1. Ita be ta uramu taunimanima ese ede bae laloda toma?

BEMA mai dibamu bona o matauraiamu tauna ta ese ladamu baine laloa boio eiava basine lalomu tao, emu hemami be ede bamona? Reana bo lalohisihisimu. Dahaka dainai? Badina ita ta ta na ta uramu ma haida ese bae abida dae. To dia una mo, ita na ta uramu bae diba ita be taunimanima ede bamodia bona ta karamu ḡaudia bae diba bena bae hanamoda.​—Num. 11:16; Iobu 31:6.

2, 3. Edena dala ai ma haida ese bae laloda bada karana na baita laloa kerere diba? (Rau 7 ai laulau ba itaia.)

² Ita na dia ḡoevadae tauda dainai, baita uramu ma haida ese bae laloda bada bona bae hanamoda. Bona dia dala maorona ai baita uramu bae matauraida. Satana ena tanobada ese taunimanima lalodia e verimu, dagi bona lada bada itahuna karana bae ura heni totona, una dainai Tamada guba ai, Iehova Dirava, asie hanamoamu bona asie tomadiho heniamu.​—Apok. 4:11.

 ³ Iesu ena negai, tomadiho igunalaina taudia haida na e urava ma haida ese bae itadia bona bae hanamodia. Iesu ese ena hahediba e hadibadia: “Itorena taudia nahuadia ba toho: idia na e uramu dabua latadia bae rio, bae loaloa, hoihoi gabudia ai taunimanima ese bae hanamodia bona dubu ai bona anibou ai gabu hereadia ai bae helai.” Ma eto: “Idia na dava metauna do bae abia.” (Luka 20:46, 47) To, Iesu ese vabu ogoḡamina ta e hanamoa​—ia na ena moni maraḡidia e uda neganai ma haida ese bae hanamoa karana na se laloa. (Luka 21:1-4) Iesu ese taunimanima e lalodiava dalana na ma haida edia amo idau. Ina atikol ese be durudamu Iehova Dirava ese e abia daemu lalohadai maorona baita hahedinaraia totona.

4. Toada bae kara bona bae laloda tao dalana namona be dahaka, bona dahaka dainai?

⁴ Toada bae kara bona bae laloda tao dalana namona be dahaka? Una na dia sikuli badana amo ta abia aonegana dainai, eiava dia bisnes, o moale karadia idauidau ai lada bada ta abia dainai taunimanima ese bae laloda bada karana. To, Paulo ese ini e herevalaia toma: “Harihari umui na Dirava dibamui, Dirava danu dibana umui. Matona, tanobada ena ḡaruḡaru herevadia manoka-manokadia bona kavakavadia ma o lou henidiamu, bae dogomui tao lou o tomu a?” (Gal. 4:9) Ḡau Iboudiai e Lohiadiamu Diravana ese toada e karamu bona e laloda taomu na hahenamo hereadaena ta! Ia na e uramu turana namona ai baitala. Diba bada tauna ta na eto, ita na “ia ese e laloda badamu.” Iehova ese turana ai e halaodamu neganai, ta maurimu badina korikori ta dibamu.​—⁠Koh. 12:13, 14.

5. Dahaka baita kara diba Iehova turana ai baitala totona?

⁵ Mose na Iehova turana ta ai ela. Ia ese Iehova e noia ena dala baine hadibalaia namonamo neganai, Iehova na eto: “Emu noinoi heḡereḡerena baina karaia, badina be lau ese na lalonamo henimumu, bona ladamu be dibagu.” (Eso. 33:12-17) Ita danu Iehova ese e dibadamu neganai, hahenamo namodia momo baita abi dibamu. To, dahaka baita kara diba Iehova turana ai baitala totona? Namona na baita lalokau henia bona eda mauri na ienai baita gwauhamatalaia.​—1 Korinto 8:3 ba duahia.

6, 7. Dahaka ese eda hetura karana Iehova ida baine hadikaia diba?

⁶ To, eda hetura karana namona Iehova ida baita hagoadaia na namo. Paulo ese e tore henidia Galatia Kristen taudia heḡereḡeredia, namona na ita ese ina tanobada ena “ḡaruḡaru herevadia manoka-manokadia bona kavakavadia,” bona ma haida ese bae hanamoda urana na baita dadarai. (Gal. 4:9) Unu Kristen taudia ginigunadia na lauma dalana ai e goadava bona Dirava turana ai bema lao diba. To, Paulo na eto, unu tadikaka na ḡau asi anidia e “lou henidiamu.” Vaitani Paulo na eto: “Dahaka dainai umui na kavakava karadia, eiava ḡau asi anidia ma o lou henimu?”

⁷ Hari ina negai ita edai una baine vara diba, a? Oibe. Iehova ta diba matama neganai, ita na Paulo heḡereḡerena, Satana ena tanobada ai lada bada iabina karana ta dadaraia. (Filipi 3:7, 8 ba duahi.) Reana asita ura sikuli badana baitala, eiava dagi bada iabina karana o bisnes ai moni ihabadana karadia ta dadaraia. Danu, miusik eiava spot gadara ai eda diba na bada dainai reana  ladada bema bada eiava taḡa taudia ai tama lao diba, to unu na ta dadarai. (Heb. 11:24-27) Bema unu abi hidi daidiai baita lalohisihisimu bona baita lalomu unu tama abi dae neganai eda mauri na bema namo, una na dia aonega karana. Unu baita lalo tomamu neganai, tanobada ena “ḡaruḡaru herevadia manoka-manokadia bona kavakavadia” baita lou henimu. *

8. Iehova ese baine laloda tao urana be ede baita hagoadaia toma?

⁸ Edena dala ai Iehova ese baine laloda tao urana baita hagoadaia, bona tanobada ese baine laloda karana baita dadaraia? Unu baita kara toma totona, ḡau badadia rua baita lalodiatao na namo. Ginigunana na, Iehova na hanaihanai ia e hesiai henia goadagoadamu taudia e lalodiamu bona e hanamodiamu. (Heberu 6:10 ba duahia; 11:6) Ia ese ena hesiai taudia na e lalodia badamu, bona mai dibana baine lalodia boio na dia kara maorona. Iehova na “ena taunimanima iboudiai vada dibana.” (2 Tim. 2:19) Ia na “kara maoromaoro taudia edia dala dibana” bona mai dibana hahetoho amo ede baine hamauridia toma.​—⁠Sal. 1:6; 2 Pet. 2:9.

9. Iehova ese ena taunimanima e lalonamo henidia daladia haida a herevalai.

⁹ Nega haida, Iehova na dala haida amo e hahedinaraia ena taunimanima na e lalonamo henidiamu. (2 Sis. 20:20, 29) Heḡereḡere, Davara Kakakakana ai Farao ena tuari oreana ese Iehova ena taunimanima e ḡavadia neganai, e hamauridia dalana mani a laloa. (Eso. 14:21-30; Sal. 106:9-11) E vara ḡauna na idau herea dainai, laḡani 40 muridiai taunimanima ese dounu e herevalaiava. (Ios. 2:9-11) Gog, Magog Tauna, ese baine tuari henida neganai, Iehova ena lalokau bona siahu e hahedinarai daladia baita lalotaomu karana ese be hagoadadamu! (Esek. 38:8-12) Una nega ai, baita moalemu badina ita na Dirava ena amo lalonamo ta ura baita abia, dia tanobada ena!

10. Edena mai anina bada ḡauna baita laloatao na namo?

¹⁰ Danu, namona na mai anina bada ḡauna iharuana baita laloatao: Iehova ese ita na asita lalomu daladia ai be hanamodamu. Bema taunimanima na kara namodia e karamu ma haida ese bae itadia totona, Iehova ese ahudia na basine henimu. Dahaka dainai? Badina Iesu ena hereva heḡereḡerena, bema taunimanima na haida ese bae hanamodia, idia davadia bunu. (Mataio 6:1-5 ba duahi.) To, Iesu na eto, ma haida e kara namo henidiamu taudia, ena be taunimanima ese asie hanamodiamu, to Tamana ese “hehuni” ai e itadiamu. Ia ese unu kara e itamu bona una heḡereḡerena e hanamodiamu. To, nega haida Iehova ese ita na asita lalomu daladia ai e hanamodamu. Mani haheitalai haida aita lalodia.

11. Edena dala ai Iehova ese e hahedinaraia Maria na e laloatao bona e hanamoa?

¹¹ Dirava Natuna na taunimanima ta bamona baine vara neganai, Iehova ese haneulato rami-hebouna, Maria, e abia hidi una natu sinana ai bainela. Maria na hanua maraḡina ta, Nasaret, ai e nohova, una hanua na Ierusalem bona ena dubu helaḡa amo daudau. (Luka 1:26-33 ba duahi.) Dahaka dainai Maria e abia hidi? Aneru Gabriel ese hehuni ai e hamaoroa, ia na “Dirava ena harihari” eiava  lalonamo vada e abia. Gabeai Maria ese varavarana Elisabeta e hereva henia neganai, e hahedinaraia ena hetura karana Dirava ida na e laloa bada. (Luka 1:46-55) Oibe, Iehova ese Maria ena kara na e itaia, bona ena abidadama dainai hahenamo namona e henia.

12, 13. Iesu e vara bona dina 40 muridiai dubu helaḡa e laohaia neganai, ma haida ese edena dala ai e hanamoa?

¹² Gabeai Maria ese Iesu e havaraia neganai, Iehova ese Ierusalem bona Betelehem ai dagi bada bona lohia taudia na se hadibadia. To, aneru e siaidia mamoe ireḡudia taudia dekedia, idia na Betelehem murimurina ai edia mamoe e reḡudiava. (Luka 2:8-14) Bena unu mamoe ireḡudia taudia na una vara matamata beibina e vadivadia. (Luka 2:15-17) Iesu e matauraia dalana na Maria bona Iosef ese e itaia neganai e hoa! Iehova ese ḡau e karamu daladia bona Diabolo ese ḡau e karamu daladia edia idau mani aita laloa. Satana ese aonega taudia e siaidia Iesu bona tamana sinana bae vadivadidia neganai, Ierusalem taudia iboudiai ese Iesu e vara sivaraina e kamonai bona kudoudia na e hetaha. (Mat. 2:3) Una dainai, natu maraḡidia momo na gabeai e hamasedia.​—Mat. 2:16.

¹³ Iesu e vara bena dina 40 muridiai, Maria na Iehova enai boubou ḡauna ihenina totona Ierusalem ena dubu helaḡa ela, Betelehem amo ena daudau na kilomita 9 heḡereḡerena. (Luka 2:22-24) Maria na Iosef bona Iesu ida e laova lalonai, reana e lalova hahelaḡa tauna ese mai anina bada ḡaudia haida baine kara Iesu baine hanamoa totona. Momokani, Iesu na e hanamoa, to dia Maria ese e laloava dalana ai. Iehova ese “kara maoromaoro tauna bona Dirava garina e gariva tauna” ta ladana Simeon, bona peroveta hahinena, laḡanina 84 vabuna, Ana, e ḡaukaralaidia. Idia ese e hadibadia Iesu na gwauhamata Mesiana eiava Keriso ai bainela.​—Luka 2:25-38.

14. Maria be Iehova ena amo dahaka hahenamo e abia?

¹⁴ Maria enai be dahaka e vara? Iehova ese ia be dounu e hanamoa badina Natuna e naria namonamo, a? Oibe. Dirava ese Maria ena kara bona e gwaurai herevadia na Baibul ai e toredia. To, Iesu na laḡani toi mai kahana ena haroro ḡaukara e karaia neganai, Maria na dia heḡereḡere ia baine bamoa. Reana Maria na vabu dainai, Nasaret ai e nohova. Ena be hahenamo momo e readia, to Iesu baine mase neganai ia na Iesu badinai. (Ioa. 19:26) Gabeai, Maria na hahediba taudia ida Ierusalem ai, bona Pentekost dinana ai lauma helaḡa e abia. (Kara 1:13, 14) Ia bona unu hahediba taudia na e horodia. Bema unu bamona, anina na ia na Iesu ida guba ai bae noho hanaihanai. Ena abidadama karana dainai una hahenamo hereadaena e abia!

15. Iesu tanobada ai e nohova neganai, edena dala ai Iehova ese e hahedinaraia ia na e lalonamo henia?

¹⁵ Iesu na se ura tomadiho bona politikol igunalaina taudia ese bae hanamoa. To, Iehova ese nega idaudia toi ai guba amo e hereva henia eto ia na e lalokau henia neganai, una ese e hagoadaia. Iesu na Ioridane Sinavaina ai e bapatiso murinai, Iehova na eto: “Lau Natugu binai, lau ese ia na lalo namo heniamu.” (Mat. 3:17) Ioane Bapatiso sibona na ia ida bona unu hereva e kamonai. Gabeai, laḡani ta do vairai bena Iesu baine mase neganai, aposetolo tatoi na Iehova ese Iesu e herevalaia neganai e kamonai, eto: “Natugu binai, egu lalokau; lau ia na lalo  namo heniamu: ia erena ba kamonai.” (Mat. 17:5) Dokonai, Iesu ena mase dinana e kahikahiva ai, Iehova ese guba amo Natuna ma e hereva henia.​—Ioa. 12:28.

16, 17. Edena dala ai Iehova ese Iesu e hanamoa?

¹⁶ Ena be Iesu na mai dibana bae hahemaraia, bae hamasea, bona bae gwauraia Dirava ladana ihadikana tauna, to ena ḡuriḡuri ai eto Iehova ena ura baine vara, dia ia ena. (Mat. 26:39, 42) Iesu ese “satauro e haheaukalaia” hemaraina na se laloa, to e ura Tamana sibona ese baine laloatao bona baine hanamoa, dia ina tanobada. (Heb. 12:2) Edena dala ai Iehova ese e hanamoa?

¹⁷ Iesu na tanobada ai e nohova neganai, e hahedinaraia ia na e ura Tamana ida guba ai e nohova neganai e abia hairaina baine abia lou. (Ioa. 17:5) Baibul ese se hahedinaraia Iesu na e ura hahenamo ma haida danu baine abi. Ia na se laloa tanobada ai Dirava ena ura e karaia dainai guba ai hahenamo hereadaena ta baine abia. To Iehova be dahaka e kara? Ia ese Iesu na e hanamoa bona una na dia Iesu ese e laloa dalana ai. Dirava ese e hatorea isi lou bena guba ai “lada” o dagi hereadaena ta e henia, bona basine mase diba maurina danu​—una mauri na ta ese nega ta do se abia. * (Fili. 2:9; 1 Tim. 6:16) Oibe, Iesu ena abidadama karana dainai una hahenamo hereadaena e abia!

18. Dahaka ese baine duruda ina tanobada ese baine abida dae lalohadaina baita dadaraia?

¹⁸ Dahaka ese baine duruda ina tanobada ese baine abida dae lalohadaina baita dadaraia? Baita helalotao, Iehova na hanaihanai ena abidadama hesiai taudia na e lalodiataomu, bona nega momo asie laloamu dalanai e hanamodiamu. Asi dibada vaira negana ai dahaka hahenamo ma haida baita abimu. To hari, ina tanobada dikana ai hekwakwanai bona hahetoho ta haheaukalaimu lalonai, namona na baita helalotao, ina tanobada bona ena ura ibounai na bae ore vaitani. (1 Ioa. 2:17) Tamada lalokauna, Iehova, “na asi ena kara gageva-gageva” ia ese “eda ḡaukara bona eda lalokau ia ladana dainai vada ta hahedinarai’ na basine lalodia boio. (Heb. 6:10) Oibe, ia ese baine lalonamo henida​—⁠reana asita lalomu daladia ai baine karaia!