1-2. (a) Isaia 41:10 ena hereva ese taihu Yoshiko be ede e hagoadaia toma? (b) Iehova ese unu hereva be daidia idurudia totona e tore?

ABIDADAMA taihuna ta ladana Yoshiko na sivarai dikana ta e kamonai. Ena dokta ese e hamaoroa ia na basine noho daudaumu. Ia be dahaka e kara? Yoshiko na ena feiva sirina ta e laloa, Isaia 41:10. (Ba duahia.) Bena Yoshiko ese dokta e hamaoroa, Iehova ese imana e dogoataomu dainai ia na se garimu. * Una siri ena hereva ese eda taihu na e durua mai kudouna idoinai ida Iehova baine abidadama henia. Una siri tamona ese ita danu baine duruda hahetoho idauidau lalodiai basita gari. Una baita lalopararalaia totona, namona na baita tahua dahaka dainai Iehova ese una hereva na Isaia e hamaorolaia.

² Matamanai, Iehova na Isaia e hamaoroa unu hereva baine tore, unu amo Iuda taudia na gabeai Babulono bae laohaidia neganai unu hereva ese bae hagoadadia. Iehova ese unu hereva na dia iḡui ai e nohova Iuda taudia daidiai mo e tore, to una nega amo ema bona hari ena taunimanima iboudiai idurudia totona e tore. (Isa. 40:8; Roma 15:4) Hari, ita na “nega dikadia” ai ta nohomu dainai, Isaia bukana ena hahegoada herevana na mai anina bada ita edai.​—⁠2 Tim. 3:1.

3. (a) Laḡani 2019 ena siri badana, Isaia 41:10 ai, dahaka gwauhamata baita davarimu? (b) Dahaka dainai unu gwauhamata na mai anidia bada ita edai?

³ Ina atikol ai, Iehova na Isaia 41:10 ai eda abidadama ihagoadana gwauhamatadia toi e gwaurai: (1) Iehova na ita ida, (2) ia na eda Dirava, bona (3) ia ese baine duruda.  Unu gwauhamata * na mai anidia bada ita edai, badina Yoshiko heḡereḡerena, eda mauri lalonai hekwakwanai idauidau ta davarimu. Danu, tanobada ai ḡau dikadia e varamu daidiai, ta lalohisihisimu. Ita haida na gavamani goadadia ese e hahisidamu. Mani gwauhamata ta ta aita herevalai.

4. (a) Baita herevalaiamu gwauhamata ginigunana be dahaka? (Futnout danu ba itaia.) (b) Iehova ese e lalodamu dalana be ede e gwauraia toma? (c) Dirava ena gwauhamata dainai emu hemami be ede bamona?

⁴ Iehova ena gwauhamata ginigunana na ina: “Basio gari, badina be lau na oi ida.” * Iehova na ita ida, anina na ia ese e laloda badamu bona e lalokau henidamu. E lalodamu dalana na ini e gwauraia toma: “Oi davamu na bada lau vairagu ai; na matauraimumu, na ura henimumu.” (Isa. 43:4) Guba bona tanobada ai ḡau ta ese Iehova ena lalokau iena hesiai taudia ediai na basine koua diba; e bogadahisimu dainai basine rakatanidamu. (Isa. 54:10) Ia ese e lalokau henidamu bona turana ai e halaoda dainai ḡau ta garina asita garimu. Ia turana Abram (Abraham) e gimaia heḡereḡerena, ita danu baine gimada diba. Iehova ese Abram e hamaoroa, eto: “Abram, basio gari, lau na oiemu kesi.”​—Gen. 15:1.

5-6. (a) Ede ta diba tomamu Iehova na e uramu eda hekwakwanai negadiai baine duruda? (b) Yoshiko ena sivarai amo dahaka ta dibamu?

⁵ Ta dibamu Iehova na e uramu eda hekwakwanai negadiai baine duruda badina ena taunimanima e gwauhamata henidia, eto: “Ranu lalodia amo ba hanai negana ai, lau na oi ida; sinavai lalodia amo ba hanai negana ai na basie habubunimu; lahi amo ba raka hanai negana ai, basio heara; lahi hururu-hururuna ese basine ḡolemu oho.” (Isa. 43:2) Iena hereva anina be dahaka?

⁶ Iehova na se gwa eda mauri ai e varamu hekwakwanaidia baine kokidia, to baine duruda “sinavai” na heto hekwakwanaidia baita hanaidia, eiava “lahi” na  heto hahetohodia ese basie hadikada vaitani. E gwauhamata ia na ita ida, bona baine duruda hekwakwanai ‘baita hanaidia.’ Iehova be dahaka be karamu? Be durudamu basita gari, unu amo ia baita badinaia, ena be baita mase. (Isa. 41:13) Yoshiko, matamanai tame herevalaia hahinena, ese una hereva na e hamomokania. Natuna kekenina na eto: “Sinamai ena lalogoada karana a itaia neganai, a moale. A diba momokani Iehova ese lalomaino e henia. Ia ese nesi bona gorere taudia ma haida ediai Iehova bona ena gwauhamata e herevalai ela bona ena mase.” Yoshiko ena sivarai amo dahaka ta dibamu? Iehova ena gwauhamata “lau na oi ida” baita abidadama heniamu neganai, ita danu basita garimu bona hahetoho baita haheaukalaimu.

7-8. (a) Baita herevalaiamu gwauhamata iharuana be dahaka, bona anina be dahaka? (b) Dahaka dainai Iehova ese Babulono ai e nohova Iuda taudia e hamaorodia ‘kudoudia basie hetaha’? (c) Isaia 46:3, 4 ai ededia hereva ese Dirava ena taunimanima e hagoadadia?

⁷ Gwauhamata iharuana, Isaia ese e torea ḡauna, mani aita laloa, eto: “Kudoumu basine hetaha, badina be lau na oiemu Dirava.” Kudou hetaha anina be dahaka? Ina siri ai ‘kudou hetaha’ na heberu gado ai e hahanaia neganai, anina na “ta na e roha hegiro louloumu badina e garimu tau dikana ta eiava ḡau dikana ta ese baine hadikaia na garina” eiava “ta na e garimu dainai e roha idauidaumu.”

⁸ Dahaka dainai Iehova ese Babulono ai bae noho Iuda taudia e hamaorodia ‘kudoudia basie hetaha’? Badina mai dibana una tano ai e nohomu taudia na be garimu. Dahaka dainai be garimu? Iuda taudia na Babulono ai laḡani 70 e noho, bena una laḡani dokona e lao heniava lalonai Mede Parasa ena ami goadana ese Babulono hanuana e vareai henia. Iehova ese una ami e ḡaukaralaia ena taunimanima na Babulono amo baine ruhadia. (Isa. 41:2-4) Una negai Babulono taudia bona bese ma haida na e diba inaidia ese bae vareai henidia neganai, e hahegoada heheniva, e gwauva: “A boga auka.” Danu kaivakuku diravadia momo e kara, etomava unu ese bae gimadia. (Isa. 41:5-7) To, Iehova ese Iuda taudia lalodia e hagoada, eto: “Oi, Israel, egu hesiai tauna, [dia dekemu taudia heḡereḡeredia] oi na egu hesiai tauna . . . kudoumu basine hetaha, badina be lau na oiemu Dirava.” (Isa. 41:8-10) Iehova ena hereva “lau na oiemu Dirava” mani a laloa. Una hereva amo Iehova ese ia e badinaiava taudia e hadibadia, idia na se lalodia boio​—ia na dounu edia Dirava bona idia na dounu iena taunimanima. E hamaorodia, eto: “Baina abimui loaloa . . . bona baina hamaurimui.” Momokani, unu hereva namodia ese Babulono ai e nohova Iuda taudia e hagoadadia.​—Isaia 46:3, 4 ba duahi.

9-10. Dahaka dainai basita gari? Haheitalai ba gwauraia.

⁹ Hari ina negai, taunimanima na kudoudia e hetahamu badina tanobada maurina na e dika e laomu. Ita danu momo ese e davarimu hekwakwanaidia ta davarimu. To namona na basita gari. Iehova na ita e hamaorodamu, e gwaumu: “Lau na oiemu Dirava.” Dahaka dainai una hereva ese baine duruda basita gari?

¹⁰ Mani ina haheitalai ba laloa: Jim bona Ben na pleini lalonai, bona lai na bada dainai pleini na e mareremarereva. Pleini e diho daeva lalonai, pailot na spika ai ini e gwau toma: “Emui seat belt na  basio kokidia. Ita na ina lai badana lalonai taina baita heau daudaumu.” Jim na e gari dikadika. To pailot ma eto: “Basio gari. Ina na lau emui pailot.” Jim na kwarana e taiko taikoa, eto, “Ai be momokani basia hekwakwanaimu?” To e itaia Ben na se gariva. Una dainai e nanadaia: “Dahaka dainai so garimu?” Ben na mai kirina ida e gwa: “Badina ina pailot na lau mai dibagu tauna. Ia na tamagu!” Ma eto: “Mani tamagu sivaraina aina hamaoromu. Bema bo dibamu ia na pleini itarina tauna namona ta, oi danu basio garimu!”

11. Jim bona Ben edia haheitalai amo dahaka ta dibamu?

¹¹ Una haheitalai amo dahaka ta dibamu? Ben heḡereḡerena, ita danu asita garimu badina Tamada Iehova guba ai na mai dibada namonamo. Ta dibamu ina dina gabediai, ia ese be durudamu lai gubana na heto hekwakwanaidia baita haheaukalaidiamu. (Isa. 35:4) Iehova ta abidadama heniamu dainai asita garimu, a tanobada taudia na gari ese e butudia taomu. (Isa. 30:15) Danu Ben heḡereḡerena, Dirava ta abidadama heniamu badidia na dekeda taudia ediai baita herevalai. Bena idia danu bae diba, herevana dahaka hekwakwanai bae davari, to Iehova ese baine durudia diba.

12. (a) Baita herevalaiamu gwauhamata ihatoina be dahaka? (b) Ina hereva Iehova “imana” ese dahaka e hadibadamu?

¹² Gwauhamata ihatoina, Isaia ese e torea ḡauna, mani aita laloa, eto: “Baina hagoadamu, baina durumu.” Isaia na Iehova ese ena taunimanima baine hagoadadia dalana e herevalaia eto: “Iehova na mai siahuna ida e maimu, ia imana na e lohiamu.” (Isa. 40:10) Nega momo Baibul ese ina hereva “ima” e ḡaukaralaiamu neganai, una ese siahu o goada  e laulaulaiamu. Una dainai, ina hereva Iehova “imana na e lohiamu” ese e hadibadamu Iehova na King goadana. Ia ese ena siahu e ḡaukaralaia idaunegai ena hesiai taudia e hagoadadia bona e gimadia, bona hari ia e abidadama heniamu taudia danu e hagoadadiamu bona e gimadiamu.​—Deu. 1:30, 31; Isa. 43:10.

13. (a) Nega ede bamodiai Iehova na ena gwauhamata e badinaiamu? (b) Edena gwauhamata ese e hagoadadamu dainai asita garimu?

¹³ Inaida ese e daḡedaḡe henidamu neganai, Iehova na ena gwauhamata e badinaiamu, eto: “Baina hagoadamu.” Hari, tano haida ai, inaida na e hekwarahimu eda haroro ḡaukara bae koua eiava eda orea bae taravatua. To, ita na asita kudou hetahamu ena be kara unu bamodia e varamu. Iehova ena gwauhamata ese e hagoadadamu dainai asita garimu. Ia na e gwauhamata, eto: “Tuari ḡauna ta oi ihadikamu totona e karaiamu na ena ḡaukara anina basine vara.” (Isa. 54:17) Una ese mai anina bada herevadia toi e hadibadamu.

14. Dirava inaina ese e tuari henidamu neganai, dahaka dainai basita daradara?

¹⁴ Ḡau ginigunana na, ita na Keriso murinai ta rakamu dainai, taunimanima ese e inai henidamu. (Mat. 10:22) Iesu na e peroveta ena hahediba taudia na dina gabedia lalodiai daḡedaḡe bada bae davari. (Mat. 24:9; Ioa. 15:20) Ḡau iharuana na, Isaia ena peroveta herevana amo ta dibamu inaida ese dia bae inai henida mo to tuari ḡaudia idauidau amo bae hahisida danu. Unu tuari ḡaudia haida na lalo veri herevadia, koikoi herevadia, bona daḡedaḡe bada karadia. (Mat. 5:11) Iehova ese inaida na basine koudiamu unu tuari ḡaudia amo ita bae tuari henida totona. (Efe. 6:12; Apok. 12:17) To namona na basita gari. Dahaka dainai?

15-16. (a) Baita laloatao ḡauna ihatoina be dahaka, bona Isaia 25:4, 5 una hereva be ede e durua tomamu? (b) Inaida ediai be varamu ḡauna be Isaia 41:11, 12 ese ede e perovetalaia toma?

¹⁵ Baita laloatao ḡauna ihatoina mani a  laloa. Iehova eto ‘tuari ḡauna ta ita ihadikada totona e karaiamu na ena ḡaukara anina basine vara.’ Haba ta ese lai gubana amo ita e gimadamu heḡereḡerena Iehova na “asi edia hebogahisi taudia edia badu” amo e gimadamu. (Isaia 25:4, 5 ba duahi.) Ena be inaida ese bae hahisida to basie kwalimu diba.​—Isa. 65:17.

¹⁶ ‘E badu henidamu taudia’ ediai be varamu ḡauna na Iehova ese e perovetalaia bona una ese eda abidadama ia enai e hagoadaiamu. (Isaia 41:11, 12 ba duahi.) Ena be inaida ese bae hahisida eiava bae tuari henida to Dirava ena taunimanima e inai henidiamu taudia iboudiai “na bae boio vaitani.”

17-18. (a) Edena dala ai Baibul iduahina karana ese eda abidadama Dirava enai baine hagoadaia diba? Haheitalai ta ba gwauraia. (b) Laḡani 2019 ena siri badana baita laloa dobu karana ese ede baine duruda toma?

¹⁷ Eda abidadama Iehova enai baita hagoadaia totona, ia baita dibaia namonamo na namo. Dirava baita dibaia namonamo dalana tamona na, Baibul baita duahia bona ta duahimu herevadia na baita lalodia dobu. Iehova ese idaunegai iena taunimanima e gimadia sivaraidia na Baibul ai hehetore. Unu sivarai amo ta diba momokanimu ita danu be gimadamu.

¹⁸ Isaia ese laulau herevana ta amo Iehova ese ita e gimadamu dalana e herevalaia. Iehova na mamoe ireḡuna tauna ida e haheḡereḡerea bona Dirava ena hesiai taudia be mamoe ida e haheḡereḡeredia. Isaia ese Iehova na ini e herevalaia toma: “Mamoe natudia na imana ai baine rosidia, bona kemena ai baine rosidia lao.” (Isa. 40:11) Iehova ena hegima karana ta mamimu neganai asita garimu, vaitani imana goadana ai e rosidamu. Herevana dahaka hekwakwanai baita davari to basita gari totona, hesiai tauna mai ena kamonai bona kara maoromaoro ese Isaia 41:10 e abia hidi laḡani 2019 ena siri badana ai bainela. E gwaumu: “Kudoumu basine hetaha, badina be lau na oiemu Dirava.” Una hereva na ba laloa dobu. Be hagoadamumu vaira ai bae vara hahetohodia ba haheaukalai totona.