1. Dina ta ta ai ita be dahaka ta karamu?

 DINA TA TA ai ita na abi hidi ta karamu. Abi hidi haida be haraḡa, heḡereḡere daba ai dahaka baita ani eiava edena taim ai baita mahuta. To, abi hidi haida ikaradia be auka. Badina bo abia hidimu ḡauna ese emu helt, moale, ruma bese, bona tomadiho dalana baine hanamoa eiava baine hadikaia diba. Namona na baita abi hidi ḡaudia ese ita bona eda ruma bese baine duruda. Bona mai anina bada ḡauna na, eda abi hidi ese Iehova baine hamoalea.—Roma 12:​1, 2.

2. Ededia dala haida ese be durumumu abi hidi maorodia ba kara?

² Abi hidi maorona ba karaia totona namona na (1) diba maoro bavabi, (2) Iehova ena lalohadai ba tahua, bona (3) ba kara ḡaudia ba haero namonamo. Ina atikol ai unu dala ta ta baita herevalaimu, danu baita itaiamu edena dala ai darada baita hadibaia namonamo.—Her. 2:11.

DIBA MAORO BAVABI

3. Abi hidi ta do asita karaia neganai, dahaka dainai diba maoro baita abi na namo? Haheitalai ba herevalaia.

³ Abi hidi namona ba karaia totona dala ginigunana na, diba maoro bavabi. Dahaka dainai una na mai anina bada? Mani ina haheitalai a laloa: Gorere tauna ta na dokta dekena ela heduru baine abi totona. O laloamu dokta be maoromaoro gorere tauna muramura be heniamu, a? Lasi. Dokta na gorere tauna be sekea namonamomu eiava henanadai haida amo ena gorere  badina be tahuamu. Una heḡereḡerena, sivarai ibounai ba diba guna unu amo abi hidi maorona ba karaia. Una be edena dala ai ba badinaia?

4. Hereva Lada-isidia 18:13 heḡereḡerena, edena dala ai diba maoro bavabi? (Laulau danu ba itaia.)

⁴ Nega momo henanadai amo diba maorona bo abiamu. Heḡereḡere, reana haida ese e boirimu idia ida ba moale hebou. Una invateisin bo abia daemu, eiava? Bema una moale hebou e heḡaeḡaelaia tauna eiava una nega ai be karamu ḡaudia na asi dibamu namonamo, reana ba nanadaia: “Una moale hebou be edena nega bona edeseni ai bo karaiamu? Taunimanima hida o boiridia? Daika ese una moale negana be itaia taomu? Daidia be vasimu? Una moale negana ai dahaka bo karamu? Be vasimu taudia be alkahol danu bo henidiamu?” Unu henanadai haeredia amo oi na abi hidi maorona bo karaiamu.—Hereva Lada-isidia 18:13 ba duahia.

5. Diba maoro o abimu murinai dahaka ba kara?

⁵ Be varamu ḡaudia iboudiai na vada mai dibamu dainai, ḡau ma haida ba haero. Heḡereḡere, bema o dibamu una moale hebou ai haida na Baibul ena hahekau herevadia asie lalo badamu eiava bia eiava ḡau unu bamodia danu be atomu, oi be dahaka bo karamu? Una moale hebou negana na pati gabuna ai be lao dibamu. (1 Pet. 4:​3, NWT) Dahaka bo karamu bema una moale hebou negana na emu  kongrigeisin hebou bona haroro negana? Unu iboudiai bo haerodia namonamomu murinai, oi na abi hidi maorona bo karaiamu. To, ba karaia ḡauna ma ta na ina: Namona na Iehova ena lalohadai ba tahua.—Her. 2:6.

IEHOVA ENA LALOHADAI BA TAHUA

6. Iakobo 1:5 ena hereva heḡereḡerena, dahaka dainai Iehova ena heduru baita noia?

⁶ Iehova ba noia oi baine durumu iena lalohadai ba lalopararalaia. Iehova na e gwauhamata aonega baine henida, unu amo ia baine hamoalea abi hididia baita kara. Ia ese una aonega na taunimanima “e henidia dudu kaumu bona se gwaugwaumu.”—Iakobo 1:5 ba duahia.

7. Edena dala ai Iehova ena lalohadai ba dibaia?

⁷ Iehova ena heduru o noiamu murinai, emu ḡuriḡuri be haerelaiamu dalana ba laloa. Mani ina haheitalai a laloa: Bema oi asi dibamu gabuna ta ai o haloaloa, oi na una gabu mai dibana tauna ta enai heduru bo tahumu. To, ia e herevamu lalonai oi bo raka ohomu? Lasi. Oi na iena hereva ibounai bo hakala henia namonamomu. Una dainai, Iehova amo aonega o noiamu murinai, Baibul ai iena haere ba tahua, heḡereḡere ededia taravatu bona hahekau herevadia be oiemu ai e varamu ḡauna e herevalaiamu. Matamanai tame herevalaia heḡereḡerena, abi hidi ta do so karaia lalonai, namona na Baibul ese pati karadia, hebamo  dikadia, bona Basileia bavatoa guna daladia ba haero.—Mat. 6:33; Roma 13:13; 1 Kor. 15:33.

8. Bema heduru o uramu edeseniai ba hetahu? (Laulau danu ba itaia.)

⁸ Momokani, nega haida haere maorona bavabia totona, oi na heduru bo tahumu. Heḡereḡere, lo tadikakana eiava taihuna ta ba nanadaia. To sibomu emu hetahu karana amo haere maorodia bo davarimu. Eda stadi tuludia ai heduru herevadia na momo, heḡereḡere Research Guide for Jehovah’s Witnesses bona Keristani Mauri Totona Baibel Siri Idauidau (NWT). Ba laloatao ḡauna na ina: Iehova e hamoaleamu abi hididia ba kara.

9. Ede baita diba tomamu eda abi hidi ese Iehova na e hamoaleamu? (Efeso 5:17)

⁹ Ede baita diba tomamu eda abi hidi ese Iehova na e hamoaleamu? Ḡau ginigunana na, Ia baita dibaia namonamo. Baibul na e gwa: “Helaḡa Diravana idibana na lalo-parara.” (Her. 9:10) Oibe, lalo-parara korikorina na Iehova ena kara, ena ura, bona e ura henimu ḡaudia eiava e inai henimu ḡaudia idibadia karana amo e varamu. Sibomu ba henanadai, ‘Lau be dahaka baina kara Iehova baina hamoalea totona?’—Efeso 5:17 ba duahia.

10. Dahaka dainai Baibul ena hahekau herevadia na mai anidia bada, dia eda kastom?

¹⁰ Nega haida, Iehova ihamoalena totona, baita karamu abi hididia ese varavarada na be habadudiamu. Heḡereḡere, tama sina haida na be uramu natudia kekenina na mai ena moni merona baine adavaia, ena be una mero na lauma dalanai se goadamu. Momokani, tama sina na e uramu natudia kekenina na mauri namona baine moalelaia, to lauma dalanai daika ese be duruamu? Iehova ese una be ede e laloa tomamu? Haere na Mataio 6:33 ai baita davariamu. Una siri ai Kristen taudia na e hagoadadiamu, ‘Basileia . . . bae tahua guna.’ Ena be tama sina bona eda hanua taudia na ta matauraidiamu, to mai anina bada ḡauna na Iehova baita hamoalea.

BA KARA ḠAUDIA BA HAERO NAMONAMO

11. Filipi 1:​9, 10 be edena kara e herevalaia, bona edena dala ai una ese be durumumu ba kara ḡaudia ba haero namonamo?

¹¹ Baibul ena hahekau herevadia o lalopararalai murinai, o uramu ba kara abi hididia ba haero. (Filipi 1:​9, 10 ba duahidia.) Una negai, namona na abi hidi ta ta ba haerodia namonamo, unu amo bo dibamu gabeai be dahaka be varamu. Nega haida abi hidi ta baita karaia na dia auka. To abi hidi momo na dia unu bamona. Bema ba kara ḡaudia na bo haero namonamomu, nega aukadia ai danu abi hidi maorodia na bo karamu.

12-13. Edena dala ai ḡau ihaerodia namonamo karana ese be durumumu moni ḡaukara maorona bavabia hidi?

¹² Mani ina haheitalai a laloa. Oi na emu ruma bese iduruna totona moni ḡaukara ta o tahuamu. Ḡaukara gabudia rua o davari. Oi na ḡaukara gabunai e varamu ḡaudia o lalomu, heḡereḡere dahaka ḡaukara e karamu, edena taimi ai ḡaukara e hematamamu bona e dokomu, ḡaukara gabuna ena daudau, bona ḡau ma haida. Unu ḡaukara ruaosi na Kristen taudia ese bae kara diba ḡaukaradia. Reana bo abia hidimu ḡaukarana na oi ese o ura heniamu eiava pei namona be henimumu. To, abi hidi do so karaia neḡanai ḡau ma haida danu ba lalo.

¹³ Heḡereḡere, unu ḡaukara ruaosi ese hebou ilao henina karana basine hadikaiamu? Unu ḡaukara ese emu femli ida ba noho negana bona lauma dalanai ba durudia negana basine abiamu? Henanadai unu bamodia ese be durumumu “mai anina bada ḡaudia”—ruma bese tomadiho bona femli ena dabu ḡaudia bo  lalo badamu—to dia kohu momo itahuna karana. Bena oi bo karaiamu abi hidina na Iehova ese be hanamoamu.

14. Edena dala ai ḡau ihaerodia namonamo karana bona lalokau ese be durudamu haida basita hahekwakwanaidia?

¹⁴ Ḡau ihaero namonamo karana amo baita dibamu ta karamu abi hididia ese haida be hamoalediamu eiava lasi. (Fili. 1:10) Eda heḡoeva daladia ai abi hidi ta karamu neganai una na mai anina bada. Heḡereḡere, reana ita na heḡoeva dalana ta eiava hui kara dalana ta ta ura heniamu. To bema una ese tadikaka taihu bona ma haida be hahekwakwanaidiamu be ede bamona? Ḡau ihaero namonamodia karana ese be durudamu taunimanima edia hemami baita mataurai. Lalokau ese be durudamu “ma ta” ena namo baita tahuamu bona baita laloa badamu. (1 Kor. 10:​23, 24, NWT, 32; 1 Tim. 2:​9, 10) Bena baita karaiamu abi hidina  ese be hahedinaraiamu haida na ta lalokau henidiamu bona ta matauraidiamu.

15. Abi hidi badana ta do so karaia neganai dahaka ba lalo be namo?

¹⁵ Bema oi na abi hidi badana ta o karaiamu, namona na ba kara ḡaudia ba lalo. Iesu na e gwa, “davana ba laloa.” (Luka 14:​28, NWT) Una dainai emu nega, kohu, bona emu hekwarahi ba haeroa unu amo emu abi hidi ba haḡuḡurua. Nega haida emu femli ida ta ta ese bae kara ḡaudia ba herevalai, una dala amo emu abi hidi na bo haḡuḡuruamu. Dahaka dainai una na mai anina bada? Unu amo bo dibamu emu abi hidi ai ḡau haida ba haidau eiava dala ma ta ba badinaia. Bona bema emu femli edia lalohadai bo hakala henimu, idia na mai edia ura ida oi be durumumu emu abi hidi ba haḡuḡurua.—Her. 15:22.

BAINE DURUMU ABI HIDIDIA BA KARA

16. Ededia dala ese baine durumu abi hidi namona ba karaia? (Ina maua danu ba itaia, “ Abi Hidi Namodia Ba Kara Daladia.”)

¹⁶ Bema oi na paragraf matamadiai e ato daladia o badinamu, oi na vada heḡereḡere abi hidi maorona ta ba karaia. Oi na diba maoro ome abi, bona hahekau herevadia ome diba dainai Iehova ihamoalena abi hidina bo karaiamu. Hari Iehova ba noia oi baine durumu emu abi hidi ba haḡuḡurua.

17. Abi hidi namona ba karaia totona oi baine durumu ḡauna be dahaka?

¹⁷ Ena be oi ese abi hidi momo o kara ḡaudia na vada o haḡuḡurudia, ba helalotao abi hidi namona ba karaia dalana tamona na dia emu aonega o diba ai ba tabekau, to Iehova ena aonega ai. Ia sibona ese diba maorona, laloparara bona ḡau ihaero namonamodia karana be henimumu—unu na mai anidia bada. (Her. 2:​1-5) Iehova ese oi na be durumumu ia e hamoaleamu abi hididia bo karamu.—Sal. 23:​2, 3.