LAḠANINA 27 painia taihu ta, Sylviana, na ini e gwau toma: “Bamogu haida na painia momo e ura henidia gabudia ela bona edia ekspiriens na kamonaimu neganai, lau danu na ura dikadikamu idia heḡereḡeredia baina moale. To, na mamiamu lau na dia heḡereḡere pablisa dia momo gabudiai baina haroro.”

Oi danu Sylviana heḡereḡerena o hemamimu, a? O ura dikadikamu Basileia iharorolaina taudia dia momo teritorina ta baola, to o daradaramu una ba karaia diba eiava lasi, a? Bema unu o hemami tomamu, namona na basio lalomanoka! Tadikaka bona taihu momo na Iehova ena heduru amo edia hesiai ḡaukara ihabadana karana e kouamu ḡaudia e hanaidia. Iehova ese idia haida e durudia dalana baita diba totona, Madagascar baita vadivadia, ia na tanobada ibounai lalonai motumotu badana ihahanina.

Laḡani 10 gunadia ai, tano 11 * amo pablisa bona painia goadadia 70 mai kahana na Africa tanona ela hesiai ḡaukara bae karaia totona, unuseni ai taunimanima momo ese Baibul na e matauraiamu. Danu, Africa ai e nohomu pablisa na mai edia ura ida ela una motumotu ibounai lalonai Basileia sivaraina bae harorolaia totona. Mani idia haida edia sivarai aita itaia.

Louis bona adavana Perrine, laḡanidia na 30 mai kahana, na France amo ela Madagascar. Laḡani momo lalodiai, idia na e lalova tano ma ta baela edia hesiai ḡaukara bae habadaia totona, to Perrine na se ura baela. Ia na eto: “Lau na na gariva asi dibagu gabuna ta baiala totona. Na lalohekwarahiva badina emai ruma bese, kongrigeisen, emai ruma, mai dibamai gabudia, bona emai mauri ai a karava ḡaudia baia rakatanidia. Momokani, egu lalohekwarahi ḡaudia baina hanaidia na auka.” Laḡani 2012 ai, Perrine na lalona e hagoadaia, bena ia bona Louis na ela. Idia e karaia abi hidina be ede e laloa toma? Louis na eto: “Una na laloa loumu neganai, baina gwau diba emai mauri lalonai Iehova ese e durumai dalana a itaia neganai, emai abidadama na e hagoadaia. Mani a laloa, Madagascar ai emai Memorial ginigunana a abia neganai, emai Baibul stiuden 10 na ema!”

 Dahaka ese e hagoadadia hekwakwanai negadiai dounu edia hesiai ḡaukara bae karaia totona? Ḡuriḡuri amo Iehova e noia goada baine henidia bae haheauka totona. (Fili. 4:13) Louis na eto: “A mamia Iehova ese emai ḡuriḡuri na e haerelaia bona ‘Dirava ena maino’ e henimai. Ai na emai hesiai ḡaukara amo a abiava moalena mo a laloava. Danu, France amo bamomai ese e-mail bona revareva e siaiva, bae hagoadamai basia hesiku totona.”​—Fili. 4:6, 7; 2 Kor. 4:7.

Louis bona Perrine edia haheauka karana dainai Iehova ese e hanamodia. Louis na eto: “October 2014 ai, ai na Kristen Headava Taudia Edia Baibul Sikuli * ala France ai. Una sikuli na Iehova ena amo a abia harihari ḡauna ta dainai asia laloaboio.” Idia na e gradueit murinai, Madagascar e siaidia lou neganai, e moale dikadika.

Didier bona adavana Nadine na laḡani 2010 ai France amo Madagascar ela, una negai laḡanidia na 50 heḡereḡerena. Didier na eto: “Ai na uhau bona ulato negamai ai a painia, bona gabeai natumai tatoi a havaradia. Idia e bada neganai, ai na a lalo tano ma ta ai hesiai ḡaukara baia karaia na namo.” Nadine na eto: “Natumai edia amo baia daudau karana na laloa neganai, asina ura baiala, to idia ese e hamaoromai: ‘Bema pablisa dia momo gabuna ta bo laomu, baia moale dikadikamu!’ Edia hereva ese e hagoadamai dainai ala. Ena be hari ai na idau tano ai a nohomu, to a moalemu badina nega momo natumai ida a herevaherevamu.”

Didier bona Nadine na e hekwarahiva Malagasy gado bae dibaia. Nadine na mai kirina ida eto: “Ai laḡanimai na dia 20.” Edena dala ai una gado e dibaia? Ḡau ginigunana na, French gado kongrigeisen ta e bamoava. Gabeai, e laloa idia na heḡereḡere neganai Malagasy gado kongrigeisen ta ela. Nadine na eto: “Haroro ḡaukara ai a davaridia taudia momo na e ura dikadikava Baibul bae stadilaia. Nega momo e tenkiu henimaiva. Matamanai, na laloava una na basine varamu. Ina teritori ai painia ḡaukarana na ura heniamu. Daba ai na nogamu neganai, sibogu na gwaumu: ‘Namo herea​—hari dina ai lau na ba haroromu!’”

Didier ese Malagasy gado e dibaia matama negana e laloa lou, bena mai kirina ida eto: “Lau ese kongrigeisen hebouna ta na hakauava, to tadikaka bona taihu ese e heniva haeredia na asina lalopararalaiva. To na gwauva mo, ‘Tenkiu.’ Taihu ta na haere e heni bena na tenkiu henia murinai, ia murinai helaidia na imadia amo e sainiva una taihu ena haere na kerere. Haraḡa herea tadikaka ta na abia hidi bena haere maorona e heni​—na diba haere maorona e heni.”

Laḡani 2005 hebouhebouna ta ai, Thierry bona adavana Nadia ese drama ladana “Pursue Goals That Honor God” e itaia. Una Baibul drama na Timoteo e herevalaia, bona una ese kudoudia e hamarerea dainai, e ura Basileia iharorolaina taudia dia momo gabuna  ta baela. Thierry na eto: “Una drama e ore bena ai iboumai imamai a patapatava lalonai, adavagu na nanadaia: ‘Ita be edena gabu baita laomu?’ Adavagu na eto ia danu unu e lalo tomamu.” Gabeai, idia na ḡau haida e kara edia ura ḡauna bae haḡuḡurua totona. Nadia na eto: “Taina ruana, emai kohu a hoihoilaiva ela bona emai suitcase hani heḡereḡeredia kohudia mo a rakatani!”

Laḡani 2006 ai, idia raruosi na Madagascar ai e kau, bona una nega amo edia haroro ḡaukara na e moalelaiava. Nadia na eto, “A haroro henidia taudia ese emai moale na e habadaia.”

To laḡani siks muridiai, Thierry bona Nadia ediai hekwakwanai ta e vara. France ai, Nadia sinana, Marie-Madeleine, na e moru bena imana e kwaidu bona kwarana e haberoa. Idia raruosi ese Marie-Madeleine ena dokta e hereva henia murinai, Marie-Madeleine e noia Madagascar ai idia ida baine ha noho. Ena be una negai ia laḡanina na 80, to mai moalena ida edia noinoi na e abia dae. Marie-Madeleine ena hemami be ede bamona? Ia na eto: “Nega haida na auka una tano taudia edia mauri dalana baina manadalaia totona, ena be egu goada na dia heḡereḡere, to na mamiamu kongrigeisen na baina durua diba. Bona na moalelaiamu ḡauna na, natugu bona ravagu dekediai na nohomu karana ese idia e durudiamu, edia hesiai ḡaukara dounu bae karaia totona.”

Tadikaka ta ladana, Riana, laḡanina na 22. Ia na Alaotra Mangoro ai e bada, una na Madagascar ena ist kahana hanuana ta. Sikuli ai ena maka na nanamo bona e ura sikuli badana ta bainela. To, Baibul e stadilaia murinai, ena lalohadai na e haidaua. Ia na eto: “Na hekwarahiva egu secondary sikuli baina haorea bona Iehova na gwauhamata henia, ‘Bema egu eksam ginigabena baina karaia namonamo, painia ḡaukara baina hamatamaia.’” Riana na e gradueit murinai, ena gwauhamata heḡereḡerena e kara. Ia na painia tadikaka ta ida e nohova, pat-taim moni ḡaukara ta e abia, bona e painia matama. Ia na eto: “Lau na abi hidi maorona na karaia.”

To, Riana varavarana na e daradarava dahaka dainai ia na moni ḡaukara namona ta se tahua. Riana na eto: “Tamagu, vavagu, bona tubugu hahinena ta ese e hagoadaguva sikuli badana ta bainala. To asina ura ḡau ta ese egu painia ḡaukara baine hadikaia.” Se daudau, Riana na e urava pablisa dia momo gabuna ta ai hesiai ḡaukara baine karaia. Dahaka ese ena ura e habadaia? Ia na eto: “Raskol taudia na a nohomu rumana ai e vareai bona egu kohu momo e henaodia. Una henaohenao karana dainai Iesu ena hereva na laloa, ‘emui kohu na guba ai ba habou.’ Una dainai lalogu na hadaia egu hesiai ḡaukara baina habadaia.” (Mat. 6:19, 20) Ia na saot kahana ela​—una gabu ai medu na se diho momomu, bona ia e nohova gabuna amo ena daudau na kilomita 1,300 heḡereḡerena. Unuseni ai na Antandroy taudia e nohomu. Dahaka dainai ia na una gabu ela?

Hua ta gunanai, henaohenao karana do se vara neganai, Riana na Antandroy tataudia rarua ida Baibul stadi e hamatamaia. Edia gado ai hereva haida e dibadia bona Basileia sivaraina do asie kamonai Antandroy taudia momo e lalodia. Ia na eto: “Iehova ena heduru na noia, Tandroy-gado e herevalaiamu gabuna bainala totona.”

Riana na una gabu ela, to se daudau hekwakwanai ta e davaria. Moni ḡaukara ta se davaria. Tau ta ese e hamaoroa: “Dahaka dainai ina gabu oma? Taunimanima na moni ḡaukara idavarina totona, oi oma gabuna e laomu!” Wiki rua muridiai, Riana na rijinol hebouna ta ela neganai ena moni na e ore, bona e lalohekwarahiva dahaka baine kara. Hebouhebou dinana ginigabena ai, tadikaka ta ese ena kouti pokedena ai moni e uda. Una moni na heḡereḡere ia baine durua Antandroy baine lou lao, bona yogurt ihoihoilaina bisnes maraḡina ta baine hamatamaia totona. Riana na eto: “Una nega ai Iehova ena heduru na mamia. Iehova do asie dibaia taudia na dounu baina durudia diba!” Danu, kongrigeisen ai ḡaukara na bada. Riana na ma eto: “Lau na e abigu hidi pura ta ta ai pablik tok baina heni. Iehova ese ena orea amo treinin e heniguva. Hari, Riana na Tandroy-gado ai e herevamu taudia ediai Basileia sivaraina na dounu e harorolaiamu.”

Iehova na eto: “Tano ai sibona baine hahenamo tauna na hereva momokani Diravana ladana ai baine hahenamo.” (Isa. 65:16) Bema baita ḡaukara goadamu e koudamu gaudia baita hanaidia, unu amo eda hesiai ḡaukara baita habadaiamu neganai, Iehova ese be hanamodamu. Mani Sylviana, ina atikol matamanai e herevalaia taihuna, baita laloa. Matamanai, e laloava ia na dia heḡereḡere pablisa dia momo gabudia ai baine haroro totona. Dahaka dainai unu e lalo toma? Ia na eto: “Aegu idibana na kwadogi (9 cm) aegu laurina amo. Una dainai asina raka namonamomu bona na hesiku haraḡamu.”

Laḡani 2014 ai, Sylviana na ena kongrigeisen amo painia taihuna ta, Sylvie Ann, ida e ḡaukara hebouva. Idia raruosi na edia gabu amo ela hanua maraḡina ta, ena daudau na kilomita 85. Ena be Sylviana enai na auka, to ena ura ḡauna na e vara​—bona una na hahenamo ta! Ia na eto: “Laḡani ta hesiai ḡaukara na karaia murinai, na stadi heniava hahinena, Doratine, na emai seket hebouna ai e bapatiso.”

Pablisa dia momo gabudia ela taudia edia abidadama e herevalaia karana ese e hahedinaraiamu, eda hesiai ḡaukara ihabadana totona e koudamu ḡaudia baita hanaidiamu neganai, Iehova ese ena hesiai taudia e henidia gwauhamatana na be ḡuḡurumu, eto: “Baina hagoadamu, baina durumu.” (Isa. 41:10) Unu amo eda hetura karana Iehova ida na be goadamu. Danu, mai eda ura ida siboda baita henimu​—ta nohomu gabuna ai eiava idau tano ta baita laomu​—neganai, ita na ta heḡaeḡaemu tanobada matamatana ai tiokratik ḡaukaradia baita kara totona. Didier, matamanai ta herevalaia tadikakana, na eto: “Pablisa dia momo gabudia ai hesiai ḡaukara ta karamu na treinin namona vaira nega totona!” Mai edia ura ida una ḡaukara e uramu bae karaia taudia ese una treinin bae abia na namo!