NEGA ta emu ai e vara ḡauna dainai o lalohekwarahi bona o mamia oi na asi idurumu, a? Ita na nega dikadia ai ta nohomu, bona be varamu ḡaudia daidiai baita lalomanokamu bona baita mamiamu ita na asi iduruda. (2 Tim. 3:1) To, hekwakwanai ta davariamu negadiai ita na mai iduruda. Baibul ese e hahedinaraiamu, “dika negadiai” tura korikori ena heduru na mai anina bada.—Her. 17:17.

Paulo ena misinari laolaodia ai turana ese e bamoa bona dala idauidau ai e durua. (Kol. 4:​7-11) Paulo Roma ai e hadiburaia neganai, bema kara ḡaudia haida ia enai na e auka dainai turana ese e durua. Heḡereḡere, Paulo ese e ura heniva ḡaudia haida na, Epafrodito ese Filipi tadikaka taihu edia amo e abi, bena e laohai ia dekena. (Fili. 4:18) Tukiko be Paulo ese e toreva revarevadia na e laohaiva, kongrigeisin ta ta eha henidiava. (Kol. 4:7) Turana edia heduru dainai, Paulo ese kongrigeisin ta ta e hagoadadia, ena be e taravatua ruma amo basine raka lasi, bona dibura ruma ai e atoa. Hari ina negai edena dala ai tura korikorina ai baola?

Hari ina negai e varamu sivaraidia ese tura korikori ena kara e hahedinaraimu. Heḡereḡere Spain ai regula painia ta ladana Elisabet na nega aukadia ai taihu ta ese e durua karana e herevalaia. Sinana kensa gorerena e abia neganai, una taihu ese Baibul ai hahegoada siridia momo na text message amo Elisabet e siai henia. Elisabet na e gwa, “Unu message na ita neganai na mamia ta ese lau na e lalogu badava dainai na moale, bona una ese goada e henigu baina kara diba ḡaudia na kara.”—Her. 18:24.

Eda hetura karana tadikaka bona taihu ida na be goadamu bema idia ida baita haroromu, bona kongrigeisin ḡaukaradia baita kara heboumu. Heḡereḡere, tadikaka o taihu burukana ta na emu motuka amo hebou gabuna ba laohaia eiava ia ida ba haroro hebou. Bema unu bo kara tomamu, edia ekspiriens ese oi na be hagoadamumu, bona idia danu bo hagoadadiamu. (Roma 1:12) To, badi haida daidiai, Kristen taudia haida ese edia ruma na basie rakatani dibamu. Edena dala amo idia baita durudia?

Eda tadikaka taihu haida na gorere o ḡau ma haida daidiai, hebou negadiai Kingdom Hall na basie lao dibamu. Mani David ena haheitalai aita laloa, ia na lymphoma kensa gorerena e haheaukalaiva. Hua siks lalodiai, ia na kensa muramurana e abiava. Unu negadiai, ia adavana Lidia ida na videoconference amo kongrigeisin heboudia e abiva.

Kongrigeisin tadikaka taihu ese idia be ede e hagoadadia toma? Hebou ta ta e oreva muridiai,  Kingdom Hall ai tadikaka haida na dala e karava videoconference amo David bona Lidia e hereva henidiava. Bona haida be David bona Lidia hebou ai e haereva dainai edia hahegoada herevadia na text message amo idia e siai henidiava. Unu kara daidiai David bona Lidia ese tadikaka bona taihu edia lalokau na e mamia korikori.

Namona na dala baita kara ruma ai mo e nohomu tadikaka bona taihu ida baita haroro hebou. Eda sediual ai sensi maraḡidia haida baita kara, bena idia ida baita ḡaukara hebou, unu amo baita hahedinaraia idia na asita lalodia boiomu. (Her. 3:27) Reana nega bavato idia ida revareva ba torea o telefon amo ba haroro hebou. Elda taudia na dala bae kara haroro heboudia na videoconference amo bae abi hebou. David bona Lidia ese una dala na e moalelai. David na e gwa, “Haroro grup ai e gwauraiamu hereva kwadoḡina, bona ḡuriḡuri ese ai na e hagoadamai.” Bema tadikaka taihu ediai na heḡereḡere, edia Baibul stadi bae laohai, ruma ai mo e nohomu taudia ida bae karaia hebou.

Bema eda nega baita atomu ruma ai mo e nohomu tadikaka bona taihu baita bamodiamu, idia turadia korikori ai baita laomu. Heḡereḡere, Dirava ena Hereva amo ta baine durua Iehova turana ai bainela dalana bo itaiamu neganai, oi na bo moalemu bona bo matauraidiamu. Hesiai ḡaukara idauidau ai, tadikaka taihu bo durudiamu neganai oi na tura namodia momo bo davarimu.—2 Kor. 6:13.

Paulo ese nega aukadia e davari neganai ia turana Tito ese e vadivadia, una ese Paulo e durua e lalomaino. (2 Kor. 7:​5-7) Ina Baibul sivarai ese e hadibadamu, heduru e uramu tadikakadia na dia tauhalo herevadia mo baita gwaurai henidia, to eda nega baita ato idia ida baita noho bona baita ḡaukara hebou.—1 Ioa. 3:18.

Eda tadikaka taihu Russia ai na haheitalai namodia ta ta baita heduru heheni karana ai. Mani Sergey bona adavana Tatiana edia ekspiriens aita laloa. Pulisi ese edia ruma e sekea murinai e laohaidia pulis steisin. Tatiana be e ruhaia nege guna bena e lou ruma. Sergey na e gwa, “Tatiana ruma ai e kau neganai, lalo-goada taihuna ta na maoromaoro ela ia dekena. Unu ḡau iboudiai e ore muridiai se daudau, tadikaka taihu momo na ema ai e durumai emai gabu a haḡoevaia.”

Sergey na ma e gwa, “Lau na hanaihanai Hereva Lada-isidia 17:17 na laloataomu, e gwa, ‘Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.’ Una hisihisi negana lalonai turagu edia heduru na na moalelaia bada, bona na diba Hereva Lada-isidia 17:17 ai e gwaurai herevadia na momokani.” Iehova ese lalogoada bona asi gari dibadia tura namodia e henigu bona idia ese e durugu. a

Hari ina nega ai hisihisi idauidau ta haheaukalaimu lalonai turada edia heduru na mai anina bada. Hisihisi badana lalonai turada edia heduru na baita ura henia badamu. Hari, namona na baita ḡaukara goada dala idauidau ai turada na baita hagoadadia bona baita durudia.—1 Pet. 4:​7, 8.