1. Laḡani iboudiai Keriso ena Mase Ihelalolaina Hebouna baitala ena namo be dahaka?

 MOMOKANI, oi na o abia daemu mauri idavalaina boubouna na Iehova ena harihari ḡauna hereadaena. (2 Kor. 9:15) Iesu ese ena mauri e bouboulaia dainai oi na Iehova Dirava turana ai baola diba, bona mauri hanaihanai bavabia diba. Una dainai mauri idavalaina boubouna na baita laloa bada bona Iehova baita tenkiu henia badina ena lalokau dainai una boubou ḡauna e heni! (Roma 5:8) Oibe, Iehova bona Iesu ese ita daidai e karaia karana na basita laloaboio bona hanaihanai eda tenkiu karana baita hahedinaraia totona, Iesu na e haheḡani, ita na laḡani ta ta iboudiai iena mase Ihelalolaina Hebouna baitala.—Luka 22:​19, 20.

2. Ina atikol ai dahaka baita herevalaimu?

² Ina laḡani ai, Memorial baita abiamu dinana na Saturday, April 12, 2025. Oibe, ita iboudai na ta uramu una hebou baitala. Memorial negana ai Iehova bona Iesu ese ita daidai e kara ḡaudia baita lalodia dobumu a neganai, namo baita davarimu. Ina atikol ai, ita ese mauri idavalaina boubouna amo Iehova bona Natuna edia kara baita dibadiamu. Bona murina atikol ai, baita itaiamu edena dala ai mauri idavalaina boubouna amo namo baita davari bona edena dala ai eda tenkiu karana baita hahedinaraia.

MAURI IDAVALAINA BOUBOUNA AMO IEHOVA ENAI DAHAKA TA DIBAMU?

3. Edena dala ai tau tamona ese taunimanima na mase bona kara dika amo baine ruhadia? (Laulau danu ba itaia.)

³ Mauri idavalaina boubouna amo ta dibamu Iehova na hahemaoro maoromaoro Diravana. (Deu. 32:4) Edena dala ai? Mani a laloa: Adam ena gwau-edeede dainai, ita iboudai na  kara dika bona mase ena igui ai e atoda. (Roma 5:12) Iehova ese kara dika bona mase amo baine ruhada totona, Ia ese Iesu e siaia ena mauri e bouboulaia. To edena dala ai ḡoevadae tauna ta ese ena mauri e bouboulaia taunimanima iboudiai baine hamauridia? Aposetolo Paulo na e gwa: “Tau tamona [Adam] ena gwau-edeede dainai hutuma na dika taudia ai e halaodiava; unuhetomana, tau tamona [Iesu] ena kamonai dainai hutuma na kara maoromaoro taudia ai e halaodiamu.” (Roma 5:19; 1 Tim. 2:6) Paulo ena hereva anina na, tau tamona ena gwau-edeede karana dainai ita iboudai na kara dika bona mase ese e ḡuida. Una dainai, tau ḡoevadaena ta ese ita baine ruhada na namo.

4. Adam natuna haida na Iehova e badinaia, to dahaka dainai maoro se henidia bae mauri hanaihanai?

⁴ Iehova ese ita baine hamaurida totona Iesu e siaia baine mase be maoro, a? Adam natuna haida na Iehova e badinaia, to dahaka dainai maoro na se henidia bae mauri hanaihanai totona? Ita na dia ḡoevadae tauda dainai, reana baita lalomu Iehova na unu bema kara toma na maoro. To Iehova enai una na dia dala maorona. Badina bema Ia na unu bema kara toma, toana na Adam ese e karaia karana na dia kara dika badana bona ia natuna na asi edia kara dika. To una na dia momokani.

5. Dahaka dainai ta abia daemu Iehova na hanaihanai e kara maoromu?

⁵ Bema Iehova na mauri davana basinema heni bona Adam natuna na bema rakatanidia bae mauri hanaihanai be ede bamona? Reana taunimanima na bema lalo Dirava na ḡau ma haida ai danu hahemaoro maoromaoro dalana na basine badinaiamu. Heḡereḡere, bema lalo Iehova be ena gwauhamata be haḡuḡurumu, eiava? To dahaka dainai ita ese una na basita lalohekwarahilaia? Badina Iehova ese hahemaoro maoromaoro karana e badinaia, ena be unu baine kara toma totona ia ese Natuna lalokauna e bouboulaia. Una dainai ta abia daemu Iehova na hanaihanai e kara maoromaoromu.

6. Mauri idavalaina boubouna amo Iehova enai ta dibaiamu karana ta be dahaka? (1 Ioane 4:​9, 10)

⁶ Mauri idavalaina boubouna dainai ta lalopararamu Iehova na hahemaoro maoromaoro Diravana, to dia una mo, ena lalokau karana danu ta dibaiamu. (Ioa. 3:16; 1 Ioane 4:​9, 10 ba duahidia.) Iehova ese Natuna e siaia ita daidai e mase badina ia na e uramu ita na baita mauri hanaihanai bona ena ruma bese taudia ai baitala. Mani a laloa: Adam e kara dika neganai, Iehova ese na ena ruma bese amo e kokia. Una dainai, ita ta vara neganai, ita na dia Dirava ena ruma bese lalonai. To mauri idavalaina boubouna dainai, Iehova ese eda  dika na e gwautaomu bona ia e abidadama heniamu bona e badinaiamu taudia na iena ruma bese ai be laomu. Hari danu, ita na Iehova bona tadikaka taihu turadia ai baitala diba. Oibe, Iehova ese ita na e lalokau henidamu!—Roma 5:​10, 11.

7. Iesu ese ena mauri e heni neganai, ia na e hisihisi bada herea. Una ese e hadibadamu Iehova ena lalokau ita edai be ede bamona?

⁷ Iehova ese ita e lalokau henida badamu dalana baita lalopararalaia totona, Iesu e hisihisi neganai Iehova ena hemami baita laloa. Satana na e gwaumu Dirava e hesiai heniamu taudia na nega be aukamu neganai, Dirava na basie badinaiamu. Satana baine hakoikoia totona, Iehova ese Iesu do se mase ai e hisihisiva na se koua. (Iobu 2:​1-5; 1 Pet. 2:21) Iehova ese e itaia, taunimanima ese Iesu e kirikirilaia, soldia ese e dadabaia, bona hisihisi auna ai e kokoa kau. Iehova ese Natuna lalokauna e itaia e hisihisi ela bona e mase. (Mat. 27:​28-31, 39) Iehova na mai ena siahu unu e varava ḡaudia iboudiai bema koudia. Heḡereḡere, ia e inai heniava taudia na eto: “Dirava ese bema lalokau henia, bema hamauria.” Oibe, Iehova ese Iesu na bema hamauria diba. (Mat. 27:​42, 43) To, bema Dirava na unu bema kara toma, Iesu ena mauri na basinema bouboulaia bona ita na vada asi eda helaro. Una dainai Iehova na e haheauka bona Natuna na e hisihisi ela bona e mase.

8. Iehova ese Natuna e itaia e hisihisiva neganai, iena hemami be ede bamona? Ba herevalaia. (Laulau danu ba itaia.)

⁸ Ita na basita lalo siahu ibounai Diravana na asi ena hemami. Ia ese ita na ia heida-idana e karada bona ita na mai eda hemami, una dainai ta dibamu Iehova na mai ena hemami. Baibul na e gwa ia na e “hahisihisiava” bona e “habaduava.” (Sal. 78:​40, 41) Mani Abraham bona Isaak edia sivarai aita laloa. Iehova ese Abraham na e haḡania natuna vara-edeana ena mauri baine bouboulaia. (Gen. 22:​9-12; Heb. 11:​17-19) Mani Abraham ena hemami aita laloa, ia na e heḡaeḡaeva natuna baine bouboulaia neganai, reana e lalohisihisi bona e lalometau. Una heḡereḡerena, Iehova na Natuna e itaia taunimanima ese e hahisia ela bona e hamasea neganai, Ia na e lalohisihisi bada herea!—Vidio ladana Imitate Their Faith—Abraham, Part 2 na jw.org ai ba itaia.

9. Roma 8:​32, 38, 39 ese e hadibadamu Iehova ena lalokau oi bona tadikaka taihu ediai be ede bamona?

⁹ Mauri idavalaina boubouna amo ta dibamu Iehova ese ita na e lalokau henida badamu, bona una ese varavara bona tura edia lalokau na e hereaia. (Roma 8:​32, 38, 39 ba duahidia.) Oibe, Iehova ese ita na e lalokau henida badamu. Oi o uramu ba mauri hanaihanai, a? Bavabiadae vaitani Iehova na e ura dikadikamu  oi na ba mauri hanaihanai. Oi o uramu emu kara dika na baine gwaudiatao, a? Iehova na e ura dikadikamu emu dika baine gwautao. Ia na e uramu ena harihari ḡauna hereadaena, mauri idavalaina boubouna na baita laloa bada bona baita abidadama henia. Mauri idavalaina boubouna amo Iehova ese ena lalokau na ita edai e hahedinaraia. Bona nega matamata ai, ita ese Iehova ena lalokau karadia ma haida baita dibadiamu.—Koh. 3:11.

MAURI IDAVALAINA BOUBOUNA AMO IESU ENAI DAHAKA TA DIBAMU?

10. (a) Iesu baine mase neganai, dahaka dainai ia na e lalometau? (b) Ededia dala ai Iesu ese e hamomokania Iehova na maoro? (Maua ladana “ Iesu ese Iehova E Badinaia Dainai Iehova Ladana E Hanamoa” danu ba itaia.)

¹⁰ Iesu ese Tamana ladana na e laloa bada. (Ioa. 14:31) Iesu na e lalometau badina e hamaoroa ia ese Tamana ladana e hadikaia bona se matauraia. Una dainai e ḡuriḡuri, eto: “Tamagu e, bema mai dalana ina kehere na egu amo boma abia oho.” (Mat. 26:39) To Iesu na Iehova e abidadama henia ela bona e mase, unu amo Tamana ladana e hanamoa.

11. Edena dala ai Iesu ese e hahedinaraia taunimanima na e lalokau henidia bada? (Ioane 13:1)

¹¹ Mauri idavalaina boubouna amo ta dibamu ḡauna ma ta na Iesu ese taunimanima bona ia murinai e rakava taudia na e lalokau henidia bada. (Her. 8:31; Ioane 13:1 ba duahia.) Heḡereḡere, Iesu na mai dibana ia tanobada be maimu neganai, ia ese be karamu ḡaudia haida ienai na be aukamu, ia na baine hisihisi ela bona baine mase. To, Iesu ese unu iboudiai e karadia badina na dia Iehova ese e henia ḡaukarana mo baine haḡuḡurua, to taunimanima danu e lalokau henidia dainai. Iesu na mai kudouna ibounai ida taunimanima e haroro henidiava, e hadibadiava, bona e durudiava. Ena mase dinana ai danu, ia na nega e ato ena aposetolo taudia aedia e huri, e hagoadadia bona  hahekau herevadia e henidia. (Ioa. 13:​12-15) Bona Iesu na hisihisi auna ai e hisihisiva lalonai, ia badinai kara dika tauna helaro e henia bona Ioane e hamaoroa ia sinana na baine naria. (Luka 23:​42, 43; Ioa. 19:​26, 27) Oibe, Iesu ese taunimanima daidiai ena lalokau e hahedinaraia dalana na dia idia daidiai mo e mase, to danu ena mauri ibounai lalonai una lalokau na e hahedinaraia.

12. Hari ina nega ai Iesu ese ita be ede e duruda tomamu?

¹² Ena be Keriso na “nega tamona” kara dika ikokina totona e mase, to ia na dounu ita daidai ḡau momo e karamu. (Roma 6:​10, NWT) Edena dala ai? Ia na mauri idavalaina boubouna dainai, e ḡaukara goadamu ita e durudamu. Mani e karamu ḡaudia aita herevalai. Ia na King ḡaukarana e karaiamu, Hahelaḡa Tauna Badana ḡaukarana e karaiamu, bona kongrigeisin e gunalaiamu. (1 Kor. 15:25; Efe. 5:23; Heb. 2:17) Iena ḡaukara ma ta na horoa taudia bona hutuma bada taudia e haboudiamu, una na hisihisi badana do se ore lalonai be haḡuḡuruamu. b (Mat. 25:32; Mar. 13:27) Bona danu, ini dina gabedia lalodiai, ia ese ena abidadama hesiai taudia na lauma dalana ai e ubudiamu. (Mat. 24:45) Bona ia na laḡani 1,000 be lohiamu neganai, ia na dounu ita daidai be ḡaukaramu. Iehova ese Natuna e heni neganai ia na dia ita daidai mo e mase to danu ita daidai ḡau momo baine kara!

ḠAU MATAMATADIA NA DOUNU BAITA DIBAMU

13. Edena dala ai lalo dobu karana ese be durudamu Dirava bona Keriso edia lalokau ita daidai baita dibaia?

¹³ Baita laloa dobumu neganai, Iehova Dirava bona Iesu Keriso ese ita daidai e hahedinaraia lalokauna baita dibamu. Ina laḡani ai Memorial negana ai, Evanelia bukana ta eiava iboudiai ba duahidia. Dina tamona ai karoa momo basio duahidia. To, taina ruana kaha haida ba duahi bona research ma haida ba kara, unu amo ba diba ededia badi ma haida daidia Iehova bona Iesu baita lalokau henidia. Bona o dibamu ḡaudia na ma haida ediai ba herevalai.

14. Salamo 119:97 heḡereḡerena, edena dala ai research karana ese be durudamu mauri idavalaina boubouna bona ma ḡau haida ai eda diba baita habadaia? (Laulau danu ba itaia.)

¹⁴ Bema oi na hereva momokani ai laḡani momo vada o noho, reana bo lalomu Dirava ena hahemaoro daladia, ena lalokau bona mauri idavalaina boubouna ai diba matamatadia  na basio davarimu. To ita na hanaihanai ini topik ai diba matamatadia baita davarimu. So, dahaka ba kara? Iseda pablikeisin baita duahidia bona baita stadilaidia. Bema Baibul sirina ta na so lalopararalaiamu, ba hetahulaia. Bona o diba ḡaudia na una dina ai ba lalodia dobu. Heḡereḡere, Iehova, ia Natuna bona ita daidai e hahedinaraia lalokauna ai o diba ḡaudia ba lalodia dobu.—Salamo 119:97 ba duahia.

15. Dahaka dainai baita hekwarahi Baibul amo diba matamatadia baita abi?

¹⁵ Bema Baibul o duahiamu bona research o karamu lalonai, ḡau matamatana ta so dibaiamu, basio hesiku. Mani gold e tahumu tauna ta a laloa. Ia na mai haheaukana ida hora momo eiava dina momo gold e tahumu. Gold na dava bada ḡauna dainai ia na se hesikumu, to mai haheaukana ida e hetahumu ela bona e davariamu. Baibul amo ta dibaia ḡauna ese gold na e hereaia. (Sal. 119:127; Her. 8:10) So hanaihanai Baibul ba duahia bona diba matamatadia bavabi totona research ba kara.—Sal. 1:2.

16. Edena dala ai Iehova bona Iesu baita tohotohodia?

¹⁶ Baibul o stadilaiamu neganai, o dibamu ḡaudia na emu mauri ai ba badinadia dalana ba laloa. Heḡereḡere, Iehova ena hahemaoro daladia ba tohotohodia bona taunimanima iboudiai ba kara namo henidia. Iesu ese Tamana bona ma haida e lalokau henidia dalana baita tohotohoa totona mai kudouda idoinai ida Iehova ladana dainai ena ura baita karaia bona nega namodia eiava nega dikadia ai ma haida baita durudia. Danu, Iesu baita tohotohoa dalana ma ta na ma haida baita haroro henidia, unu amo idia danu Iehova ese idia daidiai e kara ḡaudia bae diba bona mauri idavalaina boubouna bae abidadama henia.

17. Atikol gabena ai dahaka baita herevalaimu?

¹⁷ Bema mauri idavalaina boubouna baita lalopararalaia namonamomu bona baita laloa badamu, eda lalokau Iehova bona Natuna enai be bada hereamu. Unu baita kara tomamu neganai, idia danu edia lalokau ita edai na be bada hereamu. (Ioa. 14:21; Iak. 4:8) Una dainai eda orea ese e halasimu ḡaudia baita ḡaukaralaidia namonamo, unu amo eda diba baita habadaia mauri idavalaina boubouna ai. Atikol gabena ai, ita ese mauri idavalaina boubouna amo baita abimu hahenamodia haida baita herevalaimu bona Iehova ena lalokau dainai eda tenkiu karana baita hahedinaraia dalana baita herevalaiamu.