1-2. (a) Lohiabada ena Anibou ai hutuma e hegogomu neganai Iehova ese idia be ede e lalodia tomamu? (Rau 1 laulauna ba itaia.) (b) Ina atikol ai dahaka baita herevalaiamu?

MANI a laloa, tanobada heḡeḡemadai Lohiabada ena Anibou hebouna ai hutuma e hegogomu neganai, Iehova ese idia be ede e lalodia tomamu? Ia na una hebou e laomu taudia iboudiai e itadiamu bona ta ta e lalodiamu. Heḡereḡere, e itaiamu, haida na laḡani ta ta una hebou na se reaiamu. Idia bogaraḡidiai reana haida na daḡedaḡe bada e davarimu to dounu e maimu. Haida be pura ta ta heboudia asie maimu, to Memorial hebouna be e maimu badina e dibamu una hebou na mai anina bada. Danu, haida be reana edia nega ginigunana Memorial e maimu, badina e uramu ina hebou ai e varamu ḡaudia bae diba.

² Oibe, Iehova na e moalemu badina hutuma na Memorial e maimu. (Luka 22:19) To, Iehova na taunimanima hida una hebou baema na se laloamu. Ia ese e laloa badamu ḡauna na, idia e maimu badina. Ina atikol ai, mai anina bada henanadaina ta baita herevalaiamu: Dahaka dainai laḡani ta ta Memorial hebouna ta laomu, bona dia una mo, to Iehova ese ia e lalokau heniamu taudia daidiai e heḡaeḡaelai wiki ta ta heboudia ta lao henimu?

3-4. (a) Dahaka dainai hebou ta laomu? (b) Hebou ta lao henimu karana ese dahaka e hahedinaraiamu? (c) 1 Korinto 11:23-26 ena hereva heḡereḡerena, dahaka dainai Memorial hebouna basita reaia?

³ Kongrigeisin heboudia ta maimu badina badana na, unu hebou na eda tomadiho kahana ta. Ta heboumu badina ma ta na, Iehova na unu hebou amo e hadibadamu. Hekokoroku taudia na asie uramu haida ese bae hadibadia.  (3 Ioa. 9) To, ita be ta ura dikadikamu Iehova bona ia ese e ḡaukaralaiamu oreana ese baine hadibada.​—Isa. 30:20; Ioa. 6:45.

⁴ Hebou ta lao henimu karana ese e hahedinaraiamu ita na ta manaumu, bona ta uramu ta ese baine hadibada. Iesu ena mase Ilalotaona hebouna ta laomu badina na, ta dibamu una na eda maduna bona Iesu ena haheḡani ta badinaiamu, eto: “Ini ba kara toma, lau ba lalogu.” (1 Korinto 11:23-26 ba duahi.) Una hebou ese eda vaira nega helarona e hagoadaiamu bona e hadibadamu Iehova na ita e lalokau henida badamu. To, Iehova na mai dibana ta ese hanaihanai baine hagoadada bona tauda baine halo na namo. Una dainai wiki ta ta heboudia e heḡaeḡaelai bona e haḡanidamu unu hebou baita lao heni. Una haheḡani baita badinaia totona baita manau na namo. Wiki ta ta, ita na hora haida lalodiai unu hebou totodia ta heḡaeḡaemu bona ta laomu.

5. Dahaka dainai manau taudia ese Iehova ena boiboi e abia daemu?

⁵ Laḡani ta ta, Iehova na manau taudia e boiridiamu baine hadibadia, bona momo ese iena boiboi na e abia daemu. (Isa. 50:4) Nega ginigunana Memorial e laomu taudia na una hebou e moalelaiamu dainai, gabeai hebou haida danu e laomu. (Sek. 8:20-23) Idia bona ita na ta uramu Iehova ese baine hadibada bona baine hakauda, badina ia na ita ‘ikahada bona ihamaurida Diravana.’ (Sal. 40:17) Ta moalemu badina ita ese Iehova bona Natuna lalokauna Iesu, edia boiboi ta abia dae badina ta uramu idia ese bae hadibada.​—Mat. 17:5; 18:20; 28:20.

6. Edena dala ai tau ta na manau karana ese e durua Memorial ela?

⁶ Laḡani ta ta, ita na hutuma ta boiridiamu Iesu ena mase Ilalotaona hebouna baema. Manau taudia momo na eda boiboi e abia daemu bona una hebou e moalelaiamu. Haheitalai ta aita laloa. Laḡani haida gunadiai, tau ta na Memorial invateisen pepana ta e abia, to una pepa e henia tadikakana e hamaoroa ia na basine laomu. To, Memorial hanuaboina ai, tadikaka na e hoa badina e itaia una tau na Kingdom Hall ai e raka vareai. Una tau na e moale badina tadikaka taihu ese e hedavari heniava, una dainai eda wiki ta ta heboudia e lao heni matama. Murina laḡanidiai, ia na hebou toi mo e rea. Dahaka dainai hebou iboudiai e laova? E manau dainai. Ia e vavea tadikakana na gabeai eto: “Ia na manau tauna.” Iehova ese una tau e veria mai Ia baine tomadiho henia, bona hari ia na tadikaka ta.​—2 Sam. 22:28; Ioa. 6:44.

7. Edena dala ai hebou ai ta dibamu bona Baibul ai ta duahimu ḡaudia ese e durudamu baita manau?

⁷ Hebou ai ta dibamu ḡaudia bona Baibul ai ta duahimu ḡaudia ese e durudamu baita manau. Memorial wikina e lao heniamu lalonai, eda hebou ai ita na Iesu ena haheitalai bona mai manauna ida ena mauri e bouboulaia karana ta herevalaiamu. Bona Memorial wikina ai, e hagoadadamu Baibul ai Iesu ena mase bona toreisi lou sivaraidia baita duahi. Hebou ai ta dibamu ḡaudia bona Baibul sivaraidia ta duahimu neganai, ta hahedinaraiamu Iesu ese ita daidai e heni boubou ḡauna na ta laloa badamu. Una ese e hagoadadamu iena manau karana baita tohotohoa bona Iehova ena ura baita badinaia, herevana ita edai una na mai hekwarahina.​—Luka 22:41, 42.

8. Edena dala ai Iesu ese e hahedinaraia ia na se gari?

⁸ Danu, ta uramu Iesu heḡereḡerena basita gari. Mani a laloa, ena mase negana e kahikahiva neganai, e hahedinaraia ia na se gari. Dibana kahirakahira inaina ese bae hahemaraia, bae dadabaia, bona bae hamasea. (Mat. 20:17-19) To mase garina na se gari. Bae dabaia tao negana e kau neganai, ia ida Getesemane ai e noho aposetolo taudia e hamaorodia, eto: “O tore, aitala; taogu itorena tauna vada e maimu.” (Mat. 26:36, 46) Bena bae arestia taudia e kau neganai, ia na vairadia ela, bona e hadibadia e tahuamu tauna na ia, bena soldia e haḡanidia ena aposetolo hari bae siaidia. (Ioa. 18:3-8) Oibe, Iesu ese e hahedinaraia ia na se gari! Hari, horoa Kristen taudia bona mamoe idaudia na e ḡaukara goadamu Iesu heḡereḡerena basie gari. Edena dala ai?

9. (a) Dahaka dainai hebou basita readia totona basita gari na namo? (b) Edena dala ai eda haheitalai ese dibura ruma ai e nohomu tadikakadia e durudiamu?

⁹ Hebou basita readia totona, nega aukadia ai baita hahedinaraia ita na asita garimu. Tadikaka bona taihu haida, ena be e lalometaumu, e lalomanokamu, eiava e goreremu to hebou na se readiamu. A haida be edia ruma bese taudia eiava gavamani ese e daḡedaḡe henidiamu to asie garimu hebou baela. Mani a laloa, eda haheitalai ese edia abidadama dainai dibura ruma ai e atodia tadikakadia na e durudiamu. (Heb. 13:3) E kamonaimu ita na hahetoho lalodiai Iehova dounu ta hesiai heniamu neganai, una ese e hagoadadiamu edia abidadama bae dogoatao tarika-tarika, basie gari, bona Iehova bae badinaia. Aposetolo Paulo enai una na e vara. Roma dibura rumana ai e nohova neganai, e moaleva badina e kamonaiva tadikaka ese Dirava e hesiai henia goadagoadava. (Fili. 1:3-5, 12-14) Paulo na dibura ruma ai do se ruhaia eiava e ruhaia murinai, Heberu tadikaka e tore henidia. Una revareva ai abidadama Kristen taudia e haḡanidia, ‘heura-heheni na bogaraḡidiai baine hesiriu’ bona edia hegogo karadia na basie nege.​—Heb. 10:24, 25; 13:1.

10-11. (a) Daidia baita vavedia Memorial baema? (b) Efeso 1:7 ese unu baita kara toma badina be ede e herevalaia toma?

¹⁰ Varavarada, ta ḡaukara heboumu taudia, bona dekeda taudia na Memorial hebouna totona ta vavediamu neganai, ta hahedinaraiamu ita na asita garimu. Dahaka dainai ta vavediamu? Iehova bona Iesu ese ita daidai e karaia ḡauna ta laloa badamu dainai ta ura dikadikamu haida baita boiridia Memorial baema. Ta uramu idia na bae diba mauri davana, Iehova ena “harihari-bada ḡoeva-daena,” amo idia danu namo bae davari diba.​—Efeso 1:7 ba duahia; Apok. 22:17.

 ¹¹ Tadikakada ida ta hegogomu karana amo ta hahedinaraiamu ita na asita garimu, bona kara namona ta danu ta hahedinaraiamu, una na Dirava bona Natuna edia kara badana ta.

12. (a) Edena dala ai iseda hebou ese eda lalokau Iehova bona Iesu ediai e habadaiamu? (b) Edena dala ai 2 Korinto 5:14, 15 ese e hagoadadamu Iesu baita tohotohoa?

¹² Iehova bona Iesu ta lalokau henidiamu dainai hebou ta laomu. Hebou ai ta dibamu ḡaudia ese eda lalokau Iehova bona Natuna ediai e habadaiamu. Idia ese ita daidai e kara ḡaudia na hanaihanai hebou ai ta herevalaimu. (Roma 5:8) Memorial ese ita bona mauri davana ena namo asie lalopararalaiamu taudia e hadibadamu, Iehova bona Iesu ese ita na e lalokau henida badamu. Ta moalemu dainai, ta uramu dina ta ta Iesu baita tohotohoa. (2 Korinto 5:14, 15 ba duahi.) Danu, kudouda e hamarereamu dainai Iehova ta imodaiamu badina mauri davana e heni. Baita imodaia dalana ta na eda hebou ai haere namodia baita heni.

13. Iehova bona Natuna ediai iseda lalokau be ede baita hahedinaraia toma? Ba herevalaia.

¹³ Iehova bona Natuna ediai iseda lalokau baita hahedinaraia totona, eda ura ḡaudia haida baita dadarai. Unu baita kara toma unu amo eda hebou baita lao heni diba. Kongrigeisin momo edia hebou na adorahi ḡaukara muridiai e heabimu, unu na tauanida e hesikumu negadia. Bona hebou ma ta be wiken ai e heabimu, unu na taunimanima e laḡa-animu negadia. Ena be tauanida e hesikumu to unu hebou ta laomu neganai Iehova ese unu be e itamu, eiava? Oibe. Ena be nega haida hebou baitala na mai hekwarahina, to ta laomu neganai Iehova enai una na mai anina bada.​—Mar. 12:41-44.

14. Edena dala ai Iesu na sibona ena ura e dadaraia lalokauna e hahedinaraia?

¹⁴ Iesu na sibona ena ura e dadaraia lalokauna e hahedinaraia. Ia na mai ena ura ida ena hahediba taudia daidiai e mase, dia una mo, to danu ena mauri lalonai idia edia namo e laloa bada. Heḡereḡere, ena be tauanina e hesiku bona lalona e hekwarahi bada hereava, to nega e ato ena hahediba taudia baine  hagoadadia. (Luka 22:39-46) Bona ma haida baine durudia dalana e laloa bada, dia ia bae durua dalana e laloa. (Mat. 20:28) Bema iseda lalokau Iehova bona tadikakada ediai na goada, ḡau ta ese basine koudamu Lohiabada ena Anibou bona kongrigeisin heboudia ma haida baita lao henimu.

15. Ta uramu daidia baita durudia?

¹⁵ Ita na Kristen tadikaka oreana lalonai ta nohomu, bona mai moaleda ida haida ta boiridiamu ita bae bamoda. To, ta uramu eda “ekalesia taudia,” e manoka taudia, baita durudia. (Gal. 6:10) Idia ediai eda lalokau baita hahedinaraia totona, baita hagoadadia eda hebou iboudiai, Memorial hebouna danu, baema. Iehova bona Iesu heḡereḡeredia, ta moale dikadikamu bema manoka tauna ta na Iehova, Tamada lalokauna bona Mamoe Ireḡuna Tauna, e lou heniamu.​—Mat. 18:14.

16. (a) Edena dala ai baita hahegoada heheni, bona eda hebou ese ede baine duruda toma? (b) Dahaka dainai ina laḡani ai Iesu ena hereva Ioane 3:16 ai baita laloatao?

¹⁶ E maimu wikidia ai, baita ḡaukara goada momo baita vavedia Friday adorahi, April 19, 2019 ai Memorial hebouna baema. (Ina maua, “Bo Vavediamu, A?” ba itaia.) Namona na hanaihanai Iehova ese ita daidai e heḡaeḡaelai heboudia baita lao heni, baita hahegoada heheni totona. Ina nega dokona e lao heniamu lalonai, eda hebou ese baine duruda baita manau, basita gari, bona lalokau baita hahedinaraia. (1 Tes. 5:8-11) Iehova bona Natuna ese e lalokau henidamu dainai, namona na mai kudouda idoinai ida eda tenkiu karana baita hahedinaraia.​—⁠Ioane 3:16 ba duahia.