1-2. (a) Edena negai ta lalokau heniamu mase tauna ta laloamu? (b) Iesu do se mase hanuaboina ai ia ese dahaka e hamatamaia?

 ENA be laḡani daudau lalodiai eda lalokau taudia na de mase, to dounu ta lalodia taomu. Nega momo idia e mase dinana ai, ta kara hebou ḡaudia ta lalodia loumu.

² Laḡani ta ta ai tanobada heḡeḡemadai taunimanima milion momo ida ta heboumu, ta lalokau henia badamu tauna, Iesu Keriso, ena mase dinana ta laloataomu. (1 Pet. 1:8) Ta heboumu, unu amo kara dika bona mase amo ihamaurida totona ena mauri e heni tauna ta laloataomu. (Mat. 20:28) Iesu danu e ura ia murinai e rakamu taudia ese ena mase bae laloatao. Iesu do se mase hanuaboina ai, ia ese mai anina bada hebouna ta e hamatamaia. Bena ena hahediba e haḡanidia, eto: “Ini ba kara toma, lau ilalolaigu.” *​—Luka 22:19.

3. Ina atikol ai dahaka baita herevalaimu?

³ Keriso Ena Mase Ilalotaona hebouna e laomu taudia haida mo edia helaro na guba ai. To tanobada helarona e abia taudia milion momo danu una hebou e laomu. Ina atikol ai, ita ese unu orea rua na laḡani ta ta ai mai edia ura ida Keriso Ena Mase Ilalotaona hebouna e laomu badidia baita herevalaimu. Danu, ita ese una hebou baitala karana ena namo baita herevalaimu. Mani e horodia taudia ese una hebou e laomu badidia haida aita herevalai guna.

4. Dahaka dainai horoa taudia ese Iesu Ena Mase Ilalotaona dinana ai parao e aniamu bona wain e inuamu?

⁴ Laḡani ta ta ai e horodia taudia ese Iesu Ena Mase Ilalotaona neganai parao e animu bona wain e inumu. Dahaka  dainai idia na parao e animu bona wain e inumu? Una baita haerelaia totona, mani tanobadai Iesu ena hanuaboi ginigabena ai e vara ḡauna aita laloa. Lagau Hanai ariana murinai, Iesu ese ḡau matamatana ta e hamatamaia, una na hari e gwauraiamu Lohiabada Ena Anibou. Ia ese ena abidadama aposetolo 11 na parao bona wain e henidia bona e hamaorodia bae ania bona bae inua. Iesu ese ena hahediba ediai gwauhamata rua herevalai​—gwauhamata matamatana bona Basileia gwauhamatana. * (Luka 22:19, 20, 28-30) Unu gwauhamata ruaosi ese dala e kehoa aposetolo taudia bona ma haida na guba ai pavapava bona hahelaḡa taudia ai baela diba. (Apok. 5:10; 14:1) Horoa orena taudia, * unu gwauhamata ruaosi lalonai e vareai taudia, sibodia mo Iesu Ena Mase Ilalotaona dinana ai parao bae ania bona wain bae inua diba.

5. Horoa taudia ese e abia helarona ai dahaka e dibamu?

⁵ Horoa taudia na mai edia ura ida Iesu Ena Mase Ilalotaona hebouna e laomu badina ma ta na ina, una hebou ai e varamu ḡaudia e itamu karana ese e durudiamu edia helaro bae laloa. Iehova ese e henidia helarona na idau herea, idia na guba ai basine mase bona basine bodaḡa diba maurina be moalelaiamu, bona hairai de abia tauna, Iesu Keriso bona 144,000 taudia ma haida ida be ḡaukara heboumu. To hereadaena be, Iehova Dirava vairanai be ginimu! (1 Kor. 15:51-53; 1 Ioa. 3:2) Horoa taudia na e lalopararamu idia na e vavedia guba ai unu hahenamo bae moalelai. To guba baela totona, idia na Dirava bae abidadama henia ela bona bae mase. (2 Tim. 4:7, 8) Horoa taudia na edia guba helarona e laloamu karana ese e hamoalediamu. (Tito 2:13) To “mamoe idaudia” be ede bamona? (Ioa. 10:16) Iesu Ena Mase Ilalotaona hebouna e laomu badidia haida be dahaka?

6. Dahaka dainai laḡani ta ta ai mamoe idaudia na Iesu Ena Mase Ilalotaona hebouna e laomu?

⁶ Mamoe idaudia na Iesu Ena Mase Ilalotaona hebouna e laomu neganai, parao na asie animu bona wain na asie inumu. Laḡani 1938 ai, tanobada helarona e abia taudia na nega ginigunana Iesu Ena Mase Ilalotaona hebouna ai e boiridia. The Watchtower March 1, 1938, na e gwa: “[Mamoe idaudia] na una hebou baela bona una hebou ai e varamu karadia bae ita na maoro. . . . Una nega na idia ese danu bae moalelaia na maoro.” Headava neganai e vavedia taudia ese headava e moalelaiamu heḡereḡerena, mamoe idaudia na Iesu Ena Mase Ilalotaona hebouna e laomu dainai e moalemu.

7. Dahaka dainai mamoe idaudia na e ura dikadikamu Iesu Ena Mase Ilalotaona dinanai e henimu herevana bae kamonai?

⁷ Mamoe idaudia danu edia helaro na e laloamu. E ura dikadikamu Iesu Ena Mase Ilalotaona dinana ai Memorial tok bae kamonaia. Badina una tok ai Keriso bona ia ida be lohiamu 144,000 taudia ese laḡani 1,000 lalonai abidadama taudia daidiai be karamu ḡaudia be herevalaimu. King Iesu Keriso ena hegunalai henunai, unu guba ai be lohiamu taudia ese tanobada na paradaiso ai be halaoamu bona kamonai taudia na ḡoevadae taudia ai be halaodiamu. Iesu Ena Mase Ilalotaona hebouna be laomu taudia milion momo na Baibul ese vaira negana e perovetalaia  herevadia be lalodiamu neganai be moalemu, heḡereḡere Isaia 35:5, 6; 65:21-23 bona Apokalupo 21:3, 4. Lalodia matanai be itaiamu, idia bona edia lalokau taudia na una tanobada matamatana lalonai be nohomu karana ese edia vaira nega helarona be hagoadaiamu, bona be durudiamu Iehova ihesiai henina karana basie hadokoa.​—Mat. 24:13; Gal. 6:9.

8. Mamoe idaudia na Iesu Ena Mase Ilalotaona hebouna e laomu badina ma ta be dahaka?

⁸ Mamoe idaudia na Iesu Ena Mase Ilalotaona hebouna e laomu badina ma ta mani aita laloa. Idia na e uramu edia lalokau bona heduru na horoa taudia ediai bae hahedinaraia. Dirava na ena Hereva ai e peroveta, e horodia taudia bona tanobada helarona e abia taudia na bae ḡaukara hebou namonamo. Edena dalai? Mani haheitalai haida aita herevalai.

9. Sekaria 8:23 ai e gwauraia peroveta herevana ai, mamoe idaudia ese horoa taudia e lalodiamu dalana be ede e hahedinaraia toma?

⁹ Sekaria 8:23 ba duahia. Ina peroveta herevana ai, mamoe idaudia ese horoa tadikaka bona taihu e lalodiamu dalana e hahedinaraia ḡoevaḡoeva. Ini hereva “Iuda tauna ta” bona “oi” na orea tamona e herevalaia, una na horoa orena taudia. (Roma 2:28, 29) “Tatau gwauta, gado idauidau besedia amo” na mamoe idaudia e laulaulaidia. Idia ese “Iuda tauna ta ena dabua bae dogoa tao,” anina na horoa taudia ida tomadiho ḡoevana bae badinaia. Una dainai, mamoe idaudia na Iesu Ena Mase Ilalotaona habouna e laomu badina e uramu edia lalokau bona heduru na e horodia taudia ediai bae hahedinaraia.

10. Esekiel 37:15-19, 24, 25 ena peroveta herevana baine ḡuḡuru totona, Iehova be dahaka e kara?

¹⁰ Esekiel 37:15-19, 24, 25 ba duahi. Una peroveta herevana baine ḡuḡuru totona, Iehova ese horoa taudia bona mamoe idaudia na e hatamonadia, bona edia lalotamona karana na ḡau ta ese basine hapararaia diba. Una peroveta herevana ese au rua e herevalaidia. Guba helarona e abia taudia na “Iuda ena au” heḡereḡerena (Israel pavapavadia na Iuda iduhuna amo e abidia hidiva), bona tanobada helarona e abia taudia be “Efraim auna” heḡereḡerena. * Iehova ese unu orea rua na baine hatamonadia, unu amo au tamona ai baela. Anina na mai lalotamonadia ida, idia ese edia Pavapava tamona, Keriso Iesu, bae hesiai henia. Laḡani ta ta ai, horoa taudia bona mamoe idaudia na Iesu Ena Mase Ilalotaona hebouna e laomu neganai, dia orea idaudia rua ai e heboumu, to idia na ‘seri tamona’ bona “ireḡudia tauna” danu tamona.​—Ioa. 10:16.

11. Edena dalai Mataio 25:31-36, 40 ai e gwauraia “mamoe” ese Keriso tadikakana e durudiamu?

¹¹ Mataio 25:31-36, 40 ba duahi. Ina parabole ai e gwauraidia “mamoe” ese nega dokonai tanobada helarona e abia kara maoromaoro taudia e laulaulaidia​—idia na mamoe idaudia. Idia na hanaihanai Keriso tadikakana, horoa orena taudia, e durudiamu ḡaukara bada hereana ta bae haḡuḡurua. Una na tanobada heḡeḡemadai haroro bona hahediba ḡaukarana.​—Mat. 24:14; 28:19, 20.

12-13. Ededia dala ma haida ai, mamoe idaudia ese Keriso tadikakana e durudiamu?

¹² Laḡani iboudiai, Iesu Ena Mase Ilalotaona dinana e lao heniamu puradia ai, mamoe idaudia ese Keriso tadikakana bae durudia totona, tanobada heḡeḡemadai una hebou e uramu baela taudia ivavedia ḡaukarana e karaiamu. (Maua ladana, “ Iesu Ena Mase Ilalotaona Negana Totona Do  Heḡaeḡae, A?” ba itaia.) Ena be kongrigeisin momo ai wain bona parao bae abi taudia na lasi, to ḡau iboudiai e karamu unu amo tanobada heḡeḡemadai ai kongrigeisin iboudiai ese Iesu Ena Mase Ilalotaona hebouna bae karaia. Mamoe idaudia na e moale dikadikamu unu dala ai Keriso tadikakana e durudiamu. Idia na mai dibadia, Iesu na e gwa, ia tadikakana horoa taudia, ede e kara henidia tomamu na vaitani ia danu unu e kara henia tomamu.​—Mat. 25:37-40.

¹³ Ededia badi ma haida daidiai ita iboudai na Iesu Ena Mase Ilalotaona hebouna ta laomu?

14. Edena dalai Iehova bona Iesu ese lalokau hereadaena e hahedinarai henida?

¹⁴ Iehova bona Iesu ese e hahedinaraia lalokauna dainai ta tenkiumu. Iehova ese dala momo ai ena lalokau na e hahedinarai henida. To ena lalokau e hahedinaraia dalana hereadaena na, ia Natuna lalokauna e siaia ita daidai e hisihisi bona e mase. (Ioa. 3:16) Iesu danu lalokau bada e hahedinaraia, mai ena ura ida ita daidai ena mauri e heni. (Ioa. 15:13) Ita ese Iehova bona Iesu e hahedinaraia lalokauna davana na basita heni lou dibamu. To ita ese eda tenkiu karana na dina ta ta ai eda mauri dalana amo baita hahedinaraia diba. (Kol. 3:15) Bona Iesu Ena Mase Ilalotaona hebouna baitala, unu amo edia lalokau karana ita edai baita laloatao bona eda lalokau idia ediai baita hahedinaraia.

15. Dahaka dainai horoa taudia bona mamoe idaudia ese Dirava ena harihari ḡauna, mauri davana na e laloa badamu?

¹⁵ Ita ese Dirava ena harihari ḡauna, mauri davana, na ta laloa badamu. (Mat. 20:28) E horodia taudia ese mauri davana na e laloa badamu, badina unu amo edia helaro namona bae abia diba. Keriso ena boubou ḡauna e abidadama henia dainai, Iehova ese maorodia e gwaurai, bona natuna ai e halaodia. (Roma 5:1; 8:15-17, 23) Mamoe idaudia ese danu una mauri davana na e laloa badamu. Keriso rarana e hahebubua karana e abidadama heniamu dainai, Dirava vairanai edia kara na ḡoeva, ia isiaina bae lao heni diba, bona “hisihisi badana” amo bae roho mauri helarona e abia. (Apok. 7:13-15) Horoa taudia bona mamoe idaudia ese mauri davana e laloa badamu dalana ta na, laḡani ta ta ai Iesu Ena Mase Ilalotaona hebouna e laomu.

16. Iesu Ena Mase Ilalotaona hebouna baitala badina ma ta be dahaka?

¹⁶ Iesu Ena Mase Ilalotaona hebouna ta laomu badina ma ta na, ta uramu Iesu ena hereva baita badinaia. Herevana vaira negai eda helaro be dahaka, to ita ta ta na Iesu ese ena mase ilalotaona hebouna ginigunana e karaia hanuaboina ai, e gwauraia haheḡanina baita badinaia, eto: “Ini ba kara toma, lau ba lalogu.”​—1 Kor. 11:23, 24.

17. Edena dalai Iesu Ena Mase Ilalotaona karana ese be durudamu, Iehova baita raka henia kahi?

¹⁷ Iehova baita raka henia kahi. (Iak. 4:8) Ina stadi ai tame diba heḡereḡerena, Iesu Ena Mase Ilalotaona karana ese dala e kehoamu, Iehova ese e henida helarona baita laloa, bona lalokau hereadaena e hahedinarai henida karana baita laloa dobu. (Ier. 29:11; 1 Ioa. 4:8-10) Eda vaira nega helarona bona Dirava ena lalokau hereadaena ita edai baita haerodiamu neganai, Iehova ilalokau henina karana baita habadaiamu bona eda hetura karana ia ida baita hagoadaiamu.​—Roma 8:38, 39.

18. Iesu ena haheitalai baita laloa dobumu karana ese be hagoadadamu dahaka baita kara?

¹⁸ Ita na e hagoadadamu Iesu ena kara  baita tohotohoa. (1 Pet. 2:21) Iesu Ena Mase Ilalotaona dinana e lao heniamu neganai, ita ese Baibul amo Iesu ena wiki ginigabena tanobada ai, iena mase, bona ena toreisi lou ta lalodiamu. Bena Iesu Ena Mase Ilalotaona hanuaboina ai, be henimu tok ese be durudamu Iesu ena lalokau ita edai baita laloamu. (Efe. 5:2; 1 Ioa. 3:16) Iesu ese sibona e heni karana ta duahiamu bona ta laloa dobumu neganai, ta uramu ‘iena raka heḡereḡerenai baita raka’.​—1 Ioa. 2:6.

19. Edena dala ai Dirava ena lalokau ai baita noho diba?

¹⁹ Laloda na ta hadaiamu Dirava ena lalokau lalonai baita noho. (Iuda 20, 21) Dirava ena lalokau lalonai baita noho diba bema ia baita badinaia, ladana baita hahelaḡaia, bona kudouna baita hamoalea. (Her. 27:11; Mat. 6:9; 1 Ioa. 5:3) Iesu Ena Mase Ilalotaona karana ese e hagoadadamu dina ta ta ai eda mauri dalana amo baita hahedinaraia, ita na ta uramu Iehova ena lalokau lalonai baita noho hanaihanai.

20. Ededia badi namodia daidiai Iesu Ena Mase Ilalotaona hebouna baitala?

²⁰ Ena be eda helaro na guba ai baita mauri hanaihanai, eiava tanobada ai baita mauri hanaihanai, to badi namodia daidiai Iesu Ena Mase Ilalotaona hebouna baitala. Laḡani ta ta ai, una dina ai ta heboumu neganai, ita ese ta lalokau heniamu tauna, Iesu Keriso, ena mase ta laloataomu. Bada hereana be, lalokau karana hereadaena ta laloataomu​—Iehova ese Natuna e heni, mauri davana ai ela. Ina laḡani ai Iesu Ena Mase Ilalotaona hebouna na Friday, April 15, 2022 adorahina ai be heabimu. Iehova bona Natuna na ta lalokau henidiamu, una dainai Iesu ena mase ilalotaona dinana ai, ita edai mai anina bada ḡauna na, una hebou baitala.