1, 2. Hari ina negai Dirava ena taunimanima ediai dahaka hahetoho e varamu? (Rau 27 ai laulau ba itaia.)

DOKTA bona nesi momo na daihanai goreredia e davari taudia bogaraḡidiai e ḡaukaramu. Idia ese unu gorere taudia na e naridiamu badina e uramu bae durudia. To danu, sibodia bae henahua toho na namo, unu amo gorere na basie hanai idia ediai. Una heḡereḡerena, ita na kara namodia asie hahedinaraimu taudia bogaraḡidiai ta nohomu eiava idia ida ta ḡaukara heboumu. Una na hahetoho ta ita edai.

² Ini dina gabedia ai kara dikadia na e bada hereamu. Aposetolo Paulo ese ena revareva iharuana ai Timoteo e tore henia neganai, Dirava ena amo e daudaumu taudia edia kara e herevalai, bona ini dina gabedia ai unu kara na gabu ibounai lalonai e varamu. (2 Timoteo 3:1-5, 13 ba duahi.) Ena be unu kara dikadia na asita moalelaimu, to e hahedinaraimu taudia edia kara bona lalohadai ese bae hakauda kerere diba. (Her. 13:20) Ina atikol ai, ita ese dina gabedia ai taunimanima edia kara bona Dirava ena taunimanima edia kara edia idau baita herevalaimu. Bona baita itaiamu edena dala ai siboda baita hegima unu amo kara dikadia  ese basie hakauda kerere bona lauma dalana ai ma haida baita durudia.

3. Timoteo Iharuana 3:2-5 ai ededia kara e herevalai?

³ Aposetolo Paulo na eto: “Dina gabedia ai nega dikadia do bae vara.” Bena ia ese dina gabedia ai taunimanima ese bae hahedinarai kara dikadia 19 e gwauraidia. Unu na Roma 1:29-31 ai e gwaurai karadia ida heḡereḡere, to Paulo ese Timoteo e tore henia revarevana ai e gwaurai karadia na Kristen Grik Revarevadia haida ai na asie herevalai. Paulo ese kara dikadia edia list na ina hereva amo e hamatamaia, “badina be taunimanima na . . . ” To unu kara na dia taunimanima iboudiai ese e hahedinaraimu. Kristen taudia edia kara na i’idau.​—Malaki 3:18 ba duahia.

4. Hekokoroku taudia edia kara be ede bamona?

⁴ Paulo na eto, taunimanima na sibodia bae heura heni bona moni bae mataḡaniḡani henia, bena ma eto, bae heaḡi, bae hekokoroku bona bae hereva kava, unu e kara tomamu taudia na edia aonega, hairai, taḡa bona dagi daidiai e laloamu idia ese ma haida e hereadia. Danu, e uramu ma haida ese bae ura henidia bona bae lalodia bada. Diba bada tauna ta ese hekokoroku tauna na ini e herevalaia toma: “Ia na kudouna ai sibona e heimodaimu to Dirava na se imodaiamu.” Haida na e gwaumu hekokoroku karana na dia namo, bona e hekokorokumu taudia danu una kara na asie ura heniamu bema haida ese e hahedinaraiamu.

5. Edena dala ai abidadama taudia haida danu e hekokoroku?

⁵ Baibul ena hereva heḡereḡerena, Iehova ese “hekokoroku” karana na e inai heniamu. (Her. 6:16, 17) Hekokoroku tauna na Dirava ena amo e daudaumu. (Sal. 10:4) Una na Diabolo ena kara ta. (1 Tim. 3:6) Iehova ena hesiai taudia haida ese danu hekokoroku eiava heaḡi karana e hahedinaraia. Iuda pavapavana, Usia, na laḡani momo lalodiai Dirava e abidadama heniava. Baibul na e gwaumu: “A e goada negana ai, ena heaḡi e vara, unu amo e dika. Badina be Iehova, ena Dirava, enai e kara koikoi; ia na Iehova ena dubu ai e raka vareai, muramura patana ai muramura mai bonana baine gabua eto.” Gabeai, King Hesekia danu nega sisina lalonai e hekokoroku.​—2 Sis. 26:16; 32:25, 26.

6. Dahaka ḡau daidiai David na bema hekokoroku diba, to dahaka dainai unu na se kara toma?

⁶ Taunimanima haida na e hekokorokumu badina mai hairaidia, ladadia na bada, edia diba miusik ai na bada, mai goadadia, bona mai edia dagi namodia. David enai unu iboudiai na mimia; to ia na ena mauri ibounai lalonai manau karana e hahedinaraia. Goliata e alaia bona King Saulo natuna kekenina e henia baine adavaia neganai, David na eto: “Lau be daika, bona varavaragu, tamagu ena ruma taudia, be daidia Israel ai, dainai lau na pavapava ravana ai bainala?” (1 Sam. 18:18) Dahaka ese David e durua dainai e manau? David ese e karaia karana, ena diba, bona unu hahenamo e abi badina na Dirava na ‘e igo dobi’ eiava e hahemanau, bona ia e kamonai henia. (Sal. 113:5-8) David na e laloparara e abi ḡau namodia iboudiai na Iehova ese e henia.​—1 Korinto 4:7 ba itaia.

7. Dahaka ese baine duruda manau karana baita hahedinaraia?

⁷ David heḡereḡerena, hari ina negai Iehova ena taunimanima na e ḡaukara goadamu manau karana bae hahedinaraia totona. Ta moalemu badina ta dibamu Iehova, ḡau iboudiai e lohiadiamu Tauna hereadaena, ese manau karana e hahedinaraiamu. (Sal. 18:35) Ta uramu ina sisiba baita badinaia: “Ini na ba hahedokilai: hebogahisi, gado namo, manau, manada, haheauka.” (Kol. 3:12) Danu, mai dibada lalokau na “se heaḡimu; se hekokorokumu.” (1 Kor. 13:4) Manau karana baita hahedinaraiamu neganai,  taunimanima baita veridia dibamu Iehova bae dibaia totona. Hahine edia kara namodia ese adavadia bae veridia diba Dirava bae dibaia totona, una heḡereḡerena, Dirava ena taunimanima edia manau karana ese ma haida baine veridia diba Ia bae dibaia totona.​—1 Pet. 3:1.

8. (a) Hari ina negai haida ese tama sina igwau-edeede henidia karana be ede e laloa tomamu? (b) Baibul ese natu e haḡanidia dahaka bae kara totona?

⁸ Paulo ese dina gabedia ai taunimanima ese ma haida bae kara henidia dalana e herevalaia. Ia na eto, dina gabedia ai natu ese tamadia sinadia bae gwau-edeede henidia. Hari ina negai, una kara na nega haida buka, muvi, bona televisen program ai e hahedinaraimu bona momo ese e abia daemu, to gwau-edeede karana ese ruma bese ena noho namo na e hadikaiamu. Taunimanima ese una hereva na idaunegai e diba. Heḡereḡere, idaunega Greece ai, bema tau ta ese tamana sinana baine dadabadia, ia na hanua amo bae lulua; Roma edia taravatu ai, tamana baine dadabaia tauna na ala-ala tauna e hahisiava heḡereḡerena bae hahisia. Heberu Revarevadia bona Kristen Grik Revarevadia ai, natu e haḡanidia tamadia sinadia bae matauraidia.​—Eso. 20:12; Efe. 6:1-3.

9. Dahaka ese natu baine durudia tamadia sinadia bae kamonai henidia totona?

⁹ Natu ese tama sina edia kara namodia bae lalodia neganai, una ese baine durudia basie gwau-edeede. Namona na natu na bae laloparara Dirava, ita iboudai Tamada, na e uramu kamonai karana bae hahedinaraia. Natu ese tamadia sinadia edia kara namodia bae herevalaidia neganai, turadia be durudiamu idia danu tamadia sinadia bae matauraidia totona. Momokani, bema tama sina ese natudia basie lalokau henidiamu, natudia na mai kudoudia idoinai ida tamadia sinadia basie bae kamonai henidiamu. To, bema natu ta na be mamiamu tamana sinana ese e lalokau heniamu, una ese be duruamu baine kamonai henidia totona, ena be haida ese bae dibaḡania baine gwau-edeede totona. Austin na eto: “Ena be nega haida na urava ḡau haida na sibogu baina kara, to tamagu bona sinagu ese taravatu haida e atova, unu taravatu e atova badidia e herevalaiva, bona e urava basina gari baina hereva henidia. Una ese e durugu baina kamonai henidia totona. Na itaiava idia ese lau na e lalogu badava, una dainai na urava baina hamoaledia.”

10, 11. (a) Ededia kara dikadia ese e hahedinaraimu taunimanima na asie helalokau hehenimu? (b) Kristen taudia korikoridia ese lalokau be ede bae hahedinaraia toma?

¹⁰ Paulo ese e herevalai karadia ma haida ese e hahedinaraimu taunimanima na asie helalokau hehenimu. “Tamadia sinadia bae gwau edeede henidia” herevana e gwauraia murinai, ia na ma eto, basie hahenamo, badina taunimanima na ma haida ese idia daidiai e karamu kara namodia na asie lalo badamu eiava asie tenkiu henidiamu. Danu, taunimanima na basie helaḡa. Idia na bae tudaga eiava basie uramu gwauhamata ta bae karaia, una anina na asie uramu ma haida ida bae maino. Idia na bae ere dika bona bae tao tore, hereva dikadia bae gwaurai, danu taunimanima bona Dirava bae gwauraidia dika. Bona bae habade koikoi, idia ese hereva koikoidia bae gwaurai unu amo ma haida ladadia bae hadikadia. *

¹¹ Hari ina negai, taunimanima momo ese lalokau na asie hahedinaraiamu, to Iehova e tomadiho heniamu taudia ese tadikakadia e lalokau henidiamu. Vaia, una kara na hanaihanai e hahedinaraiamu. Iesu na eto, Mose ena Taravatu ai, dekeda taudia ilalokau  henidia karana, eiava a·gaʹpe lalokauna, na haheḡani iharuana, a Dirava ilalokau henina haheḡanina na haheḡani ginigunana. (Mat. 22:38, 39) Danu, Iesu na ma eto lalokau heheni karana na Kristen taudia korikoridia edia kara ta. (Ioane 13:34, 35 ba duahi.) Una Kristen lalokauna na inaidia ediai danu bae hahedinaraia.​—Mat. 5:43, 44.

12. Edena dala ai Iesu ese e hahedinaraia ma haida na e lalokau henidia?

¹² Iesu ese e hahedinaraia ma haida na e lalokau henidia bada. Ia na hanua ta ta e laova, Dirava ena Basileia sivaraina namona e harorolaiava. Ia ese matakepulu taudia, ae hedairike taudia, lepera taudia, bona taia kudima taudia e hanamodia. Bona mase taudia e hatoredia isi lou. (Luka 7:22) Danu Iesu na taunimanima iboudiai daidiai ena mauri e heni, ena be momo ese e inai henia. Iesu ese Tamana ena lalokau e hahedinaraia ḡoevaḡoeva. Tanobada heḡeḡemadai, Iehova ena Witnes ese ma haida e lalokau henidiamu.

13. Edena dala ai ma haida ta lalokau henidiamu karana ese baine durudia Iehova bae dibaia totona?

¹³ Ma haida baita lalokau henidiamu neganai, idia na be uramu Tamada guba ai e nohomu bae dibaia. Heḡereḡere, Thailand ai, tau ta na rijinol hebouna ta ai tadikaka taihu edia lalokau karana e itaia neganai, e moale dikadika. Ena ruma ela neganai, ia na e noinoi wiki ta lalonai nega rua baine stadi. Ia ese varavarana e haroro henidiava, bona hebouhebou e ore bena hua siks muridiai, ia na Kingdom Hall ai ena Baibul duahiduahi ginigunana e karaia. Bema ta uramu baita diba ita na lalokau ta hahedinaraiamu eiava lasi, siboda baita henanadai: ‘Lau ese egu ruma bese, egu kongrigeisen, bona haroro ḡaukara ai ma haida na durudiamu, a? Ma haida na lalodiamu dalana be Iehova ese e lalodiamu heḡereḡerena, a?’

14, 15. Momo ese ededia kara e hahedinaraimu, to haida be edena dala ai edia kara e haidau?

¹⁴ Dina gabedia ai, taunimanima ese kara dikadia ma haida e hahedinaraimu bona unu baita dadaraidia na namo. Dirava asie gari heniamu taudia ese kara namo basie ura heni; eiava Baibul haida ai ini e hahanaia toma, “namo e inai heniamu taudia” eiava “kara  namodia e dadaraimu.” Idia na bae lebulebu eiava sibodia basie hebiagu, bona bae daḡedaḡe. Ma haida na bae kara kava, eiava basie lalo namonamo bena ḡau bae kara, bona basie lalomu una ese ma haida be hahekwakwanaidiamu eiava lasi.

¹⁵ Daḡedaḡe animal edia kara heḡereḡeredia e karava taudia momo ese edia kara na e haidau. Una ese Baibul ena peroveta herevana e haḡuḡurua. (Isaia 11:6, 7 ba duahi.) Una siri ai e hahedinaraia daḡedaḡe animal, heḡereḡere uda sisiadia bona leona, na ubu-ubu animal, heḡereḡere boromakau natudia bona nani natudia ida maino ai bae noho. Una na be vara momokanimu badina “tanobada na Iehova idiba-maorona ai baine honu.” (Isa. 11:9) To, animal ese Iehova na basie dibaia diba, una dainai una peroveta herevana na taunimanima ediai baine ḡuḡuru.

16. Edena dala ai Baibul ese taunimanima e durudiamu edia kara bae haidau totona?

¹⁶ Guna momo edia kara na uda sisiadia heḡereḡeredia, to hari idia na ma haida ida maino ai e nohomu. Idia haida edia ekspiriens na jw.org ai, kaha ta ladana “The Bible Changes Lives” ai bo davari dibamu. Iehova e dibaiamu bona e hesiai heniamu taudia edia kara na idau, dia Dirava ibadinana na koukouna mo e abiamu a anina e dadaraiamu taudia heḡereḡeredia, idia na e gwaumu Dirava e tomadiho heniamu to edia kara amo una na asie hahedinaraiamu. To, guna e daḡedaḡeva taudia momo ese “tau matamatana” e hahedokilaia, una na “Dirava heida-idana, kara maoromaoro ai bona hereva momokani helaḡana ai vada e karaia.” (Efe. 4:23, 24) Taunimanima ese Dirava e dibaiamu neganai, e lalopararamu iena taravatu bae badina na namo. Una ese e durudiamu e abi daemu ḡaudia, edia lalohadai bona kara bae haidau totona. Una na mai hekwarahina, to e ura dikadikamu Dirava ena ura bae karaia taudia na iena lauma helaḡa ese e durudiamu.

17. Edena dala ai kara dikadia e karamu taudia baita dadaraidia diba?

¹⁷ Dirava e hesiai heniamu taudia bona asie hesiai heniamu taudia edia idau na hedinarai ḡoevaḡoeva. Dirava ta hesiai heniamu tauda na baita henahua toho, ma haida edia kara kereredia ese basie hakauda kerere totona. Aonega dalana na, 2 Timoteo 3:2-5 ai e herevalai karadia iboudiai amo ba raka oho. Momokani, kara dikadia e karamu taudia iboudiai na basita dadaraidia dibamu. Ita na reana idia ida ta ḡaukaramu, idia ida sikuli ta laomu, eiava ta noho heboumu. To, edia lalohadai bona kara na basita tohotohodia. Una baita karaia totona, namona na Baibul baita stadilaia bona Iehova e hesiai heniamu taudia baita bamodia karana amo eda hetura karana Iehova ida baita hagoadaia.

18. Edena dala ai eda hereva bona kara ese ma haida baine durudia diba?

¹⁸ Danu, namona na baita ḡaukara goadana lauma dalana ai ma haida baita durudia totona. Dala idauidau ai ma haida ba haroro henidia totona, Iehova ba noia baine durumu nega maorodia ai hereva maorodia ba gwaurai. Namona na ma haida baita hadibaia ita na Iehova ena Witnes tauda. Bona eda kara namodia ese Dirava ladana bae hanamoa, dia ita. Dirava ese e hadibadamu Ia “idadaraina karadia bona tanobada ena lebulebu karadia baita rakatani, ina tanobada ai baita noho migomigo, baita kara maoromaoro, Dirava baita badinaia.” (Tito 2:11-14) Bema Dirava ena ura heḡereḡerena ai kara namodia baita karamu, ma haida ese unu na be itamu, bona be gwaumu: “Mani oi ida aitala, badina be ai na vada a kamonai, Dirava na dekedekemu ai.”​—Sek. 8:23.