatamaia bona Coron motumotuna ai spesol painia ḡaukarana na karaiava, una na Palawan provins ai.

Coron ai na kau neganai laḡanigu na 21. Lau na taoni ai na bada dainai, unuseni ai paoa lasi, ranu se arudia namonamova, bona motuka danu dia  momo, unu na ita neganai na hoa. Unuseni ai tadikaka na dia momo, bona lau sibogu mo na painiava. Nega haida sibogu na harorova. Hua ginigunana ai egu hemami na dia namo, badina egu femli bona turagu na misidia bada hereava. Hanuaboi ai, na roha isiva hisiu na itadiava neganai, iruru matagu e dihova. Na lalova egu ḡaukara na baina rakatania, bona baina lou egu hanua.

Unu na hemami tomava negadiai, Iehova enai egu hemami bona lalohadai iboudiai na gwaurai hedinaraiva. Bona lau na Baibul bona eda pablikeisin amo na duahiva hahegoada herevadia na lalodia louva. Nega momo Salamo 19:14 na lalogu ai e daeva. Na laloparara Iehova na “egu Nadigini,” bona “Hahemauri Tauna,” ai bainela diba bema lau ese ia e moalelaimu ḡaudia ba lalo dobumu, heḡereḡere, Ia ena ḡaukara bona kara namodia. Watchtower atikol ladana, “You Are Never Alone” a na duahia loulouva, bona una ese lau e durugu. Sibogu na nohova negadiai, na mamiava lau na Iehova ida, bona unu na nega namodia baina ḡuriḡuri, stadi, bona baina laloa dobu.

Coron ai na kau bena se daudau e abigu hidi elda ta ai nala. Unuseniai lau mo sibogu elda dainai, wiki ta ta ai tiokratik Haroro Skuli, Hesiai Hebou, Kongrigeisin Book Study, bona Gima Kohorona Stadi na hakauva. Bona wiki ta ta ai pablik tok na heniva. Unu ḡau ai na bisiva dainai sibogu noho hemamina na asina abiava!

Coron ai haroro ḡaukara amo kamonai taudia momo na davaridia, bona egu Baibul stadi haida na e bapatiso. To baina hekwarahilai ḡaudia ma haida danu. Nega haida, bainala teritori ta totona, dina kahana ta na rakava, na lao heniava gabuna ai na kauva neganai mahuta gabudia na tahuva. Una kongrigeisin ena haroro gabudia momo na motumotu maraḡidia. Nega momo boat amo hurehure badadia lalodiai a heauva, ena be asi nahu dibagu! Unu iboudiai lalodiai, Iehova ese e gimagu bona e durugu. Gabeai, na laloparara unu negadiai Iehova na lau e duruguva, asaimen ma ta ai hekwakwanai badadia baina haheaukalai.

Laḡani 1978 ai, e siaigu Papua New Guinea nala, una na Australia ena not kahana ai. Papua New Guinea na ororo momo gabuna, ena bada na kahirakahira Spain ida heḡereḡere. Na hoa badina na itaia unuseni ai taunimanima 3 milion bamona e nohomu, bona bese idauidau na gado 800 mai kahana e ḡaukaralaimu. Namo be, taunimanima momo na Melanesian Pidgin ai e herevamu, momo ese una gado na e gwauraiamu, Tok Pisin.

Lau na e siaigu Port Moresby English kongrigeisin bainala unuseniai nega sisina baina noho. To gabeai nala Tok Pisin kongrigeisin bona unuseniai Tok Pisin e hadibaguva. Unu amo na diba ḡaudia na haroro ḡaukara ai na ḡaukaralaiva. Una ese lau e durugu gado na dibaia haraḡa. Se daudau, lau na Pablik Tok ta na heni Tok Pisin gado ai. Papua New Guinea ai na kau, bena hua haida muridiai, e abigu hidi Tok Pisin kongrigeisin edia seket tauna ai nala. Una neganai na hoa, badina unu na provins badadia.

Kongrigeisin ta amo kongrigeisin ma ta padadia na daudau, una dainai na heḡaeḡaeva sekit heboudia na gabu ta ta ai baina kara, bona na loaloa momova. Matamanai, na mamia lau na  sibogu badina tano matamatana, unuseniai taunimanima na gado idauidau ai e herevamu, bona edia kastom na idau lauegu amo. Ororo na momo herea bona dala na dia namo dainai, lau na wiki ta ta ai pleini amo na laova kongrigeisin ta ta. Nega haida, una pleini maraḡina na dia namo momokani, bona lau mo sibogu una pleini ai. Una dainai na lalo hekwarahiva, dia bouti ai na guiva heḡereḡerena!

Taunimanima haida mo mai edia telefon, una dainai kongrigeisin ta ta na leta amo baia kara ḡaudia a herevalaiva. Nega haida, egu leta do se kau, lau na kau gunava. Bona unu gabu taudia na nanadaidiava witnes taudia be ede kahai e nohomu. Nega momo tadikaka na davaridiava, idia na mai moaledia bona lalokau ida lau e abigu daeva, na laloa louva egu hekwarahi na mai badina. Iehova ena heduru na dala idauidau ai na mamia, bona egu hetura karana ia ida na e goada.

Bougainville motumotuna ai, egu hebou ginigunana nala neganai, headava taudia rarua na mai moaledia ida lau e hedavari henigu, bena e henanadai, e gwa: “Ai o lalomaitaomu, a?” Lau Port Moresby ai na kau neganai unu headava taudia na hedavari henidia. Lau ese edia Baibul stadi na hamatamaia bona gabeai na heni hanai una gabu tadikakadia ediai. Hari idia na bapatiso tadikaka bona taihu! Laḡani toi Papua New Guinea ai na noho lalonai hahenamo momo na davari bona hahenamo badana ta be una.

Laḡani 1978 ai Coron do asina rakatania neganai, taihu Adel na davaria ia na mai hairaina, bona ḡaukara goada taihuna. Ia na regula painia, bona natuna, Samuel, Shirley, bona sinana burukana e naridiava. May 1981 ai, nala Philippines Adel na adavaia. A headava murinai, ai na a regula painia bona emai femli a nariava.

Ena be mai egu femli, to 1983 ai, spesol painia ḡaukara na hamatamaia lou, bona e siaigu bena egu femli ida ala Linapacan motumotu, una na Palawan provins ai. Unuseniai witnes ta se nohova. Laḡani ta murinai Adel sinana e mase. To, ai ese haroro ḡaukara na a goadalaiava. Una ese e durumai emai hisihisi a haheaukalai. Linapacan ai Baibul stadi momo a hamatama, idia momo na e urava hebou baema. Una dainai Kingdom Hall maraḡina ta a haginia. Laḡani toi muridiai, taunimanima 110 na Memorial hebouna ema. Una a itaia neganai a moale, bona una gabu a rakatania murinai idia momo na e goada bona e bapatiso.

Laḡani 1986 ai, lau na e siaigu Culion motumotuna nala. Una motumotu ai gabu ta na, lepera gorerena e abia taudia e nohova. Una murinai, Adel danu spesol painia e hamatamaia. Matamanai, unu gorere taudia ihereva henidia na a gariva. To unuseniai e nohova pablisa ese e hadibamai una gorere taudia na muramura maorona e abia dainai, una gorere na asi goadana ita edai baine hanai. Unu gorere taudia na taihu ta ena ruma ai Kristen heboudia e abiva. Gabeai idia iharoro henidia na a manada. Bona mai moalemai ida Baibul ena helaro namona ediai a herevalaiava. Guna, e laloava Dirava bona taunimanima ese idia na se lalodia bada. To e moale badina e diba nega  ta be maimu idia na be ḡoevadaemu, una kara a itaia neganai ai danu a moale.—Luka 5:​12, 13.

Culion ai natumai ese edia mauri be ede e haidau toma? Ai ese Coron amo taihu matamatadia rua a boiridia unu amo natumai ese hebamo namona bae moalelaia. Samuel, Shirley, bona taihu matamatadia raruosi na mai moaledia ida haida e durudia hereva momokani bae dibaia. Danu a laloparara dala ma ta ai, ai na ruma bese eleven a stadi henidiava. Se daudau, ai na Iehova e tahua taudia momo ida Baibul a stadilaiava una dainai kongrigeisen matamatana ta a hamatamaia!

Matamanai, una gabu ai lau sibogu mo elda. Una dainai Brens ofesi ese noigu Culion ai unu pablisa daidiai wiki ta ta ena hebou baina hakaua. Marily ai danu pablisa nain daidiai hebou na hakauava, una na hora toi bouti amo a heauva. Hebou muridiai, ai na hora momo lalodiai ororo a rakadia hanai, a laova hanua ta ladana Halsey ai emai Baibul stadi a karava.

Gabeai, a itaia Marily bona Halsey ai taunimanima momo na hereva momokani ai e vareai una dainai Kingdom Hall rua a hagini. Una nega amo Linapacan ai, tadikaka bona kamonai taudia ese Kingdom Hall ihaginidia kohudia momo e henimai bona e durumaiva. Marily ai a haginia rumana na taunimanima 200 bae hebou diba, bona ba habadaia diba, una dainai hebou badadia na unuseni ai bae abi diba.

Laḡani 1993 ai natumai e bada neganai, lau bona Adel na Philippines ai sekit ḡaukara a karaiava. Bena laḡani 2000 ai, Ministerial Training Skul ai na vareai. Unuseni ai instructor sikulina na karaia. Lau na dia heḡereḡere instructor ai bainala, to hanaihanai Adel ese e hagoadaguva. Ia ese e hamaoroguva baina helalotao Iehova ese be durugumu una asaimen matamatana baina haḡuḡurua. (Fili. 4:13) Adel na ena ekspiriens amo e herevava, badina ia ese ena asainmen na e haḡuḡurua ena be mai ena gorere.

Laḡani 2006 ai lau na instructor ta, una negai Adel na Parkinson gorerena e abia. Ai na a daradara! Na noinoi ai emai asainmen baia hadokoa  bona ia baina naria neganai, Adel na e gwa, “Mani emu kara dokta ta ba tahua lau baine durugu, bona na dibamu Iehova ese be durudamu eda asaimen baita haḡuḡurudia.” Laḡani siks lalodiai, Adel na mai haheaukana ida Iehova e hesiai henia. Gorere dainai ena goada na dia heḡereḡere baine raka, to ia na wheelchair amo e harorova. Ena hereva danu e metau, to hebou negadia ai, ia na hereva ta o rua amo e haereva. Tadikaka taihu ediai Adel na haheitalai namona, haheauka karana ai. Una nega amo tadikaka taihu ese hahenamo revarevadia e siai heniava ela bona 2013 ai e mase. Laḡani 30 lalodiai adavagu lalokauna ida hesiai ḡaukara a moalelaia, to hari lalohisihisi bona sibona noho hemamina ma name abia lou.

Adel ese e hagoadagu egu asaimen ai egu ḡaukara baina haḡuḡurua, una dainai unu na kara toma. Lau na hesiai ḡaukara ai na bisiva, una ese e durugu sibona noho hemamina asina abia momo. Laḡani 2014 ela 2017 ai, e siaigu Tagalog ai e herevava kongrigeisendia na vadivadidia, unu na eda haroro ḡaukara e taravatudia tanodia ai. Una murinai, nala Tagalog kongrigeisen, Taiwan, United States, bona Canada ai na vadivadidia. 2019 ai, English gado amo Basileia Evanelia Skulina na hakaua, India bona Thailand ai. Lau na unu asaimen iboudiai amo moale korikorina na davaria. Iehova ena hesiai ḡaukara mai kudougu ibounai na karaia dainai na moalemu.

Asainmen matamatadia na abiva neganai, na hedavari henidiava tadikaka bona taihu ediai, egu lalokau na e badava, una dainai irakatanidia egu ai na e aukava. Unu nega ai, Iehova baina abidadama henia korikori karadia na dibava. Iehova ena heduru na namamia korikori, bona una ese e durugu, egu mauri ai e varamu sensidia na mai kudougu ibounai ida na abidia dae. Hari, Philippines ai, lau na spesol painia ta. Egu kongrigeisen matamatana na moalelaiamu. Idia na egu ruma bese dainai, e durugumu, bona e narigumu. Danu, na itaiamu Samuel bona Shirley ese sinadia ena abidadama e tohotohoamu dainai na moalemu.—3 Ioane 4.

Oibe, Egu mauri ai hekwakwanai momo na davari, danu adavagu lalokauna na gorere dainai e hisihisi ela bona e mase na matagu ai na itaia. Mauri daladia idauidau danu na haheaukalai. Unu iboudiai amo na itaia Iehova bona “ita ta ta padada na dia daudau.” (Apos. 17:27) Iehova imana na “se tunamu”ena hesiai taudia idurudia, bona ihagoadadia ai, ena be ta na sibona idau gabu ai e nohomu. (Isa. 59:1) Egu mauri ibounai lalonai, Iehova, egu Nadi-Gini, na lau ida, bona lau na ia dainai na moalemu. Ema bona hari lau na dia sibogu.