Idia haida e tubu dae gabudiai, tatau momo ese ha’hine na asie lalodia badamu. Heḡereḡere, Bolivia ai, seket tauna ta ladana Hans, na e gwa: “Tatau haida e tubu dae gabudia ai, idia edia mauri dalana dainai, tatau momo na e hekokorokumu. Idia na e laloamu idia ese ha’hine e hereadiamu dainai asie matauraidiamu.” Taiwan ai, elda ta ladana Shengxian, na e gwa: “Lau na nohomu gabunai, tatau momo na e laloamu ha’hine na asi edia maoro tatau ediai edia lalohadai bae gwaurai. Bema tau ta ese hahine ta ena lalohadai be herevalaiamu, bamona ese ia na basie matauraiamu.” A haida be dala ma haida amo e hahedinaraiamu ha’hine na asie matauraidiamu. Heḡereḡere, ha’hine e hevasehalaidiamu.

Herevana tau ta ena mauri dalana na ede bamona, to ena kara na baine haidau diba. Ia na baine abia dae tatau ese ha’hine na se hereadia. (Efe. 4:​22-24) Una na baine karaia diba bema ia na Iehova ena haheitalai baine tohotohoa. Ina atikol ai, Iehova ese ha’hine e kara henidiamu dalana, tadikaka ese Iehova ena haheitalai bae tohotohoa dalana, bona elda taudia ese taihu bae matauraidia daladia baita herevalaimu.

IEHOVA ESE HA’HINE BE EDE E KARA HENIDIA TOMAMU?

Iehova na haheitalai hereadaena e hahedinaraia ha’hine baita kara henidia dalanai. Ia na Tama ta mai ena hebogahisi, bona ita iboudai na e lalokau henidamu. (Ioa. 3:16) Bona ia e abidadama heniamu taihu iboudiai na ia natuna bamona e lalodiamu. Mani Iehova ese ha’hine e matauraidiamu daladia aita herevalai.

Iehova ese tatau bona ha’hine na e kara henidia heḡereḡeremu. Iehova ese tatau bona  ha’hine e karadia, ia heida-idana. (Gen. 1:27) Ia ese dia tatau mo aonega bona diba e henidiamu, to ha’hine danu, eiava basitato ia ese tatau mo e hanamodiamu a ha’hine be lasi. (2 Sis. 19:7) Ia ese tatau bona ha’hine na diba tamona e henidia Baibul ena hereva momokani bae lalopararalaia, bona iena kara namodia bae tohotoho. Danu, Iehova ese abidadama tatau bona ha’hine na e lalodia badamu, ena be edia helaro na tanobada paradaisona ai bae mauri hanaihanai eiava guba ai hahelaḡa bona lohia ḡaukarana bae karaia. (2 Pet. 1:1) Oibe, Iehova ese ha’hine na e lalodia badamu.

Iehova ese ha’hine na e hakala henidiamu. Iehova ese ha’hine edia lalohadai bona hemami na e lalodia badamu. Heḡereḡere, ia ese Rahela bona Hana edia ḡuriḡuri na e hakala heni bona e haerelai. (Gen. 30:22; 1 Sam. 1:​10, 11, 19, 20) Danu Iehova ese Baibul e torea taudia e hasiahudia bena ha’hine e hakala henidia tataudia sivaraidia e tore. Heḡereḡere, Abraham na Iehova ena hereva heḡereḡerena adavana Sara e kamonai henia. (Gen. 21:​12-14) Bona King David be Abigail e kamonai henia. Danu e laloparara, Iehova ese Abigail e siaia ia baine hereva henia. (1 Sam. 25:​32-35) Iesu, Tamana ena kara e hahedinarai ḡoevaḡoeva tauna, ese sinana Maria ena hereva na e kamonai. (Ioa. 2:​3-10) Unu sivarai amo ta dibamu Iehova ese ha’hine e matauraidiamu dalana ta na, e kamonai henidiamu.

Iehova ese ha’hine na e trastidiamu. Heḡereḡere, Iehova ese Heva e trastia dainai, e hamaoroa tanobada ireḡuna ḡaukarana ai adavana baine durua. (Gen. 1:28) Unu amo Iehova ese Heva na e laloa bada bona e diba momokani ia ese adavana, Adam, na baine durua diba. Danu Iehova ese peroveta hahinedia Debora bona Hulda e trastidia dainai iena hereva e henidia iena taunimanima bae hakaudia totona, padadiai na hahemaoro tauna ta bona king ta. (Hah. 4:​4-9; 2 Han. 22:​14-20) Hari danu, Iehova ese Kristen hahinedia e trastidiamu dainai ḡaukara e henidiamu. Idia haida na pablisa, haida be painia bona haida be misinari ḡaukarana e karaiamu. A haida be, Kingdom Hall bona brens idisainidia, ihaginidia bona ihanamodia ḡaukaradia e karamu. Bona ma haida na Betele bona remote translation office ai e ḡaukaramu. Unu taihu iboudiai na tuari oreana ta bamona, Iehova ese e ḡaukaralaidiamu ena ura ihaḡuḡuruna. (Sal. 68:11) Momokani, Iehova matanai ha’hine na mai goadadia bona ḡaukara idauidau na bae kara diba.

EDENA DALA AI TADIKAKA ESE IEHOVA BAE TOHOTOHOA?

Tadikaka na Iehova ese ha’hine e kara henidiamu dalana bae tohotohoa totona, namona na mai momokanidia ida edia lalohadai bona kara bae haerodia. Tadikaka bae durudia ḡaudia be dahaka? Haheitalai ta na X-ray misinina ese ta kudouna ai gorere e hahedinaraiamu. Una heḡereḡerena, tura namona ta bona Dirava ena Hereva ese ta kudouna ai ha’hine e lalodia kereremu lalohadaidia bae hahedinarai diba. Tadikaka na tura namona bona Dirava ena Hereva amo heduru bae abi totona dahaka bae kara?

Turamu namona ta ena amo heduru ba tahu. (Her. 18:17) Turamu namona ta, oi ese o trastiamu bona ḡau e haero namonamomu tauna ba nanadaia: “O laloamu lau ese taihu be ede na kara henidia tomamu? Taihu e laloamu lau ese idia na matauraidiamu, a? Edena dala ai idia ikara henidia daladia baina hanamo?” Bema turamu ese oi ba hanamo kahadia e herevalaimu, basio lalohisihisi. To, namona na emu kara ba haidaudia.

Dirava ena hereva ba stadilaia. Bema o uramu ba diba oi ese taihu o kara namo henidiamu eiava lasi, dala namona ta na oiemu lalohadai bona kara ba haerodia bona ba itaia bema unu na Dirava ena Hereva ida heḡereḡere. (Heb. 4:12) Baibul baita stadilaiamu neganai, ha’hine e kara namo henidia bona asie kara namo henidia tataudia sivaraidia baita dibamu. Bena edia kara bona iseda kara baita haheḡereḡeredia. Danu, Baibul siri idauidau baita haheḡereḡeredia namonamomu neganai, Baibul ese ha’hine e herevalaidia siridia na baita lalodia maoromaoromu. Heḡereḡere, 1 Petero 3:​7, [NWT] ai eto, tatau ese “hahine bae matauraidia badina idia na hodu  manokana na heto.” b Una anina be hahine na tatau ese e hereadia bona idia na asi aonegadia, a? Lasi! Una dainai mani Petero ena hereva bona Galatia 3:​26-29 e hahedinaraiamu herevana Iehova ese ha’hine danu e abidia hidi Iesu ida guba ai bae lohia herevana na ba haerodia. Oibe, bema Dirava ena Hereva bo stadilaiamu bona turamu ena amo heduru bo tahumu, taihu imatauraidia daladia bo dibamu.

EDENA DALA AI ELDA TAUDIA ESE TAIHU BAE MATAURAIDIA?

Kongrigeisin ai tadikaka ese taihu bae matauraidia totona elda taudia edia haheitalai bae tohotoho. Edena dala ai elda taudia na taihu imatauraidia karana ai haheitalai namona bae hahedinaraia? Mani dala haida aita herevalai.

Taihu e karamu ḡau namodia daidiai e hanamodiamu. Elda taudia ese aposetolo Paulo ena haheitalai bae tohotohoa diba. Ia ese Roma kongrigeisin e tore henia revarevana lalonai taihu haida danu e hanamodia. (Roma 16:12) Una revareva na kongrigeisin ai e duahia neganai, unu taihu edia moale mani a laloa? Una heḡereḡerena, elda taudia ese taihu edia kara namodia bona Iehova dainai e karamu ḡaukara namodia daidiai e hanamodiamu. Una dainai taihu na e dibamu idia na e matauradiamu bona e lalodia badamu. Nega maorodiai elda taudia ese e henimu hahegoada herevadia ese unu taihu na e durudiamu.—Her. 15:23.

Elda taudia ese taihu e hagoadadiamu neganai, idia ta ta ese e kara ḡau namodia e gwauraimu bona unu heḡereḡeredia e hanamodiamu. Dahaka dainai? Taihu ta ladana Jessica na e gwa: “Tadikaka ese taihu e hamaorodiamu ‘ḡaukara namona o karaiamu,’ una na kara namona.  To bema tadikaka na ai a karaiamu ḡauna ta, heḡereḡere, natumai a hadibadiamu hebou ai bae helai namonamo eiava emai Baibul stiuden ta na hebou bainema totona a ha’udaiamu dainai e hanamomaimu, una ese ai na e hagoadamai badamu.” Elda na taihu e kara ḡau namodia daidiai be hanamodiamu neganai, taihu na be mamiamu kongrigeisin ai idia na mai anina bada.

Idia ese taihu e hakala henidiamu. Elda taudia na asie laloamu idia sibodia mo lalohadai namodia e gwauraimu. Una dainai idia na taihu e noidiamu edia lalohadai danu bae gwaurai, bona unu taihu e herevamu neganai idia na e hakala namonamomu. Unu e kara tomamu neganai, taihu e hagoadadiamu bona idia danu namo e davarimu. Edena dala ai? Betele ai e ḡaukaramu elda ta, Gerardo, na e gwa: “Taihu edia lalohadai na abimu badina una ese e durugumu egu ḡaukara baina karaia namonamo. Nega momo idia ese una ḡaukara na laḡani momo vada e karaia dainai.” Kongrigeisin lalonai, taihu momo na e painiamu dainai teritori ai e nohomu taudia na mai dibadia namonamo. Elda ta ladana Bryan na e gwa: “Iseda taihu edia heduru Iehova ena orea ai na bada herea. Una dainai edia diba bona kara namodia amo heduru bavabi diba!”

Elda taudia ese taihu edia lalohadai na asie dadarai haraḡamu. Dahaka dainai? Elda ta ladana Edward, na e gwa: “Taihu ta ena lalohadai bona ekspiriens ese tadikaka na baine durua diba, bena e vara ḡauna ta na dala ma ta ai baine itaia diba. Bona una ese tadikaka na baine durua diba ma haida edia hemami baine lalopararalai namonamo.” (Her. 1:5) Ena be elda ta ese taihu ta ena lalohadai na reana basine badinaiamu, to baine tenkiu henia ena lalohadai e herevalaia dainai.

Ḡaukara haida na taihu e hadibalaidiamu. Elda na dala e tahumu ḡaukara idauidau na taihu bae hadibadalaidia. Heḡereḡere, haroro grup be ede bae hakaua toma bema bapatiso tadikaka ta na lasi. Danu, tulu bona masini iḡaukaralaidia daladia e hadibadiamu, unu amo tiokratik meintenens bona konstraksen projek ai bae heduru diba. Betele ai, ovasia ese taihu na ḡaukara idauidau heḡereḡere maintenance, purchasing, accounting, computer programming, bona ḡaukara ma haida ikaradia daladia e hadibadiamu. Elda ese taihu e hadibadiamu neganai, e hahedinaraiamu taihu ese unu ḡaukara na bae kara diba.

Taihu momo na elda amo e diba ḡaudia e ḡaukaralaimu, ma haida e durudiamu. Heḡereḡere, disasta muridiai, unu taihu na konstraksen ai e diba ḡaudia amo haida e durudiamu edia ruma bae hagini lou. A taihu haida be pablik gabudiai haroro ḡaukara daladia e diba ḡaudia na taihu momo e hadibalaidiamu. Taihu ese idia e hadibadia elda taudia be ede e lalodia tomamu? Taihu ta ladana Jennifer na e gwa: “Kingdom Hall konstraksen projek ta ai na ḡaukara neganai, ovasia ta na nega e ato ḡaukara daladia e hadibagu. Egu ḡaukara na e moalelaia dainai hahenamo herevadia e gwaurai. Na moalemu e hadibagu namonamo bona na diba idia na e laloamu ḡaukara haida na baina kara diba.”

TAIHU NA FAMILI BAMONA BAITA KARA HENIDIA ENA NAMO

Eda Kristen taihu na ta lalokau henidiamu Iehova ese e lalokau henidiamu heḡereḡerena! Una dainai famili bamona ta kara henidiamu. (1 Tim. 5:​1, 2) Idia ida ta ḡaukara heboumu na hahenamo. Bona ta moalemu bema idia na e mamiamu ita ese idia ta lalodia badamu bona ta durudiamu. Taihu ta ladana Vanessa na e gwa: “Iehova na tenkiu heniamu iena orea lalonai na nohomu dainai, bona tadikaka taihu ese lau na e hagoadagu badamu.” Bona Taiwan ai taihu ta na e gwa: “Lau na na tenkiu bada hereamu badina Iehova bona ena orea ese ha’hine na e lalodia badamu. Una ese egu abidadama e hagoadaiamu bona na moalemu lau na Iehova ena orea lalonai.”

Iehova na e moalemu badina e itaiamu Kristen tadikakadia ese ha’hine e lalodiamu, ia ese e lalodiamu bona e kara henidiamu heḡereḡerena! (Her. 27:11) Scotland ai elda ta ladana Benjamin na e gwaumu: “Tanobada taudia ese ha’hine na e lalodia maraḡimu. Una dainai ha’hine na Kingdom Hall ai, e raka vareaimu neganai, ita na ta uramu idia na bae mamia idia ta lalodia badamu.” Namona na baita ḡaukara goada Iehova baita tohotohoa eda Kristen taihu iboudiai baita lalokau henidia bona baita matauraidia.—Roma 12:10.