1. King David bona ita haida be reana ede baita henanadai tomamu?

ITA iboudai na ta uramu baita noho namonamo. Oibe, tau ta se uramu lalona baine daradara bona baine hekwarahi. To nega haida, ita na ḡau momo daidiai laloda e hekwarahimu. Una dainai, Iehova ena hesiai taudia haida, heḡereḡere King David ese Iehova e nanadaia, eto: “Daragu baine doko ela bona edena nega ai? Lalogu na dina idoinai baine hisihisi a?”​—Sal. 13:2.

2. Ina atikol ai dahaka baita stadilaimu?

² Ena be nega haida baita lalohekwarahimu, to una na baita hanaia diba. Ina stadi matamana kahanai baita itaiamu, dahaka ḡau haida daidiai laloda be hekwarahimu? Una murinai baita itaiamu, ededia dala 6 ese bae duruda baita noho namonamo, herevana dahaka hekwakwanai o metau bae vara.

3. Dahaka ḡau haida daidiai laloda be daradaramu o be hekwarahimu, bona dahaka dainai ḡau ta basita karaia dibamu?

³ Ḡau haida na basita koudia o basita hanamodia dibamu dainai, laloda na be hekwarahimu. Heḡereḡere, laḡani ta ta ai aniani, dabua, o ruma ena rent davadia na be daemu bona basita hamaraḡi dibamu. Eiava nega haida skul o ḡaukara gabunai turada ese be doridamu baita koikoi o matabodaḡa karana baita karaia, bona idia baita durudia edia kara bae haidaua na auka. Eiava eda gabu ai raskol karana na basita koua dibamu. Ini hekwakwanai baita davarimu badina ina tanobada taudia momo herea ese Baibul na asie  badinaiamu. Badina ma ta be Satana na ina tanobada ena dirava, bona ia na e uramu ita na ina tanobada ḡaudia daidiai laloda bae daradara o bae hekwarahi ela bona Iehova baita rakatania. (Mat. 13:22; 1 Ioa. 5:19) Una dainai, ina tanobada na metau o hekwakwanai idauidau amo e honu!

4. Metau daidiai laloda be daradaramu o be hekwarahimu neganai, dahaka be varamu?

⁴ Vaia, nega haida, metau daidiai laloda e daradaramu o e hekwarahimu. Heḡereḡere, readia ta warimu badina ta habouamu monina na dia heḡereḡere ta uramu ḡauna baita hoia, eiava gorere dainai ḡaukara ta misimu o ḡaukara amo vada be hadokodamu. Eiava baita garimu badina hari be hahetoho lalonai Dirava ena taravatu baita utumu. Eiava baita daradaramu ḡauna ta be, Satana ese ena taunimanima amo Dirava ena taunimanima be tuari henidiamu neganai ita be dahaka baita karamu? Reana baita henanadaimu: ‘Unu daidiai lalogu baine daradara o baine hekwarahi be namo, eiava?’

5. Iesu ena hereva, Mataio 6:25 ai, anina be dahaka?

⁵ Ita dibada, Iesu ese ia murinai e raka taudia e hamaorodia: “Lalomui na basie hekwarahi.” (Mat. 6:25) To una anina be Iesu e uramu basita wari, herevana dahaka baine vara, a? Lasi! Gunaguna, Iehova ena hesiai taudia haida na metau daidiai e lalohekwarahiva, to Iehova na dounu idia ediai e moaleva. * (1 Han. 19:4; Sal. 6:3) Bona Iesu na e uramu laloda na baine goada. Ia na se uramu ina mauri baita lalohekwarahilaia dainai, Dirava ena hesiai ḡaukara baita hadokoa. To bema laloda e hekwarahimu, dahaka baita karaia be namo?​—Mani ““ Ba Karaia Dalana” mauana ba itaia.

6. Filipi 4:6, 7 ai tame duahia, dahaka ese baine duruda baita noho namonamo totona?

⁶ (1) Hanaihanai ba ḡuriḡuri. Metau daidiai Kristen taudia e lalohekwarahimu negadiai, namona na Iehova bae noia baine durudia. (1 Pet. 5:7) Emu ḡuriḡuri dainai, “Dirava ena maino, [taunimanima edia] diba idoinai e hereaiamu mainona,” bo abiamu. (Filipi 4:6, 7 ba duahi.) Oibe, Iehova ese ena lauma helaḡa amo be durumumu ba noho namonamo totona.​—Gal. 5:22.

7. Dirava o ḡuriḡuri heniamu neganai, dahaka ba laloatao be namo?

⁷ Oi ese Iehova o ḡuriḡuri heniamu neganai, emu hekwakwanai, o hemami, o lalohadai ibounai na ba gwaurai hedinarai. Bema hekwakwanai ba hamaoromaoroa na mai dalana, Iehova ba noia aonega bona goada baine henimu una ba karaia totona. To bema hekwakwanai ihamaoromaorona dalana ta na lasi, Iehova ba noia baine durumu basio lalohekwarahi totona. Emu ḡuriḡuri ai ḡau iboudiai bo gwaurai hedinaraimu neganai, Iehova ese emu ḡuriḡuri be haerelaiamu dalana na bo itaiamu. Ena be ḡuriḡuri muridiai haere na asio abi haraḡamu, to ḡuriḡuri karana basio hadokoa. Iehova na e uramu ḡau iboudiai ba gwaurai namonamo bona ba ḡuriḡuri hanaihanai.​—Luka 11:8-10.

8. Iseda ḡuriḡuri lalonai dahaka baita gwaurai be namo?

⁸ Ḡuriḡuri lalodiai dia emu lalohekwarahi mo Iehova enai ba taho kau, lasi, to ia ba tenkiu henia danu. Herevana hekwakwanai na momo, to iseda hahenamo idauidau baita lalodia na namo. To bema nega haida asi dibamu emu hemami ede ba gwauraia  toma Iehova enai, dahaka ba kara diba? Ba laloatao, Iehova ese emu ḡuriḡuri na be haerelaiamu, herevana ḡuriḡuri na kwadoḡi, heḡereḡere bo gwaumu, ‘Mani a durugu!’​—2 Sis. 18:31; Roma 8:26.

9. Ita be ede baita noho namonamo toma?

⁹ (2) Iehova enai ba tabekau; sibomu emu aonega basio abidadama henia. Laḡani 732 B.C.E. ai, Iuda taudia na e gari badina Suria taudia ese idia bae tuari henidia. Una dainai, Iuda taudia na Egypt taudia e noidia idia bae durudia Suria taudia bae halusidia. (Isa. 30:1, 2) To, Iehova ese Iuda taudia e hamaorodia, idia na dika bae davaria badina Egypt taudia ediai e tabekau. (Isa. 30:7, 12, 13) Isaia amo, Iehova ese taunimanima e hamaorodia idia be ede bae noho namonamo toma. Peroveta tauna eto: “Maino ai bona heabidadama [eiava Iehova iabidadama henina] ai goada ba davaria.”​—Isa. 30:15b.

10. Ededia negai ba hahedinaraia diba oi na Iehova o abidadama heniamu?

¹⁰ Edena dalai baita hahedinaraia ita na Iehova ta abidadama heniamu? Mani haheitalai haida ba lalodia. Reana kampani ta ai oi na pei badana o abiamu, to nega momo o ḡaukaramu eiava ovataim dainai, asi emu nega Iehova ba tomadiho henia. Eiava ḡaukara gabunai ta na e uramu oi baine adavamu, to ia na do se bapatiso o ia na dia Iehova ena Witnes ta. Eiava emu ruma tauna ta ese oi be hamaoromumu bema oi na Iehova bo abia hidimu, ia ese oi na be dadaraimumu. Unu haheitalai ta ta lalodiai, oi na disisin badana ta ba karaia na namo, to danu, Iehova ese oi na be durumumu disisin maorona ba karaia. (Mat. 6:33; 10:37; 1 Kor. 7:39) Henanadai be ina: Oi ese Iehova ena hahekau herevana be bo abidadama heniamu bona bo badinaiamu, a?

11. Ededia Baibul sivaraidia ese ita be duruda dibamu daḡedaḡe negadiai basita gari totona?

¹¹ (3) Taunimanima namodia bona dikadia edia sivarai amo diba bavabi. Baibul ena sivarai momo herea ese e hahedinaraimu maino ai baita noho bona Iehova baita abidadama henia na ḡau badana. Unu sivarai o duahimu negadiai, namona na ba tahua dahaka ese Dirava ena taunimanima e durudia dainai daḡedaḡe lalonai asie gari. Heḡereḡere, Iuda ena supreme court ese haroro ḡaukara e taravatua neganai, aposetolo taudia na asie gari. To, idia na mai lalo goadadia ida eto: “Dirava ikamonai-henina be namo; taunimanima ikamonai-henidia be dika.” (Apos. 5:29) Ena be daḡedaḡe taudia ese aposetolo taudia e dadabadia, to idia na asie gari. Dahaka dainai? Badina dibadia Iehova na edia kahai gini. Ia na idia daidiai e moaleva. Una dainai, idia ese sivarai namona iharorolaina asie hadokoa. (Apos. 5:40-42) Una heḡereḡerena, daḡedaḡe taudia ese Stefano bae hamasea neganai ia na se gari; vairana na e kara “aneru ta vairana na heto.” (Apos. 6:12-15) Dahaka dainai? Badina ia dibana Iehova na ia dainai e moaleva.

12. Ita ese 1 Petro 3:14 bona 4:14 ai tame duahia, dahaka dainai daḡedaḡe negadiai baita moale?

¹² Aposetolo taudia dibadia Iehova na idia e durudiava. Ia ese siahu e henidia hoa karadia bae kara totona. (Apos. 5:12-16; 6:8) Hari, ita na hoa karadia basita kara dibamu. Baibul amo, Iehova etomu, bema kara maoromaoro dainai hisi baita ani, ia na ita edai be moalemu bona ena lauma helaḡa amo be durudamu. (1 Petro 3:14; 4:14 ba duahi.) Una dainai, gabeai daḡedaḡe lalonai dahaka baita kara na basita warilaia momo. To ḡau badana na, hari ina negai Iehova baita abidadama henia bona ia ese baine duruda bona baine  hamaurida dalana baita lalohadailaia. Aposetolo taudia baita tohotohodia, bona Iesu ena gwauhamata baita abidadama henia, ia eto: “Lau ese hereva bona aonega baina henimui, bena inaimui iboudiai ese igwau-tubumui bona ilao-ahumui basie goada.” Ia ma eto: “Emui haheauka dainai laumamui do bae mauri.” (Luka 21:12-19) Ba laloatao, ena be ta na hesiai ḡaukara baine goadalaia ela bona baine mase, to iena ḡaukara maraḡidia bona badadia na Iehova ese basine lalo boiomu. Una dainai, Dirava ese una hesiai tauna na mase amo be hatorea isi loumu.

13. Iehova asie abidadama henia bona e gari taudia edia sivarai amo dahaka baita dibamu?

¹³ Haida be e gari bona Iehova asie abidadama henia, bona edia sivarai ese ita e hadibadamu danu. Idia edia sivarai baita stadilaimu neganai be durudamu, edia kara basita tohotoho totona. Heḡereḡere, King Asa ese Iuda e lohiaia matama neganai, ia na Iehova enai e tabekau bona ami badana e tuari henia neganai, Iehova ese e durua e kwalimu. (2 Sis. 14:9-12) To gabeai, Israel ena king, Baasa, bona ena ami maraḡina ese Iuda taudia baine tuari henidia neganai, Asa na Suria ena ami e hoidia ia bae durua​—Asa na Iehova enai se tabekau, dia guna e kara heḡereḡerena. (2 Sis. 16:1-3) Bona Asa e gorerea bona kahirakahira baine mase neganai, ia na Iehova ena heduru se tahua.​—2 Sis. 16:12.

14. Asa ena sivarai amo dahaka baita dibamu?

¹⁴ Matamanai, hekwakwanai lalodiai, Asa na Iehova e tahuava. To gabeai, Asa na e ura ia sibona ena ura dalana ai hekwakwanai baine hamaoromaoro. Reana taunimanima na be gwaumu, ‘Asa ena plan na namo herea badina ia na Suria taudia e noidia, bae durua Israel taudia baine halusidia.’ To, Iuda ena maino na se mia daudau. Peroveta tauna amo Iehova ese Asa e hamaoroa: “Suria pavapavana enai o hetao kaumu a Iehova, emu Dirava, enai so hetao kaumu dainai, Suria pavapavana ena tuari oreana na oi imamu amo vada e roho mauri.” (2 Sis. 16:7) Ita danu nahuada baita toho, hari be baita laloamu siboda na heḡereḡere hekwakwanai baita hamaoromaoro dainai, Iehova ena Hereva amo heduru basita tahumu. Bona ena be disisen ta baita karaia haraḡamu, to basita gari bona Iehova baita abidadama henia na namo, badina ia ese be durudamu baita kwalimu totona.

15. Baibul ta duahiamu neganai, dahaka baita kara be namo?

¹⁵ (4) Baibul siri ba lalotao. Siri namodia na ba lalotao bema lalomaino e henimumu bona e hagoadadamu Iehova bavabidadama henia. Readia unu siri edia hereva na ba duahi badabada o pepa ai ba tore, gabeai ba riviulai totona. Dirava ese Iosua e haḡania dina ta ta ai Taravatu bukana baine duahia bona anina baine laloa dobu, unu amo ia na mai aonegana ida baine raka. Danu, unu hahediba ese ia bae durua basine gari bona Dirava ena taunimanima baine hakaudia namonamo. (Ios. 1:8, 9) Lalohekwarahi o gari negadiai, Baibul ese oi baine durumu lalomaino ai ba noho.​—Sal. 27:1-3; Her. 3:25, 26.

16. Edena dalai Iehova na kongrigeisin taudia amo ita e durudamu maino ai baita noho bona ia baita abidadama henia?

¹⁶ (5) Dirava ena taunimanima ida ba hebou. Iehova ese tadikaka taihu amo e durudamu maino ai baita noho bona ia baita abidadama henia. Iseda hebou ai, pletfom amo e henimu tok idauidau, o helai taudia ese henanadai idauidau e haerelaimu, o kongrigeisin taudia ida ta nohoboumu o ta herevaherevamu amo heduru ta abimu. (Heb. 10:24, 25) Danu, kongrigeisin ai  turada namona ta enai iseda hemami o lalohadai baita gwauraia hedinaraimu neganai, goada baita abiamu. Oibe, turada ena “hereva namona” ese maino baine henida diba.​—Her. 12:25.

17. Heberu 6:19 ai tame duahia, ina nega aukana lalonai Basileia helarona ese ita be ede be duruda tomamu?

¹⁷ (6) Dirava ena Basileia ba naria. Una Basileia helarona na iseda mauri dogona na heto, badina una ese be durudamu ina mauri aukana lalonai baita gini goada bona basita lalohekwarahi momo. (Heberu 6:19 ba duahia.) Iehova ena gwauhamata ba lalohadailaidia badina ia na e gwaumu vaira negadiai taunimanima na basie lalohekwarahimu. (Isa. 65:17) Mani lalomu ai ina a piksaia: Tanobada matamatana ai, emu mauri na namo herea, bona gari o lalohekwarahi na lasi. (Mika 4:4) Ma haida idurudia karana ese emu abidadama be hagoadaiamu. Una dainai, nega iboudiai ba haroro bona taunimanima momo na hahediba ai ba halaodia. Unu bo kara tomamu neganai, oi na Dirava ena Basileia o abidadama heniamu eiava o nariamu “ela bona dokona.”​—Heb. 6:11.

18. Vaira negai be dahaka hahetoho baita davarimu, bona edena dalai baita gini goada diba?

¹⁸ Nega dokonai, ita na ḡau idauidau daidiai baita daradaramu o baita lalohekwarahimu. To laḡani 2021 ena siri badana ese baine duruda metau baita haheaukalaidia, maino ai baita noho, bona Iehova ena aonega ai baita tabekau to siboda iseda aonega basita abidadama henia. Ina laḡani ai, eda kara amo baita hahedinaraia ita na Iehova ena gwauhamata ta abidadama heniamu, badina ia eto: “Maino ai bona heabidadama ai goada ba davaria.”​—Isa. 30:15.