Lalogu na hadaia bena painia ḡaukara na hamatamaia neganai, asina lalodia hahenamodia momo na abi. (Efe. 3:20) To reana bo lalomu una be ede e vara toma. Mani aina sivarailaia.

Lau na Berlin, Germany ai na vara, laḡani 1939 World War II e matama murinai. Laḡani 1945 ai tuari dokona e lao heniava lalonai, Berlin ai tuari pleinidia na bomu momo e nege. Una neganai emai strit na e bomua, bona lau bona egu bese na seif gabuna ta (air-raid shelter) a heau lao. Gabeai sinagu ena hanua, Erfurt ala.

Sinagu na e ura dikadika hereva momokani baine diba. Aonega taudia edia buka momo e duahi bona tomadiho idauidau e stadilai to lalona na se heḡereḡere. Laḡani 1948 ai, Iehova ena Witnes rarua na emai ruma ema. Sinagu ese e boiridia vareai bena henanadai momo e heni. Una horanai, sinagu ese lau bona tadigu kekenina e hamaoromai, eto: “Hereva momokani bina!” Se daudau, lau, sinagu bona taihugu na Erfurt ai hebou ala matama.

Laḡani 1950 ai, a lou Berlin, unuseniai Berlin-Kreuzberg Kongrigeisin taudia a bamodia. Una murinai Berlin-Tempelhof Kongrigeisin a bamoa, una danu Berlin lalonai. Gabeai, Sinagu na e bapatiso, a lau be asina bapatiso. Dahaka dainai?

Na hemaraiva dainai Dirava ena hesiai ḡaukara na asina karaia namonamova. Ena be haida ida na harorova, to laḡani rua lalodiai ta asina haroro henia. To tadikaka bona taihu goadadia momo ida na ḡaukara hebou neganai, edia abidadama Iehova enai bona edia haheitalai ese e durugu bada. Idia haida na guna Nazi dibura kamepadia ai eiava East German edia dibura rumadia ai e noho. Haida be hehuni ai literature na East German ai e vareailaiva. Edia haheitalai ese lau na e hagoadagu bada. Na lalova, bema idia na Iehova bona tadikakadia daidiai e hadiburadia  bona edia mauri na bema haboio diba, namona na baina hekwarahi basina gari.

Laḡani 1955 ai special preaching campaign ta ai na vareai neganai, egu hemarai karana na hanaia matama. Informant * ai e halasia revarevana ta ai, Tadikaka Nathan Knorr na e gwa, una na orea ese e heḡaeḡaelaia campaign badana ta. Bema pablisa iboudiai na una campaign ai bae vareai, “tanobada heḡeḡemadai ita na una hua lalonai ḡaukara bada hereana ta baita haḡuḡuruamu.” Una na e vara momokani! Se daudau, egu mauri na Iehova enai na gwauhamatalaia, bena laḡani 1956 ai, lau, tamagu bona taihugu a bapatiso. Una murinai, lau na abi hidi badana ta na karaia.

Laḡani momo lalodiai, na dibava painia ḡaukara baina karaia na namo, to na lalova gabeai baina painia. Matamanai, lalogu na hadaia Berlin ena wholesale ta ai baina ḡaukara bona aniani ihoidia bona isiaidia ḡaukarana baina dibaia namonamo. Una murinai, na urava baina ḡaukara unu amo egu diba baina habadaia. Una dainai, laḡani 1961 ai, Hamburg, Germany ai, ḡaukara ta na davaria, una na kada badadia e hetumu gabuna. Egu ḡaukara na na ura henia badava dainai, na lalova painia ḡaukara na gabeai baina karaia. Lau be dahaka baina kara?

Na moalemu badina Iehova ese tadikaka e ḡaukaralaidia lau bae durugu lauma ḡaudia baina ato guna. Bamogu haida na e painiava, bona egu ai idia na haheitalai namodia. Danu, Tadikaka Erich Mundt, guna dibura kamepana ai e nohova, ese e hagoadagu Iehova baina abidadama henia totona. Ia na e gwa dibura kamepana ai, sibodia edia diba ai e tabekauva tadikakadia na gabeai e manoka. To mai lalodia idoinai ida Iehova e abidadama heniava taudia be e gini goada bona Iehova ena orea iduruna taudia ai ela.

Danu, Tadikaka Martin Poetzinger, gabeai Gavanin Bodi memba ta ai ela, ese tadikaka e hagoadadiava, e gwauva, “Boga auka karana ese umui baine durumui diba!” Unu hereva na lalo dobu murinai, egu moni ḡaukara amo na doko bona June 1963 ai painia ḡaukara na hamatamaia. Egu mauri lalonai una na abi hidi badana! Hua rua muridiai, moni ḡaukara matamatana ta do asina tahua lalonai, lau na e boirigu spesol painia ḡaukarana baina karaia. Laḡani haida muridiai Iehova ese hahenamo namodia momo e henigu. Lau na e boirigu Gilead Skul ena klas namba 44 bainala.

Tadikaka Nathan Knorr bona Lyman Swingle amo na dibaia hereva badana na: “Emu asainmen ai basio hesiku haraḡa.” Idia ese e hagoadamai emai asainmen baia moalelaia ena be hekwakwanai bae vara. Tadikaka Knorr na e gwa: “Ba lalobada ḡaudia be dahaka? Miro, pitopito (bugs), bona ogoḡami, eiava au, flaoaflaoa, bona taunimanima edia moale toadia ba lalo? Taunimanima ba lalokau henidia!” Dina ta, Tadikaka Swingle ese tadikaka haida e manoka haraḡa badina e herevalaiava neganai, lalona na e manoka bena e tai. Iena tok e hadokoa sisina, bena lalona e goada neganai e hereva. Una ese lau na e hagoadagu dainai lalogu na hadaia Keriso bona tadikakana basina hahisidia.​—⁠Mat. 25:40.

Emai asainmen a abi neganai, Betele taudia haida ese e nanadaimai ai be ede baia laomu. Idia ese asainmen ta ta edia namo e herevalai murinai, lau na na gwa: “Congo (Kinshasa) ba laomu.” Idia na edia hereva e hadokoa bena e gwa: “Congo! Iehova ese baine bamomu!” Unu negadiai, Congo (Kinshasa) ai taunimanima na e hetuari heheniva bona e heala-ala heheniva. To Gilead skuli ai na diba ḡaudia na na lalodiava. September 1967 ai emai gradueisin murinai, lau, Heinrich Dehnbostel, bona Claude Lindsay na Congo ena siti badana, Kinshasa ala.

Kinshasa ai a kau murinai, ai na hua toi lalodiai French gado a stadilaia. Bena plein amo Lubumbashi  ala, guna una gabu ladana na Elisabethville, Congo ena south kahana hanuana Zambia ena boda badinai. Siti lalonai misinari rumana ta ai a nohova.

Lubumbashi ena teritori momo na do asie karadia dainai, ai na a ura dikadikava una gabu ai e nohova taudia baia haroro henidia. Se daudau Baibul stadi momo a davari. Gavamani ai e ḡaukarava taudia bona pulis danu a haroro henidiava. Momo ese Dirava ena Hereva bona emai haroro ḡaukara na e matauraia badava. Taunimanima na Swahili gado ai e herevava, una dainai lau bona Claude Lindsay ese una gado a dibaia danu. Gabeai, Swahili gado kongrigeisin e siaimai.

Ena be ekspiriens namodia momo a davari, to hekwakwanai haida danu emai ai e vara. Nega momo e kekerova soldia mai ipididia ida bona pulisi ese e samanimai koikoiva. Dina ta, misinari rumana ai emai kongrigeisin hebouna a abiava lalonai, pulisi na mai ipididia ida e vareai, bona pulis steisen e laohaimai, unuseniai ai na tano ai e hahelaimai ela bona 10 oklok hanuaboi bena e siaimai.

Laḡani 1969 ai, lau na e abigu hidi seket ḡaukarana baina karaia. Una seket ḡaukarana lalonai, lau na Africa udadia ai, kopukopu bona ava badadia lalodiai na rakava. Hanua ta ai, egu bedi henunai na kokoroku hahinena ta mai natuna ida e mahutava. Daba kahadiai una kokoroku ena tai reḡena ese e hanogaguva negadia na asina laloboiomu. Danu adorahi ai, tadikaka ida lahi badinai a helaiva bona Baibul ena  hereva momokanidia a herevalaiva negadia na doini na lalotaomu.

A davaria hahetoho badana ta na, tadikaka koikoidia ese Kitawala oreana e duruava. * Idia haida na e bapatiso bona kongrigeisin lalonai maduna e huava. Idia na e ‘hehuni nadidia’ na heheto, to abidadama tadikaka bona taihu ese edia koikoi karadia e hahedinarai. (Iuda 12, NWT) Gabeai, Iehova ese kongrigeisin amo e kokidia, una murinai, taunimanima momo herea na hereva momokani ai e vareai.

Laḡani 1971 ai, lau na e siaigu Kinshasa brens ofes ai baina ḡaukara, unuseniai asainmen idauidau na karava, heḡereḡere revareva na siaiva, literature odadia na karava, bona Service Department ena ḡaukara haida. Betele ai, lau ese tano badana ta ai ḡaukara ihaheauna dalana na dibaia, una tano ai dala, paoa bona trenspot na dia namo momokani. Nega haida, emai revareva na hua haida muridiai kongrigeisin ai e kauva. Revareva na plein amo e kokidiava bena bouti ai e udadiava, to wiki haida lalodiai bouti na se heauva, badina ranu lalodiai e tubu haraḡamu flaoadia (hyacinths) ese davara e kouava. Ena be hekwakwanai unu bamodia bona hekwakwanai ma haida e varava to a hanaidiava.

Ena be tadikaka edia moni na dia heḡereḡere to hebouhebou badadia e heḡaeḡaelai daladia na ita neganai na hoa. Idia sibodia ese platfom e kara, bona uda avadia (elephant grass) e ḡaukaralai haba bona helai ḡaudia e kara. Idia ese baubau na du ai e halao bona siriho e ḡaukaralai guhi bona teibolo e kara. Asi edia ikoko dainai au kopidia e utu maraḡimaraḡi bena ikoko ai e halao. Unu tadikaka bona taihu edia diba e ḡaukaralaiva daladia na ita neganai na hoa. Idia na na lalokau henidia badava. Asainmen matamatana nala neganai, na misidia bada!

Laḡani 1974 ai, lau na e siaigu Nairobi ena brens, Kenya ai. Ḡaukara na bada herea, badina Kenya brens ese badi tanodia 10 edia haroro ḡaukara e nariava, unu tano haida ai eda ḡaukara na e taravatu. Nega momo e siaiguva unu tano bona Ethiopia baina vadivadidia, unuseniai eda tadikaka na daḡedaḡe bada e davariva bona kota ai e atodiava. Idia momo na e dadabadiava bona dibura ruma ai e atodiava, a haida be e hamasediava. To idia na e haheauka badina edia hetura karana Iehova bona tadikakadia ida na goada.

Laḡani 1980 ai, egu mauri lalonai ḡau namona ta e vara, Gail Matheson na adavaia, ia na Canada amo. Bona Gilead klas tamona ai a skuli hebou. Ai raruosi na revareva amo a hetore heheniva. Gail na Bolivia ai misinari ḡaukarana e karaiava. Laḡani 12 muridiai, New York ai a hedavari lou. Se daudau, Kenya ai a headava. Na moalemu Gail enai badina hanaihanai ia ese ḡau iboudiai na Iehova ena lalohadai heḡereḡerena e karava bona enai dahaka mimia na e moalelaiva. Ia na mai lalokauna ida doini e durugumu.

Laḡani 1986 ai, Gail ida e abimai hidi seket ḡaukarana baia karaia, bona Brens Komiti ḡaukarana danu na karaiava. Kenya brens ese e naridiava tanodia momo ai seket ḡaukarana a karaia.

Na helalotaomu, laḡani 1992 ai Asmara (Eritrea ai) ai iseda ḡaukara do se taravatua neganai, ai na hebouhebou ta totona a heḡaeḡaeva. To, ai ese animal edia aniani ihaboudia rumana ta a davaria, lalona na dia namo momokani to murimurina be taina namo. Hebouhebou dinana ai, na hoa badina na itaia tadikaka ese una ruma lalona na Iehova itomadiho henina rumana namona ai e halaoa. Ruma bese momo ese dabua mai hairaidia e mailai bona toadia dia namo gabudia na unu dabua amo e koudia. Una hebouhebou na a moalelaia, bona ema taudia na 1,279.

Seket ḡaukara a karaiava neganai, ruma idauidau ai a nohova. Nega ta ai na kone badinai  ruma badana bona mai hairaina ta ai a noho; nega ma ta, punu amo e karaia rumana ta ai a noho, bona toilet ena daudau na 100 mita. Herevana edeseniai emai hesiai ḡaukara a karaiava, to painia bona pablisa goadadia ida a haroro hebouva negadia na asia laloboiomu. Asainmen ma ta e henimai neganai, turamai namodia momo a rakatanidia bona a misidia.

Laḡani 1980 dokonai bona laḡani 1990 matamana kahanai, Kenya brens ese e nariva tanodia momo na gavamani ese maoro e henidia edia haroro ḡaukara bae karaia. Una dainai, brens bona ofesi ma haida e hagini. Laḡani 1993 ai, ai na e siaimai Addis Ababa ena brens ofes, Ethiopia ai, baia ḡaukara, unuseni ai laḡani momo gunadiai iseda ḡaukara na hehuni ai e karaiava, to hari gavamani ese iseda ḡaukara ai e ato taravatudia na e koki.

Iehova ese Ethiopia ai ḡaukara na e hanamoa. Tadikaka bona taihu momo na painia ḡaukarana e karaiava. Laḡani 2012 amo pablisa 20 pesen mai kahana na laḡani ta ta regula painia ḡaukarana e karaiamu. Danu, tiokratik skulidia ai momo na treinin e abimu, bona Kingdom Hall 120 mai kahana e hagini. Laḡani 2004 ai, Betele taudia na e hanai building matamatanai, bona una gabu tamona ai Assembly Hall ta e haginia, una na hahenamo ta.

Laḡani momo gunadiai, lau bona Gail na Ethiopia tadikaka bona taihu ida a hebamo namonamova. Edia lalokau bona kara namodia daidiai a ura henidiamu. Hari ai na a goreremu dainai, e siaimai Central Europe brens ai. Unuseniai, tadikaka ese e narimai namonamomu, to emai Ethiopia tadikakadia na a misidiamu.

Iehova ese iena ḡaukara anina e havaraia dalana na a itaia. (1 Kor. 3:6, 9) Heḡereḡere, Congo ai kopa e tahuva Rwanda taudia na haroro henidia matama neganai, Rwanda ai pablisa na lasi. Hari, una tano ai pablisa iboudiai na 30,000 mai kahana. Laḡani 1967 ai, Congo (Kinshasa) ai pablisa na 6,000 heḡereḡerena. Hari, edia namba na e dae 230,000 heḡereḡerena, bona laḡani 2018 ena Memorial ema taudia na milion ta mai kahana. Guna Kenya brens ese e naridiava tanodia ai pablisa edia namba na e dae 100,000 mai kahana.

Laḡani 50 mai kahana gunadiai, Iehova ese tadikaka idauidau e ḡaukaralaidia lau bae durugu fultaim hesiai ḡaukara baina karaia totona. Ena be dounu na hemaraimu, to Iehova na na abidadama henia momokanimu. Africa ai na diba ḡaudia ese e durugumu baina haheauka bona baina moale. Lau bona Gail ese tadikaka bona taihu edia heabidae karadia, hekwakwanai e haheaukalai daladia, bona Iehova e abidadama henia karana na a moalelaiamu. Iehova ena hebogahisi dainai na tenkiumu. Momokani, Iehova ese hahenamo momo e henigu.​—Sal. 37:4.