1. Dahaka dainai Iehova ese ḡau iboudiai e biagumu na maoro? (Rau 22 ai laulau ba itaia.)

ḠAU iboudiai na Iehova ena! Ia na “guba biaguna bona atai gabudia lohiana; tanobada na iena, bona tanobada anina idoinai danu iena.” (Deu. 10:14; Apok. 4:11) Ita na Iehova ese e karada dainai, ita na iena. (Sal. 100:3) To, idaunega amo ema bona hari, Dirava ese dala hereadaena ta amo taunimanima haida e abidia hidi iena orea ai baela.

2. Baibul ai daidia be dala hereadaena ta ai Iehova ena bese ai ela?

² Heḡereḡere, Salamo 135 ese idaunega Israel ai mai edia abidadama ida Iehova e tomadiho heniava taudia na e gwauraidia “iena korikori.” (Sal. 135:4) Danu, Hosea bukana na e peroveta idau bese taudia haida na Iehova ena bese ai baela. (Hos. 2:23) Iehova ese Idau Bese taudia e abidia hidi Keriso ida bae lohia neganai, Hosea ena peroveta herevana na e ḡuḡuru. (Kara 10:45; Roma 9:23-26) Dala hereadaena ta ai ina ‘bese helaḡana’ na Iehova ena “orea,” idia na lauma helaḡa amo e horodia bona guba maurina bae abia. (1 Pet. 2:9, 10) To, hari ina negai abidadama Kristen taudia momo, tanobada helarona bae abia taudia, be ede bamona? Iehova ese idia danu e gwauraidia ena “bese taudia” bona ena “abi-hidi taudia.”​—Isa. 65:22.

3. (a) Hari ina negai daidia be Iehova turana ai ela? (b) Ina atikol ai dahaka baita herevalaimu?

 ³ Hari ina negai, “seri maraḡi,” guba helarona bae abia taudia, bona “mamoe idaudia,” tanobada helarona bae abia taudia, na e haboudia ‘seri tamona’ bona Iehova ese e gwauraidia ena bese. (Luka 12:32; Ioa. 10:16) Ta uramu Iehova enai eda tenkiu karana baita hahedinaraia, badina dala e kehoa ia turana namona ai baitala totona. Ina atikol ese be hahedinaraiamu ededia dala idauidau ai Iehova baita tenkiu henia badina turana ai e halaoda.

4. Edena dala ta amo Iehova baita tenkiu badina turana ai e halaoda, bona edena dala ai Iesu na unu e kara toma?

⁴ Iehova baita tenkiu henia dalana ta na, mai kudouda idoinai ida eda mauri na Ienai baita gwauhamatalaia. Ranu bapatisona amo, taunimanima vairadiai ta hahedinaraia ita na Iehova ena bona mai eda ura ida ia baita badinaia. (Heb. 12:9) Iesu e bapatiso neganai unu e kara toma, vaitani Iehova e hamaoroa: “Egu Dirava e, oiemu ura ikarana na moalelaiamu.” (Sal. 40:7, 8) Iesu na sibona e heni Iehova ena ura baine karaia, ena be ia na Dirava ena gwauhamata besena ai e vara.

5, 6. (a) Iesu e bapatiso neganai, Iehova ena hemami be ede bamona? (b) Haheitalai ta amo ba hahedinaraia dahaka dainai Iehova ese eda gwauhamata na e laloa badamu.

⁵ Iesu e bapatiso neganai, Iehova ena hemami be ede bamona? Baibul na eto: “Iesu e bapatisoa; bena ranu amo e dae kau negana ai na guba e parara, bena ia ese Dirava ena Lauma e itaia, pune na heto e diho, ia tubuana ai e kau. Bona gado ta guba amo e boi dobi, eto, Lau Natugu binai, egu lalokau; lau ese ia na lalo namo heniamu.” (Mat. 3:16, 17) Ena be Iesu na vada Iehova ena, to Iehova na e moale badina e itaia Natuna na mai ena ura ida Ia e badinaia. Iehova ese eda mauri ta gwauhamatalaia karana danu e moalelaiamu, bona baine hanamoda.​—Sal. 149:4.

⁶ Mani ina haheitalai aita laloa, tau ta na ena uma ai flaoa mai hairaidia momo e hado. Dina ta, natuna kekenina na una flaoa ta e abia bona tamana e henia ena harihari ḡauna. Unu flaoa na una tau ena, ani? Edena dala ai ia ese e biagua ḡauna na natuna ese baine henia diba? Tama lalokauna ta ese unu henanadai na basine lalodiamu. To, mai moalena ida una harihari ḡauna be abia daemu badina una na natuna ena lalokau karana ienai. Ia na ena uma flaoadia iboudiai amo natuna ese e henia flaoa tamona na be laloa badamu. Mai eda ura ida eda mauri na Iehova enai ta gwauhamatalaiamu neganai, ia na e moalemu.​—Eso. 34:14.

7. Edena dala ai Malaki ese Iehova ena hemami iena taunimanima ediai e hahedinaraia?

⁷ Malaki 3:16 ba duahia. Bema do so gwauhamata bona so bapatiso, una abi hidi ba karaia ena namo ba laloa. Momokani, o vara matama negana amo, oi na Iehova ena. To, mani a laloa, Iehova na be moale dikadikamu bema ena lohia dalana bo abia daemu, bona emu mauri ienai bo gwauhamatalaiamu bona ena ura bo karaiamu. (Her. 23:15) Iehova na mai dibana daidia be mai edia ura ida ia e hesiai heniamu, bona ladadia na “ilalo-taodia bukana” ai e toremu.

8, 9. Iehova na e uramu ena ‘helalotao bukana’ ai ladadia e hetore taudia be dahaka bae kara?

⁸ Iehova ese ladada na ena ‘helalotao bukana’ ai baine torea totona, ḡau haida baita kara na namo. Malaki na eto, ‘Iehova garina baita gari bona ia ladana  baita helalolaia’ na namo. Ḡau ta eiava taunimanima ta baita tomadiho henia neganai, Iehova ese ladada na mauri bukana amo baine kokia.​—Eso. 32:33; Sal. 69:28.

⁹ Una dainai, Iehova ta gwauhamata henia anina na ena ura baita karaia bona ranu bapatisona baita abia, to dia una mo. Badina una na nega tamona ta karaia ḡauna. Ita na Iehova ena bese dainai, eda mauri lalonai ia ibadinana karana na hanaihanai baita hahedinaraia.​—1 Pet. 4:1, 2.

10. Iehova e hesiai heniamu bona asie hesiai heniamu taudia edia idau be dahaka?

¹⁰ Atikol ginigunana ai Kain, Solomon, bona Israel taudia ta herevalaidia. Idia na e gwauva Iehova e tomadiho heniava, to edia kara amo Ia na asie badinaia. Unu sivarai ese e hahedinaraia ḡoevaḡoeva, Iehova e badinaiamu taudia ese kara maoromaoro bae badinaia goadagoada bona kara dika bae inai henidia na namo. (Roma 12:9) Malaki ese “ilalo-taodia bukana” e herevalaia murinai, Iehova ese ina hereva e gwauraia: “Kara namo taudia bona kara dika taudia ma ba hididia lou, Dirava isiaina e lao heniamu tauna bona isiaina se lao heniamu tauna danu ba hididia.”​—Mal. 3:18.

11. Dahaka dainai ma haida ese bae itada ita na Iehova sibona ta tomadiho heniamu?

¹¹ Iehova ese ena bese ai e halaoda dainai, eda tenkiu karana baita hahedinaraia dalana ma ta bina: “Taunimanima iboudiai” ese eda goada lauma dalana ai bae itaia na namo. (1 Tim. 4:15; Mat. 5:16) Sibomu ba henanadai: ‘Ma haida ese lau e itagumu Iehova na badinaia momokanimu, eiava? Dala idauidau ai na hahedinaraiamu lau be Iehova ena Witnes tauna ta, a?’ Iehova na be lalohisihisimu bema ita na ena bese ai e halaoda murinai, basita uramu ma haida baita hadibadia ita na Iena.​—Sal. 119:46; Mareko 8:38 ba duahia.

12, 13. Edena dala ai haida na asie hahedinaraiamu idia na Iehova ena Witnes taudia?

¹² Haida na “tanobada laumana” eiava ena lalohadai e badinaiamu dainai, Dirava e hesiai heniamu bona se hesiai heniamu taudia edia idau na se lalopararalaiamu. (1 Kor. 2:12) Una lalohadai  ese taunimanima e veridiamu “tau-anina ena ura” bae laloa bada. (Efe. 2:3) Heḡereḡere, ena be heḡoeva daladia ai heduru herevadia ta abimu, to haida na dounu dia hemataurai dabuadia e hahedokilaimu. Idia ese dabua hekahi-hekahidia bona tauanidia kahadia e hahedinaraimu dabuadia e hahedokilaimu, Kristen heboudia ai danu. Eiava tanobada taudia huidia e sitaelomu daladia e tohotohomu. (1 Tim. 2:9, 10) Una dainai, taunimanima bogaraḡidiai e nohomu neganai, ma haida na asi dibadia daika be Iehova ena bona daika be “tanobada e hetura heniamu tauna.”​—Iak. 4:4.

¹³ Dala ma haida ai, Witnes taudia haida ese tanobada ena kara na se dadaraimu. Pati gabudia ai edia mavaru daladia bona kara na dia Kristen taudia ese bae kara ḡaudia. Idia ese sibodia laulaudia bona hereva haida na Intanet ai e atomu, una ese e hahedinaraimu idia na tanobada ena lalohadai e badinaiamu. Ena be idia na Kristen kongrigeisen ai kara dika badana ta dainai matahakani na asie abi, to idia ese tadikaka taihu ma haida​—Iehova ena taunimanima bogaraḡidiai kara namodia e uramu bae hahedinarai taudia​—⁠bae hakaudia kerere diba.​—1 Petro 2:11, 12 ba duahi.

14. Eda hetura karana namona Iehova ida baita gimaia totona, dahaka baita kara na mai anina bada?

¹⁴ Ina tanobada ese “tau-anina ena heḡahusi, mata-dika, mauri ena heaḡi kava” e hahedinaraimu. (1 Ioa. 2:16) To, ita na Iehova ena dainai, Baibul ese e haḡanidamu “Dirava idadaraina karadia bona tanobada ena lebulebu karadia baita rakatani, ina tanobada ai baita noho migomigo, baita kara maoromaoro, Dirava baita badinaia.” (Tito 2:12) Namona na eda hereva, aniani bona inuinu, dabua bona heḡoeva daladia, bona eda ḡaukara amo ma haida vairadiai baita hahedinaraia ita na Iehova sibona ta tomadiho heniamu.​—1 Korinto 10:31, 32 ba duahi.

15. Dahaka dainai tadikaka taihu baita bogadia hisimu bona baita lalokau henidiamu?

¹⁵ Tadikakada baita kara henidia dalana amo baita hahedinaraia, eda hetura  karana namona Iehova ida na ta laloa badamu. Idia danu Iehova ena. Bema una baita laloataomu, hanaihanai tadikaka taihu baita bogadia hisimu bona baita lalokau henidiamu. (1 Tes. 5:15) Iesu ese ena hahediba e hamaorodia: “Unu amo taunimanima iboudiai bae diba umui na lauegu hahediba: ba helalokau heheni dainai.”​—Ioa. 13:35.

16. Mose ena Taravatu ai edena haheitalai ese Iehova ena hemami ena taunimanima ediai e hahedinaraia?

¹⁶ Mani ina haheitalai amo kongrigeisen lalonai kara namodia baita hahedinarai daladia haida aita lalo. Iehova ena dubu helaḡa ai e ḡaukaralaiva kohudia na e hahelaḡadia, tomadiho ḡoevana ai bae ḡaukaralai totona. Mose ena Taravatu ai unu kohu bae naridia namonamo daladia e hahedinarai, bona bae hadika taudia na bae hamasedia. (Num. 1:50, 51) Bema Iehova ese ia itomadiho henina ai e ḡaukaralaiva kohudia na e lalodia badava, ia ese ena bese ai e halaodia taudia danu e lalodia badamu! Iehova ese ena taunimanima na ini e herevalaidia toma: ‘Umui e daumui tohomu tauna ese lau matagu nadinadina e daua tohomu.’​—Sek. 2:8.

17. Iehova be dahaka ‘e hakala henimu bona e kamonaimu’?

¹⁷ Malaki na eto, Iehova ese ena taunimanima na “e hakala henidia, bona edia hereva e kamonai.” (Mal. 3:16) Momokani, Iehova na “ena taunimanima iboudiai vada dibana.” (2 Tim. 2:19) Ta karamu ḡaudia bona ta herevalaimu ḡaudia iboudiai na mai dibana. (Heb. 4:13) Tadikakada asita kara namo henidiamu neganai, Iehova ese una na e itaiamu. Danu heabidae karadia, hariharibada, dika igwautaona, bona kara namodia ta hahedinaraimu neganai, Iehova ese unu na e itamu.​—Heb. 13:16; 1 Pet. 4:8, 9.

18. Edena dala ai Iehova enai eda tenkiu karana baita hahedinaraia badina ena bese ai e halaoda?

¹⁸ Ta ura dikadikamu Iehova enai eda tenkiu karana baita hahedinaraia, badina Ia ese ena bese ai e halaoda. Ta dibamu eda mauri Ienai ta gwauhamatalaia karana na abi hidi maorona. Ena be “uru gageva-gagevana mai gwau-edeedena bogaraḡinai” ta nohomu, to ta uramu taunimanima ese bae diba ita na asi eda kerere, “tanobada ena diari na heto.” (Fili. 2:15) Namona na kara dikadia baita dadaraidia vaitani. (Iak. 4:7) Bona tadikakada baita lalokau henidia bona baita matauraidia, badina idia danu Iehova ena.​—Roma 12:10.

19. Edena dala ai Iehova ese ena bese ai e halaodia taudia na e hanamodiamu?

¹⁹ Baibul na e gwauhamata: “Iehova ese ena bese taudia na basine rakatanidia.” (Sal. 94:14) Una gwauhamata heḡereḡerena, herevana dahaka hekwakwanai baita davari to Iehova ese basine rakatanida. Danu mase ese ita na Iehova ena lalokau amo basine bibida oho diba. (Roma 8:38, 39) “Ta maurimu be Lohiabada enai ta maurimu; bona baita mase, Lohiabada enai baita mase. Taunabunai, ta maurimu eiava baita mase, ita na Lohiabada ena.” (Roma 14:8) Momokani, ta uramu Iehova ese turana namodia iboudiai mase amo baine hatoredia isi lou negana baita itaia. (Mat. 22:32) Bona hari ina negai hahenamo momo ta moalelaimu. Baibul ena hereva heḡereḡerena: “Iehova na ena Dirava ai e halaoamu besena be namo; vada e abidia hidi ia dihina ai baela taudia be nanamo.”​—Sal. 33:12.