1. Iehova ese headava e hamatamaia badina be dahaka?

 IEHOVA na “moale Diravana” bona ia na e uramu ita danu baita moale. (1 Tim. 1:​11, NWT) Ia ese harihari ḡaudia momo e henida unu amo mauri baita moalelaia. (Iak. 1:17) Headava danu Dirava ena harihari ḡauna ta. Mero ta bona kekeni ta e headavamu neganai, idia na e gwauhamatamu bae helalokau heheni bona bae hemataurai heheni. Edia lalokau karana be goadamu neganai, idia na be moalemu.—Her. 5:18.

2. Headava momo lalodiai dahaka e varamu?

² Hari ina negai, headava taudia momo ese edia headava gwauhamatana na asie laloa badamu. Una dainai idia na asie moalemu. World Health Organization ena ripot ta amo e hahedinaraia, tatau momo ese adavadia na e dadabadiamu, e gwau dika henidiamu bona e hahisidiamu. Tatau haida be taunimanima vairadiai adavadia e kara namo henidiamu, to ruma ai be lasi. Danu tatau momo na ponografi laulaudia e itamu dainai, hahine na e mamiamu adavana ese na se lalokau heniamu bona se moalemu.

3. Dahaka dainai tatau haida na adavadia e hahisidiamu?

³ Dahaka dainai tatau haida na adavadia e hahisidiamu? Reana idia haida na maraḡidia ai, tamadia ese sinadia na e kara auka henidiava dainai e laloamu una kara na maoro. Haida be edia kastom daidiai unu e kara tomamu. Idia na e laloamu tau korikori ena kara na hahine baine kara auka henia, unu amo hahine na baine diba tau na bos. Tatau haida be maraḡidia ai edia hemami bae biagua daladia na se hadibadia. A tatau haida na ponografi laulau e ita momomu dainai, hahine bona mahuta hebou karana ai lalohadai kereredia e abimu. Ripot momo ese e hahedinaraia COVID-19 pandemic ai, hekwakwanai unu  bamodia na e bada. To, dia namo tatau na bae lalo unu badi daidiai adavadia bae kara auka henidia na maoro.

4. Kristen tataudia ese edena lalohadai kererena bae dadaraia, bona dahaka dainai?

⁴ Kristen tatau na tanobada ese hahine e lalodiamu dalana na bae dadaraia. a Badina taunimanima ta na e laloamu ḡauna heḡereḡerena karana e karaiamu. Aposetolo Paulo ese Roma ai horoa Kristen taudia e sisiba henidia ‘ina tanobada oromana na basie tohotohoa.’ (Roma 12:​1, 2) Paulo ese Roma kongrigeisin e tore henidia neganai, una kongrigeisin na laḡani haida vada e noho. To, Paulo ena hereva ese e hahedinaraia, idia haida na dounu tanobada ena kastom bona lalohadai ese e biagudiava. Una dainai e sisiba henidia edia lalohadai bona kara bae haidau. Hari una sisiba na dounu mai anina bada Kristen tataudia ediai. Madi, haida na tanobada ena lalohadai ese doini e biagudiamu dainai, adavadia na e hahisidiamu. b Iehova na e uramu tatau ese adavadia be ede bae kara henidia toma? Una henanadai haerena na ina atikol ena siri badana ai baita davariamu.

5. Petro Ginigunana 3:7 heḡereḡerena, tatau ese adavadia be ede bae kara henidia toma?

⁵ Petro Ginigunana 3:7 ba duahia. Iehova ese tatau na e haḡanidiamu adavadia na bae matauraidia. Unu e kara tomamu tauna ese adavana na be kara namo heniamu bona be lalokau heniamu. Ina atikol ai baita itaiamu edena dala ai tau ese adavana baine matauraia. To, mani tatau ese adavadia basie kara henidia karadia haida aita herevalai guna.

ADAVAMU IHAHISINA KARADIA BA DADARAI

6. Tatau ese adavadia e dadabadiamu neganai, Iehova ena hemami be ede bamona? (Kolose 3:19)

⁶ Tau ese adavana na basine dadabaia. Iehova ese daḡedaḡe taudia na e inai henidiamu. (Sal. 11:5) Una dainai tatau ese adavadia e dadabadiamu neganai, Iehova na se moalemu. (Mal. 2:16; Kolose 3:19 ba duahia.) Iseda siri badana, 1 Petro 3:7 ena hereva heḡereḡerena, bema tatau ese adavadia basie kara namo henidiamu, edia hetura karana Iehova ida na be hadikaiamu. Iehova ese edia ḡuriḡuri danu basine kamonaimu.

7. Efeso 4:​31, 32 heḡereḡerena, tatau ese adavadia e hereva henidiamu neganai, dahaka basie kara be namo? (“Hereva Anina” danu ba itaia.)

⁷ Tau ese adavana na basine lolo henia eiava basine gwau dika henia. Tatau haida na mai badudia ida adavadia e hereva henidiamu bona e gwauraimu herevadia amo e hahisidiamu. To Iehova ese “badu, heloḡo-heloḡo, [bona] hereva mirodia” c na e inai henimu. (Efeso 4:​31, 32 ba duahidia.) Iehova ese ita ta gwauraimu herevadia iboudiai na e kamonaimu. Tau ese pablik ai eiava ruma ai adavana e hereva heniamu dalana na Iehova ese e laloa badamu. Bema tau ese adavana e hereva henia aukamu, una ese dia edia headava mo e hadikaiamu, to ena hetura karana Dirava ida danu e hadikaiamu.—Iak. 1:26.

8. Iehova ese ponografi be ede e laloa tomamu, bona dahaka dainai?

⁸ Tatau ese ponografi laulaudia na basie ita. Iehova ese ponografi be ede e laloa tomamu? Ia ese e inai heniamu. Una dainai bema tau ta ese laulau dikadia be itamu, ena hetura karana Iehova ida na be hadikaiamu bona  adavana danu basine matauraiamu. d Iehova na e uramu tau na mai kudouna ibounai ida adavana baine lalokau henia. Adavana e lalokau heniamu tauna na hahine ma ta ida basine heuda hanaimu. Bona una ikarana lalohadaina danu basine abiamu. Iesu na e gwa, bema “tau ta ese hahine ta baine raraia ela bona baine ḡahusia, ia lalona ai vada e heuda hanai vaitani.” e—Mat. 5:​28, 29.

9. Dahaka dainai Iehova na se moalemu bema tau ese adavana e doriamu matabodaḡa karadia bae kara?

⁹ Mahuta hebou lalonai tau ese adavana na basine doria matabodaḡa karadia bae kara. Tatau haida ese adavadia e doridiamu matabodaḡa karadia bae kara, una ese adavadia lalodia mamidia na e hadikamu. Iehova ese kara unu bamodia na e inai henimu. Ia na e uramu tatau ese adavadia bae lalokau henidia bona edia hemami bae mataurai. (Efe. 5:​28, 29) Bema Kristen tauna ta na adavana e doriamu matabodaḡa karadia bae kara, adavana e dadabaiamu, eiava ponografi laulaudia e itamu be ede bamona? Ia ese ena kara bona lalohadai be ede baine haidau toma?

TAU ESE ENA KARA BAINE HAIDAU DALADIA

10. Tatau be Iesu ena haheitalai amo dahaka e dibamu?

¹⁰ Dahaka ese tau baine durua adavana baine kara namo henia bona baine matauraia? Namona na baine hekwarahi Iesu baine tohotohoa. Ena be Iesu na se headava, to iena hahediba taudia e kara henidiava dalana amo, tatau ese adavadia bae kara henidia dalana be dibaiamu. (Efe. 5:25) Mani Iesu ese ena aposetolo e kara henidia bona e hereva henidia dalana aita herevalaia.

11. Iesu ese ena aposetolo be ede e kara henidia toma?

¹¹ Iesu ese ena aposetolo na e kara namo henidiava bona e matauraidiava. Ia ese idia na se hereva auka henidiava. Ena be Iesu na idia edia Lohiabada bona Biagudia, to ia ese ena siahu na se ḡaukaralaiava idia baine biagudia auka bona baine hagaridia. Ia na mai manauna ida idia isiaidia e lao heniva. (Ioa. 13:​12-17) Ia ese ena aposetolo taudia e hamaorodia: “Lau dekegu ai ba hahediba, badina be lau na manada bona lalo-manau taugu.” (Mat. 11:​28-30) Una siri ese e hahedinaraiamu Iesu na manau tauna. Manau tauna na dia manoka, to lalona na goada dainai baine haheauka diba. Ta ese e habaduamu neganai, ena hemami na e biaguamu.

12. Iesu ese haida be ede e hereva henidia tomava?

¹² Iesu ese e ḡaukaralaiva herevadia ese taunimanima na e hagoadadiava. Ia ese ena hahediba taudia na se hereva henidia aukava. (Luka 8:​47, 48) Ena be e inai heniava taudia ese e ere dika henia bona e urava lalona bae hahisia, to Iesu ese edia dika davana na se halou. (1 Pet. 2:​21-23) Bona nega haida Iesu na hereva ta se gwauraiava. (Mat. 27:​12-14) Momokani, Iesu na haheitalai hereadaena Kristen tatau ediai!

13. Mataio 19:​4-6 heḡereḡerena, edena dala ai tau na “adavana enai baine tao”? (Laulau danu ba itaia.)

¹³ Iesu ese tatau na e haḡanidia hanaihanai adavadia bae badinadia. Ia ese Tamana ena hereva e gwauraia lou, eto, tau na “adavana enai baine tao.” (Mataio 19:​4-6 ba duahidia.) Una siri ai Greek herevana amo e hahanaia herevana “baine tao” anina na “baine hekamo tarikatarika.” Una dainai, headava lalonai tau bona hahine edia lalokau karana baine goada na namo, idia na vaitani ta ta enai e hekamo tarikatarikamu. Bema idia ta ese ḡau kererena ta be karaiamu, idia raruosi be hisihisimu. Adavana e lalokau henia badamu tauna ese ponografi laulaudia bona ḡau unu bamodia  iboudiai be dadaraimu. Ia na haraḡa herea ‘ḡau asi anidia basine haḡeremu.’ (Sal. 119:37) Iobu heḡereḡerena, ia na lalona e hadaiamu, heḡahusi dalanai hahine ta basine raraia.—Iobu 31:1.

14. Adavana e hahisiamu tauna be dahaka baine kara ena hetura karana Iehova bona adavana ida baine hanamoa?

¹⁴ Bema tau ta na ena hereva bona kara amo adavana e hahisiamu, namona na ḡau haida baine kara ena hetura karana Iehova bona adavana ida baine hanamoa. Baine kara ḡaudia haida bini: (1) Baine laloparara ia na mai ena hekwakwanai badana ta. Iehova matanai ḡau ta na dia hehuni. (Sal. 44:21; Koh. 12:14; Heb. 4:13) (2) Adavana ihahisina karana baine hadokoa bona ena kara baine haidau. (Her. 28:13) (3) Adavana bona Iehova baine sori henidia bona baine noidia ena dika bae gwautao. (Apos. 3:19) Ia ese Iehova baine noia ena mauri baine haidaua urana na lalona ai baine havaraia bona baine durua ena lalohadai, hereva, bona kara baine biagudia totona. (Sal. 51:​10-12; 2 Kor. 10:5; Fili. 2:13) (4) Namona na ena ḡuriḡuri heḡereḡerena baine kara. Unu baine kara toma totona daḡedaḡe karadia iboudiai bona hahehisi herevadia baine inai henidia. (Sal. 97:10) (5) Elda edia amo heduru baine abi. (Iak. 5:​14-16) (6) Plen ta baine karaia bona una plen lalonai baine dadarai ḡaudia iboudiai baine toredia tao, una ese baine durua kara kereredia na ma basine kara lou. Ponografi laulaudia e itamu tauna danu ini dala 6 baine badinadia. Iehova ese ia na be duruamu ena mauri baine haidaua. (Sal. 37:5) Tau ese adavana ihahisina karadia baine hadoko. To danu namona na baine matauraia. Unu baine kara toma daladia be dahaka?

ADAVAMU BA MATAURAIA DALADIA

15. Edena dala ai tau ese baine hahedinaraia adavana na e lalokau heniamu?

¹⁵ Lalokau ba hahedinaraia. Edia headava e moalelaiamu tadikakadia na dina ta ta edia kara amo e hahedinaraiamu adavadia na e lalokau henidiamu. (1 Ioa. 3:18) Tau ese dala maraḡidia ai ena lalokau adavana enai baine hahedinaraia diba, heḡereḡere Baibul ese e  hahedinaraiamu tatau haida ese adavadia e harahudiava bona e rosidiava. Tau ese adavana baine hamaoroa, “Na lalokau henimumu” eiava “Oi o kara ḡaudia na na lalodia badamu.” Danu nega ta ta teks meseij baine siai henia, eiava adavana ena kadi ta baine torea, unu amo baine hahedinaraia ia ese adavana na e lalokau heniamu. Bema tau na unu be kara tomamu, adavana na be matauraiamu bona edia headava na be goadamu.

16. Dahaka dainai tau ese adavana baine hanamoa?

¹⁶ Hahenamo herevadia ba gwaurai. Adavana e matauraiamu tauna ese adavana na e hagoadaiamu. Dala ta na adavana baine tenkiu henia badina e karamu ḡaudia amo ia e duruamu. (Kol. 3:15) Ia na mai momokanina ida adavana be hanamoamu neganai, adavana kudouna be hamoaleamu. Danu adavana e lalokau heniamu badidia be hamaorolaiamu neganai, hahine na be mamiamu adavana ese ia na e lalokau heniamu, bona e matauraiamu.—Her. 31:28.

17. Edena dala ai tau ese baine hahedinaraia adavana na e matauraiamu?

¹⁷ Hebogahisi bona hemataurai karadia ba hahedinarai. Adavana e lalokau heniamu tauna ese adavana na e laloa badamu. Ia na mai dibana adavana na Iehova ena harihari ḡauna namo hereana ta. (Her. 18:22; 31:10) Una dainai ruma ai eiava sibodia e nohomu negadiai mai ena hebogahisi bona hemataurai ida adavana baine kara henia. Idia e mahuta heboumu neganai, namona na tau ese adavana basine doria ia se uramu karana ta baine karaia, unu amo ena hemami eiava lalona mamina basine hadikaia. f Tau danu baine hekwarahi Iehova matanai lalona mamina baine hadikaia karana ta basine karaia.—Apos. 24:16.

18. Tatau be lalodia bae hadai dahaka bae kara? (Maua danu ba itaia, “ Tatau ese Adavadia Bae Matauraidia Daladia Hani.”)

¹⁸ Tatau e, Iehova na e moalemu badina e itaiamu umui na o hekwarahimu emui hereva bona kara amo adavamui o matauraidiamu. Una dainai adavamui ba matauraidia totona hahine ihahisidia karadia na ba hadoko, ba bogadia hisi, ba matauraidia, bona ba lalokau henidia. Unu bo kara tomamu neganai bo hahedinaraiamu ia na o lalokau heniamu bona o laloa badamu. Adavamu bo matauraiamu neganai emu hetura karana Iehova ida na bo gimaiamu.—Sal. 25:14.