1-3. Ededia hekwakwanai daidiai Iehova ena taunimanima na e taimu?

 OI O TAI negana ginigabena be edena nega? Nega haida, moale dainai ta taimu. To nega momo, lalohisihisi dainai ta taimu. Heḡereḡere, eda lalokau tauna ta e mase dainai ta taimu. United States ai, taihu Lorilei na e gwa: “Natugu ena mase hisihisina na bada herea dainai, lalogu ihagoadana ḡauna ta na lasi. Kudougu ena hisihisi na bada herea dainai, asi dibagu ede baina haheaukalaia toma.” *

² Reana badi ma haida daidiai baita taimu. Japan ai painia ta, Hiromi, na e gwa: “Nega ta ta ai na lalomanokamu badina egu hesiai ḡaukara ai na davaridiamu taudia na asie uramu bae kamonai. Nega haida, mai taigu ida Iehova na noiamu baine durugu hereva momokani e tahuamu tauna ta baina davaria.”

³ Oi danu unu o hemami tomamu, a? Oibe, ita momo na unu ta hemami tomamu. (1 Pet. 5:9) Ta uramu ‘Iehova isiaina baita lao heni mai moaleda ida,’ to reana ta lalohisihisimu, ta lalomanokamu, eiava ḡau ta ese Dirava ta badinaiamu karana e tohoamu dainai, ta taimu. (Sal. 6:6; 100:2) Unu ta hemami tomamu neganai, dahaka ese baine duruda diba baita haheauka?

4. Ina atikol ai be dahaka baita herevalaimu?

⁴ Iesu ena haheitalai amo ḡau haida baita dibamu. Nega haida, ia danu lalona se auka dainai “e tai.” (Ioa. 11:35; Luka 19:41; 22:44; Heb. 5:7) Mani ia e tai negadia aita herevalaidia. Unu ta herevalaimu lalonai, baita badina diba ḡaudia  baita dibamu. Bona ta lalohisihisimu negadiai bae duruda diba daladia haida danu baita herevalaimu.

5. Ioane 11:32-36 ai e hetore sivaraina amo Iesu enai be dahaka ta dibamu?

⁵ Laḡani 32 C.E. ena paraka negana ai, Iesu turana namona Lasaro na e gorerea bona e mase. (Ioa. 11:3, 14) Lasaro taihuna na rarua, Maria bona Mareta, bona Iesu ese una ruma bese na e lalokau henia badava. Unu hahine raruosi na taihudia lalokauna e mase dainai e lalohisihisi bada herea. Lasaro e mase murinai, Iesu na Maria bona Mareta e nohova gabuna, Betania ela. Mareta na e kamonai Iesu na e maiva neganai, e heau lao baine hedavari henia. Mareta ese ina hereva, “Lohiabada e, oi na iniseni ai boma noho, taihugu na basinema mase,” e gwauraia neganai ena hemami mani a laloa. (Ioa. 11:21) Una murinai Iesu ese Maria bona ma haida e itadia e taiva neganai, ia danu “e tai.”​—Ioane 11:32-36 ba duahia.

6. Dahaka dainai Iesu na Lasaro e mase neganai e tai?

⁶ Dahaka dainai una negai Iesu na e tai? Insight on the Scriptures bukana na e gwa: “Turana Lasaro ena mase bona taihuna edia dara doko dainai, Iesu ‘lalona e hisihisi bada bona e tai.’” * Reana Iesu ese turana namona Lasaro e gorerea neganai e mamia hisihisina bona kahirakahira baine mase neganai e abia hemamina e laloa. Bona momokani Maria bona Mareta na taihudia ena mase dainai e lalohisihisi bada herea karana ese danu Iesu lalona e hamanokaia bena e tai. Bema turamu namona ta eiava emu ruma bese tauna ta e mase, a dibamu oi danu unu o hemami toma. Mani ina sivarai amo ba diba ḡaudia toi ba lalodia.

7. Iesu na turana dainai e tai karana amo Iehova enai dahaka ta dibamu?

⁷ Iehova ese emu hemami na e lalopararalaiamu. Iesu na Tamana “anitarana ihaheḡereḡerena.” (Heb. 1:3) Iesu e tai  neganai, Tamana ena hemami e hahedinaraia. (Ioa. 14:9) Bema o lalokau heniamu tauna ta e mase dainai o lalohisihisimu, namona na ba diba Iehova na emu hisihisi e lalopararalaiamu, bona e bogamu hisi badamu. Bona e uramu emu dara doko baine hanamoa.​—Sal. 34:18; 147:3.

8. Dahaka dainai ta abia dae momokanimu Iesu ese eda lalokau taudia na be hatoredia isi loumu?

⁸ Iesu na e uramu emu lalokau taudia baine hatoredia isi lou. Iesu do se tai neganai, Mareta e hamaoroa: “Taihumu na baine tore isi lou.” Mareta ese Iesu ena hereva na e abia dae. (Ioa. 11:23-27) Ia na Iehova e tomadiho heniava abidadama hahinena ta dainai, laḡani handred gunadiai peroveta taudia Elia bona Elisaia ese e kara toreisi lou sivaraidia na mai dibana. (1 Han. 17:17-24; 2 Han. 4:32-37) Bona Iesu ese e kara toreisi lou sivaraidia danu mai dibana. (Luka 7:11-15; 8:41, 42, 49-56) Oi danu bo abia dae dibamu, emu lalokau mase taudia na bo itadia loumu. Iesu na turana edia hisihisi neganai mai taina ida e hagoadadia karana amo e hamomokaniamu, e ura dikadikamu mase taudia na baine hatoredia isi lou!

9. Iesu heḡereḡerena, e dara dokomu taudia be edena dalai baita durudia diba? Haheitalai ta a gwauraia.

⁹ E dara dokomu taudia ba durudia diba. Iesu na dia Mareta bona Maria ida e tai mo, to danu edia hereva e kamonai bona e hagoadadia. Ita danu dara doko taudia na unu baita kara henidia toma. Dan, elda ta Australia ai e nohomu, na e gwa: “Adavagu e mase neganai, na urava heduru baina abi. Tadikaka haida mai adavadia ida na dina bona hanuaboi ai nega e atova e hakala heniguva. Asie kouguva egu dara doko baina hahedinaraia, bona na taiva neganai idia na asie hemaraiva. Danu asina heḡereḡereva neganai, idurugu karadia e karava, heḡereḡere egu motuka e huriava, stoa ai egu aniani e hahoiva, bona e nanaduva. Bona nega momo lau ida a ḡuriḡuri hebouva. Momokani, idia na tura korikoridia bona tadikaka ‘dika negadia ai.’”​—Her. 17:17.  

10. Luka 19:36-40 ai e hetore sivaraina a herevalaia.

¹⁰ Nisan 9, 33 C.E. ai, Iesu na Ierusalem ela. Hanua e lao heniava lalonai, hutuma na e hegogo bona edia dabua na dala ai e laha, unu amo e hahedinaraia ia na edia Pavapava. Una na moale negana. (Luka 19:36-40 ba duahia.) Una dainai, ena hahediba ese gabeai e vara ḡauna na asie laloa. “[Iesu] na e raka kahira, hanua e itaia, bena e tai.” Matana mai ranuna ida, Ierusalem ai e nohova taudia ediai baine vara ḡauna dikana e perovetalaia.​—Luka 19:41-44.

11. Dahaka dainai Iesu na Ierusalem taudia daidiai e tai?

¹¹ Iesu lalona na e hisihisi bada badina dibana ena be edia heabidae na namo herea, to hanua taudia momo na edia kara amo de hahedinaraia, Basileia sivaraina na basie abia daemu. Una dainai, Ierusalem na be hadikaiamu bona be roho maurimu Iuda taudia na abi mauri taudia ai be laomu. (Luka 21:20-24) Madi, Iesu ena lalohadai heḡereḡerena, momo ese ia na asie abia dae. O nohomu gabunai taunimanima ese Basileia sivaraina e abia daemu eiava? Bema hereva momokani o hahedibalaiamu lalonai haida mo e kamonaimu, Iesu e tai karana amo dahaka bo dibamu? Mani baita diba ḡaudia ma toi aita lalodia.

12. Iesu na dekena taudia daidiai e tai karana amo Iehova enai be dahaka ta dibamu?

¹² Iehova ese taunimanima na e lalodia  badamu. Iesu e tai karana dainai ta dibamu Iehova ese taunimanima na e lalodia badamu. ‘Ia na se uramu ta baine mase; e uramu iboudiai bae helalo-kerehai.’ (2 Pet. 3:9) Hari ina negai, mai eda ura bona haheauka ida sivarai namona amo taunimanima baita durudiamu neganai, ta hahedinaraiamu dekeda taudia na ta lalokau henidiamu.​—Mat. 22:39. *

13-14. Iesu ese taunimanima ediai hebogahisi karana be ede e hahedinaraia toma, bona ita ese una kara be ede baita hahedinaraia toma?

¹³ Iesu ese hesiai ḡaukara na e goadalaia. Dala e hekehova negadiai, ia ese taunimanima e hadibadiava karana amo ena lalokau e hahedinaraia. (Luka 19:47, 48) Dahaka dainai unu e kara toma? E bogadia hisi dainai. Nega haida, momo na e urava Iesu ena hereva bae kamonai dainai, ia bona ena hahediba na “asi edia dala bae aniani.” (Mar. 3:20) Bona hanuaboi ai danu e hahedibava, badina ena hereva e urava baine kamonaia tauna ta enai una na nega maorona. (Ioa. 3:1, 2) Iesu ena hereva e kamonai taudia momo na ena hahediba ai asiela. To e kamonai taudia iboudiai na e hadibadia ḡoevaḡoeva. Hari ina negai, ta uramu taunimanima iboudiai ese sivarai namona bae kamonaia. (Apos. 10:42) Una baine vara totona, namona na eda hesiai ḡaukara ikarana dalana baita haidaua.

¹⁴ Mai emu ura ida ḡau haida ba haidau. Bema eda hesiai ḡaukara negadia na basita haidaumu, reana sivarai namona e uramu bae kamonaia taudia na basita davaridiamu. Painia taihu ta ladana Matilda na e gwa: “Adavagu ida nega idauidau ai taunimanima a haroro henidiamu. Dabai, bisnes gabudiai a haroromu. Dina tubua ai, taunimanima momo e loaloamu dainai, pablik gabudiai troli a ḡaukaralaimu. Adorahi ai, a davaria taunimanima momo na edia ruma ai a hereva henidiamu.” Dia namo eda ura negadiai mo baita haroro, to namona na mai eda ura ida eda sediual baita haidau, taunimanima baita davaridia diba negadia ai baita haroro. Bema unu baita kara tomamu, ta dibamu Iehova na be moalemu.

15. Luka 22:39-44 heḡereḡerena, Iesu ena hanuaboi ginigabenai dahaka e vara?

¹⁵ Nisan 14, 33 C.E. hanuaboina ai, Iesu na Getesemane imeana ela. Unuseni ai, ena lalohekwarahi ḡaudia iboudiai Iehova e hamaorolaia. (Luka 22:39-44 ba duahi.) Unu hora oredia lalodiai Iesu na e noinoiva, “mai taina bona mai irurumatana ida.” (Heb. 5:7) Iesu ena hanuaboi ginigabenai, do se mase neganai, dahaka e ḡuriḡurilai? Goada e noi Iehova baine badinaia bona ena ura baine karaia totona. Iehova ese Natuna ena hisihisi na ena ḡuriḡuri amo e dibaia bona aneru ta e siaia e hagoadaia.

16. Dahaka dainai Iesu na Getesemane imeana ai e ḡuriḡuriva neganai, lalona na e hisihisi bada herea?

¹⁶ Iesu na mai taina ida Getesemane imeana ai e ḡuriḡuri badina na, se ura taunimanima na bae laloa ia na Dirava ladana ihadikana tauna. Danu ia ese e huaia madunana​—Tamana ladana baine hahelaḡaia​—na e lalopararalaia. Bema Iehova o badinaiamu karana e tohoamu hahetohona ta o davariamu, Iesu e tai karana amo dahaka bo dibamu? Mani baita diba ḡaudia ma toi aita herevalai.

17. Iesu ena ḡuriḡuri e haerelaidia karana amo Iehova enai be dahaka ta dibamu?

¹⁷ Iehova ese emu noinoi na be kamonaimu. Iehova ese Iesu ena noinoi na e kamonaidia. Dahaka dainai? Badina Iesu ese e laloa bada ḡauna na, hanaihanai Tamana baine badinaia bona ladana baine hahelaḡaia. Bema ta lalo badamu ḡaudia na, hanaihanai Iehova baita badinaia bona ladana baita hahelaḡaia, ia ese eda ḡuriḡuri na be kamonaidiamu bona be durudamu.​—Sal. 145:18, 19.

18. Ededia dalai Iesu na tura ta mai ena hebogahisi heḡereḡerena?

¹⁸ Iesu ese na e bogamu hisimu badina emu hemami na mai dibana. Ta lalohisihisimu neganai, eda hemami e lalopararalaiamu tura namona ta mai ena hebogahisi ese be hagoadadamu neganai, baita moale badamu. Iesu na tura unu bamona. Ia na manoka mamina bona heduru baita abi na namo karana na mai dibana. Eda manoka ḡaudia na mai dibana, bona dala be karamu “eda dabu negadia” korikori ai  heduru baita abimu. (Heb. 4:15, 16) Getesemane imeana ai Iesu na aneru ta ena amo heduru e abi heḡereḡerena, mai eda ura ida Iehova ese e henimu heduruna​—herevana pablikeisin ta, vidio ta, tok ta, elda ta eiava turada namona ta ena vadivadi karana amo​—baita abia dae na namo.

19. Dirava ibadinana karana ai hahetoho ba davaria neganai, edena dalai goada bavabi diba? Haheitalai ta a gwauraia.

¹⁹ Iehova ese iena “maino” baine henimu. Edena dalai Iehova ese be hagoadadamu? Baita ḡuriḡurimu neganai, ita ese “Dirava ena maino, eda diba idoinai e hereaiamu mainona” baita abiamu. (Fili. 4:6, 7) Iehova ese be henimu mainona ese laloda be hamainoamu bona ḡau iboudiai baita lalo namonamomu. Mani taihu ladana Luz enai una e vara karana aita laloa. Ia na e gwa: “Launa na mamiava sibogu na nohova dainai na lalohekwarahi bada hereava. Nega haida, unu hemami daidiai na laloava Iehova ese lau na se lalokau henigumu. To unu na hemami tomava neganai, karaharaḡa Iehova enai egu hemami na hamaorolaiamu. Ḡuriḡuri karana ese e durugu egu hemami baina biagua.” Una taihu enai e vara karana ese e hahedinaraiamu, ḡuriḡuri karana amo maino baita abia diba.

20. Iesu e tai karana amo dahaka ta dibamu?

²⁰ Iesu e tai karana amo bae duruda bona baita badina diba ḡaudia momo tame diba! E hadibadamu turada e dara dokomu neganai baita durudia, bona baita abia dae eda lalokau tauna ta e masemu neganai Iehova bona Iesu ese ita na be durudamu. E hagoadadamu mai eda hebogahisi ida baita haroro bona baita hahediba, badina Iehova Dirava bona Iesu Keriso ese una kara namona na e hahedinaraia. Bona ta moalemu badina ta dibamu Iehova bona Natuna lalokauna ese eda hemami bona manoka ḡaudia na e lalopararalaimu, bona e uramu bae duruda baita haheaukalai. Namona na tame diba ḡaudia baita badina ela bona Iehova ese ena gwauhamata namona, ‘iruru-mata iboudiai matada amo baine dahu oho,’ na baine haḡuḡurua!​—Apok. 21:4.