1, 2. Dahaka dainai e lalohisihisimu taudia ihagoadadia daladia baita herevalai na namo? (Rau 12 ai laulau ba itaia.)

SUSI na eto: “Natumai merona e mase bona kahirakahira laḡani ta vada e ore, ai na doini a lalohisihisimu.” Kristen tauna ma ta na adavana e mase neganai, e gwa, ‘Na mamia hisihisina baina gwauraia hedinarai na auka.’ Madi, momo ediai danu una na e varamu. Kristen kongrigeisen ai momo na e laloamu edia lalokau taudia na basie masemu to Aramagedono bae itaia. Reana emu lalokau tauna ta e mase eiava mai dibamu ta na e lalohisihisimu dainai, reana bo henanadaimu, ‘E lalohisihisimu taudia be edena dalai heduru bae abi diba?’

² Reana o kamonaimu haida na e gwaumu nega be laomu lalonai lalohisihisi na be oremu. To, una be momokani, a? Vabu ta na e gwa: “Na laloamu ta ese ena nega baine ḡaukaralaia karana amo ma ta baine durua diba.” Oibe, toto ta e namo e laomu heḡereḡerena, bema e lalohisihisimu tauna baita duruamu, ena lalohisihisi na taina ruana be ore be laomu. Dahaka ese lalohisihisi taudia baine durudia diba bae haheauka totona?

3, 4. Dahaka dainai ta dibamu Iehova ese lalohisihisi taudia edia hemami na e lalopararalaiamu?

³ Ta dibamu Iehova, Tama hebogahisina, na tauhalo e henimu Diravana. (2 Korinto 1:3, 4 ba duahi.) Hebogahisi karana e hahedinaraia Diravana, Iehova, ese ena taunimanima na ini e hagoadadia toma: “Lau binai taumui ihalodia tauna.”​—Isa. 51:12; Sal. 119:50, 52, 76.

⁴ Eda hebogahisi Diravana ese e lalokau henidiamu taudia haida na e mase, heḡereḡere Abraham, Isaak, Iakob, Mose, bona King David. (Num. 12:6-8; Mat. 22:31, 32; Kara 13:22) Baibul ese e hadibadamu Iehova na e ura dikadikamu mase taudia baine hamauridia lou bona ia na una nega e nariamu. (Iobu 14:14, 15) Una negai idia na be moalemu bona basie goreremu. Bona mani a laloa, Dirava Natuna lalokauna​—Dirava ese e ‘moale’ heniamu tauna​—na e hisihisi ela bona e mase. (Her. 8:22, 30) Una negai Iehova ese e mamia hisihisina na ta ese basine gwauraia diba.​—Ioa. 5:20; 10:17.

5, 6. Edena dalai Iehova ese baine hagoadada diba?

⁵ Ta diba momokanimu Iehova ese ita na baine duruda diba. Una dainai ḡuriḡuri amo eda lalometau na Ienai baita gwaurai hedinarai. Ta moalemu badina ta dibamu Iehova ese eda hisihisi na e lalopararalaiamu bona tauhalo baine henida diba. To edena dalai una e karaiamu?

⁶ Dirava ese e durudamu dalana ta na, iena “Lauma Helaḡa” amo tauhalo e henidamu. (Kara 9:31) Dirava ena ḡaukara siahuna na mai goadana ita baine duruda. Iesu na e gwauhamata Tamada guba ai e nohomu ese “lauma helaḡa” na e noiamu taudia baine henidia. (Luka 11:13) Matamanai tame herevalaia hahinena, Susi na e gwa: “Nega momo ai na a tui dihova bona Iehova a noia goadagoadava tauhalo baine henimai totona. Unu negadia ai, Dirava ena maino ese kudoumai bona daramai e gimaia.”​—Filipi 4:6, 7 ba duahi.

7, 8. Dahaka dainai ta dibamu Iesu ese ita na baine hagoadada diba?

⁷ Iehova ena hebogahisi karana na Natuna, Iesu, tanobada ema neganai, ena kara bona hereva amo e hahedinaraia ḡoevaḡoeva. (Ioa. 5:19) Dirava ese Iesu e siaia “dara-doko taudia” bona “taitai taudia iboudiai” baine hagoadadia totona. (Isa. 61:1, 2; Luka 4:17-21) Una dainai, Iesu ese hebogahisi karana e hahedinaraia​—ia ese taunimanima edia hisihisi e lalopararalai bona e ura dikadika baine durudia.​—Heb. 2:17.

⁸ Iesu eregabenai, ena ruma bese taudia bona turana namodia haida na e mase. Reana Iesu eregabenai, ia e ubua tauna, Iosef, na e mase. * Mani a laloa, una nega aukana lalonai Iesu na ia sibona, sinana, tadina bona taihuna edia lalohisihisi danu e haheaukalai.

9. Lasaro e mase neganai Iesu be edena dalai hebogahisi karana e hahedinaraia?

⁹ Iesu ese ena haroro ḡaukara e hamatamaia neganai, ia ese taunimanima edia hisihisi na e lalopararalai bona e bogadia hisi.  Heḡereḡere, turana namona Lasaro e mase neganai e vara ḡauna mani a laloa. Ena be Iesu na mai dibana Lasaro na baine hatorea isi lou, to ia ese Maria bona Mareta edia lalohisihisi danu e mamia. Ia na e hebogahisi dainai e tai.​—Ioa. 11:33-36.

10. Dahaka dainai ta dibamu hari ina negai Iesu na ita e bogada hisimu?

¹⁰ Iesu ena hebogahisi karana ese hari ina negai ita be ede e hagoadada tomamu? Baibul ese e hadibadamu “Iesu Keriso na varani bona harihari dia idau, bona basine idau ela bona hanaihanai.” (Heb. 13:8) “Mauri Biaguna” ese taunimanima edia hisihisi na e lalopararalaimu dainai, “ia na hedibaḡani e mamiamu taudia idurudia mai dibana.” (Kara 3:15; Heb. 2:10, 18) Una dainai, ta diba momokanimu ma haida e hisihisimu neganai, Keriso ese edia hisihisi na e lalopararalaimu, bona nega maorona ai tauhalo baine henidia.​—Heberu 4:15, 16 ba duahi.

11. Edena siri be oi e hagoadamumu?

¹¹ Lasaro e mase neganai Iesu ese e mamia hisihisina na Baibul lalonai e herevalaia tauhalo sivaraina ta. Una na momokani badina “e tore guna ḡaudia na ita ihadibalaida totona e tore, bena Buka Helaḡa ese haheauka bona tauhalo bae havara, ela bona helaro baita davaria.” (Roma 15:4) Bema oi na o lalohisihisimu, be hagoadamumu siri namodia haida bini:

• “Iehova na lalo-hisihisi taudia dekedekediai; dara-doko taudia ia ese e hamauridiamu.”​—Sal. 34:18, 19.

• “Lalogu e hekwarahi momomu negadia ai, [Iehova] emu tauhalo ese laumagu e hamoaleamu.”​—Sal. 94:19.

• “Eda Lohiabada Iesu Keriso bona Tamada Dirava, e lalokau henidamu bona ena harihari-bada ai mia-hanaihanai tauhalona bona helaro-namona vada e henida Diravana, ese lalomui bae hakeru, bona . . . bae hagoadamui.”​—2 Tes. 2:16, 17. *

12. Haida baita hagoadadia dalana badana ta be dahaka?

¹² Kristen kongrigeisen ese danu e lalohisihisimu taudia bae hagoadadia diba. (1 Tesalonika 5:11 ba duahia.) Edena dalai “lalo-metau” taudia ba hagoadadia diba? (Her. 17:22) Ba helalotao “asi reḡereḡeda baita noho na mai negana,” bona “baita herevahereva na mai negana.” (Koh. 3:7) Vabu ta ladana Dalene na e gwa: “E lalohisihisimu taudia ese edia lalohadai bona hemami bae gwaurai hedinarai na namo. Una dainai, idia e herevamu neganai ḡau badana na ba kamonai mo​—bona edia hereva na basio utu.” Junia, taihuna merona na sibona e hemata, na e gwa: “Ena be edia lalohisihisi na basio lalopararalaiamu, to ḡau badana na o uramu edia hemami ba lalopararalaia.”

13. Lalohisihisi karana ai dahaka baita laloatao na namo?

¹³ Danu ba helalotao, taunimanima ese edia lalohisihisi na dala idauidau ai e hahedinaraimu. Nega haida, ta ese lalonai e mamiamu hisihisina baine gwauraia hedinarai na auka. Dirava ena Hereva na e gwaumu: “Lalo sibona ese idita mamina e dibaiamu, bona idau tauna ta na ia ida basie moale hebou.” (Her. 14:10) Ena be ta na ena hemami  be gwauraia hedinaraimu, to reana ma haida ese ena hereva be lalopararalaiamu na auka.

14. Lalohisihisi tauna be edena dalai baita hagoadaia diba?

¹⁴ Nega haida ita na asi dibada dahaka hereva baita gwaurai lalohisihisi taudia ihagoadadia totona. To, Baibul na e gwaumu “aonega tauna malana ese hahemauri e mailaiamu.” (Her. 12:18) Momo na ina buklet, Oiemu Lalokau Tauna ta Ia Mase Neganai, e ḡaukaralaiamu ma haida bae hagoadadia totona. * To, nega momo heduru ba heni dalana ta na “e taitaimu taudia ida ba tai.” (Roma 12:15) Gaby, adavana na e mase, na e gwa: “Nega haida egu tai amo egu hemami na hahedinaraiava. Una dainai turagu na lau ida e taiva neganai una ese lau na e hagoadaguva. Una negai, na mamiava haida ese danu egu hisihisi na e mamiava.”

15. Bema ta ihagoadana herevadia baita gwaurai na auka, dahaka baita kara diba? (“Hahegoada Hereva Namodia” mauana danu ba itaia.)

¹⁵ Bema hahegoada herevadia ba gwaurai na auka, dala namona ta na reana kadi ta, e-mail, teks meseij, eiava revareva ta ai emu hahegoada herevadia ba tore bena ba siai diba. Reana hahegoada sirina ta, eiava e mase tauna ena kara namona ta, eiava ia ida o kara hebouva ḡauna ta ba herevalaia diba. Junia na e gwa: “Hahegoada hereva kwadoḡina ta na abiamu eiava Kristen tadikaka taihu ese e boirigumu baia hebamo karana ese lau na e durugumu. Unu amo na hemamimu idia ese lau na e lalokau henigumu bona e lalogu badamu.”

16. Ta baita hagoadaia dalana namona ta be dahaka?

 ¹⁶ Eda ḡuriḡuri karana ese danu e lalohisihisimu tadikakadia bona taihudia na be durudiamu. Ena be ḡuriḡuri bo gwauraiamu na auka badina tai mamina bo abiamu, to mai kudoumu idoinai ida bo gwauraiamu ḡuriḡurina ese lalohisihisi tauna na be hagoadaia dibamu. Dalene na e gwa: “Nega haida taihu haida na lau ihagoadagu totona e maiva neganai, na noidiava bema namo ḡuriḡuri ta bae gwauraia. E ḡuriḡuri matamava neganai, nega momo na auka bae hereva totona, to hereva haida e gwauraiva muridiai, lalodia na e goadava bena edia ḡuriḡuri e haḡuḡuruva. Edia abidadama goadana, edia lalokau, bona e lalogu badava karana ese egu abidadama na e hagoadaia.”

17-19. Dahaka dainai hanaihanai ma haida baita hagoadadia na namo?

¹⁷ Taunimanima edia lalohisihisi hetoadia na idauidau. Vaia, lalokau tauna ta e masemu neganai varavara bona bamo momo ese tauhalo e henimu, to mase e guriamu murinai momo na e loumu edia ruma, nega unu bamodiai e lalohisihisimu tauna na dounu baita hagoadaia na namo. “Tau ta turana ese nega iboudiai e lalokau heniamu; bona tadikakana ena lalokau na dika negana ai e hedinaraimu.” (Her. 17:17) Kristen tadikaka bona taihu ese lalohisihisi tauna na dounu bae hagoadaia ela bona lalona baine goada momokani.​—1 Tesalonika 3:7 ba duahia.

¹⁸ Ba helalotao, ḡau haida ese e lalohisihisimu taudia na be hahelalodiamu, reana edia headava dinana be laloamu, mase tauna ese e ura heniava miusik ta be kamonaimu, laulau haida be itamu, idia ida e kara hebouva ḡaukaradia haida be lalomu, ḡau haida bonadia eiava reḡe haida be lalo loumu. Vabu eiava doḡae na nega ginigunana ḡau ta sibona be karaiamu, heḡereḡere sibona hebouhebou ta eiava Memorial be laomu neganai, be lalohisihisimu. Tadikaka ta na e gwa: “Adavagu e mase neganai na laloava emai headava dinana ilalotaona negana ai ba lalohisihisi badamu. To tadikaka bona taihu haida ese turagu namodia haida e boiridia bona idia ida a moale hebou.”

¹⁹ To ba helalotao, lalohisihisi taudia na nega iboudiai baita hagoadadia, dia spesol negadia ai mo. Junia na e gwa: “Nega ma haida ai lalohisihisi taudia baita durudiamu bona baita bamodiamu ese namo bada baine havaraia diba. Unu na mai anidia bada bona ta baine hagoadaia.” Vaia, ta ena lalokau tauna e masemu neganai e mamiamu lalohisihisina na basita haorea dibamu, to kara haida baita kara diba una lalohisihisi tauna baita hagoadaia totona. (1 Ioa. 3:18) Gaby na e gwa: “Iehova na tenkiu heniamu badina egu lalohisihisi negana lalonai elda taudia na mai lalokaudia ida lau e durugu. Edia kara amo Iehova ena lalokau na mamia momokani.”

20. Dahaka dainai Iehova ena gwauhamata ese ita e hagoadadamu?

²⁰ Ta moalemu badina tauhalo Diravana, Iehova, ese lalohisihisi e havaramu ḡaudia iboudiai na be haoredia vaitanimu, una negai “gara ai e nohomu taudia iboudiai ese [Keriso] gadona bae kamonaia; bena bae raka lasi.” (Ioa. 5:28, 29) Dirava na e gwauhamata “ia ese mase baine ha-orea ela bona hanaihanai; Ḡaubada Iehova ese irurumata na vaira iboudiai amo baine dahu oho.” (Isa. 25:8) Bena tanobada taudia iboudiai na ‘e taitaimu taudia ida basie tai,’ to ‘e moalemu taudia ida bae moale.’​—Roma 12:15.