1. Dahaka dainai laḡani ta ta ai Memorial dinana na mai anina bada? (Luka 22:​19, 20)

 LAḠANI ta ta ai, Iehova ena taunimanima ediai Keriso Ena Mase Ilalotaona eiava Memorial dinana na mai anina bada. Una na Iesu ese ena hahediba e haḡanidia iena mase bae helalolaia. (Luka 22:​19, 20 ba duahidia.) Badi momo daidiai ita ese Memorial na ta laloa badamu. Mani unu badi haida aita herevalai.

2. Ita ese Memorial ta laloa badamu badidia haida be dahaka?

² Memorial hebouna baitala ena namo na mauri idavalaina boubouna ena namo baita laloa dobu. Bona be durudamu ededia dala ai baita hahedinaraia ita ese Iesu ena boubou ḡauna na ta laloa badamu. (2 Kor. 5:​14, 15) Danu una hebou ai tadikaka taihu ida “baita hahealo hehenimu.” (Roma 1:12) Laḡani ta ta ai lauma dalanai e manoka taudia momo na una hebou e maimu. Idia haida na Iehova e lou henia badina tadikaka taihu ese una hebou ai mai edia lalokau ida e abidia dae. Bona kamonai taudia momo na Memorial ai e itamu bona e kamonaimu ḡaudia daidiai e uramu Baibul bae stadilaia. Unu badi idauidau daidiai, ita ese Memorial na ta laloa badamu.

3. Edena dala ai Memorial ese tanobada heḡeḡemadai ai tadikaka taihu e hatamonadiamu? (Laulau danu ba itaia.)

³ Memorial hebouna ese tanobada heḡeḡemadai ai tadikaka taihu e hatamonadiamu dalana mani a laloa. Una dina ai, dina e dihomu murinai, tanobada heḡeḡemadai Iehova ena Witnes taudia na una hebou e karaiamu. Bona iboudiai na tok tamona e kamonaiamu, una tok ese mauri idavalaina boubouna  ena namo e hahedinaraiamu. Una dina ai Iehova ihanamona anedia rua e abimu, parao bona wain e loalaimu, bona ehe gwauraimu ḡuriḡuridia foa ai tadikaka taihu na mai lalodia idoidiai ida e gwaumu “amen.” Oibe, hora 24 lalodiai kongrigeisin iboudiai na una dala tamona e badinaiamu. Tanobada heḡeḡemadai mai lalotamonada ida Iehova bona Iesu ta hanamodiamu neganai, idia ese e abiamu moalena mani a laloa.

4. Ina atikol ai dahaka baita herevalaimu?

⁴ Ina atikol ai ita ese ini henanadai baita herevalaimu: Ededia dala ai Memorial totona baita heḡaeḡae? Ededia dala ai haida baita durudia Memorial amo namo bae davari? Bona ededia dala ai manoka taudia baita durudia? Unu henanadai haeredia baita abimu neganai be durudamu una mai anina bada dinana dainai baita heḡaeḡae.

EDEDIA DALA AI MEMORIAL TOTONA BAITA HEḠAEḠAE?

5. (a) Dahaka dainai mauri davana ena namo baita laloa dobu? (Salamo 49:​7, 8) (b) Ina vidio Iesu E Mase Badina be Dahaka? amo dahaka o dibamu?

⁵ Bema ita ese Iesu ena mauri idavalaina boubouna ena namo baita laloa dobumu, una ese be hahedinaraiamu, ita ese Memorial na ta laloa badamu. Taunimanima ta na dia heḡereḡere sibona ena mauri davana Dirava baine henia, kara dika bona mase amo baine heruha totona. (Salamo 49:​7, 8 ba duahidia; danu ina vidio Iesu E Mase Badina be Dahaka? ba itaia) a Una dainai Iehova na dala e kara Iesu ese ena mauri e heni ita baine hamaurida helaoreana. (Roma 6:23) Momokani, Iehova bona Iesu ese boubou ḡauna bae heni totona idia na ḡau haida e haheaukalai. Unu baita lalo dobumu neganai, mauri idavalaina boubouna na baita laloa badamu. Hari ita na idia e haheaukalai ḡaudia haida baita herevalaimu. Mani, una mauri davana anina aita laloa guna.

6. Iehova ese Iesu ena boubou ḡauna amo e hoia lou ḡauna be dahaka?

⁶ Iehova na Iesu ena mauri idavalaina boubouna amo Adam e haboioa ḡauna e hoia lou. Ia ese Adam e karaia neganai ia na ḡoevadae, to Adam e kara dika neganai mauri hanaihanai helarona e haboioa, dia ia sibona ena mo, to ia natuna iboudiai edia danu. Iesu na tanobada ai e nohova neganai “kara dikana ta se karaia” bona “uduna amo hereva koikoina ta se lasi.” (1 Pet. 2:22) Iesu e mase neganai ia ese ena mauri ḡoevadaena e heni, Adam ese e haboioa mauri ḡoevadaena ihoi louna.—1 Kor. 15:45; 1 Tim. 2:6.

7. Tanobada ai Iesu e tohoa ḡaudia haida be dahaka?

⁷ Tanobada ai Iesu na hahetoho momo e davari, to Tamana guba ai na e badinaia ḡoevaḡoeva. Iesu maraḡinai, ia tamana bona sinana, dia ḡoevadae taudia baine matauraidia na namo, ena be ia e vara negana amo ia na ḡoevadae. (Luka 2:51) Danu ia matamatanai (teenager), e davari hahetohodia ese tamana sinana bona Iehova ikamonai henidia karana na e tohoa. Bena Iesu e bada neganai, Satana Diabolo ena hedibaḡani baine dadarai na namo, unu hedibaḡani lalodiai, Satana ese e hamaoroa Dirava ibadinana karana baine dadaraia. (Mat. 4:​1-11) Satana na e urava Iesu na kara dikana ta baine karaia amo mauri davana ihenina ai basine heḡereḡere.

8. Iesu be ededia hahetoho ma haida e haheaukalai?

⁸ Iesu na tanobada ai ena hesiai ḡaukara lalonai hahetoho ma haida e haheaukalai. Ia inaina ese e daḡedaḡe henia bona e ura bae hamasea. (Luka 4:​28, 29; 13:31) Ia ese ena hahediba taudia edia manoka ḡaudia na e  haheaukalai. (Mar. 9:​33, 34) Bona ia e kota henia taudia ese e hahisia bada bona e kirikirilaia. Dia una mo, to kara dika tauna ta bamona au ai e kokoa kau neganai, e hahemairaia bona hisihisi bada e mamia. (Heb. 12:​1-3) Ena be Iehova ese unu na se kou, to Iesu na e haheauka. b—Mat. 27:46.

9. Iesu ese e haheaukalai ḡaudia ta laloamu neganai eda hemami be ede bamona? (1 Petro 1:8)

⁹ Iesu na mauri davana baine heni totona hisihisi bada herea e davari. Iesu ese e haheaukalai ḡaudia baita lalomu neganai eda lalokau ia enai na be badamu, ani?—1 Petro 1:8 ba duahia.

10. Iehova na mauri davana baine heni totona dahaka e haheaukalai?

¹⁰ Iehova be mai ena ura ida dahaka e haheaukalai dainai Iesu na mauri davana e heni? Iehova bona Iesu edia hetura karana na goada herea, tama ta natuna ida edia hetura karana heḡereḡerena. (Her. 8:30) Tanobada ai, Iesu na hisihisi momo e davari bona Iehova ese unu e ita neganai e abia hemamina mani a laloa. Oibe, ia Natuna na haida ese e kara auka henia, e dadaraia bona e hahisia bada neganai, Ia danu e hisihisi bada.

11. Iesu e mase neganai Iehova ena hemami be ede bamona?

¹¹ Natudia e mase tama sina na mai dibadia mase ese e havaraiamu hisihisina na bada herea. Ita ese toreisi lou helarona na ta abidadama heniamu, to lalokau tauna ta e masemu neganai ta abiamu hisihisina na dounu ta mamiamu. Una ese e durudamu laḡani 33 C.E. ai Iehova Natuna lalokauna e hisihisi bona e mase neganai, Iehova ese e abia hemamina ta lalopararalaiamu. c—Mat. 3:17.

12. Memorial negana e lao heniamu lalonai ita be dahaka baita kara?

¹² Memorial negana e lao heniamu lalonai, sibomu emu stadi ai eiava ruma bese tomadiho ai, mauri davana ena kaha haida ba stadilai. Oi ese Research Guide for Jehovah’s Witnesses (bema mai ḡauna emu gado ai) eiava pablikeisin ma haida ai mauri davana ba stadilaia dobulao. d Danu, Eda Kristen Mauri Bona Hesiai Ḡaukara—Hebou Pepana ai e atoa Memorial Baibul duahiduahi ena sediual ba badinaia. Bona basio helaloboio, Memorial dinana ai Morning Worship vidiona danu ba itaia.  Dala unu bamodia ai Memorial totona baita heḡaeḡaemu neganai, ma haida baita durudiamu Memorial amo namo bae davari.—Esr. 7:10.

EDEDIA DALA AI HAIDA BAITA DURUDIA MEMORIAL AMO NAMO BAE DAVARI?

13. Haida baita durudia Memorial amo namo bae davari dalana ginigunana be dahaka?

¹³ Ededia dala ai haida baita durudia Memorial amo namo bae davari? Dala ginigunana na, baita invaitidia. Haroro ḡaukara ai ta davaridiamu taudia bona mai dibada taudia ladadia na listi ta ai baita tore, unu amo ta basita reaia. Heḡereḡere, varavarada, ḡaukara bona skuli hebou taudia bona ma haida danu. Bema Memorial invaiteisin pepadia na dia momo, elektronik kopena ta ena link baita siai henidia diba. Asita ta diba hida be maimu.—Koh. 11:6.

14. Taihu ta adavana ena ekspiriens ese dahaka e hadibadamu?

¹⁴ Memorial invaiteisin amo oi sibomu ese ta ba boiria na mai anina bada! Heḡereḡere, dina ta, taihu ta adavana, dia Witnes tauna, ese e hamaoroa, ia na e uramu ia ida Memorial bainela neganai taihu na e hoa. Dahaka dainai e hoa? Badina guna ia ese na nega momo vada e boiria to sela. Dahaka dainai hari ia na e uramu Memorial bainela? Taihu adavana na e gwa, “Lau na ta ese invateisin e henigu.” Bona una na ia mai dibana kongrigeisin elda ta ese e henia. Taihu adavana na una laḡani ena Memorial bona murina laḡanidia danu ela.

15. Taunimanima ta invaitidiamu neganai, baita laloatao ḡauna be dahaka?

¹⁵ Namona na baita helalotao, ta invaitidiamu taudia na mai edia henanadai. Badina haida ediai ina na nega ginigunana iseda hebou ta be maimu. Idia ese bae heni henanadaidia baita lalo bona baita haerelaidia. (Kol. 4:6) Heḡereḡere, haida na reana be gwaumu: ‘Memorial ai be dahaka e karamu?’ ‘Una hebou be hora hida?’ ‘Dabua ede bamodia e karamu?’ ‘Una hebou be mai davana, eiava?’ ‘Moni e gogomu, eiava?’ Memorial ai ta o boiriamu  neganai ba nanadaia, “Oi mai emu henanadai?” bena ena henanadai ba haerelai diba. Danu ini vidio, Iesu Ena Mase Baita Laloatao bona Kingdom Hall Ai be Dahaka E Karamu? baita hahedinarai diba, unu amo eda hebou ai e varamu ḡaudia baine lalopararalai. Bona Mauri Oi Moalelaia Hanaihanai bukana ai lesen 28 ena poin namodia haida na ia ida ba herevalai.

16. Memorial be maimu taudia edia henanadai ma haida be dahaka?

¹⁶ Memorial be maimu kamonai matamata taudia na reana Memorial murinai henanadai ma haida be henimu. Reana be henanadaimu: Dahaka dainai ta parao seme ani bona wain seme inu? Eiava dahaka dainai haida mo parao eme ani bona wain eme inu? Memorial hebouna be nega hida e hekaramu? Iehova ena Witnes edia hebou iboudiai be heḡereḡere eiava? Ena be Memorial tok ai unu henanadai haeredia be herevalaimu, to kamonai matamata taudia ediai baita herevalaidia namonamo na mai anina bada. Iseda websait jw.org ai ina atikol ladana, “Why Do Jehovah’s Witnesses Observe the Lord’s Supper Differently From the Way Other Religions Do?” amo edia henanadai baita haerelai diba. Memorial vairanai, dinanai, bona murinai, “kudou maoro taudia” baita durudia Memorial amo namo bae davari totona.—Apos. 13:48; NWT.

EDEDIA DALA AI MANOKA TAUDIA BAITA DURUDIA?

17. Elda taudia ese manoka taudia be ede bae durudia toma? (Esekiel 34:​12, 16)

¹⁷ Memorial negadiai elda taudia ese manoka taudia be ede bae durudia toma? Ba hahedinaraia idia na o lalodia badamu. (Esekiel 34:​12, 16 ba duahidia.) Memorial do lasi neganai, dala ba tahu iboudiai ba vadivadidia eiava ba rini henidia. Ba hadibadia umui ese idia na o lalokau henidiamu bona o ura dikadikamu ba durudia. Bena invateisin ba henidia. Bema baema ba welkam henidia. Memorial murinai dounu ba vadivadidia bona lauma dalanai ba durudia Iehova bae lou henia totona.—1 Pet. 2:25.

18. Edena dala ai ita iboudai ese manoka taudia baita durudia? (Roma 12:10)

 ¹⁸ Edena dala ai kongrigeisin taudia iboudiai ese manoka taudia bae durudia? Namona na baita lalokau henidia, baita bogadia hisi, bona baita matauraidia. (Roma 12:10 ba duahia.) Baita helalotao, unu tadikaka taihu baeme hebou lou na auka. Reana e lalohekwarahimu badina e laloamu kongrigeisin taudia ese basie abidia daemu. e Una dainai, ihahemaraidia henanadaidia eiava ihahisidia herevadia na basita gwaurai. (1 Tes. 5:11) Idia na ita tadikakada bona taihuda. Bona ta moalemu badina idia ida Iehova ma baita tomadiho henia heboumu.—Sal. 119:176; Apos. 20:35.

19. Iesu ena mase baita laloatao ena namo be dahaka?

¹⁹ Ita na ta moalemu badina Iesu na e gwa, laḡani ta ta iena mase baita laloa lou, bona ta lalopararamu dahaka dainai unu baita kara toma na mai anina bada. Memorial baita laomu neganai ita bona ma haida na dala idauidau ai namo baita davarimu. (Isa. 48:​17, 18) Eda lalokau Iehova bona Iesu ediai baita hagoadaiamu. Baita hahedinaraiamu idia ese ita daidai e kara ḡaudia na ta lalodia badamu. Eda tadikaka taihu ida eda hetura karana be goadamu. Bona haida baita durudiamu idia danu mauri idavalaina boubouna ese baine havara hahenamodia bae moalelai. Oibe, namona na iboudai baita ḡaukara goada, ina laḡani ai mai anina bada dinana, Memorial dainai, baita heḡaeḡae!