1. David enai be dahaka e vara?

 DAVID na baine mase garina e heau. Saulo, Israel edia pavapava goadana, na lalona e hadaia ia baine alaia. David na aniani ai e dabu neganai, Nob hanuana ela, bena Ahimelek enai flaoa igabudia ima e noi. (1 Sam. 21:1, 3) Gabeai, ia bona ena tatau na nadi kohuana ta ai e komu. (1 Sam. 22:1) Dahaka dainai unu na David enai e vara?

2. Saulo be edena dalai sibona dika ai e heato? (1 Samuel 23:16, 17)

² Saulo na taunimanima ese David e hanamoava bona tuari ai ia na e kwalimuva dainai e mama henia. Danu Saulo na mai dibana iena gwau-edeede dainai Iehova ese ia na de dadaraia, bona Iehova ese David na e abia hidi Israel pavapavana ai bainela. (1 Samuel 23:16, 17 ba duahi.) To, Saulo na dounu Israel pavapavana dainai, mai ena tuari orea badana bona iduruna taudia na momo herea, una dainai David na baine mase garina e heau. O laloamu Saulo be e urava Dirava ena ura David enai baine koua, a? (Isa. 55:11) Baibul ese una na se herevalaia, to ita mai dibada ḡauna na: Saulo na sibona dika ai e heato. Nega iboudiai Dirava ena ura e kouamu taudia na basie kwalimu diba!

3. Ena be David ena noho dalana na dia namo to iena hemami be ede bamona?

³ David na dia hekokoroku tauna. Sibona se heabi hidi Israel pavapavana ai bainela. To Iehova ese una dagi e henia.  (1 Sam. 16:1, 12, 13) Saulo ese David na e inai henia badava. To David ese e davariva hekwakwanaidia daidiai gwau na Iehova se henia; eiava ena aniani na dia heḡereḡere bona nadi kohuna ai e nohova dainai se maumau. To, David na reana una nadi kohuana ai e komuva neganai, Dirava ihanamona anena ta e torea bona una ane kahana ta na ina laḡani ai baita laloa sirina: “Iehova e tahuamu taudia na ḡau namona ta ai asie dabumu.”​—Sal. 34:10.

4. Ededia henanadai baita haerelaimu, bona dahaka dainai unu henanadai na mai anidia bada?

⁴ Hari ina negai, Iehova ena hesiai taudia momo edia aniani na dia bada bona edia mauri bae durua ḡaudia na dia momo. * Ina pandemic ai una na e varamu. Bona “hisihisi badana” ta lao heniamu lalonai, mauri na be auka hereamu. (Mat. 24:21) Unu ta lalomu neganai, mani ini henanadai hani baita haerelai: Edena dalai David na ‘ḡau namona ta ai se dabu’? Dahaka dainai edai miadia ḡaudia na baita moalelai? Dahaka dainai baita abia dae Iehova ese ita na be naridamu? Bona edena dalai hari baita heḡaeḡae vaira negana totona?

5-6. Edena dalai Salamo 23:1-6 ese e durudamu David ena hereva, Dirava ena hesiai taudia na “ḡau namona ta ai asie dabumu,” baita lalopararalaia?

⁵ David na e gwa, Iehova ena hesiai taudia na “ḡau namona ta ai asie dabumu,” anina be dahaka? Salamo 23 ai unu bamona herevadia e ḡaukaralai, una Salamo baita haeroamu neganai be durudamu David ena hereva anina baita lalopararalaia. (Salamo 23:1-6 ba duahi.) David ese una ane na ini e hamatamaia toma: “Lau ireḡugu tauna mamoe ireḡuna na heto Iehova mo; lau na ḡau ta ai basina dabu.” Bena una salamo dokonai, ia ese mai anina bada ḡaudia haida e herevalai. Heḡereḡere, lauma dalanai hahenamo momo e abi badina Iehova na ia Ireḡuna Tauna ai e halaoa. Iehova ese ‘kara maoromaoro daladia ai e hakaua,’ bona nega namodia bona nega dikadia ai e  durua. David na mai dibana Iehova ena “rei manoka-manoka gabudia ai” hekwakwanai na dounu be davarimu. Nega haida, be lalomanokamu, una na ‘dibura kourana ai’ bema raka na heto, bona haida ese na be inai heniamu. To Iehova na ia Ireḡuna Tauna dainai, ‘dika garina se gari.’

⁶ Edena dala ai David na ‘ḡau namona ta ai se dabu’? Ia enai ena hetura karana Iehova ida baine hanamoa diba ḡaudia na momo herea. Iena moale badina na dia kohu bona moni. To Iehova ese e heniava ḡaudia daidiai e moaleva. Ia enai mai anina bada ḡauna na, Iehova ese e hanamoava bona e gimaiava karana.

7. Luka 21:20-24 heḡereḡerena, Iudea ai e nohova Kristen ginigunadia ediai dahaka e vara?

⁷ David ena hereva amo ta dibamu, tauanina iduruna ḡaudia ai lalohadai maorona baita abia na mai anina bada. Momokani, tauanina dalanai bae duruda ḡaudia na baita moalelai diba, to eda mauri ai unu na ḡau badadia ai basita halao na namo. Iudea ai e nohova Kristen ginigunadia ediai una na e vara. (Luka 21:20-24 ba duahi.) Iesu ese e hamaorodia nega ta be maimu “tuari oreadia ese Ierusalem bae koua heḡeḡe.” Una bae itaia neganai, “ororo bae heau lao.” Unu be kara tomamu neganai be maurimu, to ḡau momo na be rakatanimu. Laḡani haida gunadiai, Gima Kohorona ta ese una na ini e gwauraia toma: “Idia ese edia uma bona ruma e rakatani, bona edia ruma kohudia danu asie habou. E diba momokani Iehova ese na be gimadiamu bona be durudiamu, una dainai Ia itomadiho henina karana e atoa guna, a taunimanima ese e lalo badava ḡaudia na asie lalodia.”

8. Iudea ai e nohova Kristen ginigunadia ediai e vara ḡauna amo dahaka ta dibamu?

⁸ Iudea ai e nohova Kristen ginigunadia ediai e vara ḡauna amo dahaka ta dibamu? Matamanai tame herevalaia Gima Kohorona na e gwa: “Vaira negai reana tauanina ḡaudia baita lalodiamu karana ai hahetoho baita davarimu; idia be mai anina bada, eiava Dirava ibadinana karana dainai hahemauri baita abia hari mai anina bada? Nega dokonai, hekwakwanai idauidau baita haheaukalaimu bona ḡau haida na baita dadaraimu. Namona na baita noho heḡaeḡae, herevana dahaka baine vara, to Iudea e heautania Kristen taudia e kara heḡereḡerena baita kara.” *

9. Aposetolo Paulo ese Heberu taudia e henidia sisibana ese oi be ede e hagoadamu tomamu?

⁹ Iudea e rakatania Kristen taudia ese edia kohu iboudiai e rakatani bona gabu matamatanai bae noho ena hekwarahi mani a laloa. Unu Kristen taudia na edia dabu ḡaudia dainai Iehova enai bae tabekau na abidadama karana. To ḡau ma ta ese danu e durudia. Laḡani faiv gunanai Roma taudia ese Ierusalem do asie koua heḡeḡe neganai, aposetolo Paulo ese ina sisiba namona na Heberu taudia e henidia: “Lalomui ai moni basio hekise-hekise henia, a dekemui ai mimia ḡaudia na bavabi, asi karikarimui; badina be Dirava eto: Lau na basina negemu bona basina rakatanimu, lasi ona lasi vaitani. Taunabunai, mai goadada ida baitato, Lohiabada be egu hekaha, lau na basina gari; taunimanima ese ede bae hadikagu toma?” (Heb. 13:5, 6) Ta dibamu, Roma ese Ierusalem do asie vareai henia neganai, Paulo ena sisiba e badinaia taudia na gabu matamatana ai edia noho dalana matamatana na e abia dae. Idia ese e abia dae momokani Iehova ese edia dabu ḡaudia na be henimu. Paulo ena hereva ese e hagoadadamu ita danu idia e kara heḡereḡerena baita kara diba.

10. Paulo be dahaka e kara unu amo dounu e moale?

¹⁰ Paulo ese una sisiba heḡereḡerena na Timoteo danu e henia bona ita ese baita badinaia danu. Ia na e gwa: “Taunabunai, malamala bona hahedoki baita davari, unu hari laloda ese bae moalelai na namo.” (1 Tim. 6:8) Anina be aniani namodia basita ani, ruma namona ta ai basita noho, eiava nega ta ta ai dabua matamatadia basita hoi, a? Lasi, Paulo ena hereva anina na dia una. To iena hereva anina na, edai dahaka ḡau mimia, na baita moalelai. (Fili. 4:12) Paulo na unu e kara toma. Ita edai mai anina bada ḡauna na eda hetura karana Dirava ida, dia tauanina ḡaudia.​—Hab. 3:17, 18.

11. Mose ese Israel taudia e hamaorodia herevana amo dahaka ta dibamu?

¹¹ Ita ese eda dabu ḡaudia ta lalomu dalana na reana Iehova ese e lalomu dalana amo na idau. Israel taudia na laḡani 40 tano ḡaḡaena ai e noho murinai, mani Mose ese e hamaorodia herevana a laloa: “Iehova emui Dirava ese vada e hanamomui, imamui ḡaukaradia iboudiai lalodiai; emui loaloa ina tano ḡaḡaena badana ai ia dibana. Ini laḡani hari-ahui lalodiai Iehova emui Dirava ese vada e bamomuiva, ḡau ta ai asio dabu.” (Deu. 2:7) Unu laḡani 40 lalodiai, Iehova ese Israel taudia na mana amo e ubudia. Bona edia dabua​—Aigupto e rakatania neganai e kara dabuadia​—na asie dika. (Deu. 8:3, 4) Ena be reana Israel taudia haida na bema lalo unu na dia  heḡereḡere, to Mose ese e hahelalodia tao Iehova ese edia dabu ḡaudia iboudiai na e henidia. Iehova na be moalemu bema dekedai mimia ḡaudia na baita moalelaimu. Ia ese e havara henidamu ḡaudia maraḡidia danu baita moalelai, bona baita lalodia idia na iena harihari ḡaudia bona unu daidiai baita tenkiu henia.

12. Dahaka ese e hahedinaraia David ese Iehova na e abidadama henia?

¹² David na mai dibana Iehova ese ia e lalokau heniamu taudia na basine rakatanidia bona e lalodia badamu. Ena be Salamo 34 e toreava negana lalonai David na inaina ese e urava bae hamasea, to mai ena abidadama dainai, e itaia “Iehova ena aneru” ese ia na e ‘ḡeḡea ahu’ na heto. (Sal. 34:7) Reana David ese Iehova ena aneru na tuari gabunai e taruhamu tuari tauna ida e haheḡereḡerea, hanaihanai e gimamu. Ena be David na tuari tauna goadana bona Iehova ese e gwauhamata henia pavapava dagina baine henia, to inaina ituari henidia totona, vilipopo iḡaukaralaina eiava tuari kaiana iḡaukaralaina ai, sibona ena diba ai se tabekau. (1 Sam. 16:13; 24:12) David ese Dirava e abidadama henia, bona mai dibana Iehova ese ena aneru amo Ia e gari heniamu taudia na be hamauridiamu. Vaia, hari ina negai basita laloa hoa dalanai be gimadamu. To mai dibada Iehova e abidadama heniamu taudia na basie hisihisi ela bona hanaihanai.

13. Gog, Magog tauna ese be tuari henidamu neganai, dahaka dainai be laloamu ita na bae hadarereda haraḡa diba, to dahaka dainai basita gari? (Rau 1 laulauna ba itaia.)

¹³ Kahirakahira be varamu ḡaudia ese eda abidadama Iehova ena hegima karana ai na be tohoamu. Gog, Magog tauna o tanobada besedia iboudiai be heboumu, bona Dirava ena taunimanima be tuari henidiamu neganai, baita laloamu ita na da be hamasedamu. Namona na baita abia dae Iehova ese ita na momokani be hamauridamu. Tanobada besedia ediai, ita na vaitani asi igimadia mamoedia na heheto. (Esek. 38:10-12) Asi eda tuari kohudia bona asi tuari dibada. Tanobada besedia na be laloamu ita na be hadarereda haraḡamu. To basie dibamu ḡauna na, Iehova ena aneru na noho heḡaeḡae ita bae duruda. Dahaka dainai una na asi dibadia? Badina idia ese Dirava na asie abidadama heniamu. Idia na be hoa dikadikamu guba tuari oreana na ita daidai be tuarimu!​—Apok. 19:11, 14, 15.

14. Dahaka baita kara diba vaira negana totona baita heḡaeḡae?

¹⁴ Dahaka baita kara diba vaira negana totona baita heḡaeḡae? Ḡau ginigunana na, tauanina iduruna ḡaudia ai lalohadai maorona baita abia, badina nega ta unu ḡau na baita rakatanimu. Danu namona na dekedai miadia ḡaudia bona Iehova ihetura henina karana na baita moalelaidia bada. Bema eda Dirava baita dibaia namonamomu, Gog, Magog tauna ese be tuari henidamu neganai, baita abia dae momokanimu Dirava ese ita na be gimadamu.

15. Guna David enai be dahaka e vara dainai mai dibana Iehova ese ia na be duruamu?

¹⁵ Mani David e durua ḡauna ma ta aita herevalai, una ese be durudamu vaira neganai bae vara hahetohodia daidiai baita heḡaeḡae. David na e gwa: “A mamia toho bena ba diba Iehova na namo; ia e abidadama heniamu tauna danu e moalemu.” (Sal. 34:8) Unu hereva amo ta dibamu David na mai dibana Iehova ese ia na be duruamu. David na hanaihanai Iehova enai e tabekauva,  bona ena Dirava ese ia na se rakatania. Eregabenai, David ese Filistia tauna Goliata e vaira henia neganai e hamaoroa, eto: “Hari dina ai Iehova ese lau imagu ai baine atomu.” (1 Sam. 17:45) Gabeai, David na king Saulo ena hesiai ḡaukara e karaiava neganai, Saulo na nega momo e urava David baine alaia. To “Iehova ese David e bamoava.” (1 Sam. 18:12) David na guna Iehova ena heduru na e mamia dainai, mai dibana gabeai be davarimu hekwakwanaidia ai Ia ese na dounu be duruamu.

16. Ededia dala haida ai Iehova ena namo baita “mamia” diba?

¹⁶ Bema Iehova ena hahekau daladiai baita tabekaumu, vaira neganai be hamauridamu karana na basita daradaralaiamu. Hebou badadia daidiai eiava eda hebou iboudiai baitala bona eda haroro negana baita habadaia totona eda bosi baita hereva henia neganai, ta hahedinaraiamu Iehova na ta abidadama heniamu bona ta tabekau heniamu. Bema bosi ese eda noinoi basine abia dae bona baine hadokoda, dounu baita abia daemu Iehova ese ita na basine rakatanidamu bona eda dabu ḡaudia na hanaihanai be henimu, a? (Heb. 13:5) Ful-taim hesiai ḡaukara e karamu taudia momo edia ekspiriens ese e hahedinaraiamu, edia dabu negadiai Iehova ese na e durudia. Momokani, Iehova ese ita na basine rakatanidamu.

17. Laḡani 2022 ena siri badana be dahaka, bona dahaka dainai una na siri maorona?

¹⁷ Iehova na ita ida dainai, vaira neganai be varamu ḡaudia daidiai basita garimu. Dirava ese ita na basine rakatanidamu bema hanaihanai eda mauri ai iena ura baita atoa guna. Vaira neganai bae vara hekwakwanaidia daidiai hari baita heḡaeḡae na namo, bona Iehova ese basine rakatanidamu karana baita abia dae totona, Gavanin Bodi ese Salamo 34:10 na e abia hidi laḡani 2022 ena siri badana: “Iehova e tahuamu taudia na ḡau namona ta ai asie dabumu.”