1, 2. Iehova ese e kara ḡaudia be ede e ḡaukaralai tomamu?

IEHOVA na hariharibada Diravana. Ta abimu ḡaudia iboudiai na Ia ese e henidamu. Iehova ese golo, siliva, bona tano ai e miamu ḡaudia iboudiai e biagumu, bona e ḡaukaralaimu mauri iduruna totona. (Sal. 104:13-15; Hag. 2:8) Baibul sivaraidia momo ese e hahedinaraimu Iehova ese e kara ḡaudia na hoa dalana ai e ḡaukaralaimu, ena taunimanima baine durudia totona.

² Laḡani 40 lalodiai, Israel besena na tano ḡaḡaena ai e nohova neganai Iehova ese mana bona ranu e henidia. (Eso. 16:35) Una dainai, idia na “ḡau ta ai asie dabuva.” (Neh. 9:20, 21) Iehova ese peroveta tauna Elisaia ena amo hoa karana ta e karaia, mai ena abidadama vabu ta ena dehoro sisina na e habadaia. Dirava ena hariharibada karana dainai, una vabu na ena abitorehai davadia e halou, bona ena moni oredia na heḡereḡere ia bona natuna edia heubu ḡauna. (2 Han. 4:1-7) Iehova ena heduru amo, Iesu ese hoa dalana ai aniani bona moni amo taunimanima e durudia.​—Mat. 15:35-38; 17:27.

3. Ina atikol ai dahaka baita herevalaimu?

³ Iehova ese ḡau iboudiai na baine ḡaukaralai diba, tanobada  ai e havaradia ḡaudia baine durudia totona. To, ia na dounu ena hesiai taudia e noidiamu edia kohu bae ḡaukaralai, iena orea ena ḡaukara bae durua totona. (Eso. 36:3-7; Hereva Lada-isidia 3:9 ba duahia.) Dahaka dainai Iehova na e uramu eda kohu namodia na ia baita henia lou? Edena dala ai idaunega abidadama taudia ese moni dalanai Iehova ena gwaukau taudia edia ḡaukara e duruava? Hari ina negai orea ese kontribiusen monidia be ede e ḡaukaralai tomamu? Ini henanadai haeredia na ina atikol ai baita herevalaimu.

4. Iehova ena ḡaukara ta duruamu neganai dahaka ta hahedinaraiamu?

⁴ Eda harihari ḡaudia na Iehova baita henia badina ta lalokau heniamu bona ta laloa badamu. Iehova ese iduruda totona e kara ḡaudia iboudiai ta haerodiamu neganai, ta moalemu. King David ese dubu helaḡa ihaginina ḡaukarana e herevalaia neganai, e hahedinaraia ta abimu ḡaudia iboudiai na Iehova ena amo bona ia ese vada e henida ḡaudia na ia ta heniamu.​—1 Sisiga 29:11-14 ba duahi.

5. Edena dala ai Baibul ese e hahedinaraiamu hariharibada karana na tomadiho kahana badana ta?

⁵ Danu, hariharibada karana na Iehova ta tomadiho heniamu dalana ta. Aposetolo Ioane na matahanai ta ai, Iehova ena hesiai taudia guba ai edia hereva e kamonai, eto: “Emai Lohiabada, emai Dirava e, namona binai: Hairai bona hemataurai bona siahu bavabi. Badina be oi ese ḡau iboudiai o havara, emu ura dainai o karadia bona e miamu.” (Apok. 4:11) Momokani, Iehova ese hairai bona hemataurai baine abi na maoro, una dainai eda ḡau namodia baita henia na namo. Iehova ese Mose ena amo Israel besena e haḡania, laḡani ta ta ena aria toi ai Iehova vairanai bae hedinarai. Unu aria na edia tomadiho kahana ta dainai, Israel taudia na “imadia asi anidia basie hedinarai Iehova vairanai.” (Deu. 16:16) Hari ina negai danu, hariharibada karana na tomadiho kahana badana ta, una kara amo baita hahedinaraia Iehova ena orea tanobada ai ena ḡaukara na ta laloa badamu bona ta uramu baita durua.

6. Dahaka dainai hariharibada karana na mai ena namo? (Rau 17 ai laulau ba itaia.)

⁶ Hariharibada karana na mai ena namo. Dia baita abi karana mo to baita heni karana ese ita na be durudamu. (Hereva Lada-isidia 29:21 ba duahia.) Mani natu ta aita laloa, ia na tamana sinana ese e henia moni maraḡina amo harihari ḡauna ta e hoia idia baine harihari henidia totona. Tamana sinana ese una harihari ḡauna na e laloa bada, ani? Eiava painia merona o kekenina ta na tamana sinana ida e nohomu bona moni dalanai e durudiamu mauri iduruna ḡaudia ihoidia totona. Ena be tamana sinana na asie laloamu ia na unu baine kara toma, to ena harihari ḡauna na e abia daemu, badina una dala amo natudia ese edia hekwarahi baine laloa bada. Una heḡereḡerena, Iehova na e lalopararamu eda kohu namodia ta henimu karana ese be durudamu.

7, 8. Edena dala ai Baibul negadiai Iehova ena taunimanima ese kontribiusen e heniva (a) dubu ihaginina ḡaukaradia idurudia totona? (b) ḡaukara ma haida idurudia totona?

⁷ Baibul ai, taunimanima ese edia kohu amo hariharibada karana e hahedinaraia sivaraidia na e herevalai. Nega haida, Iehova ena taunimanima ese ḡaukara haida totona edia kontribiusen e heniva. Heḡereḡere, Mose ese Israel taudia e hagoadadia kalaga  helaḡana ihaginina ḡaukarana iduruna totona kontribiusen bae heni, King David danu unu e kara toma dubu helaḡa ihaginina totona. (Eso. 35:5; 1 Sis. 29:5-9) King Ioasa ena nega ai, e habou monidia na hahelaḡa taudia ese e ḡaukaralai Iehova ena ruma bae hanamoa totona. (2 Han. 12:4, 5) Kristen kongrigeisen ginigunana ai, tadikaka na e kamonai doe e vara dainai tadikakadia bae durudia na namo, una dainai lalodia e hadai “ta ta ena kohu ena kohu e abi heḡereḡeredia, edia harihari ḡauna bae siaia lao, varavara Iudea ai e nohova edia.”​—Kara 11:27-30.

⁸ Nega ma haida ai, Iehova ena taunimanima ese moni bona kohu amo ḡaukara igunalaina taudia e durudiava. Mose ena Taravatu henunai, Levi taudia na ahu ta asie abiava, dia iduhu ma haida heḡereḡeredia. To, Israel taudia ese edia kontribiusen amo Levi taudia e durudiava dainai, idia na kalaga helaḡana ai edia ḡaukara e laloa badava. (Num. 18:21) Una heḡereḡerena, Iesu bona ena aposetolo taudia na hahine haida ese edia hariharibada karana amo e durudia.​—Luka 8:1-3.

9. Idaunega ai kontribiusen haida be ede amo e abiva?

⁹ Momokani, kontribiusen na dala idauidau amo e abiva. Tano ḡaḡaena ai kalaga helaḡana ihaginina totona, Israel taudia ese e heni kontribiusen haida na Aigupto amo e abi ḡaudia. (Eso. 3:21, 22; 35:22-24) Aposetolo edia negai, Kristen taudia haida ese edia uma eiava ruma e hoihoilai, bona monidia na aposetolo taudia e henidia. Bena aposetolo taudia ese unu moni na e ḡaukaralai dabu taudia bae durudia totona. (Kara 4:34, 35) Ma haida na moni haida e ato tabeva bona ḡaukara iduruna totona e heniva. (1 Kor. 16:2) Una dainai, mauri dala idauidau taudia iboudiai​—taḡa taudia bona ogoḡami taudia​— ese harihari ḡaudia na bae heni diba.​—Luka 21:1-4.

10, 11. (a) Edena dala ai Baibul neḡadiai Iehova ena hesiai taudia edia hariharibada karana baita tohotohoa diba? (b) Basileia ena ḡaukara o duruamu karana be ede o laloa tomamu?

¹⁰ Hari ina negai, ita danu ḡaukara haida daidiai e noidamu kontribiusen baita heni. Heḡereḡere, emu kongrigeisen be palani e karamu Kingdom Hall matamatana ta bae haginia totona, a? Eiava emu Kingdom Hall e hanamoamu, a? Reana eda kontribiusen baita ḡaukaralaia eda brens ofesi bae hanamoa, o eda hebouhebou gabuna baita durua, eiava disasta gabudia ai tadikakada baita durudia. Danu, eda kontribiusen amo eda hedkota bona tanobada heḡeḡemadai brens ofesi ai e ḡaukaramu taudia baita durudia. Eda kontribiusen ese misinari, spesol painia, bona seket taudia e durudiamu. Danu, emu kongrigeisen na hanaihanai kontribiusen e siaimu hebouhebou gabudia bona Kingdom Hall ihaginidia ḡaukarana idurudia totona, una ese tadikakada tanobada heḡeḡemadai e durudiamu.

¹¹ Iehova ese ini dina gabedia ai e haḡuḡuruamu ḡaukarana na ita iboudai ese baita durua diba. Ta henimu kontribiusen na ta ese basine itaia o basine diba. Namona na haida basita hadibadia moni hida Kingdom Hall ena kontribiusen mauadia ai ta udamu, eiava Intanet ai jw.org amo ta siaimu. Reana baita laloamu eda kontribiusen na maraḡi. To, hari ina negai kontribiusen momo na harihari ḡaudia maraḡidia e henimu taudia edia amo. Ogoḡami tanodia ai e nohomu tadikakadia na Makedonia taudia heḡereḡeredia, ena be edia “ogoḡami na bada” to e noinoi harihari ḡaudia bae heni, bona hariharibada karana e hahedinaraia.​—2 Kor. 8:1-4.

12. Dirava ena orea ese kontribiusen monidia be ede e ḡaukaralai tomamu?

 ¹² Gavanin Bodi na mai ena kamonai bona kara maoromaoro ida orea ena kontribiusen iḡaukaralaina dalana e haeroa namonamomu. (Mat. 24:45) E abimu monidia na e ḡaukaralai namonamomu. (Luka 14:28) Baibul negadia ai, kontribiusen e nariva taudia ese kontribiusen na dala maorona ai e ḡaukaralaiva. Heḡereḡere, Esera na Ierusalem e lou lao neḡanai Parasa pavapavana ese e henia kohudia danu e laohai​—golo, siliva, bona ma ḡau haida, hari ina negai davadia na 100 milion dola (U.S.) mai kahana. Esera na e laloa unu kontribiusen na Iehova baine henia harihari ḡaudia, bona ia ida ela taudia e hadibadia gabu dikadia amo bae hanai neganai unu kohu na bae gimadia. (Esr. 8:24-34) Aposetolo Paulo ese kontribiusen monidia e habou Iudea tadikakadia baine durudia totona. Ia ese dala e karaia unu amo moni bae laohai taudia na bae “ḡaukara maoromaoro, Dirava vairanai bona taunimanima vairadiai.” (2 Korinto 8:18-21 ba duahi.) Hari ina negai eda orea ese Esera bona Paulo edia haheitalai e tohotohomu, bona kontribiusen monidia e ḡaukaralai namonamomu.

13. Vanegai orea lalonai e haidau ḡaudia be ede baita lalodia toma?

¹³ Ruma bese ese edia moni iḡaukaralaina dalana bae haidaua diba, unu amo moni basie nege kava eiava kohu momo basie tahu, bona Iehova ihesiai henina ḡaukarana bae habadaia. Iehova ena orea na unu e kara tomamu. Vanega laḡanidia ai, ḡau matamatadia momo e kara. Nega haida, unu ḡau daidiai moni momo e nege. Una dainai, orea na dala haida e tahumu, moni momo basie nege kava bona ḡaukara bae haharaḡaia, unu amo e abimu kontribiusen amo ḡaukara namodia momo bae kara diba.

14-16. (a) Emu kontribiusen ese dahaka ḡau haida e haḡuḡurumu? (b) Edena dala haida ai unu ḡau ese e durumumu?

¹⁴ Laḡani momo lalodiai Iehova e hesiai henia taudia momo na e gwa, hari lauma aniani momo herea e abimu, dia guna heḡereḡerena. Mani a laloa, vanega laḡanidia ai, ita ese jw.org bona JW Broadcasting kahadia ta itadia. New World Translation of the Holy Scriptures na gado momo ai e hahanaidia. Laḡani 2014/2015 ai, tanobada heḡeḡemadai hanua 14 edia steidiem badadia ai “Dirava Ena Basileia Ba Tahua Guna!” Intanesinol Hebouna e karaia. Unu hebou ela taudia iboudiai na e moale dikadika.

¹⁵ Momo na Iehova ena orea amo e abimu ḡaudia ese e durudiamu dainai e moalemu.  Heḡereḡere, Asia tanona ai hesiai ḡaukara e karamu tauna ta mai adavana ida ese JW Broadcasting amo heduru e abi karana na ini e herevalaia toma: “Ai na hanua maraḡina ta ai hesiai ḡaukara a karamu. Una dainai, nega haida a mamiamu ai na sibomai, bona Iehova ena ḡaukara ena bada na a laloaboiomu. To JW Broadcasting ai program idauidau a itamu neganai, a helalotaomu ai danu tanobada heḡeḡemadai tadikaka oreana lalonai. Eda tadikaka bona taihu ese JW Broadcasting na e moalelaiamu. Nega momo a kamonaimu e gwaumu hua ta ta edia program e itamu murinai, e mamiamu idia na Gavanin Bodi taudia badibadidia ai. Hari idia na Dirava ena orea lalonai e nohomu dainai e moalemu.”

¹⁶ Tanobada heḡeḡemadai, kahirakahira Kingdom Hall 2,500 e haginidiamu eiava e hanamodiamu. Honduras ai kongrigeisen ta na edia Kingdom Hall matamatana e ḡaukaralaia matama neganai, ini e gwau toma: “Ai na a moale dikadikamu badina Iehova ena ruma bese badana lalonai a nohomu bona tanobada heḡeḡemadai tadikaka oreana ida a ḡaukara heboumu, unu ese e durumai emai gabu ai Kingdom Hall ta a haginia.” Momo ese Baibul bona pablikeisen haida na edia gado ai e abimu, eiava dika negadia ai tadikaka bona taihu ese e durudiamu, o edia teritori ai pablik gabudiai haroro karana amo anina namona e varamu e itaiamu neganai, e moale dikadikamu.

17. Edena dala ai hari ina negai orea ena heau dalana ese e hamomokaniamu Iehova ese ḡaukara e duruamu?

¹⁷ Taunimanima momo na asie lalopararamu unu ḡaukara iboudiai na ta henimu kontribiusen monidia amo e hekaramu. Kampani badana ta biaguna na eda printin gabuna ta e vadivadia neganai, e hoa badina unu ḡaukara iboudiai na volentia taudia ese e karamu, bona taunimanima edia kontribiusen monina amo e haheauamu, bona fund-raising na asie karamu moni bae abi totona. Ia na eto unu na siboda eda goada amo basita karadia diba. Una na momokani! Mai dibada Iehova ese ḡaukara e duruamu dainai ta haḡuḡurudiamu.​—Iobu 42:2.

18. (a) Basileia baita duruamu neganai dahaka hahenamo baita abimu? (b) Edena dala ai natuda bona kamonai taudia matamatadia baita hadibadia bae heduru totona?

¹⁸ Iehova ese e ḡaukaralaidamu hari ina negai ḡaukara badana baita durua totona. Ia na e gwauhamata Basileia baita durua neganai hahenamo momo baine henida. (Mal. 3:10) Iehova na e gwauhamata hariharibada karana e hahedinaraiamu tauna na namo baine davaria. (Hereva Lada-isidia 11:24, 25 ba duahi.) Hariharibada karana ese danu baine hamoaleda, badina “ḡau ihenina ena moale be bada, ḡau iabina ena moale be maraḡi.” (Kara 20:35, NWT) Eda hereva bona kara amo, natuda bona kamonai taudia matamatadia baita hadibadia edena dala ai idia danu ina ḡaukara bae durua bona hahenamo momo bae moalelai diba.

19. Ina atikol ese oi be ede eme durumu toma?

¹⁹ Ta davarimu ḡaudia iboudiai na Iehova ena amo e maimu. Unu ḡau Ia baita henia loumu karana ese be hahedinaraiamu Ia ta lalokau heniamu bona ita daidai e kara ḡaudia iboudiai na ta lalodia badamu. (1 Sis. 29:17) Israel taudia ese dubu helaḡa ihaginina totona kontribiusen e heni neganai, “taunimanima na e moale, badina be vada e heni mai lalo-uradia ida; badina be idia ese mai lalodia idoidiai Iehova vada e henia dudukau.” (1 Sis. 29:9) Ita danu Iehova ena amo ta abimu ḡaudia na mai moaleda ida Ia baita henia lou.