1. Dahaka baita kara unu amo Iehova baita hamoalea?

 MANI a laloa oi ese harihari ḡauna namo hereana ta na o lalokau heniamu tauna o henia. Oi na bo lalohisihisimu bema ia ese emu harihari ḡauna na be atoa tabemu bona basine laloa badamu. To bema emu harihari ḡauna na ia ese e ḡaukaralaia namonamomu dainai hahenamo herevadia be gwaurai henimumu, oi na bo moalemu. Ina haheitalai amo dahaka ta dibamu? Iehova na ita e lalokau henidamu dainai Natuna e heni ita daidai e mase. Iehova ena harihari ḡauna hereadaena bona ena lalokau dainai eda tenkiu karana ta hahedinaraiamu neganai, Ia na e moalemu.—Ioa. 3:16; Roma 5:​7, 8.

2. Ina atikol ai dahaka baita herevalaimu?

² Laḡani e laomu lalodiai, ita ese mauri idavalaina boubouna baita laloa maraḡi dibamu. Unu ta kara tomamu neganai, una na vaitani Dirava ena harihari ḡauna na ta atoa tabemu. Ena be una harihari ḡauna dainai ta moale, to asita laloa badamu. Una basine vara totona, namona na hanaihanai, Dirava bona Keriso ese ita daidai e kara ḡaudia baita lalodia bada. Ina atikol ai unu baita kara daladia baita dibamu. Una boubou ḡauna dainai, edena dala ai hari bona vaira negai baita abimu hahenamodia baita herevalaimu. Bona Memorial negana ai Iehova ena lalokau dainai, eda tanikiu karadia baita hahedinarai daladia danu baita herevalaimu.

HARI ITA E DURUDAMU DALANA

3. Hari ina negai mauri idavalaina boubouna ese e durudamu dalana ta be dahaka?

³ Keriso ena mauri idavalaina boubouna amo heduru na ta abimu. Heḡereḡere, una mauri idavalaina boubouna dainai, Iehova ese eda dika e gwautaomu. Ia na ta ese se doria dika baine gwautao, to sibona ena ura dainai dika e gwautaomu. Salamo itorena tauna na Iehova ena hebogahisi karana dainai e gwa:  “Iehova e, oi na namo bona noho heḡaeḡae dika ba gwauatao totona.”—Sal. 86:​5, NWT-MO; 103:​3, 10-13.

4. Iehova be daidia totodia mauri idavalaina boubouna e heni? (Luka 5:32; 1 Timoteo 1:15)

⁴ Haida na e laloamu idia na dia heḡereḡere dainai Iehova ese edia dika na basine gwautao diba. Vaia, ita iboudiai na asi eda maoro eiva dia heḡereḡere eda dika bae hegwautao. Aposetolo Paulo ese una na e lalopararalaia dainai e gwa: “Lau na dia namo aposetolo bae gwauraigu.” To ma e gwa: “Dirava ena harihari-bada dainai lau ini name heto.” (1 Kor. 15:​9, 10) Bema kara dika amo baita helalo-kerehaimu, Iehova ese ede dika na be gwautaomu. Dahaka dainai unu ta gwau tomamu? Badina ia ese e lalokau henidamu. Bema o lalohisihisimu badina o laloamu Iehova ese emu dika na basine gwau tao dibamu, ba helalotao Iehova ese una mauri davana na edia kara dika daidiai e lalohisihisimu bona e uramu edia mauri bae haidau taudia daidai e heni to dia ḡoevadae taudia daidiai e heni.—Luka 5:32; 1 Timoteo 1:15 ba duahidia.

5. O laloamu ta mai ena maoro baine laloa Iehova ese ena dika baine gwau tao na namo? Mani ba herevalaia.

⁵ Namona na basita laloa ita ese laḡani momo Iehova ta hesiai henia dainai, ia ese eda dika baine gwau tao na namo. Vaia, Iehova ese ia dainai ta kara ḡaudia iboudiai na e lalotaomu. (Heb. 6:10) Ia ese mauri davana e heni na harihari ḡauna ta asi davana, to dia eda hesiai ḡaukara davana. Bema ta laloamu Iehova totona ḡau momo ta kara dainai ia ese eda dika baine gwautao na maoro, una na lalohadai kererena. Badina unu e lalo tomamu taudia ese e hahedinaraiamu mauri davana na asie laloa badamu.—Galatia 2:21 ida ba haheḡereḡerea.

6. Dahaka dainai Paulo na Iehova ihesiai henina ḡaukarana e goadalaia?

⁶ Paulo na mai dibana ena be ia na Iehova dainai ḡau momo e kara, to dia unu daidiai Iehova ese ena dika e gwautao. To, dahaka dainai ia na Iehova e hesiai henia goadagoada? Badina e ura baine hahedinaraia Iehova ena hebogahisi karana na e laloa bada. (Efe. 3:7) Paulo heḡereḡerena, dia Iehova ena hebogahisi baita abia totona, to una mauri davana ta laloa badamu dainai, mai laloda idoinai ida Iehova baita hesiai henia.

7. Edena dala ma ta ai hari ina negai mauri idavalaina boubouna amo namo ta davarimu? (Roma 5:1; Iak. 2:23)

⁷ Hari ina negai, mauri davana ena namo ta na, ita ese Iehova ihetura henina karana baita moalelaia diba. a Atikol namba 4 ai ta itaia heḡereḡerena, ita ta vara neganai ita na dia maoromaoro Iehova turana ai tala. To mauri idavalaina boubouna dainai, ita ese ‘Dirava ena maino ta abia’ bona ia baita hetura henia diba.—Roma 5:1; Iakobo 2:23 ba duahidia.

8. Dahaka dainai Iehova ta ḡuriḡuri heniamu karana na baita laloa bada?

⁸ Iehova ihetura henina karana ai baita karaia ḡauna ta na ia baita ḡuriḡuri henia. Iehova na Kristen heboudia ai e hegwauraimu ḡuriḡuridia bona siboda ta gwauraimu ḡuriḡuridia e kamonaidiamu. Ta ḡuriḡurimu neganai, Iehova ese lalomaino e henidamu. To dia una mo, ḡuriḡuri karana ese eda hetura karana Iehova ida danu e hagoadaiamu. (Sal. 65:2; Iak. 4:8; 1 Ioa. 5:14) Iesu tanobada ai e nohova neganai, ia na hanaihanai Iehova e ḡuriḡuri heniava, badina mai dibana Tamana na e hakalava bona ḡuriḡuri karana ese ena hetura karana Tamana ida be hagoadaiamu. (Luka 5:16) Ta moale bada hereamu badina Iesu ena boubou ḡauna dainai, Iehova turana ai baitala diba bona ia baita ḡuriḡuri henia diba.

 VAIRA NEGA AI BAITA MOALELAIMU HAHENAMODIA

9. Mauri davana dainai abidadama taudia be dahaka hahenamo be davarimu?

⁹ Mauri davana dainai abidadama taudia be dahaka hahenamo be davarimu? Iehova ese mauri hanaihanai be henidiamu. Momo na e laloamu una na basine vara dibamu, badina mase na hanaihanai e varamu ḡauna. To, Iehova ena ura ginigunana na taunimanima na bae mauri hanaihanai. Bema Adam na basinema kara dika, taunimanima ese mauri hanaihanai na basiema daradaralaia. Ena be hari ina negai mauri hanaihanai baita laloa na auka, to baita abia dae una na be vara momokanimu badina mai dibada Iehova ese Natuna lalokauna ena mauri e henia baita mauri hanaihanai helaoreana.—Roma 8:32.

10. Vaira nega ai horoa taudia bona mamoe idaudia ediai be dahaka be varamu?

¹⁰ Ena be mauri hanaihanai na vaira nega ai baine vara ḡauna, to Iehova na e uramu hari una hahenamo baita laloa. Lauma Helaḡa amo e horodia taudia na guba ai be mauri hanaihanaimu bona Keriso ida tanobada be lohiaiamu. (Apok. 20:6) Mamoe ma haida be tanobada paradaisona ai be nohomu, bona unuseniai daradoko, taitai bona lalohisihisi na lasi. (Apok. 21:​3, 4) Oi danu mamoe idaudia ta bona o uramu tanobada paradaisona ai ba mauri hanaihanai, a? Una na hahenamo badana. Iehova ese taunimanima e karadia na tanobada ai bae noho, una dainai tanobada ai baita mauri hanaihanaimu mai moaleda ida.

11-12. Paradaiso ai baita abimu hahenamodia haida be dahaka? (Laulau danu ba itadia.)

¹¹ Tanobada Paradaisona ai bo karamu ḡaudia mani a lalo. Gorere bona mase dainai oi na basio lalohekwarahimu. (Isa. 25:8; 33:24) Iehova ese o uralaimu ḡau namodia na be henimumu. Una negai oi be o uramu dahaka ba stadilai? Oi be o uramu animal eiava manu edia mauri dalana, miusik igadaralaina dalana, eiava laulau e toremu dalana ba stadilaidia, a? Paradaiso ai ruma ihaginidia bona biru ḡaukaradia mai dibadia namonamo taudia edia amo  heduru baita abimu. Taunimanima momo na be hedurumu, aniani be heḡaeḡaelaimu, tulu be karamu, uma gabu be karamu bona be naridiamu. (Isa. 35:1; 65:21) Oi na bo mauri hanaihanaimu dainai emu nega na heḡereḡere ḡau idauidau bo karamu.

¹² Mani a laloa mase taudia be toreisi loumu bona baita hedavari henidia loumu na mai moalena. (Apos. 24:15) Bona Iehova ese e kara ḡaudia bo stadilaimu karana amo ia idibana karana bo moalelaiamu. (Sal. 104:24; Isa. 11:9) Hereadaena be, mai lalomu mamina ḡoevana ida Iehova bo tomadiho heniamu! Oi o uramu “kara dika” amo e varamu moale sisina dainai unu hahenamona ba dadarai, a? (Heb. 11:25) Lasi! Paradaiso ai baita abimu hahenamodia ese ina tanobada ese e henimu ḡaudia na e hereadia. Tanobada Paradaisona na dia hanaihanai baita laroamu ḡauna. Badina una paradaiso be varamu neganai, una na iseda noho gabuna ai be laomu. Unu hahenamo iboudiai na be varamu badina Iehova ese ita e lalokau henida bada dainai mauri idavalaina boubouna e heni.

BA HAHEDINARAIA IEHOVA ENA LALOKAU KARANA NA O LALOA BADAMU

13. Edena dala ai baita hahedinaraia Iehova ena lalokau karana na ta laloa badamu? (2 Korinto 6:1)

¹³ Edena dala ai baita hahedinaraia Iehova ese e heni mauri davana na ta laloa badamu? Namona na eda mauri ai baita hahedinaraia Iehova ena hesiai ḡaukara na mai anina bada. (Mat. 6:33) Badina Iesu na e mase unu amo “e maurimu taudia na sibodia ediai basie mauri, to idia daidiai e mase ma e tore isi lou tauna enai bae mauri.” (2 Kor. 5:15) Momokani, Iehova na ena hebogahisi bada dainai eda dika e gwautao. Una dainai mai kudouda idoinai ida ia baita hesiai heniamu neganai, ta hahedinaraiamu ia ese ita daidai e kara ḡaudia na ta lalopararalaimu bona ta lalodia badamu.—2 Korinto 6:1 ba duahia.

14. Edena dala ai baita hahedinaraia Iehova ena hahekau herevadia na ta abidadama henimu?

¹⁴ Iehova ena lalokau baita laloa bada dalana ta na iena hahekau herevadia baita abidadama henidia. Edena dala ai? Abi hidi haida ta karamu neganai, heḡereḡere ededia skuli baitala eiava edena moni ḡaukara baita abia hidi, namona na Iehova ena ura baita laloa guna. (1 Kor. 10:31; 2 Kor. 5:7) Bema eda abidadama na eda kara amo baita hahedinaraiamu, eda abidadama bona eda hetura karana Iehova ida na be goadamu. Una ese eda helaro danu be hagoadaiamu.—Roma 5:​3-5; Iak. 2:​21, 22.

15. Edena dala ai Memorial negana ai eda tenkiu karana baita hahedinaraia?

¹⁵ Iehova ena lalokau dainai eda tenkiu karana baita hahedinaraia dalana ma ta na ina: Memorial vairana bona murina wikidia ai baita kara ḡaudia amo baita hahedinaraia Iehova ese e heni mauri davana na ta laloa badamu. Memorial baita lao henia heḡaeḡaedia ta karamu lalonai, haida danu baita boiridia diba una hebou baema. (1 Tim. 2:4) Oi ese o boiridiamu taudia ediai Memorial dinana ai bae  vara ḡaudia na ba herevalai. Heduru ḡauna ta na baola jw.org bena ini vidio ba haheitalaidia, Iesu E Mase Badina be Dahaka? bona Iesu Ena Mase Baita Laloatao. Namona na elda taudia ese e manoka taudia danu bae boiridia. Guba bona tanobada ai na moale bada herea e varamu bema e boio mamoedia na Iehova e lou heniamu! (Luka 15:​4-7) Memorial negana ai namona nega ginigunana Memorial ema taudia, tadikaka taihu, bona laḡani daudau una hebou asiema taudia baita hedavari henidia. Ita na ta uramu idia na bae mamia idia na ta abidia daemu.—Roma 12:13.

16. Dahaka dainai Memorial vairana bona murina wikidia ai eda hesiai ḡaukara baita habadaia?

¹⁶ O laloamu memorial vairana bona murina wikidia ai emu hesiai ḡaukara ba habadaia diba, a? Una na dalana namona ita ese baita hahedinaraia Iehova bona Iesu ese ita daidiai e kara ḡaudia na ta lalo badamu. Eda hesiai ḡaukara baita habadaiamu neganai, Iehova ese ita e durudamu dalana baita itaiamu, bona eda abidadama ia enai na be goadamu. (1 Kor. 3:9) Danu, Dina Ta Ta Baibul Baita Herevalaia buklet ai Memoral wikina ai baita duahimu Baibul siridia ba ita eiava midwik hebou pepana ai e atoa sedual ba badinaia. Reana unu o duahimu Baibul siridia na emu stadi projek ta ai ba halaoa.

17. Dahaka ese Iehova e hamoaleamu? (Maua danu ba itaia, “ Iehova Ena Lalokau Ba Laloa Bada Daladia.”)

¹⁷ Momokani reana emu noho dalana dainai ina atikol ese e herevalai ḡaudia iboudiai na basio kara dibamu. To ba helalotao Iehova ese oi o karamu ḡaudia na ma haida ese e karamu ḡaudia ida se haheḡereḡerediamu, badina ia dainai o hahedinaraiamu lalokau karana na e laloa badamu. Ia na e moalemu bema e itaiamu oi ese iena harihari ḡauna, mauri davana, na o laloa badamu.—1 Sam. 16:7; Mar. 12:​41-44.

18. Dahaka dainai Iehova Dirava bona Iesu Keriso ediai eda tenkiu karana baita hahedinaraia?

¹⁸ Iehova ese mauri davana e heni dainai, eda dika e gwautao, ia baita hetura henia diba, bona mauri hanaihanai helarona e henida. Una dainai hanaihanai Iehova enai eda tenkiu karana baita hahedinaraia, badina e lalokau henida dainai unu hahenamo e henida. (1 Ioa. 4:19) Iesu enai danu eda tenkiu karana baita hahedinaraia, ia na ita e lalokau henida bada dainai ena mauri e heni!—Ioa. 15:13.