1. Hari ina nega ai momo be dahaka e lalo badamu?

 HARI ina nega ai momo na sibodia edia namo e lalo badamu bona haida edia namo na asie lalomu? Heḡereḡere, haida na social media ai e kara ḡaudia e postimu unu amo bae ita taudia ese idia bae imodaidia. To hari ina nega ai haida ese mo Iehova e imodaiamu. Ina atikol ai ita ese Iehova baita imodaia anina bona unu baita kara toma badidia baita herevalaimu. Danu, baita dibamu edena dala ai Iehova baita imodaia bona edena dala ai vaira negai ia sibona ese ladana be hahelaḡaiamu.

IEHOVA BAITA IMODAIA ANINA BE DAHAKA?

2. Sinai Ororona ai Iehova be dahaka e kara? (Laulau danu ba itaia.)

² Baibul ese e hahedinaraia Iehova na herea mikamika. Israel taudia na Aigupito amo e hakaudia lasi murinai, Iehova sibona ese ena hairai e hahedinaraia. Mani ina a laloa: Israel besena ibounai na Sinai Ororona badinai e hebou, Dirava ese baine hereva henidia totona. Una negai haraḡa herea kwalahu ese ororo e ḡovaia ahu. Tano e laga dagu, guba e rahua bona kevaru e kevaru isi bona kibi ta reḡena e kamonai. (Eso. 19:​16-18; 24:17; Sal. 68:8) Israel taudia na unu ḡau e ita neganai, Iehova e imodaia badina e itaia Iehova ena siahu na bada herea.

3. Iehova baita imodaia anina be dahaka?

³ Taunimanima ese Iehova na bae imodaia diba. Iehova baita imodaia dalana ta na, ena siahu hereadaena amo e kara ḡaudia bona iena kara namodia na ma haida baita hadibadia. Danu, Dirava ese goada e henidamu ta karamu ḡaudia ta  haḡuḡurumu dainai ia baita imodaia diba. (Isa. 26:12) Iehova i’imodaina karana ai King David na haheitalai namona. Israel taudia vairadia ai e gwauraia ḡuriḡurina ai, David na e gwa: “Iehova e, goada bona siahu bona hairai bona kwalimu bona herea-dae na oiemu; badina be ḡau iboudiai guba ai bona tanobada ai na oiemu.” David ena ḡuriḡuri e hadokoa murinai “hebou taudia iboudiai ese Iehova, . . . e hanamoa.”—1 Sis. 29:​11, 20.

4. Edena dala ai Iesu ese Iehova e hanamoa?

⁴ Iesu tanobada ai e nohova neganai, Tamana e imodaiava dalana ta na, taunimanima e hadibadiava ia ese Iehova ena siahu amo hoa karadia e karava. (Mar. 5:​18-20) Ia ese Tamana e herevalaiava dalana bona haida e kara henidiava dalana amo Tamana e imodaiava. Nega ta, Iesu na sinagoga ai e hahedibava. Bena ena hereva e kamonaiva taudia bogaraḡidiai na laḡani 18 lauma dikadia ese e boloa hahinena ta danu. Una hahine na lauma dikadia ese e biaguava dainai doruna e kwaidu bona basine gini maoromaoro diba. Iesu ese ena lalo hekwarahi na e lalopararalaia bona e ura baine durua. Bena Iesu ese e hamaoroa, eto: “Hahine e, emu doru laoho vada eme maoro.” Bena imana na hahine latanai e dau kau horana ai hahine na e gini maoromaoro bona “Dirava e imodaia,” badina ena gorere amo e namo lou. (Luka 13:​10-13) Una hahine na badi maorona dainai Iehova e imodaia, bona namona na ita danu unu baita kara toma.

DAHAKA DAINAI IEHOVA BAITA IMODAIA?

5. Ededia badi haida daidiai Iehova baita matauraia?

⁵ Iehova ta imodaiamu badina ta matauraiamu. Badi idauidau daidiai Iehova na baita matauraia. Iehova na siahu idoinai Diravana, bona ena siahu na asi hetoana. (Sal. 96:​4-7) Ena aonega bada na e kara ḡaudia ese e hahedinaraiamu. Ia na mauri Badina, bona mauri iduruna ḡaudia e henidamu. (Apok. 4:11) Ia e badinaiamu taudia na se rakatanidiamu. (Apok. 15:4) Ena ḡaukara iboudiai lalodiai e kwalimumu, bona ena ḡaukara na e haḡuḡurudiamu. (Ios. 23:14) Una dainai peroveta tauna Ieremia ese Iehova na ini e herevalaia toma: “Bese idau-idau edia aonega taudia iboudiai bogaradiai, bona edia basileia iboudiai lalodiai, oi na asi idaimu.” (Ier. 10:​6, 7) Momokani, badi momo daidiai ita ese Tamada guba ai baita matauraia. To, ita ese Iehova na dia ta matauraiamu mo, to ena kara namodia dainai ta lalokau heniamu.

6. Dahaka dainai Iehova ta lalokau heniamu?

⁶ Iehova ta imodaiamu badina ta lalokau heniamu. Mani Iehova ena kara namodia haida aita lalo, unu ese ita na e durudamu ia baita lalokau henia. Ia na hebogahisi bona harihari-bada Diravana. (Sal. 103:13; Isa. 49:15) Ita ese ta abimu hisihisidia na ia ese danu e mamimu. (Sek. 2:8) Ia ese dala e kehoa unu amo ita na ia turana ai baitala. (Sal. 25:14; Apos. 17:27) Bona ia na manau Diravana; “e igo dobimu, guba bona tanobada e nenediamu, . . . e dabumu taudia na kahu gabuna amo e veridia isimu.” (Sal. 113:​6, 7) Ini iboudiai daidiai ta uramu eda Dirava hereadaena baita imodaia.—Sal. 86:12.

7. Ita be edena mai anina bada ḡaukarana e henida?

⁷ Iehova ta imodaiamu badina ta uramu haida ese ia bae dibaia. Momo ese Iehova sivaraina momokanina na do asie dibaia. Dahaka dainai unu ta gwau tomamu? Badina Satana ena koikoi herevadia ese momo lalodia na vada e hadiburadia. (2 Kor. 4:4) Satana ese taunimanima lalodia e verimu dainai e tomu Iehova ese dika na se gwautaomu, taunimanima se lalodia badamu, bona tanobada ai e varamu hisihisidia gwaudia na Ia e heniamu. To  ita na eda Dirava sivaraina momokanina na mai dibada! Una dainai eda maduna na ma haida ediai Dirava ena kara namodia baita hahedinarai bona baita durudia Dirava ladana bae imodaia. (Isa. 43:10) Salamo 96 ese Iehova ihanamona daladia momo e gwaurai. Ina karoa ena siri ta ta baita herevalaimu lalonai, Iehova ena ura heḡereḡerena ai ia baita imodaia daladia ba lalo.

EDENA DALA AI ITA ESE IEHOVA ENA URA HEḠEREḠERENA IA BAITA IMODAIA?

8. Iehova baita imodaia dalana ta be dahaka? (Salamo 96:​1-3)

⁸ Salamo 96:​1-3 ba duahidia. Ita ese Iehova ta herevalaiamu dalana amo ia ta imodaiamu. Ini siri ai, Iehova ena taunimanima na e boiridiamu, e tomu: “Ane avabia, Iehova ena, ia ladana ba hanamoa, . . . ena hahemauri [sivaraina namona] ba herevalaia,” bona “tanobada besedia bogaraḡidiai ia hairaina ba gwauraia hedinarai.” Ini iboudiai na eda guba Tamana baita imodaia daladia. Guna Iehova e hesiai heniava taudia na mai edia ura ida ma haida ediai Iehova ena kara namodia bona Ia ese idia daidiai e kara ḡau namodia na e herevalaiva. (Dan. 3:​16-18; Apos. 4:29) Ita ese una be ede baita badinaia toma?

9-10. Angelena ena ekspiriens amo dahaka o dibamu? (Laulau danu ba itaia.)

⁹ United States ai e nohomu taihuna ta ladana Angelena, a ena ekspiriens mani a laloa. Ia na mai goadana ida ena ḡaukara gabunai Iehova e herevalaia. Angelena bona una kampani ai e ḡaukara matama taudia haida na e boiridia hebou ta lalonai ta ta edia noho daladia bae herevalai. Angelena na Iehova ena Witnes ta dainai e ura laulau haida amo ena mauri ai e moalelaiva ḡaudia baine herevalai. To, ia do se hereva lalonai, e ḡaukara heboumu tauna ta na e hereva hedinarai, ia na Iehova ena Witnes ai e bada. Una tau ese Witnes taudia e ḡonaḡonalaidiava bona e abidaemu ḡaudia e hadikava. Angelena na e gwa: “Lau na na gari. To asina ura ḡaukara taudia ese unu koikoi herevadia bae abidae. Una dainai na lalo: ‘Namona na baina hadibadia Iehova be Dirava ede bamona.’”

¹⁰ Una tau ena hereva e hadokoa murinai, Angelena na lalonai ḡuriḡuri kwadoḡina ta e gwauraia. Bena mai manauna ida e hereva henia, eto: “Lau egu sivarai na oiemu ida taina heḡereḡere. Lau danu Iehova ena Witnes ai na bada, bona una nega amo ema bona hari lau  doini Witnes ta.” Ena be mai lalohewarahina to ia na e haheauka, ia ese turana ida mai moaledia ida Iehova e hesiai heniava laulaudia na ena ḡaukara taudia ediai e hahedinarai, bona mai hematauraina ida ena abidadama e gwauraia hedinarai. (1 Pet. 3:15) Bena dahaka e vara? Angelena ena hereva e hadokoa murinai, una tau na e manau. Danu, maraḡina ai Iehova ena orea lalonai e davari ekspiriens namodia haida e lalo. Angelena na e gwa: “Iehova ladana baita gimaia na mai anina bada. Ia ladana ai ta herevamu na hahenamo badana.” Ita danu Iehova baita hanamoa ena be haida ese ia na asie matauraiamu, bona una na hahenamo hereadaena.

11. Idaunega amo ema bona hari tomadiho momokani taudia ese Salamo 96:8 ena hahekau herevana be ede e badinaia toma?

¹¹ Salamo 96:8 ba duahia. Eda kohu namodia amo Iehova baita imodaia. Iehova e tomadiho henia momokanimu taudia na hanaihanai una dala ai Iehova e hanamoamu. (Her. 3:9) Heḡereḡere, Israel taudia na dubu helaḡa ihaginina bona una ḡaukara iduruna totona edia moni bona kohu namodia e heni. (2 Han. 12:​4, 5; 1 Sis. 29:​3-9) Keriso ena hahediba haida na edia “kohu e ḡaukaralai,” Iesu bona ena aposetolo taudia e durudia. (Luka 8:​1-3, NWT) Kristen ginigunadia danu edia kohu e ḡaukaralaiva tadikaka taihu e durulaidiava. (Apos. 11:​27-29) Hari ina negai ita danu eda kontribiusin amo Iehova baita imodaia diba.

12. Eda kontribiusin amo Iehova be ede ta imodaia tomamu? (Laulau danu ba itaia.)

¹² Mani eda kontribiusin amo Iehova ta imodaiamu dalana ta aita laloa. Laḡani 2020, Zimbabwe ai hua momo medu se diho dainai doe e vara. Aniani na dia bada dainai taunimanima momo na e hitolova, eda taihu ta ladana Prisca danu. Ena be mauri na e auka, to Prisca na hanaihanai Wednesday bona Friday ai e harorova. Bona taunimanima ese uma matamata e karava negadiai danu, ia na dounu e harorova. Uma se karava dainai varavarana ese e gwau heniava e gwauva, “Gabeai oi na be hitolomumu.” Prisca na mai dibana Iehova ese ia na be nariamu dainai, mai lalo goadana ida idia e hamaorodiava, e gwauva: “Iehova ese ena hesiai taudia na se lalodia boiomu.” Bena se daudau, Prisca na eda orea ese e siai aniani ḡaudia e abi. Unu heduru ḡaudia na tadikaka taihu edia kontribiusin amo e  vara. Una kara ese Prisca varavarana lalodia e veri, bena e hamaoroa, “Dirava ese oi na se rakatanimumu, una dainai ai na a uramu ia baia dibaia.” Una nega amo ia varavarana iboudiai seven na kongrigeisin heboudia e laova.

13. Edena dala ai eda kara amo Iehova baita imodaia? (Salamo 96:9)

¹³ Salamo 96:9 ba duahia. Eda kara amo Iehova na baita imodaia dibamu. Hahelaḡa tauna na Iehova ena dubu helaḡa ai baine vareai totona baine haheḡoeva na namo. (Eso. 40:​30-32) Ita danu baita ḡoeva na namo, dia tauanida mo baine ḡoeva, to Iehova ese e inai henimu karadia danu baita dadaraidia. (Sal. 24:​3, 4; 1 Pet. 1:​15, 16) Baibul na e gwa namona na baita ḡaukara goada “mauri gunana” baita kokia bona “mauri matamatana” baita hahedokilaia. Una anina na Iehova ese se moalelaimu lalohadai bona kara mirodia baita dadarai. To, namona na eda lalohadai bona kara amo baita hahedinaraia ita ese Iehova ena kara namodia ta tohotohomu. (Kol. 3:​9, 10, NWT) Iehova ena heduru amo, daḡedaḡe bona kara mirodia e karamu tauna ese ena mauri baine haidaua diba, bona mauri matamatana baine hahedokilaia.

14. Jack ena ekspiriens amo dahaka ta dibamu? (Laulau danu ba itaia.)

¹⁴ Mani Jack ena ekspiriens aita laloa, ia na taunimanima ese e gari heniava daḡedaḡe tauna, una dainai ladana ta na e hatoava The Demon. Ena daḡedaḡe karana dainai kota ai diadi na e gwa bae hamasea. Una nega ai tadikaka ta na ia e nohova dibura rumana e vadivadiava, Jack na bae hamasea negana e nariava lalonai Baibul stadi e abia dae bena una tadikaka ida e stadiva. Ena be ia na kara dikadia momo e kara, to ena mauri na e haidaua, una murinai bapatiso e abi, bena Iehova ena Witnes ta ai ela. Jack ena kara na e idau momokani bona tau namona ai ela, una dainai, bae hamasea dinana ai gadi haida na e tai. Dibura ai e ḡaukarava soldiana ta na e gwa: “Ina gabu ai Jack na taunimanima dikana ta. To, hari ia na vada taunimanima namona.” Jack e hamasea wikina murinai, dibura ruma ai hebou e hakauava tadikakadia ese dibura rumana ai e nohova tauna ta e hedavari henia, ia na nega ginigunana hebou ela. Dahaka dainai una hebou ela? Ia na Jack ena kara namodia ese lalona e veria dainai e ura baine diba ia be dahaka baine kara Iehova baine tomadiho henia totona. E hahedinaraia ḡoevaḡoevamu eda kara  amo Tamada guba ai na baita hanamoa diba!—1 Pet. 2:12.

VAIRA NEGA AI IEHOVA ESE LADANA BE EDE BE HAHELAḠAIA TOMAMU?

15. Edena dala ai vaira nega ai Iehova ese ladana be hahelaḡaiamu? (Salamo 96:​10-13)

¹⁵ Salamo 96:​10-13 ba duahidia. Salamo 96 ena siri ginigabedia ese Iehova na e gwauraiamu hahemaoro maoromaoro Diravana bona Pavapava. Vaira negai Iehova ese ladana be ede be hahelaḡaia tomamu? Ia ese taunimanima be hahemaoro henidiamu dalana amo una be karaiamu. Kahirakahira Iehova ese Babulono Badana na be haorea vaitanimu, badina ia ladana helaḡana e hadikaiamu. (Apok. 17:​5, 16; 19:​1, 2) Babulono Badana be hadikaiamu karana be itaiamu taudia haida na be uramu ita ida Iehova baita tomadiho henia. Dokonai, Aramagedono tuarina ai Iehova ese Satana ena tanobada oromana dikana, Ia e inai heniamu taudia, bona Iehova ladana e hadikaiamu taudia iboudiai be haoredia vaitanimu. To, Iehova e lalokau heniamu, e badinaiamu bona mai edia ura ida ia e imodaiamu taudia na be hamauridiamu. (Mar. 8:38; 2 Tes. 1:​6-10) Keriso ena Lohia Laḡanidia 1,000 dokonai bona hahetoho ginigabena murinai, Iehova sibona ese ia ladana vada be hahelaḡaia momokanimu. (Apok. 20:​7-10) Una nega ai, “tanobada na Iehova hairaina idiba-maorona amo baine honu, davara na ranu ai e honumu na heto.”—Hab. 2:14.

16. Lalomu ba hadaia dahaka ba kara? (Laulau danu ba itaia.)

¹⁶ Ta moalemu badina kahirakahira taunimanima iboudiai ese Iehova be imodaiamu! Una nega ta nariamu lalonai, baita ḡaukara goada Dirava ena kara namodia baita herevalai bona eda kara amo ia baita imodaia. Una maduna baita laloa bada totona, Gavanin Bodi ese Salamo 96:8 na e abia hidi laḡani 2025 ena siri badana: “Iehova ladana ba imodaia badina ia ladana na hereadae.”