1. Dahaka dainai ita na nega idau hereana ta lalonai ta nohomu?

ITA na nega idau hereana ta lalonai ta nohomu. Baibul ena hereva heḡereḡerena, Iehova ese “hutuma bada-herea . . . bese idau-idau bona iduhu idau-idau bona hanua idau-idau bona gado idau-idau amo” e haboudiamu. Idia iboudiai na “bese badana mai goadana” ai ela; idia na 8 milion mai kahana bona mai moaledia ida Dirava “isiaina e lao heni boimu e lao heni ranimu.” (Apok. 7:9, 15; Isa. 60:22) Hari ina negai taunimanima momo ese Dirava bona tadikakadia e lalokau henidiamu, dia guna heḡereḡerena.

2. Dirava ena amo e daudaumu taudia ese edena lalokau e hahedinaraiamu? (Rau 22 ai laulau ba itaia.)

² To, Baibul na ma e peroveta, hari ina negai Dirava ena amo e daudaumu taudia ese sibodia bae helalokau heni karana bae hahedinaraia. Aposetolo Paulo na eto: “Dina gabedia ai . . . , taunimanima na sibodia bae heura heni; moni bae mata ḡaniḡani henia . . . lebulebu karadia bae ura heni bada, Dirava bae ura henia maraḡi.” (2 Tim. 3:1-4) Una lalokau bona Kristen lalokauna na mai edia idau. Sibodia edia namo e tahumu taudia na asie moalemu. Momokani, unu bamona lalokauna ese dika baine havaraia diba.

3. Ina atikol ai dahaka baita herevalaiamu, bona dahaka dainai?

³ Paulo na mai dibana taunimanima momo na sibodia bae helalokau  heni, bona una ese Kristen taudia baine hakaudia kerere diba. Una dainai, e hadibadia una lalokau e hahedinaraiamu taudia edia amo bae “raka oho.” (2 Tim. 3:5) To, unu bamona taudia baita dadaraidia na auka. Una dainai, edena dala ai tanobada taudia edia kara baita dadaraidia bona baita hekwarahi Iehova, lalokau Diravana, baita hamoalea? Mani Dirava ilalokau henina karana bona 2 Timoteo 3:2-4 ai e herevalaia lalokauna edia idau aita herevalai. Unu baita kara tomamu neganai, be durudamu moale korikorina baine havaraia lalokauna baita hahedinaraia totona.

4. Dahaka dainai dala maorona ai siboda baita helalokau heni na asi ena kerere?

⁴ Paulo na eto: “Taunimanima na sibodia bae heura heni.” Siboda baita heura heni eiava baita helalokau heni be kerere, a? Lasi, siboda baita helalokau heni karana na vaevae ta hahedinaraiamu karana, bona mai ena namo. Iehova ese ita e karada neganai una ura na e henida. Iesu na eto: “Dekemu tauna ba lalokau henia, sibomu o helalokaumu heḡereḡerena.” (Mar. 12:31) Bema siboda basita helalokaumu, dekeda taudia na basita lalokau henidia dibamu. Danu Baibul na eto: “Tatau ese adavadia bae lalokau henidia, sibodia tau-anidia e lalokau henimu heḡereḡerena. Adavana e lalokau heniamu tauna ese sibona e helalokaumu. Badina be tau ta ese sibona tau-anina se inai heniamu, to e ubuamu bona e dosiamu.” (Efe. 5:28, 29) Una dainai, dala maorona ai siboda baita helalokau heni na asi ena kerere.

5. Sibodia e helalokau henimu taudia edia kara be ede bo herevalaia tomamu?

⁵ To, 2 Timoteo 3:2 ai e herevalaia lalokauna na dia lalokau maorona. Una na ta sibona ena namo e tahuamu lalokauna. Una lalokau e hahedinaraiamu taudia na sibodia e helalomu. (Roma 12:3 ba duahia.) Bona ma haida na asie lalodia badamu. Hekwakwanai e varamu neganai, gwau na ma haida e henidiamu, badina asie uramu bae kerere. Unu bamona taudia na asie moalemu.

6. Dirava ilalokau henina karana ese dahaka e havaraiamu?

⁶ Baibul mai dibadia momo taudia haida na e gwaumu, aposetolo Paulo ese dina gabedia ai bae vara kara dikadia e gwaurai neganai, e gwauraia karana ginigunana na, taunimanima na sibodia bae heura heni, una kara amo kara dikadia ma haida e varamu. To, Dirava e lalokau heniamu taudia ese kara namodia e hahedinaraimu. Baibul ese Dirava ilalokau henina karana na moale, maino, haheauka, hebogahisi, kara maoromaoro, hereva ibadinana, manau, bona boga-auka ida e gwauraidia hebou. (Gal. 5:22, 23) Salamo itorena tauna na eto: “Ena Dirava be Iehova besena na e moalemu.” (Sal. 144:15) Iehova na moale Diravana, bona iena taunimanima ese una kara na e hahedinaraiamu. Danu, sibodia e helalokau henimu taudia na e uramu idia mo ḡau namodia bae abi, to Iehova ena hesiai taudia na e moalemu badina edia nega bona goada e ḡaukaralaimu ma haida bae durudia totona.​—Kara 20:35.

7. Ededia henanadai ese be durudamu eda lalokau Dirava enai baita laloa totona?

⁷ Ede baita diba tomamu bema ita na siboda ta helalokau heni badamu to Dirava ta lalokau henia maraḡimu? Mani Filipi 2:3, 4 ena sisiba aita laloa, e gwaumu: “Ḡau ta basio karaia heiri-heiri dainai eiava hekokoruku dainai; a ta ta sibomui ba hahemanau, bamomui ba imodaidia. Bona ta ta ena namo ena namo basio tahu, a bamomui edia namo ba tahu.” Siboda baita henanadai: ‘Egu mauri lalonai una sisiba na badinaiamu, a? Lau be mai momokanigu ida Dirava ena ura na karaiamu, a? Lau ese kongrigeisen lalonai bona haroro ḡaukara ai ma haida idurudia karana na laloa badamu, eiava?’  Nega haida eda nega bona goada baita ḡaukaralaimu na mai hekwarahina. Una baita karaia totona, namona na baita ḡaukara goada bona eda ura ḡaudia haida baita dadarai. To ta moalemu badina ta dibamu ḡau iboudiai e lohiadiamu Diravana ese e lalonamo henidamu.

8. Dirava ilalokau henina karana ese haida e hagoadadia dahaka e kara?

⁸ Haida na Dirava ilalokau henina karana ese e hagoadadia dainai, edia pei bada moni ḡaukaradia e rakatani, Iehova ihesiai henina ḡaukarana bae habadaia totona. United States ai e nohomu taihuna ta, Ericka, na dokta ta. Ia ese ena dokta ḡaukarana na se laloa bada to regula painia ḡaukara e karaia, bona adavana ida ela tano haida ai hesiai ḡaukara bae karaia totona. Ia na eto: “Idau tano ai ma haida idurudia karana amo a davari ekspiriens momo, bona tura namodia edia hebamo karana ese emai mauri na e haidaua. Lau na doini dokta ḡaukarana na karaiamu, to egu nega bona goada bada na ḡaukaralaiamu ma haida ediai Dirava sivaraina na herevalaiamu bona tadikaka taihu na durudiamu karana amo moale korikori na davariamu.”

9. Dahaka dainai moni imataḡaniḡani henina karana ese moale na se havaraiamu?

⁹ Paulo na eto taunimanima na “moni bae mata ḡaniḡani henia.” Laḡani haida gunanai, Ireland ai, painia tadikakana ta ese tau ta enai Dirava e herevalaia. Una tau ese ena paosi e vaia, bena moni pepadia haida e abi lasi, e dudui isi, bona mai hekokorokuna ida eto, “Ina na egu dirava!” Ena be taunimanima momo na unu basie kara tomamu, to idia ese moni bona moni amo bae hoi diba ḡaudia na e ura heni badamu. To, Baibul na eto: “Moni e ura heniamu tauna ese moni baine abi, to lalona basine heḡereḡere; bona taḡa e ura heniamu tauna ese ena taḡa baine habadaia, to lalona basine heḡereḡere.” (Koh. 5:10) Unu bamona taudia na be uramu moni momo bae habou, bona be hekwarahimu moni bae abi totona, to “hisihisi momo” bae davari.​—1 Tim. 6:9, 10.

10. Baibul ese ogoḡami bona taḡa be ede e herevalaidia toma?

¹⁰ Momokani, moni na mai ena namo. Ia na hegima ḡauna. (Koh. 7:12) To, taunimanima ta baine moale diba bema ena moni na heḡereḡere ena dabu ḡaudia iabidia totona, a? Oibe! (Kohelete 5:12 ba duahia.) Aguru Iake na eto: “Ogoḡami eiava taḡa basio henigu, a egu hitolo heḡereḡerena ai mo ba ubugu.” Ta lalopararamu dahaka dainai ia na se ura baine ogoḡami. Ia na ma eto, ia na se ura baine henaohenao, badina henaohenao karana ese Dirava ladana e hadikaiamu. To dahaka dainai ia na e ḡuriḡuri basine taḡa totona? Ia na eto: “Bogagu baine kunu bena baina ḡoremu, bainato ‘Iehova be daika?’ na garina.” (Her. 30:8, 9) Edia taḡa e lalo badamu to Dirava asie laloa badamu taudia haida na reana mai dibamu.

11. Iesu be dahaka sisiba e heni?

¹¹ Moni e ura heni badamu taudia ese Dirava na basie hamoalea diba. Iesu na eto: “Asi tauna ta ese biagu rarua isiaidia baine lao heni diba. Badina be ta baine inai henia, ta baine lalokau henia; eiava ta baine badinaia, ta be baine dadaraia. Dirava bona Taḡa isiaidia basio lao heni diba.” Una hereva do se gwauraia neganai, Iesu na ini e gwau toma: “Emui kohu na ina tanobada ai basio habou, iniseni ai pitopito bona hogohogo ese e ani oremu, iniseni ai danu henao taudia ese ruma e dareamu bona e henaomu. A emui kohu na guba ai ba habou, unuseni ai pitopito bona hogohogo ese asie ani oremu, unuseni ai danu henao taudia ese ruma asie dareamu, asie henaomu.”​—Mat. 6:19, 20, 24.

12. Edena dala ai moni bona kohu momo basita tahu karana ese baine duruda Dirava baita hesiai henia? Haheitalai ta ba gwauraia.

 ¹² Momo na e davaria moni bona kohu momo asie tahumu karana ese dia e hamoalediamu mo, to danu idia na mai edia nega Iehova bae hesiai henia totona. United States ai e nohomu tadikakana, Jack, ese ena ruma badana bona bisnes e hoihoilai badina mai dibana unu baine kara toma neganai, ia bona adavana na bae painia diba. Ia na eto: “Emai ruma namona bona tano baia hoihoilai na auka. To, laḡani momo lalodiai, ruma na maiva neganai ḡaukara gabunai e varava hekwakwanaidia daidiai na lalohisihisiva. Adavagu na regula painia, bona hanaihanai e moaleva. Ia ese e hamaoroguva, ‘Egu bosi na bosi hereadaena!’ Hari, lau danu na painiamu, bona ai raruosi na biagu tamona, Iehova, a hesiai heniamu.”

13. Edena dala ai moni baita laloa maoromaoro?

¹³ Moni baita laloa maoromaoro totona, namona na mai momokanida ida ini henanadai ihaerelaidia dalana baita laloa: ‘Baibul ese moni e herevalaia dalana be na abia dae momokani bona na badinaiamu, a? Egu mauri lalonai moni itahuna karana na atoa gunamu, a? Lau be moni bona kohu na lalo badamu to egu hetura karana Iehova bona taunimanima ida na laloa maraḡimu, a? Lau be na abia dae momokanimu Iehova ese egu dabu ḡaudia baine heni, a?’ Ta diba momokanimu Ia e abidadama heniamu taudia na baine durudia.​—Mat. 6:33.

14. Edena dala ai moale karadia baita lalodia maoromaoro?

¹⁴ Baibul ese e perovetalaia heḡereḡerena, taunimanima na “lebulebu karadia [“moale karadia,” NWT] bae ura heni bada.” Dala maorona ai siboda baita helalokau heni bona moni baita laloa maoromaoro na namo, una heḡereḡerena dala maorona ai moale karadia baita kara na namo. Iehova na se uramu siboda eda ura ḡaudia baita tahu eiava moale karadia maorodia baita dadarai. Baibul ese abidadama taudia e hagoadadia, eto: “Aola, amu bavania mai moalemu ida, bona emu vine ranuna ba inua mai lalo-namomu ida.”​—Koh. 9:7.

15. Timoteo Iharuana 3:4 ai edena moale karana e herevalaia?

¹⁵ Timoteo Iharuana 3:4 ese moale karadia  e ura heni badamu bona Dirava asie laloa badamu taudia e herevalaidia. Diba bada tauna ta na ini e gwau toma: “Una [siri] na dia eto idia ese Dirava bae lalokau henia danu, to anina na idia ese Dirava na asie lalokau henia momokanimu.” Moale karadia e ura heni badamu taudia ediai una hahediba herevana na mai anina bada! Ina hereva, “lebulebu karadia bae ura heni bada,” na tanobada “ena moale ese e habubunidiamu” taudia e herevalaidiamu.​—Luka 8:14.

16, 17. Iesu ese moale karadia be ede e lalodia toma?

¹⁶ Iesu ese moale karadia ai lalohadai maorona e abia. Ia ese “headava” ariana ta bona ia dainai e karaia “aria badana” ta ela. (Ioa. 2:1-10; Luka 5:29; NWT) Headava gabuna ai, wain e ore neganai, Iesu ese hoa dalana ai ranu na wain ai e halaoa. Bona nega ma ta ai, haida e gwauva ia na aniani momo bona inuinu momo tauna neganai, Iesu ese e hahedinaraia edia lalohadai na kerere.​—Luka 7:33-36.

¹⁷ To, Iesu ese ena mauri lalonai moale karadia na se ato guna. Ia ese Iehova e atoa guna bona e ḡaukara goadava ma haida baine durudia totona. Ia na mai ena ura ida hisihisi auna ai e mase, unu amo taunimanima baine hamauridia. Iesu ese ia murinai e rakava taudia e hamaorodia: “Lau daigu ai umui bae uduguiraimui, bae daḡedaḡe henimui, bae gwau dika henimui koikoi, negadia ai na do ba namo. Ba moale, ba moale hisi dae, badina be guba ai davamui baine bada; badina be e gunalaimui taudia, peroveta taudia, na unu e daḡedaḡe henidia tomava.”​—Mat. 5:11, 12.

18. Ededia henanadai ese bae duruda moale karadia baita lalodia maoromaoro?

¹⁸ Edena dala ai moale karadia baita lalodia maoromaoro? Namona na siboda baita henanadai: ‘Lau be moale karadia na ato gunamu, to hebou bona haroro ḡaukara be gabeai, a? Na uramu Iehova baina hesiai henia dainai sibogu egu ura ḡaudia haida be mai lalogu idoinai ida na dadaraimu, a? Moale karadia na abi hidimu neganai, Iehova ese egu abi hidi baine laloa dalana na haeroamu, a?’ Bema Iehova ta lalokau henia momokanimu, Ia ese se moalelaimu karadia bona e inai henimu ḡaudia baita dadaraimu.​—Mataio 22:37, 38 ba duahi.

19. Daidia na basie moale diba?

¹⁹ Laḡani 6,000 lalodiai taunimanima na e hisihisimu, to Satana ena tanobada na kahirakahira be oremu. Tanobada ai taunimanima momo na sibodia e helalokau henimu, moni e mata ḡaniḡani henimu bona moale karadia e ura heni badamu. Idia na e ura dikadikamu edia ura ḡaudia mo bae abi, bona edia mauri lalonai edia ura ḡaudia mo e ato gunamu. Unu bamona taudia na basie moale diba. To, salamo itorena tauna na eto: “Iakob ena Dirava ese e kahaiamu tauna na e moalemu; ena helaro be Iehova, ena Dirava.”​—Sal. 146:5.

20. Edena dala ai Dirava ilalokau henina karana ese e hamoalemumu?

²⁰ 0 Dirava ilalokau henina karana na iena taunimanima ese e hahedinaraiamu, bona laḡani ta ta ai momo na ia e dibaiamu bona e lalokau heniamu. Una ese e hamomokaniamu Dirava ena Basileia na e lohiamu bona kahirakahira tanobada ai hahenamo momo herea baine havara. Moale korikori na Dirava ena ura ikarana amo e varamu, una ta dibamu neganai ita ese Herea Mikamika Diravana ta hamoaleamu. Bona Iehova e lalokau heniamu taudia na bae moale hanaihanai. Stadi gabena ai, siboda baita helalokau heni karana amo e varamu karadia haida baita herevalaimu, bona baita itaiamu edena dala ai unu kara na Iehova ena hesiai taudia edia kara amo idau.