1. Laḡani 1935 ena hebou badana ta ai, Tadikaka Rutherford ena tok ese mero ta be ede e durua toma?

RUMA bese ta na Bible Student taudia​—guna Iehova ena Witnes ladadia na unu e hatoa tomava. Tama bona sina ese natudia memerodia tatoi bona kekenidia rarua na e hadibadia, Iehova Dirava bona Iesu Keriso bae tohotohodia. Idia natudia merona ta laḡanina na 18 neganai e bapatiso. Laḡani ta ta ai, Lohiabada Ena Anibou negana ai, una mero bona Bible Student haida na parao e aniva bona wain e inuva. To, ia ese tok ladana, “Hutuma Bada Herea,” e kamonaia murinai, ena lalohadai e haidaua. Oibe, laḡani 1935 ai, Washington, D.C., U.S.A. ai, J. F. Rutherford ese hebou badana ta ai una tok e heni. Una hebou ese dahaka e hahedinaraia?

2. Tadikaka Rutherford ese ena tok lalonai dahaka hereva momokani matamatana e gwauraia?

² Tadikaka Rutherford ese tok lalonai, Apokalupo 7:9 ai ina hereva, “hutuma bada herea” anina e gwauraia hedinarai. Unu negadiai, Bible Student na e laloava “hutuma bada herea” na guba baela oreana iharuana, to idia na Keriso ida basie lohia hebou dainai, una orea na basie gwauraia, hesiai tauna mai ena kamonai. To, Tadikaka Rutherford ese Baibul amo e hahedinaraia hutuma bada herea na guba basiela to idia na Keriso ena mamoe idaudia haida, * bona “hisihisi badana” amo bae roho mauri, bona tanobada ai bae mauri  hanaihanai. (Apok. 7:14) Iesu e gwauhamata, eto: “Lau na mai egu mamoe idaudia haida danu; idia na do dia ina maḡu lalonai. Idia danu do baina hakaudia mai, bena gadogu bae kamonai; bena seri baine tamona, ireḡudia tauna danu baine tamona.” (Ioa. 10:16) Unu mamoe idaudia na Iehova ena Witnes bona idia na tanobada Paradaisona bae noholaia ela bona hanaihanai. (Mat. 25:31-33, 46) Una hereva momokani matamatana ese una mero bona Iehova ena taunimanima hutuma edia mauri e haidaua karana mani aita herevalaia.​—Sal. 97:11; Her. 4:18.

3-4. Laḡani 1935 ena hebou badana ai, hutuma be dahaka e lalopararalaia, bona dahaka dainai?

³ Una hebou badana ai tadikaka ese helai taudia na ini e noidia toma: “Bema daika e uramu tanobada ai baine noho ela bona hanaihanai, mani emu kara ba gini tore!” Una hebou ela tadikakana ta eto, ‘Helai taudia iboudiai 20,000 bamona na e gini.’ Bena Tadikaka Rutherford eto: “O laloamu ini be daidia gigini? Hutuma bada herea!” Una murinai, hebou taudia iboudiai na mai moaledia ida e boi badabada. Unu e gini taudia na e laloparara idia na guba basiela. Idia e laloparara [laḡani 1935 ai] Dirava ena lauma helaḡa ese idia na se horodia. Dina iharuana ai, hebou ai, taunimanima 840 e bapatiso​—unu Iehova ena Witnes matamatadia momo na mamoe idaudia.

⁴ Una tok murinai, matamanai tame herevalaia merona bona taunimanima tausen ma haida na Lohiabada Ena Anibou ai parao vada asie aniva bona wain asie inuva. Tadikaka ma ta eto: “Laḡani 1935 ena Memorial ai, lau na parao ginigabena na ania bona wain ginigabena na inua. Na laloparara Iehova ese lauma helaḡa amo lau na se horogu dainai, guba na basinala, to lau na tanobada ai baina noho bona baina heduru tanobada na paradaiso ai bainela.” (Roma 8:16, 17; 2 Kor. 1:21, 22) Una nega amo ema bona hari, hutuma bada herea edia namba na doini e tubumu, bona idia ese horoa orena taudia * e durudiamu.

5. Parao se aniva bona wain se inuva taudia be Iehova ese ede e lalodia toma?

⁵ Laḡani 1935 murinai parao se aniva bona wain se inuva taudia be Iehova ese ede e lalodia toma? Bona bema hari ina negai, Lohiabada Ena Anibou hanuaboina ai, bapatiso Witnes ta ese parao baine ania bona wain baine inua, to gabeai baine laloparara ia na lauma helaḡa ese se horoa be ede heto? (1 Kor. 11:28) Haida na parao e animu bona wain e inumu badina be e daradarava idia be guba ai o tanobada ai be nohomu. To, Iehova ese idia na hutuma bada bogaraḡidiai be atodiamu bema idia baeto idia ese parao basie ani bona wain basie inu, bona Iehova bae hesiai henia hanaihanai. Bona ena be idia ese parao ani bona wain inu karana e hadokoa, to dounu Memorial hebouna e laomu badina Iehova bona Iesu edia lalokau karana e laloa badamu.

6. Iesu ese aneru e haḡanidia dahaka bae kara totona?

⁶ Hisihisi bada hereana na kahirakahira be varamu dainai, namona na Apokalupo karoa 7 ese horoa taudia bona hutuma bada herea e herevalaia dalana aita riviulaia. Iesu ese aneru e haḡanidia, lai haniosi na bae lao ahu. Idia ese unu tanobada ena lai haniosi bae lao ahu, ela bona horoa taudia iboudiai  bagudia ai toa bae karaia, anina na Iehova ese baine gwauraidia maoromaoro. (Apok. 7:1-4) Edia abidadama dainai, horoa taudia na guba ai Keriso ena king bona hahelaḡa taudia ai be laomu. (Apok. 20:6) Guba ai horoa taudia 144,000 ese ahudia be abimu neganai, Iehova, Iesu bona aneru iboudiai na be moalemu.

7. Apokalupo 7:9, 10 ai tame duahia, Ioane be daidia e itadia? Bona idia be dahaka e karava? (Rau 1 laulauna ba itaia.)

⁷ Bena Ioane e roha lao, Aramagedono amo e roho mauri taudia “hutuma bada-herea” e itaia. Orea ginigunana taudia iboudiai be 144,000, to ina orea iharuana na hutuma herea bona ta ese basine duahidia diba. (Apokalupo 7:9, 10 ba duahi.) “Edia dabua na kukuro-kukuro” anina na, idia na sibodia e hegima, badina asie uramu Satana ena tanobada mirona ese baine hamirodia, bona idia na Dirava bona Keriso e badinadiamu. (Iak. 1:27) Idia na e lolo badabada eto, Iehova bona Iesu, Dirava ena Mamoe Natuna, ese vada e hamauridia. Bona idia imadia na mai retadia anina na, idia na e moalemu badina dibadia Iehova ese Iesu na King ai vada e halaoa.​—Ioane 12:12, 13 ida ba haheḡereḡerea.

8. Apokalupo 7:11, 12 ese Iehova ena guba oreana be ede e herevalaia toma?

⁸ Apokalupo 7:11, 12 ba duahi. Iehova ena guba oreana ese hutuma bada herea e itadia neganai dahaka e vara? Ioane eto guba taudia iboudiai na e moale bona Dirava e hanamoa. Hisihisi bada hereana amo hutuma bada herea be roho maurimu neganai, Iehova ena guba oreana na be moalemu.

9. Apokalupo 7:13-15 ai tame duahia, hutuma bada herea be dahaka e karamu?

⁹ Apokalupo 7:13-15 ba duahi. Ioane na eto hutuma bada herea ese “edia dabua na Mamoe Natuna rarana ai e huri, e hakurokuro.” Una anina na, idia lalodia na ḡoeva bona Iehova na edia kara e moalelaiamu. (Isa. 1:18) Idia ese edia mauri na ḡuriḡuri amo Dirava e henia, e bapatiso, Kristen taudia ai ela, idia ese Iesu ena boubou e abidadama heniamu, bona idia na Iehova turana. (Ioa. 3:36; 1 Pet. 3:21) Tanobada ai idia na Dirava isiaina e lao heni boimu e lao heni ranimu dainai, Dirava na e moalemu. Hari danu, idia ese Basileia e harorolaiamu bona hahediba ḡaukarana e goadalaiamu badina idia ediai Dirava ena Basileia na ḡau badana.​—Mat. 6:33; 24:14; 28:19, 20.

10. Hutuma bada herea be dahaka mai dibadia, bona edena gwauhamata be ḡuḡurumu na be itaiamu?

¹⁰ Hisihisi bada hereana amo e roho mauri hutuma bada herea na dibadia, Dirava na idia e naridiamu, badina be Baibul etomu, “terono ai e helaimu Diravana ese edia taruha ai bainela.” Hutuma bada ese e nariamu gwauhamatana ta na Baibul ese ini e gwauraia toma: “[Dirava] ese iruru-matadia iboudiai matadia amo baine dahu oho. Mase bona dara-doko bona taitai bona hisihisi bae ore; badina be ḡau gunadia vada e puki.”​—Apok. 21:3, 4.

11-12. (a) Apokalupo 7:16, 17 ai tame duahia, hutuma bada herea be dahaka hahenamo be moalelaimu? (b) Memorial negana ai hutuma bada herea be dahaka bae kara diba, bona dahaka dainai?

¹¹ Apokalupo 7:16, 17 ba duahi. Harihari, Iehova ena taunimanima haida na e hitolomu badina moni amo aniani bae hoi na dia heḡereḡere, o tuari daidiai hekwakwanai momo e varamu. Haida be edia tomadiho karadia daidiai dibura ai e atodiamu. To, hutuma bada herea na e moalemu badina dibadia ina nega dikana baine ore neganai, Iehova ese hahekau herevadia bona aniani momo herea na idia be henidiamu ela bona hanaihanai. Hutuma bada  herea na “siahu ta ese basine raradia” anina na, Iehova ese idia baine gimadia to Satana ena bese be baine haoredia vaitani. Hisihisi bada hereana amo roho mauri taudia na Iesu ese “e lohilohimu ranudia mauridia badidiai baine hakaudia” lao, anina na mauri hanaihanai baine henidia. Mani a laloa, hutuma bada herea na basie masemu. Momokani, tanobada ai taunimanima bilion momo herea na be maurimu ela bona hanaihanai!​—Ioa. 11:26.

¹² Hutuma bada herea ese Iehova bona Iesu bae tenkiu henidia! Oibe, Iehova na dia horoa taudia mo to hutuma bada herea danu e lalokau henidiamu. Horoa taudia bona hutuma bada herea ese Dirava bona Keriso na bae hanamodia diba. Dala ta bina: Lohiabada Ena Anibou bae lao henia.

13-14. Horoa orena taudia bona hutuma bada herea ese Keriso ena mase ena Memorial basie reaia badina be dahaka?

¹³ Laḡani gunadiai, Memorial neganai, taunimanima tausen amo tamona mo parao e ani bona wain e inu. Kongrigeisin momo ai reana taunimanima ta ese parao se aniamu bona wain se inuamu. Anina na Memorial e laomu taudia hutuma bada herea na tanobada ai be maurimu taudia. To, dahaka dainai idia na Lohiabada Ena Anibou e laomu? Mani a laloa, dahaka dainai oi na turamu ena wedin o laomu? Badina oi na o uramu ba hahedinaraia oi ese turamu bona adavana na o lalokau henidiamu bona o uramu idia ba sapotidia. Una heḡereḡerena, hutuma bada herea na Memorial e laomu badina idia ese Keriso bona horoa taudia e lalokau henidiamu bona e uramu idia bae sapotidia. Danu, idia na Memorial e laomu badina e uramu bae hahedinaraia idia ese Iesu ena boubou na moalelaiamu​—oibe, una boubou dainai idia na tanobada ai be mauri hanaihanaimu.

¹⁴ Hutuma bada herea na Memorial e laomu badina ma ta binai: Idia na Iesu ena haheḡani e badinaiamu. Una Anibou e hamatamaia neganai, Iesu ese aposetolo e hamaorodia, eto: “Ini ba kara toma, lau ba lalogu.” (1 Kor. 11:23-26) Una dainai, horoa orena taudia ese tanobada ai  Lohiabada Ena Anibou e karaiamu lalonai, hutuma bada herea na asie uramu una hebou bae reaia. Bona idia ese taunimanima ma haida e boiridiamu Memorial baema totona.

15. Edena dalai Memorial hebouna ai ita ese Dirava bona Keriso baita hanamodia diba?

¹⁵ Memorial na nega namona, ita ese ane bona ḡuriḡuri amo Dirava bona Keriso baita hanamodia. Ina laḡani ena Memorial tok sinadona binai, “Dirava Bona Keriso ese Oi Daimu ai E Karaia Ḡauna O Laloa Badamu, A?” Una ese ita be durudamu Iehova bona Keriso baita tenkiu henidia. Una hebou ai parao bona wain baita itadia neganai, baita laloatao parao be Iesu tauanina e laulaulaia bona wain be Iesu rarana e laulaulaia. Bona baita laloatao, Iesu ita daidiai e mase karana ese e hahedinaraiamu, Iehova ese ita na e lalokau henidamu. (Mat. 20:28) Iehova bona Iesu e lalokau henidiamu taudia iboudiai na asie uramu Memorial hebouna bae reaia.

16. Ededia dalai horoa taudia bona hutuma bada herea taudia na heḡereḡere?

¹⁶ Dirava ese horoa taudia bona hutuma bada herea na e lalokau henidiamu. Ia matana ai unu orea ruaosi na heḡereḡere, idia ta dia maraḡi ta dia bada. Bona Dirava na Natuna lalokauna ena mauri amo unu orea ruaosi e hoidia. To edia idau be, orea ta be guba ai be nohomu taudia bona orea ta be tanobada ai be nohomu taudia. To unu orea ruaosi ese Dirava bona Keriso bae badinadia hari na namo. (Sal. 31:23) Bona ba laloatao: Dirava ese lauma helaḡa amo unu orea ruaosi edia ḡaukara na e hanamoamu. Una anina na, Iehova na ena lauma helaḡa amo taunimanima tamona tamona be durudiamu, herevana ia na horoa tauna o hutuma bada herea tauna.

17. Horoa orena taudia be dahaka doini e nariamu?

¹⁷ Horoa taudia be guba ai be nohomu. Una helaro na dia sinadia edia amo e abia, lasi, to Dirava ese e henidia. Horoa taudia ese edia helaro na e laloamu, e ḡuriḡurilaiamu, bona guba ai bae abia ahuna na doini e nariamu. Idia ese hari tauanidia guba ai ede baine idau toma na do asi dibadia. (Fili. 3:20, 21; 1 Ioa. 3:2) To, idia na e uramu guba baela haraḡa, unu amo Iehova, Iesu, aneru, eiava horoa taudia ma haida bae ha itadia. Bona e ura dikadikamu idia ida guba Basileiana ai bae ha ḡaukara hebou.

18. Hutuma bada herea be dahaka doini e nariamu?

¹⁸ Hutuma bada herea be tanobada ai be nohomu ela bona hanaihanai. Oibe, taunimanima  iboudiai edia ura ḡauna bunai. (Koh. 3:11) Idia na e uramu dina ta baine kau, bena bae heduru ina tanobada idoinai na paradaiso ai bae halaoa. Idia na e uramu una dina ai edia ruma bae hagini, edia uma bae kara, o natudia ḡoevadaedia bae havara diba. (Isa. 65:21-23) Idia na e uramu tanobada ena gabu idauidau​—ororo, uda badadia, o davara​—bae ita, bona Dirava ena ima karakara ḡaudia idauidau bae stadilai. To idia ese e moalelaiamu ḡauna heredaena binai: Idia na dibadia Iehova na idia turadia ela bona hanaihanai.

19. (a) Memorial neganai dahaka baita kara be namo? (b) Laḡani 2021 ena Memorial be edena negai be heabimu?

¹⁹ Iehova ese ia e gwauhamata henia hesiai taudia ta ta na ahudia e heni, vaira negana ai guba ai o tanobada ai bae mauri hanaihanai totona. (Ier. 29:11) Keriso ena mase ena Memorial ai, namona na ita ta ta ese Dirava bona Keriso baita tenkiu henidia, badina idia ese dala e kehoa ita baita mauri hanaihanai totona. Laḡani ta ta ai, Memorial neganai Kristen taudia korikoridia bae hebou na mai anina bada. Una hebou na Saturday, March 27, 2021 ai, dina baine diho murinai be heabimu. Momo ese ina hebou badana na be moalelaiamu, ḡau ta ese idia basine koudiamu. Haida be daḡedaḡe negana lalonai ina hebou be moalelaiamu. To ma haida be dibura rumana ai Memorial be karaiamu. Iehova, Iesu, aneru, o horoa taudia na guba amo e roha dobimu lalonai, namona na kongrigeisin, grup, bona ita ta ta iboudai ese Memorial baita moalelaia!