PABLISA dia momo tanodia ai e haroro goadagoadamu taudia momo na do asie headava taihudia. Idia haida na laḡani momo lalodiai idau tanodia ai e haroro. Dahaka ese e durudia dainai idau tano ela? Idau tano ai hesiai ḡaukara e kara amo dahaka e diba? Dahaka hahenamo e davari? Idau tanodia ai e haroro taihudia haida na a intaviudia. Bema oi na do so headava taihuna ta bona o ura dikadikamu una ḡaukara namona ba karaia, a dibamu unu taihu edia ekspiriens ese oi na be durumumu. Momokani, edia haheitalai ese Dirava ena taunimanima iboudiai baine durudia diba.

O laloamu oi be heḡereḡere idau tano ta ai painia ḡaukara ba karaia, a? Anita, hari laḡanina na 75, na e laloava ia na dia heḡereḡere. Ia na England ai e bada, bona laḡanina 18 ai painia ḡaukara e matamaia. Ia na ini e gwau toma: “Taunimanima vairadiai Iehova iherevalaina na moalelaiava, to asina laloa idau tano ta ai baina haroro. Idau gado ta asina stadilaia bona na lalova gado ma ta na basina dibaia diba. Una dainai, Gilead Sikuli ai e boirigu neganai, na hoa dikadika. Na laloava lau na dia heḡereḡere una hahenamo baina abia. To na lalo, ‘Bema Iehova na e laloamu baina karaia diba, baina tohoa.’ Una na laḡani 50 mai kahana gunanai. Una nega amo ema bona hari, lau na Japan ai misinari ḡaukara na karaiamu.” Anita na ma eto: “Nega haida, mai moalegu ida taihu matamatadia na hamaorodiamu, ‘Emui baege avabi bona ina laolao hereadaena ai lau ba bamogu!’ Na moalemu badina momo na unu e kara toma!”

Idau tano ai hesiai ḡaukara e kara taihudia momo na guna e daradarava tano ma ta baela eiava lasi. Dahaka ese e durudia dainai e boga-auka?

Maureen, hari laḡanina na 64, na ini e gwau toma: “Lau na tubu daeva neganai, na ura dikadikava ma haida baina durudia.” Ia laḡanina 20 neganai, ia na Quebec, Canada ela, badina unuseniai painia taudia na dia momo. Ia na eto: “Gabeai, lau na e boirigu Gilead Sikuli bainala, to asina urava bamogu baina rakatanidia bona asi dibagu gabuna ta bainala.” Ma eto: “Bona na lalohekwarahi badina tamagu na gorere bona asina ura sinagu baina rakatania sibona ese baine naria. Hanuaboi momo mai taigu ida egu lalohekwarahi na Iehova na hamaorolaiava. Tamagu bona sinagu ediai egu lalohekwarahi na herevalaia neganai, idia ese e hagoadagu bainala. Danu, na itaia emai kongrigeisen tadikaka taihu na mai edia  lalokau ida tamagu bona sinagu e durudia. Iehova ena heduru dalana na itaia neganai, na diba momokani ia ese lau danu baine durugu diba. Una negana ai, lau na heḡereḡere bainala totona!” Laḡani 1979 amo, Maureen na laḡani 30 mai kahana West Africa ai misinari ḡaukara e karaia. Hari, Maureen na Canada ai sinana e nariamu bona doini spesel painia ḡaukara e karaiamu. Idau tano ai e ḡaukarava laḡanidia e lalodia lou neganai, ini e gwau toma: “Iehova ese egu dabu ḡaudia na hanaihanai e heniva.”

Wendy, hari laḡanina na 65, na Australia ai e bada bona laḡanina 14 ai e painia matama. Ia na ini e gwau toma: “Lau na na gariva dainai idau taudia ihereva henidia na auka. To painia ḡaukara ese e durugu taunimanima idauidau baina hereva henidia diba. Gabeai, na laloparara lau na mai goadagu ida baina haroro diba. Painia ḡaukara ese e hadibagu Iehova enai baina tabekau, bona lalogu na hagoadaia idau tano ai hesiai ḡaukara baina karaia. Danu, Japan ai laḡani 30 mai kahana misinari ḡaukara e karaia singul taihuna ta ese e boirigu Japan baiala, unuseniai hua toi heḡereḡeredia baia haroro. Ia ida a ḡaukarava dainai, idau tano ta bainala urana na e bada.” Laḡani 1986 ai, Wendy na Vanuatu ela. Una motumotu na Australia mairiveina (east) kahana ai, bona ena daudau na 1,770 kilomita heḡereḡerena.

Wendy na doini Vanuatu ai e nohomu, bona remote translation office ta ai e ḡaukaramu. Ia na eto: “Gabu daudaudia ai grup maraḡidia bona kongrigeisen idauidau e matamamu dalana na itaiamu neganai, na moalemu. Ini motumotu ai Iehova ena ḡaukara na duruamu na hahenamo hereadaena.”

Kumiko, hari laḡanina na 65, na Japan ai regula painia ḡaukara e karaiava neganai, ia ida e painia taihuna ese e noia Nepal baela. Kumiko na ini e gwau toma: “E noigu loulouva, to nega momo na gwauva, ‘lasi.’ Na lalo hekwarahiva badina na laloava gado matamatana ta na basina dibaia bona noho dalana matamatana basina manadalaia diba. Danu, idau tano bainala totona, moni davari dalana na lalohekwarahilaia. Unu ḡau na lalohadailaiva lalonai, motabaik amo aksiden ta na davaria bona hospital ai na noho. Unuseniai, ini na lalo tomava, ‘Gabeai egu ai be ma dahaka be varamu? Reana gorere dikana ta ba abiamu bona tano ma ta ai painia ḡaukara na basina karaiamu. Laḡani tamona idau tano ai hesiai ḡaukara ba karaia dibamu eiava?’ Mai egu ura ida Iehova na ḡuriḡuri henia baine durugu unu baina kara toma.” Kumiko na hospital amo e lasi murinai, Nepal e vadivadia, bona gabeai ia bona e painia hebou taihuna na una tano ela.

 Kumiko na laḡani 10 heḡereḡerena Nepal ai hesiai ḡaukara e karaia. Bona una nega e laloa lou neganai, ini e gwau toma: “Na lalohekwarahilaiva ḡaudia egu amo e hekoki na vaitani Davara Kakakakana e parara na heto. Na moalemu badina lau na pablisa dia momo gabuna ai na haroro. Nega momo, ruma bese ta enai Baibul na herevalaiava neganai, dekedia taudia iboudiai faiv o siks na e maiva bae kamonai totona. Natu maraḡidia danu mai hematauraidia ida e noiguva Baibul e herevalaiamu pepapepana ta baina henidia. Teritori unu bamodia ai haroro na mai moalena.”

Unu a intaviu henidia singul taihu goadadia na hekwakwanai danu e davari. Unu hekwakwanai be ede e hahanaidia toma?

Canada ai, Diane na ini e gwau toma: “Matamanai, egu ruma bese baina rakatania na auka.” Hari ia laḡanina na 62, bona ia na laḡani 20 Ivory Coast (hari e gwauraiamu Côte d’Ivoire) ai misinari ḡaukara e karaia. Ia na eto: “Iehova na noia baine durugu egu hesiai ḡaukara ai taunimanima baina lalokau henidia. Gilead sikuli ai emai hahediba ta, Tadikaka Jack Redford, ese e hamaoromai, emai asainmen ai taunimanima edia noho daladia baia itamu neganai, reana baia lalohekwarahimu badina idia na ogoḡami ai e nohomu. To ia na eto: ‘Edia ogoḡami na basio laloa. To taunimanima vairadia o matadia ba ita. Baibul ena hereva momokani bae kamonai neganai, edia kara ba ita.’ Lau na unu na kara toma, bona hahenamo momo na davari! Basileia sivaraina namona na harorolaiava neganai, na itaiava taunimanima na e moaleva!” Dahaka ese Diane e durua dainai idau tano ta ela? Ia na eto: “Egu stadi taudia na hetura henidiava bona na itaia Iehova ena hesiai taudia ai ela neganai na moale bada. Egu asainmen na egu noho gabuna ai ela. Lauma dalanai lau ese sina bona tama, tadikaka bona taihu momo na davaridia, Iesu ena gwauhamata heḡereḡerena.”—Mar. 10:29, 30.

Anne, hari laḡanina na 46, na Asia ai eda ḡaukara e taravatua tanona ta ai e haroromu. Ia na eto: “Laḡani momo lalodiai idau tanodia ai hesiai ḡaukara na karaiava neganai, lau ida a nohova taihudia edia mauri dalana bona kara na egu amo idau. Nega haida, edia kara o hereva na lalodia kerereva bona na lalohisihisiva. To una e varava neganai, na hekwarahiva baina hetura henidia, unu amo edia mauri dalana baina lalopararalaia namonamo. Danu, na hekwarahiva baina lalokau henidia bona baina lalomanau. Hari na moalemu, badina ai na tura namodia ai ala bona una ese e durugu egu hesiai ḡaukara ai baina haheauka totona.”

 Laḡani 1993 ai, Germany taihuna ta, Ute, hari laḡanina na 53, na e siaia Madagascar ai misinari ḡaukara baine karaia. Ia na eto: ‘Matamana ai, lau na na hekwarahiva edia gado baina dibaia totona, danu dina siahuna, bona gorere idauidau, heḡereḡere malaria, amoebas, bona parasitic worms baina haheaukalaidia na auka. To heduru bada na abi. Unuseniai e nohova taihudia, natudia, bona egu Baibul stadi taudia ese e durugu edia gado na dibaia. Na gorereva negadia ai, lau ida a misinari hebou taihuna ese e nariguva. A bada hereana be, Iehova ese e durugu. Hanaihanai egu lalohekwarahi na Ia enai na ḡuriḡurilaiva. Bena mai haheaukagu ida—nega haida dina haida bona nega haida hua haida—na nariva egu ḡuriḡuri baine haerelaia. Iehova ese egu hekwakwanai iboudiai e hamaoromaorodia.” Hari Ute na laḡani 23 Madagascar ai hesiai ḡaukara e karaia.

Pablisa dia momo gabudia ai hesiai ḡaukara e karamu taudia heḡereḡeredia, singul taihudia danu e gwaumu idau tano ai hesiai ḡaukara e kara dainai hahenamo momo e davari. Unu hahenamo haida be dahaka?

Germany taihuna ta, Heidi, hari laḡanina na 73, na laḡani 1968 amo Ivory Coast (hari e gwauraiamu Côte d’Ivoire) ai misinari ḡaukara e karaia. Ia na e gwaumu: “Lauma dalanai na naridia maraḡidia na itadiamu hereva momokani ai e rakamu neganai, egu moale na e badamu. Guna na stadi henidia taudia haida na hari e painiamu bona idia haida na elda taudia. Momo ese lau na e gwauraigumu Sinagu eiava Tubugu. Una elda ta bona ena ruma bese ese lau na edia famili ai e halaogu. Una dainai baina gwa diba, Iehova ese natugu merona ta, ravagu, bona tubugu tatoi vada e henigu.”—3 Ioa. 4.

Canada taihuna ta, Karen, hari laḡanina 72, na West Africa ai laḡani 20 mai kahana hesiai ḡaukara e karaia. Ia na ini e gwau toma: “Misinari ḡaukara ese lau na e durugu sibogu egu ura baina dadaraia, lalokau bona haheauka karadia baina hahedinarai. Danu, tano idauidau tadikakadia bona taihudia ida na ḡaukara hebou karana ese lau na e durugu bada. Na diba nanadu bona gabu haḡoeva daladia na idauidau. Egu hahenamo badana na, hari tanobada heḡeḡemadai lau turagu na momo! Ena be emai mauri daladia bona emai asainmen na e idau, to emai hetura karana na doini mia.”

England amo, Margaret, hari laḡanina 79, na Laos ai misinari ḡaukara e karaia. Ia na eto: “Idau tano ai hesiai ḡaukara na karaia neganai, na itaia Iehova ese bese bona mauri dala idauidau taudia na ena orea ai e hakaudia vareaimu. Una ese egu abidadama na e hagoadaia bada. Bona na diba momokani Iehova ese ena orea na e hakauamu bona ena ura na baine haḡuḡurua.”

Momokani, idau tano ai hesiai ḡaukara e karaiamu singul taihudia na ḡaukara hereadaena e karaiamu. Namona na baita hanamodia. (Hahe. 11:40) Danu taihu edia namba na e badamu. (Sal. 68:11, NWT) Oi be heḡereḡere emu noho dalana ba haidaua bona ina atikol ai e herevalaidia taihudia ba tohotohodia, a? Bema oibe, oi na bo mamiamu bona bo dibamu “Iehova na namo.”—Sal. 34:8.