1-2. Iehova ena hesiai taudia ese e davarimu hekwakwanaidia haida be dahaka?

 ITA EDAI hekwakwanai badadia e varamu neganai, eda mauri na e idau haraḡamu. Heḡereḡere, tadikaka ta ladana Luis a na dokta ese e hamaoroa ia na mai ena cancer bona hua haida mo baine mauri. Monika bona adavana na Iehova e hesiai henia goadagoadava. Bena dina ta, Monika na e laloparara ia adavana elda ta, na laḡani momo lalodiai mauri daladia rua e badinava. Singul taihuna ta Olivia, na e hadibaia namona na ena ruma baine rakatania haraḡa badina lai gubana na ia e nohova gabuna e lao heniava. Ia e lou lao neganai, ena ruma na una lai gubana ese e hadikaia. Luis, Monika bona Olivia edia mauri na e idau taku. Idia ediai e vara ḡauna be oiemu danu e vara, a? Oi danu o davaria hekwakwanaina ta ese emu mauri e haidaua haraḡa, a?

² Ita Iehova ena hesiai taudia danu taunimanima ese e davarimu hekwakwanaidia bona goreredia ta davarimu. Danu ita na inaida amo hisihisi bona daḡedaḡe ta davarimu. Ena be Iehova ese unu hekwakwanai na se laodia ahumu, to e gwauhamata ita na baine duruda. (Isa. 41:10) Iena heduru amo ita na baita moalemu, abi hidi maorodia baita karamu, bona nega aukadiai ia baita badinaiamu. Ina atikol ai, Iehova ese nega aukadiai ita e durudamu daladia foa baita herevalaimu. Danu baita itaiamu, ita be dahaka baita kara iena heduru amo namo baita davari totona.

 IEHOVA ESE BAINE GIMAMU

3. Hekwakwanai badana ta edai e varamu neganai, edai na be aukamu dahaka baita kara?

³ Hekwakwanai. Hekwakwanai badana ta edai e varamu neganai, edai na e aukamu baita lalo namonamo bona abi hidi baita kara. Dahaka dainai? Badina nega unu bamodiai kudouda e hisihisimu bona ta daradokomu. Bona asita dibamu dahaka baita kara. To, mani matamanai tame herevalaidia taihu raruosi aita lalodia, edia hemami be ede bamona? Olivia na e gwa: “Lai gubana ese egu ruma e hadikaia neganai, na lalo metau bada herea bona asina diba dahaka baina kara.” Monika na adavana ena kara dainai ini e gwau toma: “Lau na na lalohisihisi bada herea bona na hemami, vaitani ta ese kaia amo e gwadagu. Egu ai na e auka, dina ta ta ai na karava ḡaukaradia baina kara. Asina laloa baine vara ḡauna na egu ai e vara.” Ta lalo-metaumu neganai, Iehova be e gwauhamata dahaka baine kara ita baine duruda?

4. Filipi 4:​6, 7 heḡereḡerena, Iehova be e gwauhamata dahaka baine kara?

⁴ Iehova ena heduru dalana. Ia na e gwauhamata Baibul ese e gwauraiamu “Dirava ena maino” baine henida. (Filipi 4:​6, 7; ba duahidia.) Una na Iehova ida hetura karana amo e varamu mainona. Bona “eda diba idoinai e hereaiamu mainona.” Nega ta, mai kudoumu ibounai ida Iehova o ḡuriḡuri henia murinai emu hemami e namo, a? Una na “Dirava ena maino” ese e havaraiamu hemamina.

5. Edena dala ai Dirava ena maino ese laloda bona darada e gimadiamu?

⁵ Filipi 4:7 na ma e gwaumu, “Dirava ena maino” ese “lalomui bona daramui baine gima.” Una hereva “gima” na Grik herevana ta amo e hahanaia. Una na hanua ta e gimaiava tuari taudia e herevalaidiamu. Hanua taudia na e mahuta namonamova bona asie e gariva, badina mai dibadia hanua na tuari taudia ese e gimaiava. Una heḡereḡerena, bema Dirava ena maino ese laloda bona darada be gimaiamu, ita na basita garimu. (Sal. 4:8) Hana heḡereḡerena, ena be eda hekwakwanai na basie ore haraḡamu to laloda na be mainomu. (1 Sam. 1:​16-18) Unu amo ita na baita lalohadai namonamomu bona abi hidi namodia baita karamu.

6. Dirava ena maino ese baine gimada totona dahaka baita kara? (Laulau danu ba itaia.)

⁶ Ita ese baita karaia ḡauna. Hekwakwanai ese e hametaudamu negadiai, hanua taudia ese tuari taudia e noidiamu bae gimadia heḡereḡerena, ita danu Iehova baita noia baine gimada. Edena dala ai? Baita ḡuriḡuri loulou ela bona Dirava ena maino baita mamia. (Luka 11:9; 1 Tes. 5:17) Matamanai tame herevalaia tadikakana, Luis bona adavana Ana,  na e diba ia na hua haida mo baine mauri neganai, idia ese una e haheaukalaia dalana na ini e herevalaia toma. Luis na e gwa: “Nega unu bamodiai helt eiava ḡau ma haida ai disisen ikaradia na be aukamu. To ḡuriḡuri loulou karana ese e durumai a lalo maino.” Luis bona adavana na e gwa, idia na Iehova e ḡuriḡuri henia loulouva, ia ese lalo maino bona aonega baine henidia, unu amo abi hidi namodia bae kara. Bona idia ese Iehova ena heduru na e mamia momokani. Bema hekwakwanai badana ta na oiemu ai e varamu, ba ḡuriḡuri loulou, unu amo bo mamiamu Iehova ena maino ese lalomu bona daramu na be gimadiamu.—Roma 12:12.

IEHOVA ESE BAINE IMUDAMU

7. Hekwakwanai badana ta edai e varamu neganai eda hemami be ede bamona?

⁷ Hekwakwanai. Hekwakwanai badana ta na edai e varamu neganai, eda hemami, lalohadai, bona kara na e idaumu. Una na vaitani lai gubana ese bouti ta e bibia laomu e bibia maimu na heto. Ana, matamanai tame herevalaia taihuna, na adavana Luis e mase murinai hemami idauidau e abi. Ia na e gwa: “Nega haida na hemamiva lau na sibogu dainai na hebogahisiva. Bona ia na lasi dainai na baduva.” Ana na e mamia ia na asi iduruna bona e diba Luis ese e karava abi hididia na ia ese baine kara dainai e lalohisihisi. Nega haida ia na e mamiava, ia na vaitani davara ai, bona lai gubana ese e bibia laova e bibia maiva. Bema ita danu hemami unu bamodia ta abimu Iehova be edena dala ai ita e durudamu?

8. Isaia 33:6 ai, Iehova be e gwa dahaka baine kara?

⁸ Iehova ena heduru dalana. Ia na e gwa, ita eda imuda ai bainela eiava baine haginida tutuka. (Isaia 33:6 ba duahia.) Lai gubana ta e toamu neganai, kada badadia na hurehure ese hamareredia momomu. Una dainai kada basine hebubu totona, henudiai na stablizers, unu amo kada na basine marere momo bona pasendia ese edia laolao na bae moalelaia. Kada ena stablizers na be ḡaukaramu bema kada na dounu e heaumu. Una heḡereḡerena, bema nega aukadiai Iehova na dounu baita hesiai heniamu, ia ese ita na be haginida tutukamu.

9. Edena dala ai research tuludia ese bae duruda diba? (Laulau danu ba itaia.)

⁹ Ita ese baita karaia ḡauna. Nega aukadiai o lalo hekwarahimu neganai, ḡuriḡuri, hebou ilao henina bona haroro ḡaukara na dounu ba kara. Reana, guna o karava ḡaudia na hari basio kara dibamu, to ba helalotao Iehova ese ta se doriamu basine kara ḡaudia baine kara. (Luka 21:​1-4 ba haheḡereḡerea.) Danu nega bavato sibomu emu stadi ba karaia, bona ba  lalo dobu. Dahaka dainai? Badina Iehova na ena orea amo atikol bona vidio namodia e halasimu, bona unu ese ita bae duruda diba. Heduru ḡaudia namodia na JW Library^® app ai bo davarimu. Matamanai tame herevalaia taihuna, Monika na e gwa, e lalo-metauva negadiai, research tulu amo heduru maorodia e abi. Heḡereḡere, atikol haida ai “badu” e herevalaia kahadia haida e tahu. Danu nega haida ia na ini hereva “betrayal” eiava “loyalty” e hetahulai. Bena e davariva atikoldia na e duahiva ela bona ena hemami e namova. Monika na e gwa: “Egu hetahu karana do asina matamaiava neganai, lalogu na metau. To, egu hetahu amo na davariva ḡaudia na duahiva neganai, Iehova ena lalokau na mamiava. Na dibava Iehova ese egu hemami na e lalopararalaiva bona e duruguva.” Nega aukadiai Iehova ese dala unu bamodiai oi danu baine durumu lalomu baine maino.—Sal. 119:​143, 144.

IEHOVA ESE BAINE DURUMU

10. Hekwakwanai badana ta e varamu murinai, eda hemami be ede bamona?

¹⁰ Hekwakwanai. Hekwakwanai badana ta edai e varamu murinai, baita mamiamu ita na asi goadada bona laloda na be metaumu. Ita na heau helulu tauna ta heḡereḡerena, matamanai be e heau haraḡamu to e beromu neganai, e hekwarahimu baine raka namonamo. Una heḡereḡerena, guna ta karava ḡaukaradia na mai moaleda ida ta karava, to hari ta hekwarahimu unu ḡaukara baita kara bona asita moalemu. Elia heḡereḡerena, baita hemamimu baita toreisi na auka bona baita uramu baita mahuta mo. (1 Han. 19:​5-7) To, Iehova be e gwauhamata dahaka baine kara?

11. Iehova be e gwauhamata dahaka baine kara? (Salamo 94:18)

¹¹ Iehova ena heduru dalana. Iehova na e gwauhamata ita baine duruda. (Salamo 94:18 ba duahia.) Heau helulu ai e bero tauna na baine raka namonamo totona heduru baine abi na namo. Una heḡereḡerena, ita danu Iehova dounu baita hesiai henia totona heduru baita abi na namo. Iehova ese e hagoadadamu e gwaumu: “Lau Iehova, emu Dirava, ese oi imamu idibana na dogoa taomu; lau ese na hamaoromumu, na tomu: Basio gari, baina durumu.” (Isa. 41:13) King David na hahetoho e davari bona inaina ese e hahisia neganai, Iehova ena heduru na e mamia dainai eto: “Oi imamu idibana ese vada e dogogu tao.” (Sal. 18:35) To, Iehova be edena dala ai ita e durudamu?

12. Iehova be daidia e ḡaukaralaidiamu ita bae duruda?

 ¹² Nega momo Iehova na haida e ḡaukaralaidiamu ita bae duruda. Heḡereḡere, nega ta David na e lalo manoka neganai turana Ionatan na ia dekena ela baine durua bona baine hagoadaia. (1 Sam. 23:​16, 17) Danu, Iehova ese Elisaia e abia hidi Elia baine durua. (1 Han. 19:​16, 21; 2 Han. 2:2) Hari ina negai, Iehova ese ruma bese, tura, eiava elda be ḡaukaralaidiamu ita bae duruda. To, ta lalo-metaumu negadiai, reana baita uramu siboda baita noho. Una na vaevae e varamu ḡauna. To, Iehova ena heduru baita abia totona dahaka baita kara?

13. Iehova ena heduru baita abia totona dahaka baita kara? (Laulau danu ba itaia.)

¹³ Ita ese baita karaia ḡauna. Ba ḡaukara goada sibomu ba noho urana ba dadaraia. Lalo-metau negadiai, bema ita na siboda baita nohomu, ta davarimu hekwakwanaidia mo baita lalomu. Bena abi hidi kereredia baita karamu. (Her. 18:1) Vaia nega haida ita na ta uramu siboda baita noho. Nega momo hekwakwanai negadiai unu ta kara tomamu. To, bema ita na nega daudau lalonai siboda baita nohomu, Iehova ese e henimu heduruna na baita reaia dibamu. Una dainai nega aukadiai ruma bese, tura bona elda edia heduru na bavabi dae. Ba helalotao, idia na Iehova ese e ḡaukaraladiamu oi bae durumu.—Her. 17:17; Isa. 32:​1, 2.

IEHOVA ESE BAINE HAGOADAMU

14. Nega ede bamodiai ita na ta garimu?

¹⁴ Hekwakwanai. Ḡau haida e varamu neganai, ita na ta garimu. Baibul ai, Dirava ena hesiai taudia na inaidia bona hekwakwanai daidiai e lalo-metauva bona e gariva. (Sal. 18:4; 55:​1, 5) Ita danu, skuli bona ḡaukara taudia, eiava ruma bese bona gavamani ese be inai henidamu neganai baita garimu. Eiava reana gorere ta dainai baita mase garina baita garimu. Nega unu bamodiai ita na natu maraḡidia na heto baita garimu, badina baita hemamimu ita na asi iduruda. To, Iehova ese ita be ede e duruda tomamu?

15. Salamo 94:19 heḡereḡerena Iehova be dahaka be karamu?

¹⁵ Iehova ena heduru dalana. Iehova ese tauhalo e henimu bona e hagoadadamu. (Salamo 94:19.) Salamo itorena tauna ena hereva baita laloamu neganai, kekeni maraḡina ta baita laloamu, ia na guba rahurahu reḡena bona medu mai laina ida e toamu dainai e garimu baine mahuta. To tamana ese be rosia kahimu ela bona imana ai be mahutamu.  Ena be medu mai laina ida na se dokomu, to una kekeni na tamana ese e rosia dainai basine garimu. Ita danu ta davarimu hekwakwanaidia daidiai ta garimu negadiai, ta uramu Tamada guba ai, ese baine rosida kahi, anina na tauhalo baine henida ela bona eda lalohekwarahi o gari bae ore. Edena dala ai Iehova amo tauhalo baita abi?

16. Iehova amo tauhalo baita abi totona dahaka baita kara? (Laulau danu ba itaia.)

¹⁶ Ita ese baita karaia ḡauna. Namona na hanaihanai nega bavato Iehova ida ba herevahereva—anina na Iehova ba ḡuriḡuri henia bona ena Hereva ba duahia. (Sal. 77:​1, 12-14) Bena lalohekwarahi negadiai, oi ese bo karaiamu ḡauna ginigunana na Tamamu guba ai ena heduru bo tahuamu. O garilaimu bona o lalo hekwakwarahilaimu ḡaudia na Iehova ba hamaorolaia. Bona ena Hereva amo baine hagoadamu. (Sal. 119:28) Baibul ai oi bae hagoadamu sivaraidia ba duahi, heḡereḡere, Iobu, Salamo, Hereva Lada-isidia, bona Iesu ena hereva Mataio karoa 6 ai. Iehova bo ḡuriḡuri heniamu bona iena Hereva bo duahiamu neganai, tauhalo bona goada bo davarimu.

17. Ita ta abia daemu ḡauna be dahaka?

¹⁷ Ita na ta abia daemu, hekwakwanai badadia edai be varamu negadiai, Iehova ese ita na be durudamu. Ita na basine rakatanidamu. (Sal. 23:4; 94:14) Iehova na e gwauhamata baine gimada, baine imudada, baine duruda, bona baine hagoadada. Isaia 26:3 ai Iehova na ini e herevalaia toma: “Lalona ese oi e badinamumu tauna na oi ese maino ḡoeva-daena ai o hanohoamu, badina be ia ese oi e abidadama henimumu.” Una dainai Iehova bavabidadama henia, bona ia ese e durumumu daladia na bavabi dae. Unu bo kara tomamu neganai, nega aukadiai oi na bo goadamu.