OIBE, nega haida. Mani haheitalai ta aita laloa. Deuteronomi 24:14, 15 na eto: “Emu hesiai tauna mai davana, Israel tauna eiava noho-hedoa tauna, bema ogoḡami, emu kara na basine auka ienai. . . . Ia ese Iehova baine tai henia, oi baine habadelaimu, bena oi na ba kerere na garina.”

Una noinoi herevana na laḡani 600 B.C.E. lalodiai e torea. Una na Ashdod badinai e davaria. Una toretore na uro makohina ta ai e torea bona biru tauna ta e herevalaia, ia ese e habou witidia na se siai. Ini e gwau toma: “Emu hesiai tauna [e noinoi tauna] na dina haida lalodiai witi e habou murinai, Shobay natuna, Hoshayahu, ema bona emu hesiai tauna ena dabua e abia. . . . Lau ida dina siahu lalonai witi a habouva taudia ese una be hamomokaniamu . . . lau na na hereva momokanimu. Lau na kerere ta asina karaia. . . . Bema oi gavana na ba laloa emu hesiai tauna ena dabua iheni louna na dia emu maduna, mani hebogahisi dainai una ba karaia! Emu hesiai tauna na asi ena dabua neganai, ba hereva hedinarai na namo.”

Histori itorena tauna Simon Schama na eto, una noinoi herevana ese “e hadibada, hesiai tauna na e ḡaukara goada badina e ura dikadika [iena dabua] na baine abia lou. Danu, e hahedinaraia noinoi tauna na Baibul ena taravatu haida na mai dibana, heḡereḡere Levitiko bona Deuteronomi ai na eto ogoḡami tauna na basie kara auka henia.”