1. Edena dalai nega baita ato Iehova baita dibaia?

 NEGA ta atomu ta lalodia badamu taudia ta bamodiamu neganai, ita na ta moalemu. Headava taudia na nega bada e atomu e hebamo hehenimu neganai, e moalemu. Eregabe taudia na turadia namodia e bamodiamu karana na e moalelaiamu. Bona ita iboudai ese tadikaka taihu ibamodia karana na ta moalelaiamu. To, ḡau badana na mai moaleda ida nega ta atomu eda Dirava ta hetura heninamu. Unu ta kara tomamu dalana na, Ia ta ḡuriḡuri heniamu, ena Hereva ta duahiamu, bona ena ura bona ena kara namodia ta lalodia dobumu. Iehova ihetura henina ai ta ḡaukaralaiamu negana na mai anina bada!​—Sal. 139:17.

2. Ededia ḡau haida ese eda nega bae haorea diba?

² Ena be nega ta atomu Iehova ihetura henina karana na ta moalelaiamu, to nega haida unu baita kara toma na mai hekwarahina. Eda mauri ai ita na ḡau momo ai ta bisimu dainai, asi eda nega Iehova itomadiho henina ḡaukaradia baita kara. Moni ḡaukara, ruma bese madunadia, bona ḡaukara badadia ma haida ai eda nega bada ta ḡaukaralaimu dainai, ta hemamimu ita na asi eda nega baita ḡuriḡuri, baita stadi, bona baita lalo dobu.

3. Edena ḡau ma ta ese eda nega baine haorea diba?

³ Ḡau ma ta ese eda nega baine haorea diba danu. Ena be ta karamu ḡaudia haida na dia kekerere, to bema basita henari namonamomu Iehova totona baita ḡaukaralaia negana na unu ḡau ai baita haoremu. Heḡereḡere, nega ta atomu moale karadia baita kara na asi ena kerere. To, moale karadia namodia ese iseda nega bada e haoreamu dainai, eda nega na dia heḡereḡere Iehova itomadiho henina karadia baita kara. Una dainai, namona na moale karadia na dia ḡau badana ai baita halaoa.​—Her. 25:27; 1 Tim. 4:8.

4. Ita be dahaka baita herevalaimu?

 ⁴ Ina atikol ai, baita itaiamu dahaka dainai mai anidia bada ḡaudia baita ato guna na namo. Danu, edena dalai Iehova dainai eda nega baita ḡaukaralaia, bona eda nega baita ḡaukaralaia namonamo ena namo baita herevalaiamu.

5. Edena dalai Efeso 5:15-17 ese e herevalaia sisibana ese eregabe ta baine durua mauri dala hereadaena baine abia hidi?

⁵ Mauri dala hereadaena bavabia hidi. Nega momo eregabe taudia na edia mauri bae ḡaukaralaia namonamo dalana e laloa badamu. Danu, skul ai teacher bona dia Witnes ruma bese taudia ese e doridiamu college o iunivesiti baela, unu amo moni ḡaukara namona ta bae abia. Una ese edia nega bada na be haoreamu. To, kongrigeisin ai tama sina bona turadia ese eregabe na e hagoadadiamu, edia mauri na bae ḡaukaralaia Iehova ena hesiai ḡaukara bae karaia. Iehova e lalokau heniamu eregabe tauna be dahaka ese baine durua diba, abi hidi maorodia baine kara? Namona na ia ese Efeso 5:15-17 baine duahia bona baine laloa dobu. (Ba duahia.) Siri baine duahia murinai, reana sibona baine henanadai: ‘Iehova ena ura be dahaka? Edena abi hidi ese ia be hamoaleamu? Edena abi hidi ese be durugumu egu nega baina ḡaukaralaia namonamo?’ Ba helalotao ina na “nega dikana” bona Satana ese e lohiaiamu tanobadana na kahirakahira be oremu. Una dainai, aonega karana na eda mauri baita ḡaukaralaia Iehova e moalelaimu karadia baita kara.

6. Maria be dahaka e abia hidi, bona dahaka dainai una na abi hidi maorona?

⁶ Mai anidia bada ḡaudia bavato guna. Nega haida ta karamu ḡaukara rua na dia kekerere, to eda nega baita ḡaukaralaia namonamo totona tamona mo baita abia hidi. Una na Iesu ese Maria bona Mareta e vadivadi henidia neganai e vara ḡauna ai diba baita abimu. Mareta ese Iesu ena vadivadi na e moalelaia dikadika dainai, aniani momo e heḡaeḡaelai. To, una negai Maria na Iesu badinai e helai bona ena hahediba herevadia e hakalava. Mareta ese e karaia ḡauna na dia kerere, to Iesu na e gwa, “Maria ese ahu namona vada e abia hidi.” (Luka 10:38-42) Maria na e ani anianidia na se lalotao, to ta diba momokanimu Iesu ese e hahedibalai herevadia na e lalodiatao. Maria ese nega kwadoḡina lalonai Iesu e hakala henia na e laloa bada, una heḡereḡerena Iehova totona ta ḡaukaralaia negana baita laloa bada. Edena dalai una nega baita ḡaukaralaia namonamo?

7. Dahaka dainai nega baita ato baita ḡuriḡuri, baita stadi, bona baita lalo dobu?

⁷ Baita laloparara ḡuriḡuri, stadi, bona lalo dobu karadia na eda tomadiho kahana ta. Ta ḡuriḡurimu neganai, ita na Tamada gubai e nohomu ida ta herevaherevamu, ia ese ita na e lalokau henida badamu. (Sal. 5:7) Baibul ta stadilaiamu neganai ita na Dirava, aonega ibounai Badina, ta dibaiamu. (Her. 2:1-5) Ta lalo dobumu neganai, ita ese Iehova ena kara namodia bona taunimanima iboudiai daidiai baine kara ḡau namo hereadia ta lalodiamu. Emu nega ba ḡaukaralaia namonamo dalana ta o laloamu, a? Unu baita kara toma totona, dahaka ese be durudamu?

8. Iesu ese tano ḡaḡaenai ena nega e ḡaukaralaia amo dahaka ta dibamu?

⁸ Bema mai dalana, gabu asi reḡereḡena ta bavabia hidi. Iesu ena haheitalai mani aita laloa. Tanobadai ena hesiai ḡaukara do se hamatamaia neganai, Iesu na dina 40 tano ḡaḡaenai e noho. (Luka 4:1, 2) Una  gabu asi reḡereḡenai, Iesu ese Iehova na baine ḡuriḡuri henia diba bona Tamana ena ura ienai baine laloa dobu. Ta dibamu unu ese Iesu na e durua vairai bae vara hahetohodia baine haheaukalai. Edena dalai Iesu ena haheitalai ese oi baine durumu diba? Bema emu ruma bese ai taumui na momo, nega haida gabu asi reḡereḡena ta idavarina na auka. Bema unu bamona, murimuri ai gabu namona ta ba tahua. Julie na nega e atomu Iehova baine ḡuriḡuri henia neganai, ia na unu e kara toma. Ia bona adavana na France ai, apartment maraḡina ta ai e nohomu bona idia ese gabu asi reḡereḡena ta bae davaria na auka. Julie na e gwa: “Lau na dina iboudiai laḡa-ani gabuna ta ai na rakarakamu. Unuseniai lau na sibogu dainai, ba lalohadai namonamomu, bona Iehova ba hereva henia dibamu.”

9. Ena be Iesu na e bisiva, to edena dalai e hahedinaraia ena hetura karana Iehova ida na e laloa bada?

⁹ Iesu tanobadai e nohova neganai ia na e bisiva. Tanobadai ena hesiai ḡaukara e karaiava lalonai, e laova gabudia iboudiai hutuma ese e ḡavaiava, badina idia iboudiai na e urava Iesu ese baine haroro henidia. Nega ta, “hanua taudia iboudiai na ena iduara ai e hebou” ia bae itaia. To, Iesu na dounu nega e atova baine ḡuriḡuri. Daba do se kinia ai, ia na “gabu ḡaḡaena” ta ela Tamana baine hereva henia.​—Mar. 1:32-35.

10-11. Mataio 26:40, 41 ena hereva heḡereḡerena, Getesemane imeana ai Iesu ese ena hahediba be edena sisiba e henidia, bona dahaka e vara?

¹⁰ Iesu ena hanuaboi ginigabena bona ena haroro ḡaukara dokonai, ia na gabu asi reḡereḡena ta e tahua baine lalo dobu bona baine ḡuriḡuri totona. Una na Getesemane imeana ai. (Mat. 26:36) Una negai, Iesu na ena hahediba ediai ḡuriḡuri karana ai mai anina bada sisibana ta e heni.

¹¹ Mani e vara ḡauna aita laloa. Getesemane imeana ai e kau neganai, una na readia malokihi. Iesu ese ena aposetolo e hamaorodia bae “gima,” bena idia e rakatanidia gabu ta ai baine ḡuriḡuri. (Mat. 26:37-39) To, ia e ḡuriḡuriva lalonai idia na e mahuta. Iesu ese mahutadiai e davaridia neganai, e hamaorodia lou ‘bae gima bona bae ḡuriḡuri.’ (Mataio 26:40, 41 ba duahia.) Ia na e diba idia na tauanidia e hesiku bada herea dainai mamahuta. Iesu na mai hebogahisina ida e gwa, idia tauanidia na eme manoka. Nega iharuana e raka lao e ha-ḡuriḡuri, bena ma e raka lou dekedia neganai, idia na asie ḡuriḡuriva to mamahuta.​—Mat. 26:42-45.

12. Dahaka baita kara bema nega haida ta hesikumu baita ḡuriḡuri?

¹² Nega maorona bavabia hidi. Nega haida reana ta hesikumu dainai asita ḡuriḡurimu. Bema una na emu ai e vara, ba diba haida danu unu e hemami toma. Dahaka ba  kara diba? Vaevae laḡa-ani negadiai Iehova e ḡuriḡuri heniamu taudia na e mamia do asie hesiku momokani negadiai Iehova iḡuriḡuri henina karana ese idia na e durudia bada. Haida be e davaria bema idia na e helaimu eiava e tui dihomu bena e ḡuriḡurimu neganai, idia na e lalohadai namonamomu. Bema o lalohekwarahimu eiava o lalomanokamu dainai so ḡuriḡurimu be ede bamona? Emu hemami na Iehova ba hamaorolaia. Ba diba ita Tamada, hebogahisi Diravana, na be lalopararamu.​—Sal. 139:4.

13. Edena dalai fon eiava tablet iḡaukaralaidia karana ese eda ḡuriḡuri, stadi, bona eda hebou karana bae hadikaia diba?

¹³ Emu stadi karana bae hadika ḡaudia na ba dadarai. Dia ḡuriḡuri karana mo ese eda hetura karana Iehova ida be hagoadaiamu. To, Dirava ena Hereva istadilaina karana bona hebou ilao henina karana ese danu be durudamu eda hetura karana Iehova ida be hagoadaiamu. Ita na ta uramu siboda eda stadi ai bona kongrigeisin heboudia ai eda nega baita ḡaukaralai namonamo. Reana sibomu ba henanadai, ‘Hebou lalodiai eiava sibogu egu stadi na karaiamu neganai, dahaka ese egu lalohadai namonamo karana e hadikaiamu?’ Readia nega unu bamodiai eda fon ai call baita haerelaimu, eiava email, o teks mesij baita duahimu karana ese una be havaraia dibamu. Hari ina negai taunimanima bilioni ese unu heduru ḡaudia na e ḡaukaralaimu. Hetahu ḡaukara e karamu taudia haida na e gwaumu, fon eiava tablet na dekedai neganai, una ese eda lalohadai namonamo karana be hadikaiamu. Diba bada tauna ta na e gwa: “O stadilaiamu ḡauna na dia mai lalomu idoinai ida bo karaiamu. Oi lalomu na idau gabu ai.” Hebou badadia do se hematama neganai, nega momo ita na e hadibadamu eda fon eiava tablet na silent mode ai baita ato, unu amo haida edia kamonai karana basita hadikaia. Una heḡereḡerena, namona na ita danu unu baita kara toma, unu amo eda ḡuriḡuri, stadi, bona hebou dainai ta atoa negana na ḡau ta ese basine hadikaia.

14. Filipi 4:6, 7 ena hereva heḡereḡerena, Iehova ese ita be ede be duruda tomamu?

¹⁴ Iehova ba noia baine durumu, unu amo ḡau idauidau basio lalohadailai. Bema o dibamu sibomu emu stadi ai o kongrigeisin heboudiai oi na ḡau idauidau o lalomu,  Iehova ba noia baine durumu. Lalohekwarahi neganai, reana emu ai na be aukamu o lalomu ḡaudia ba dadarai bona Dirava ena Hereva mo ba laloa. To una na mai anina bada. Nega unu bamodia ai namona na Dirava ba noia kudoumu bona ‘daramu baine gimaia’ diba mainona baine henimu.​—Filipi 4:6, 7 ba duahia.

15. Nega baita atomu Iehova baita dibaiamu karana ena namo ta be dahaka?

¹⁵ Iehova ihereva heniamu, ikamonai heniamu, bona ia ilalona karana na mai ena namo. Edena dalai? Ginigunana, oi na abi hidi namodia bo karamu. Baibul ese e hadibadamu, “aonega taudia ida e raka heboumu tauna na e heaonegamu.” (Her. 13:20) Una dainai, bema nega bo atomu Iehova, aonega Badina bo dibaiamu neganai, oi danu bo aonegamu. Bo lalopararamu edena dalai Iehova ba hamoalea bona edena dalai ia e hahisiamu abi hididia ba dadarai.

16. Edena dalai Iehova baita dibaia namonamomu karana ese eda hahediba dalana be hanamoamu?

¹⁶ Iharuana, oi na hahediba tauna namona ai bo laomu. Baibul amo ta ta stadi heniamu neganai, eda tahua ḡauna badana ta na, eda stiuden baita durua Iehova turana ai bainela. Iehova baita ḡuriḡuri heniamu bona ia amo diba baita abi louloumu neganai, eda lalokau ienai na be badamu bona eda stiuden na baita hadibadia namonamomu Ia bae lalokau henia totona. Mani Iesu ena haheitalai aita laloa. Ia ese Iehova na lalokau bona hebogahisi dalanai e herevalaia, una ese ena hahediba na e durudia Iehova bae lalokau henia.​—Ioa. 17:25, 26.

17. Dahaka dainai ḡuriḡuri bona stadi ese e durudamu eda abidadama baita hagoadaia?

¹⁷ Ihatoina, emu abidadama na be goadamu. Dirava enai hahekau, hahegoada, o heduru o noiamu neganai, be varamu ḡauna mani a laloa. Iehova ese unu ḡuriḡuri e haerelaimu negadia ta ta ai, emu abidadama ienai na be goadamu. (1 Ioa. 5:15) Emu abidadama baine hagoadaia ḡauna ma ta be dahaka? Sibomu emu stadi karana. Ba helalotao, “heabidadama badina be kamonai.” (Roma 10:17) To, emu abidadama baine goada totona, diba iabina karana mo na dia heḡereḡere. Dahaka danu baita kara?

18. Dahaka dainai baita lalo dobu na namo? Haheitalai ta a gwauraia.

¹⁸ Namona na ta dibamu ḡaudia baita lalodia dobu. Salamo 77 e torea tauna enai e vara ḡauna mani aita laloa. Ia na e lalometau badina e mamiava ia bona Israel taudia ese Iehova ena lalonamo na e haboioa. Una e lalohekwarahilaiava dainai, hanuaboi ai na se mahuta namonamova. (Siri 2-8) Ia be  dahaka e kara? Iehova e hamaoroa, eto: “Emu ḡaukara idoinai baina lalo-hadailaia, emu siahu karadia danu baina haerodia.” (Siri 12) Momokani, salamo e torea tauna na Iehova ese guna ena taunimanima daidiai e kara ḡaudia na mai dibana, to ia na dounu e daradarava, e gwauva: “Dirava ese harihari-bada vada e laloa boio, ena badu ese ena hebogahisi vada e laoa ahu a?” (Siri 9) Salamo itorena tauna ese Iehova e kara ḡaudia bona Dirava ese guna negadiai hebogahisi e hahedinaraia badina e laloa dobu. (Siri 11) Bena dahaka e vara? E diba momokani Iehova ese ena taunimanima na basine rakatanidiamu. (Siri 15) Una heḡereḡerena, oi emu abidadama na be goada dibamu bema Iehova ese ena taunimanima daidiai bona oi daimuai e kara ḡaudia bo lalodia dobumu.  

19. Nega baita atomu Iehova baita dibaiamu karana ena namo ma ta be dahaka?

¹⁹ Ihahanina, bona mai anina bada ḡauna na, emu lalokau Iehova enai na be badamu. Lalokau ese be hagoadamumu Iehova bo badinaiamu, Ia ihamoalena totona ḡau haida bo dadaraimu, bona hahetoho idauidau bo haheaukalaimu. (Mat. 22:37-39; 1 Kor. 13:4, 7; 1 Ioa. 5:3) Emu hetura karana Iehova ida, na ḡau ta ese basine hereaia dibamu!​—Sal. 63:1-8.

20. Dahaka baita kara unu amo Iehova itomadiho henina karadiai eda nega baita ḡaukaralaia namonamo?

²⁰ Ba helalotao ḡuriḡuri, stadi, bona lalo dobu karadia na eda tomadiho kahana ta. Iesu heḡereḡerena, gabu asi reḡereḡena ta ba tahua, unu amo emu hetura karana Iehova ida ba hagoadaia ḡaudia ba kara. Emu lalohadai namonamo karana e hadikaiamu ḡaudia ba kokidia. Iehova ba noia baine durumu ia itomadiho henina ḡaukaradia ba karadia namonamo totona. Bema hari emu nega bo ḡaukaralaia namonamomu, Iehova ese ena tanobada matamatana ai mauri hanaihanai hahenamona be henimumu.​—Mar. 4:24.