1, 2. Dahaka dainai guna e manau tauna na Dirava ese e dadaraia? (Rau 17 ai laulau ba itaia.)

KING Saulo na Israel e lohiaia matama neganai, ia na manau tauna bona taunimanima ese e matauraiava. (1 Sam. 9:1, 2, 21; 10:20-24) To gabeai, ia na e hekokoroku. Dirava ena peroveta tauna Samuel na Gilgal sela haraḡa neganai, Saulo na se ura baine nari. Filistia taudia na e heḡaeḡaeva bae tuari, bona Israel taudia ese ia na e rakatania. Reana ia na de lalova, ‘Ḡau ta baina karaia haraḡa na namo.’ Una dainai ia ese ḡole-oho boubouna ta e karaia, ena be ia na asi ena maoro unu baine kara toma. Iehova na se moale.—1 Sam. 13:5-9.

² Samuel na Gilgal ai e kau neganai, ia ese Saulo e gwau henia. Saulo ese Samuel ena sisiba na se abia dae, to ekskius e gwaurai bona gwau na ma haida e henidia. (1 Sam. 13:10-14) Una nega amo Saulo na kerere momo e kara, una dainai ena king dagina e haboioa bona Iehova ese e dadaraia. (1 Sam. 15:22, 23) Ena be matamanai Saulo ena mauri dalana na namo herea, to gabeai ena mauri na e dika herea.—1 Sam. 31:1-6.

3. (a) Momo ese manau karana be ede e laloa tomamu? (b) Ededia henanadai baita haerelaimu?

 ³ Hari ina kara helulu tanobadana ai, momo na e laloamu ma haida bae hereadia na namo, unu amo bae kwalimu diba. Una dainai, idia ese manau karana na asie hahedinaraiamu. Heḡereḡere, muvi ekta ta gabeai minista ai ela, na ini e gwau toma: “Lau egu ai manau karana ibadinana na asi anina, bona asina uramu baina hahedinaraia.” To, dahaka dainai manau karana na dounu mai anina bada? Manau karana anina be dahaka, bona ia be edena kara amo idau? Bona edena dalai dounu baita manaumu ena be hekwakwanai baita davari o haida ese bae tohoda? Ina stadi ai, henanadai ginigunadia rua baita haerelaidiamu. Henanadai ihatoina na stadi gabena ai baita haerelaiamu.

4. Hekokoroku karana be ede bo herevalaia tomamu?

⁴ Baibul ese manau bona hekokoroku edia idau e herevalaia. (Hereva Lada-isidia 11:2 ba duahia.) David ese Iehova e noia, baine durua basine “hekokoroku” totona. (Sal. 19:13) “Hekokoroku” karana be dahaka? Bema ta na asi ena maoro baine karaia ḡauna na baine karaia bona basine nari, una na hekokoroku karana. Ita na dia ḡoevadae dainai, nega haida na baita hekokorokumu. To King Saulo ena haheitalai amo tame diba, bema hanaihanai ta uramu baita guna, Dirava ena lalonamo baita haboioa dibamu. Salamo 119:21 ese Iehova na ini e herevalaia toma: “Hekokoroku taudia . . . oi ese vada o gwau henidia.” Dahaka dainai?

5. Dahaka dainai hekokoroku karadia na dia kerere maraḡidia?

⁵ Hekokoroku karadia na dia kerere maraḡidia heḡereḡeredia. Bema baita hekokorokumu, baita karaiamu ḡauna ginigunana na Iehova, eda Lohia Badana, basita matauraiamu. Iharuana be, bema ita na asi eda maoro ḡauna ta baita karaia, una ese heiri-heiri be havaraiamu. (Her. 13:10) Bona ihatoina be, bema haida na be dibamu ita na ta hekokorokumu, baita hemarai dibamu. (Luka 14:8, 9) Hekokoroku karadia ese dika e havaramu. To Baibul ese e hahedinaraiamu, manau karana na kara maorona.

6, 7. Manau karana anina be dahaka?

⁶ Baibul ese e hahedinaraiamu manau tauna na se hekokorokumu. (Fili. 2:3) Manau tauna na mai dibana ena diba bona goada na mai hetoadia, ena kerere e gwaurai hedinaraimu, bona ma haida edia lalohadai e abi daemu. Manau karana ese Iehova e hamoaleamu.

⁷ Danu Baibul ese e hahedinaraiamu, baita manau anina na siboda eda kara bona eda goada hetoadia baita lalopararalai. Grik revarevadia ese e hahedinaraimu, una baita dibamu neganai, be durudamu ma haida baita kara namo henidiamu.

8. Hekokoroku toadia haida be dahaka?

⁸ Edena nega ai eda lalohadai bona kara ai hekokoroku karana baita hahedinaraia matamamu? Hekokoroku toadia haida mani aita lalo. Reana ita siboda eiava eda maduna baita lalo badamu. (Roma 12:16) Eda heḡoeva daladia amo haida lalodia baita verimu ita bae laloda totona. (1 Tim. 2:9, 10) Eiava reana eda dagi, bamoda,  o eda lalohadai daidiai eda ura na baita hagoadamu. (1 Kor. 4:6) Unu baita kara tomamu neganai, reana basita dibamu ita na ta hekokorokumu.

9. Dahaka dainai haida na e hekokoroku? Baibul sivaraina ta mani a gwauraia.

⁹ Ta na baine hekokoroku diba bema ura dikadia baine lalodia matama. Momo na sibodia e helalomu, e mamamu, bona edia badu asie biagumu dainai e hekokorokumu. Baibul ese e herevalaidia taudia haida, heḡereḡere Absalom, Usia, bona Nebukadnesara na ura dikadia e badina, bona edia hekokoroku dainai Iehova ese e hahemaraidia.—2 Sam. 15:1-6; 18:9-17; 2 Sis. 26:16-21; Dan. 5:18-21.

10. Dahaka dainai haida edia kara dainai basita hahemaoro henidia kava? Baibul sivaraina ta mani a gwauraia.

¹⁰ To, badi ma haida dainai ta na baine hekokoroku diba. Heḡereḡere, mani ini Baibul sivaraidia, Genese 20:2-7 bona Mataio 26:31-35 ai aita lalodia. Abimelek bona Petro be ura dikadia daidiai e hekokoroku, a? Eiava idia raruosi be asi dibadia o asie henari namonamo dainai e hekokoroku, a? Ita na kudou ai e miamu ḡaudia na asi dibada dainai, aonega dalana na haida basita hahemaoro henidia kava.—Iakobo 4:12 ba duahia.

11. Edena dalai baita manau diba bema Dirava ena dala baita badinaia?

¹¹ Baita manau diba bema Dirava ena dala baita dibaia. Iehova na ḡau iboudiai e kara namonamomu Diravana dainai, ena orea lalonai ita ta ta na ḡaukara idauidau e henida. Ena be kongrigeisen lalonai eda ḡaukara na idauidau, to iboudai baita ḡaukara hebou na namo. Iehova na hariharibada Diravana dainai, ia ese ḡau idauidau, heḡereḡere kohu, diba, o aonega e henida. Unu baita ḡaukaralai diba Ia baita hanamoa bona haida baita durudia. (Roma 12:4-8) Iehova ese ita na ena kohu ireḡuna taudia ai e halaoda, bona mai dibana e henida ḡaukarana na baita karaia namonamomu.—1 Petro 4:10 ba duahia.

12, 13. Dahaka dainai basita hoa bema Dirava ena hesiai ḡaukara lalonai nega haida eda ḡaukara na be idaumu?

¹² To, Dirava ena hesiai ḡaukara lalonai nega haida eda ḡaukara na be idau dibamu. Iesu ena haheitalai mani aita laloa. Matamanai, ia na Iehova ida e nohova. (Her. 8:22) Bena Dirava e durua guba anerudia, guba bona tanobada, bona taunimanima e karadia. (Kol. 1:16) To gabeai, ia na tanobada ai ḡaukara matamatana ta e abia, beibi ta bamona e vara bena taunimanima badana ai ela. (Fili. 2:7) Ia e mase murinai, e toreisi lou bena guba ai lauma maurina e abia, unu amo laḡani 1914 ai Dirava ena Basileia Pavapavana ai ela. (Heb. 2:9) To, una na dia iena ḡaukara dokona. Laḡani daha ta baine Lohia murinai, Iesu ese ena Basileia na Iehova baine henia, unu amo “Dirava baine herea, baine herea dae.”—1 Kor. 15:28.

¹³ Una heḡereḡerena, reana baita kara abi hididia dainai, eda ḡaukara na be idaumu. Heḡereḡere, guna oi na singul, to hari na do headava, a? Hari be mai natumu, a? Emu mauri o haidaua ful-taim hesiai ḡaukara ba karaia totona, a? Unu abi hidi ta ta na mai hahenamodia bona mai edia  maduna. Eda mauri na e idaumu dainai, una ese eda ḡaukara baine habadaia eiava baine hamaraḡia diba. Oi be eregabe eiava buruka? Oi be o gorere momomu eiava lasi? Iehova na hanaihanai ena hesiai ḡaukara ai baine ḡaukaralaida daladia e lalomu. Ia na e uramu baita kara diba ḡaudia mo baita kara, bona ia dainai ta karamu ḡaukaradia na e lalo badamu.—Heb. 6:10.

14. Edena dalai manau karana ese baine duruda diba eda ḡaukara idauidau baita moalelaidia?

¹⁴ Iesu na ena ḡaukara iboudiai e moalelai, ita danu eda ḡaukara idauidau baita moalelai diba. (Her. 8:30, 31) Manau tauna na kongrigeisen lalonai ena ḡaukara eiava ena maduna be moalelaimu. Ia na vaira negana ai baine abi hahenamodia eiava haida edia hahenamo daidiai se lalohekwarahimu. To, e abia ḡaukarana na be karaiamu bona be moalelaiamu, badina mai dibana una na Iehova ena amo e abia. To danu, Iehova ese ma haida e henidia ḡaukaradia na e matauraidiamu. Manau karana ese baine duruda ma haida baita matauraidia bona baita durudia.—Roma 12:10.

15. Gideon ena manau karana amo dahaka ta dibamu?

¹⁵ Manau karana ai Gideon na haheitalai namona. Iehova ena aneru na Gideon vairanai e hedinarai neganai, Gideon na mai manauna ida ena noho dalana bona ena bese e herevalaidia. (Hahe. 6:15) Iehova ese e henia ḡaukarana e abia dae murinai, una ḡaukara ai baine kara ḡaudia iboudiai e  tahudia namonamo, bona Iehova ena heduru e tahua. (Hahe. 6:36-40) Gideon na boga–auka o haheauka tauna. To, ia na e henahua toho bona mai ena aonega ida e kara. (Hahe. 6:11, 27) Ia na e abia ḡaukarana dainai, se hekokoroku. To, ena ḡaukara e haḡuḡurua murinai, ena hanua korikori e lou henia.—Hahe. 8:22, 23, 29.

16, 17. Manau tauna na lauma dalanai baine goada totona, edena lalohadai maorona baine abia na namo?

¹⁶ Basitato baita manau anina na basita ḡaukara goada hesiai ḡaukara ai hahenamo ma haida iabidia totona. Baibul ese ita iboudai e hagoadadamu baita ḡaukara goada na namo. (1 Tim. 4:13-15) To, una anina be eda ḡaukara be hanaihanai baine idau, a? Lasi. Herevana edena hesiai ḡaukara baita karaia, to Iehova ena heduru amo lauma dalanai baita goada diba. Dirava ese e henida dibana na hanaihanai baita ḡaukaralaia bona ḡaukara namodia momo baita kara.

¹⁷ Manau tauna na maduna matamatana ta do se abia dae neganai, baine hetahu namonamo guna ia be dahaka ḡaukara be karamu. Bena mai momokanina ida ena noho dalana baine haeroa. Heḡereḡere, ia be heḡereḡere ḡaukara momo baine karadia bona unu ese mai anina bada ḡaudia ma haida basine hadikadia, a? Ena maduna matamatana baine huaia totona, ena ḡaukara haida be ma haida baine henidia diba, eiava? Bema unu henanadai ta o ruaosi haeredia na, lasi, reana ma ta na heḡereḡere una maduna matamata baine abia dae. Eda ḡuriḡuri bona siboda baita hetahu namonamo karana ese bae duruda, eda diba bona goada hetoadia baita lalodia. Manau karana dainai nega haida na baita gwaumu ita na dia heḡereḡere una maduna baita huaia.

18. (a) Maduna matamatana ta ta abiamu neganai, manau karana ese baine duruda dahaka baita kara? (b) Edena dalai Roma 12:3 ese baine duruda baita manau totona?

¹⁸ Asainmen matamatana ta ta abiamu neganai, Gideon ena haheitalai ese e hadibadamu, baita kwalimu totona Iehova ese baine hakauda bona baine duruda na namo. Dirava ese ita na e boirida Ia ‘ida baita raka hebou mai manauda ida.’ (Mika 6:8) Una dainai maduna matamatadia ta abimu neganai, namona na Iehova ese ena Hereva bona ena orea amo e halasimu herevadia baita lalodia. Ita na dia ḡoevadae dainai eda hesiai ḡaukara baita haḡuḡuru totona, Iehova ena hahekau daladia iboudiai baita badina na namo. Namona na baita helalotao, Iehova ena manau karana dainai hahenamo ta abimu. (Sal. 18:35) Mai manauda ida Dirava ida baita raka heboumu neganai, siboda basita hahebadamu eiava basita hahemaraḡimu.—Roma 12:3 ba duahia.

19. Dahaka badi idauidau daidiai baita manau na namo?

¹⁹ Manau tauna ese Iehova e hanamoamu, badina mai dibana Iehova na Ihavarada Tauna bona ḡau iboudiai e lohiadiamu Diravana. (Apok. 4:11) Manau karana ese e durudamu Dirava ena orea lalonai eda ḡaukara baita karadia namonamo bona baita moalelaidia. Baita manaumu dainai haida baita matauraidiamu, bona lalotamona ai baita nohomu. Danu manau karana ese be hagoadadamu ma haida edia namo baita lalo guna, baita henahua toho, bona kara dikadia baita dadarai. Unu badi idauidau daidiai, Dirava ena taunimanima bae manau na mai anina bada, bona una kara e hahedinaraiamu taudia na Iehova ese e lalodia badamu. To hekwakwanai negadiai manau karana dounu baita hahedinaraia, eiava? Stadi gabena ese una be herevalaiamu.