1. Dahaka hekwakwanai ta davarimu, to dahaka dainai Iehova na ena hesiai taudia ediai e moalemu? (Rau 7 ai laulau ba itaia.)

INA nega oromana lalonai, mauri na hekwakwanai amo e honu. Umui tadikaka bona taihu momo na gorere badadia o haheaukalaimu. Umui haida laḡanimui na babada, to varavaramui burukadia o naridiamu. Danu umui haida na o hekwarahimu emui ruma bese edia dabu ḡaudia ba heni totona. Bona a dibamu umui momo na dia hekwakwanai tamona, to hekwakwanai momo o haheaukalaimu! Unu ese emui nega, goada, bona moni baine haorea diba. To, umui ese Dirava ena gwauhamata o abidadama henimu; o abia daemu vaira negana ai mauri na be namomu. Una dainai Iehova na e moalemu!

2. Edena dala ai Isaia 40:29 ese e hagoadadamu, to dahaka kerere badana baita karaia diba?

² Nega haida o mamiamu, mauri ai e varamu hekwakwanai ihaheaukalaidia na auka, a? Bema oibe, basio lalohekwarahi. Baibul ese e hahedinaraiamu idaunega abidadama taudia danu unu e hemami tomava. (1 Han. 19:4; Iobu 7:7) To, idia na asie hesiku, a Iehova enai e tabekau. Idia na e moale, badina eda Dirava ese hesiku tauna na “e hagoadaiamu.” (Isa. 40:29) To, hari ina negai  Dirava ena taunimanima haida na e laloamu mauri ena hekwakwanai ihaheaukalaina dalana namona na, Dirava ihesiai henina karana bae hadokoa sisina, vaitani e gwaumu, eda Kristen ḡaukaradia na maduna metaudia, dia hahenamo. Una dainai, Baibul iduahina karana e hadokoamu, kongrigeisen heboudia asie laomu, bona haroro ḡaukara asie karaiamu​—Satana na e uramu unu bae kara toma.

3. (a) Edena dala ai Satana baita koua diba basine hamanokada totona? (b) Ina stadi ai dahaka baita herevalaimu?

³ Diabolo na mai dibana Kristen ḡaukaradia baita goadalaimu neganai, unu ese be hagoadadamu, bona ia na se uramu baita goada. O hesikumu eiava o lalomanokamu neganai, Iehova ena amo na basio daudau. To, Ia ba raka henia kahi, badina ia ese “baine haginimui tutuka-tutuka, baine hakwalimumui.” (1 Pet. 5:10; Iak. 4:8) Ina stadi ai, ita ese Dirava ihesiai henina karana ai baine hamanokada diba ḡaudia rua baita herevalaimu, bona Baibul ena hahekau herevadia ibadinadia karana ese baine duruda daladia danu. To, namona na Iehova ese e hagoadadamu dalana aita herevalaia guna, una na Isaia 40:26-31 ai e hahedinaraia heḡereḡerena.

4. Isaia 40:26 amo dahaka ta dibamu?

⁴ Isaia 40:26 ba duahia. Ta ese guba hisiudia iboudiai na basine duahi diba. Saiens taudia na e abia daemu eda Milky Way galaxy lalonai hisiu iboudiai na 400 bilion mai kahana. To, Iehova ese hisiu ta ta na ladadia e heni bona edia gabu korikori ai e atodia. Una ese dahaka e hadibadamu? Bema Iehova ese unu asie maurimu ḡaudia e lalodia badamu, anina na Ia e hesiai heniamu taudia danu e lalodia badamu. Oi ese Ia o hesiai heniamu badina na dia ta ese e dorimumu dainai, to Dirava o lalokau heniamu dainai. (Sal. 19:1, 3, 14) Tamada lalokauna na mai dibana namonamo oi. Ia ese kwaramu “huidia iboudiai vada e duahi vaitani.” (Mat. 10:30) Bona salamo itorena tauna na eto: “Iehova ese asi edia kerere taudia” ediai e varamu ḡaudia na mai dibana. (Sal. 37:18) Oibe, Iehova ese emu hekwakwanai na e itamu, bona goada baine henimu diba ba haheaukalai totona.

5. Ede ta diba tomamu Iehova ese baine hagoadada diba?

⁵ Isaia 40:28 ba duahia. Iehova na siahu idoinai Badina. Heḡereḡere, mani Ia ese dina e heniamu siahuna a laloa. Saiens edia toretore tauna ta, David Bodanis na eto: “Sekeni ta lalonai, Dina ese e halasiamu siahuna na atomic bomb bilion momo e poumu siahuna heḡereḡerena.” Hetahu ḡaukarana e karaiamu tauna ta na eto, dina ese “sekeni ta lalonai e halasiamu siahuna ese taunimanima baine durudia diba laḡani 200,000 bae mauri totona!” Momokani, Dirava ese dina na siahu e heniamu dainai, ta dibamu goada baine henida diba hekwakwanai baita haheaukalai totona.

6. Edena dala ai Iesu ena maduna na haraḡa, bona una ese edena dala ai e durudamu?

⁶ Isaia 40:29 ba duahia. Iehova ihesiai henina karana ese moale e havaraiamu. Iesu ese ena hahediba taudia e hamaorodia: “Egu maduna na paḡamui ai ba huaia.” Ma eto: “Laumamui do bae laḡa ani. Badina be egu maduna na haraḡa, ihuana danu asi hekwarahina.” (Mat. 11:28-30) Una hereva na momokani! Nega haida, eda ruma ta rakatanimu kongrigeisen heboudia baitala eiava baita haroro neganai, ta hesikumu. To ta loumu ruma neganai eda hemami be ede bamona? Goada ta abiamu​—bona ita na heḡaeḡae hekwakwanai baita haheaukalai totona. Momokani, Iesu ena maduna na haraḡa!

7. Mataio 11:28-30 ihamomokanina ena ekspiriens ta ba herevalaia.

 ⁷ Taihu ta ladana Kayla ena gorere na, tauanina e hesikuva (chronic fatigue syndrome), lalometau, bona kwara hisihisi (migraine). Una dainai, nega haida enai na auka kongrigeisen heboudia bainela totona. To, lalona e hagoadaia bona hebou ta ela neganai, eto: “Na kamonai tok ese lalomanoka karana e herevalaia. Una tok na hebogahisi bona lalokau dalana ai e heni dainai, na tai. Na laloparara hebou ilao henina karana na mai anina bada.” Ia na hebou ela dainai e moale dikadika!

8, 9. Paulo na eto: “Na manokamu negadia ai na goadamu,” una hereva anina be dahaka?

⁸ Isaia 40:30 ba duahia. Ena be eda diba na bada, to siboda eda goada ai ḡau momo na basita haḡuḡuru dibamu. Una baita dibaia na namo. Ena be aposetolo Paulo na ḡau momo baine kara diba, to ia na dia heḡereḡere e ura baine kara ḡaudia iboudiai baine haḡuḡuru totona. Ena lalohekwarahi na Dirava e hamaorolaia neganai, Dirava na eto: “Manoka-manoka ai lauegu siahu na herea.” Paulo ese una hereva na e lalopararalaia. Una dainai eto: “Na manokamu negadia ai na goadamu.” (2 Kor. 12:7-10) Ena hereva anina be dahaka?

⁹ Paulo na e laloparara ia sibona ena goada amo ḡau momo na basine kara diba, to siahu hereadaena ta ese baine durua diba. Dirava ena lauma helaḡa ese Paulo baine hagoadaia diba. Dia una mo, to Dirava ena lauma ena heduru dainai Paulo na sibona ena goada amo basine kara diba ḡaudia e haḡuḡuru. Ita edai danu una na baine vara diba. Iehova ese ena lauma helaḡa be henidamu neganai, baita goada dibamu!

10. Edena dala ai Iehova ese David e durua ena hekwakwanai baine haheaukalai?

¹⁰ Salamo itorena tauna David na nega momo Dirava ena lauma helaḡa ese e duruava. Ia na eto: “Momokani, oi bagumu ai orea badana baina hadarerea diba; egu Dirava bagunai maḡu ta baina rohoa hanai diba.” (Sal. 18:29) Hekwakwanai haida na maḡu na heto, siboda eda goada amo basita ‘rohodia hanai’ dibamu. Una dainai Iehova ena heduru baita abia na namo.

11. Edena dala ai lauma helaḡa ese e durudamu eda hekwakwanai baita haheaukalai?

¹¹ Isaia 40:31 ba duahia. Ugava na dia sibona ena goada amo gabu daudaudia e roho laomu. Hodahoda siahuna ese e duruamu dainai ataiai e rohomu bona gabu daudaudia bainela diba. Una dainai hekwakwanai badana ta o davariamu neganai, ugava ba laloa. Iehova ba noia ena “lauma helaḡa” amo baine hagoadamu totona. (Ioa. 14:26) Ta moalemu, badina lauma helaḡa ese hanaihanai e durudamu. Danu, kongrigeisen lalonai ita bona tadikaka eiava taihu ta bogaraḡida ai hekwakwanai ta e varamu neganai, Dirava ena heduru baita noia diba. To dahaka dainai unu hekwakwanai e varamu?

12, 13. (a) Dahaka dainai Kristen taudia bogaraḡidiai hekwakwanai e varamu? (b) Iosef sivaraina amo Iehova enai dahaka ta dibamu?

¹² Ita na dia ḡoevadae tauda dainai, hekwakwanai na e varamu. Nega haida tadikaka eiava taihu ta ena hereva eiava kara ese be hahisidamu​—eiava ita ese eda kara eiava hereva amo baita hahisidiamu. Una na hahetoho badana ta. Nega unu bamodia ai Iehova na e uramu Ia ibadinana karana baita hahedinaraia bona tadikakada ida baita ḡaukara hebou, badina Ia ese idia danu e lalokau henidiamu ena be idia na dia ḡoevadae.

¹³ Iehova ese ena hesiai taudia e davarimu hahetohodia na se koudiamu, Iosef sivaraina ese una e hahedinaraia. Iosef na eregabena ai, tadikakana ese hesiai tauna heḡereḡerena e hoihoilaia bona Aigupto e laohaia. (Gen. 37:28) Iehova ese turana,  kara maoromaoro tauna Iosef, enai e vara ḡaudia e ita bona e lalohisihisi. To, una na se koua. Gabeai, haida ese Iosef e samania koikoi, eto ia na e urava Potifara adavana baine reipia bona dibura ruma ai e atoa neganai, Iehova ese una danu se koua. To Iehova ese Iosef e rakatania, a? Baibul na e gwaumu: “Iehova ese Iosef e hagerea, bona ena ḡaukara iboudiai anidia e havara.”​—Gen. 39:21-23.

14. Badu karana baita dadaraia ena namo lauma bona tauanina dalana ai be dahaka?

¹⁴ Haheitalai ma ta na David. Ia na hekwakwanai momo e davari. To Dirava turana, David, na unu hekwakwanai daidiai se badu. Ia na eto: “Badu baine mia, daḡedaḡe ba rakatania. Lalomu basio hahekwarahia; una na kara dika e havaraiamu.” (Sal. 37:8) Emu badu baine “mia” eiava basio badu badina badana na, Iehova o tohotohoamu, ia na “eda kara havara na davadia se henidamu” Diravana. (Sal. 103:10) To danu, badu karana baita dadaraia na mai ena namo. Badu karana ese high blood pressure bona laḡa tunatuna goreredia baine havara diba. Danu, badu karana ese ase (o liver) bona pancreas baine hadikadia diba, bona eda aniani dalana baine hadikaia. Ta badumu neganai, basita lalo namonamomu. Bona nega haida baita badumu dainai, eda lalometau na be mia daudaumu. To, Baibul na e gwaumu: “Lalo-manau ese tau-anina e hamauriamu.” (Her. 14:30) Una dainai, tadikakada ese laloda e hahisimu neganai, dahaka baita kara diba ia ida baita maino totona? Namona na Baibul ena hahekau herevadia baita badina.

15, 16. Dahaka baita kara diba bema ta ese e hahisidamu?

¹⁵ Efeso 4:26 ba duahia. Dirava asie hesiai heniamu taudia ese e kara auka henidamu neganai, asita daradaramu. To tadikakada eiava ruma bese tauna ta ese ena hereva eiava kara amo e hahisidamu neganai, ta lalohisihisimu. Bema e vara hekwakwanaina na basita laloaboiomu, laḡani momo lalodiai baita hemakamu, a? Eiava Baibul ena hahekau herevana baita badinaia bona hekwakwanai baita hamaoromaoro haraḡa, a? Bema una hekwakwanai basita hamaoromaoro haraḡamu, be aukamu tadikakada ida baita herohemaino totona.

¹⁶ Bema tadikaka eiava taihu ta ese baine hahisimu bona una basio laloaboio be ede bamona? Dahaka ba kara diba ba herohemaino totona? Ḡau ginigunana na, Iehova ba ḡuriḡuri henia. Ba noia baine durumu tadikakamu ida ba herevahereva namonamo totona. Ba helalotao, ia danu Iehova turana ta. (Sal. 25:14) Dirava ese e lalokau heniamu. Iehova ese turana na e kara namo henidiamu, bona e uramu ita danu unu baita  kara toma. (Her. 15:23; Mat. 7:12; Kol. 4:6) Ḡau iharuana na, ba gwaurai herevadia ba haerodia. Basio laloa tadikakamu na mai ena ura ida e hahisimu. Reana una na mistake ai e vara, eiava ena kara badina na so lalopararalaia. Danu mai manaumu ida bavabia dae reana emu hereva o kara ta dainai una hekwakwanai e vara. Emu hereva o hamatamaiamu neganai, reana ini ba gwau toma, “Reana lalogu na e hisihisi haraḡa, to varani o hereva henigu neganai, lau na . . . ” Bema emui herevahereva murinai ḡauna namona ta se vara, reana dala ma ta ba tahua ba herohemaino totona. To, tadikakamu dainai ba ḡuriḡuri, bona Iehova ba noia baine durua. Bona Dirava ba noia baine durumu tadikakamu ena kara namodia ba lalodia bada totona. Herevana dahaka baine vara, to ba diba momokani Iehova na e moalemu badina o hekwarahimu tadikakamu​—Dirava turana​—ida ba herohemaino totona.

17. Ta kara dikamu neganai, Iehova be edena dala ai e durudamu, bona dahaka dainai una heduru baita abia dae na namo?

¹⁷ Haida na guna kara dika badadia e kara dainai, e laloamu idia na dia heḡereḡere Iehova bae hesiai henia. Eda kara dika gunadia ilalodia karana ese eda maino, moale, bona goada baine haore diba. King David danu e kara kereredia dainai e lalohisihisi, ia na ini e gwau toma: “Egu kara dika asina gwaurai hedinarai negana ai, lau taugu anina na e varoda-varodava, dina idoinai na ḡanaḡanava dainai. Badina be imamu metauna na latagu ai e miava.” Momokani, David na e boga-auka bona ena hekwakwanai e hamaoromaoroa. Ia na eto: “Egu kara dika na vairamu ai na gwauraia hedinarai . . . bena oi ese egu kara dika ena metau o abia oho.” (Sal. 32:3-5) Bema oi na kara dika badana ta o karaia, Iehova na noho heḡaeḡae oi baine durumu. To namona na Ia ese elda taudia amo e henimu heduru daladia bavabi dae. (Her. 24:16; Iak. 5:13-15) Basio nari​—mauri hanaihanai helarona ba haboioa garina! To bema emu kara dika e gwautao murinai dounu o lalohisihisimu, dahaka ba kara na namo?

18. Edena dala ai Paulo ena haheitalai ese e lalomanokamu taudia baine durudia diba?

¹⁸ Aposetolo Paulo danu ena kerere gunadia daidiai e lalometauva. Ia na eto: “Aposetolo iboudiai ese lau e hereagumu; lau na dia namo aposetolo bae gwauraigu, badina be Dirava ena ekalesia oreana na daḡedaḡe heniava.” Ma eto: “To Dirava ena harihari-bada dainai lau ini name heto.” (1 Kor. 15:9, 10) Iehova ese Paulo na e durua, ena be guna kerere momo e kara, bona e ura Paulo ese una na baine lalopararalaia. Bema oi na mai kudoumu idoinai ida o helalo-kerehai bona emu kerere o gwaurai hedinarai, namona na bavabia dae Iehova ese emu dika na be gwauatao vaitanimu. Una dainai Iehova ena hereva ba badinaia, bona dika e gwautaomu karana bavabia dae!​—Isa. 55:6, 7.

19. Laḡani 2018 ena siri badana be dahaka, bona dahaka dainai una na mai anina bada?

¹⁹ Ina nega oromana ena ore negana e kahikahimu dainai, mauri ai hekwakwanai momo herea baita davarimu. To namona na ba diba, Iehova, “manori [“hesiku,” NWT] taudia . . . e hagoadadiamu, bona asi ena goada tauna enai goada e habadaiamu” Diravana, ese baine duruda diba. (Isa. 40:29; Sal. 55:22; 68:19) Laḡani 2018 ai, Kingdom Hall ai hebou baita laomu negadia ai, una mai anina bada hereva momokanina baita laloamu. Laḡani ena siri badana ese una e hahedinaraia: “Iehova e nariamu taudia ese edia goada bae hamatamata.”​—Isa. 40:31.