BAIBUL lalonai abidadama taudia sivaraidia na momo, idia na “taunimanima mo, ita bamoda.” (Iak. 5:17) Heḡereḡere, Roma 7:21-24 ai Paulo ena hereva na ta lalopararalaiamu. Eto: “Kara namo baina karaia na tomu, to dika na egu ai e miamu. . . . Lau madi, ihabaigu!” Paulo ena hemami ese ita na e durudamu, badina ita danu dia ḡoevadae dainai ta kerere louloumu.

Paulo ese ḡau ma haida danu e herevalai. Galatia 2:20 ai eto: “Dirava Natuna . . . ese e ura henigu bona sibona e heni, lau daigu ai.” Oiemu hemami be Paulo ena heḡereḡerena, a? Reana nega haida unu o hemami tomamu.

Bema eda kerere gunadia daidiai baita lalohisihisimu, baita laloamu Iehova ese ita na se lalokau henidamu bona eda dika na basine gwautaomu, danu edai na be aukamu Iesu ena boubou ḡauna baita abia dae. Iesu be e uramu baita abia dae mauri davana na harihari ḡauna ta, a? Bema oibe, dahaka ese baine duruda diba? Mani unu henanadai ruaosi aita herevalai.

Iesu na e uramu iena boubou ḡauna na harihari ḡauna ta bamona baita laloa bada. Ede ta diba tomamu? Luka 23:39-43 ese e herevalaia sivaraina aita laloa. Tau ta na Iesu badinai e hasatauroa. Ia na e gwa kara dikana ta e karaia. Reana una na kara dika badana ta, badina kara dika unuhetomadia e karamu taudia na au ai e kokodia kaumu. Una tau na e lalohekwarahi bona Iesu e noia, eto: “Emu basileia bavabia negana ai, ba lalogu.”

Iesu be dahaka e kara? Mani a laloa Iesu na mai hisihisi ida e hegiro una tau e itaia. Ena be hisihisi bada e aniva to mai moalena ida una tau e hamaoroa, eto: “Na hamaoromu momokanimu hari dina ai, ita raruosi Paradaiso ai baita kau.” Iesu ese una tau na bema hamaoroa “Taunimanima Natuna ema na . . . ena mauri baine henia, hutuma baine hamauridia helaoreana.” (Mat. 20:28) To iena boubou ḡauna ese una tau baine durua dalana e hahedinaraia. Ia na mai gado namona ida ina hereva “ita” e ḡaukaralaia. Bona una tau e hamaoroa tanobada paradaisona ai baine noho.

Momokani, Iesu na e ura una tau na baine laloparara, iena boubou ḡauna amo ia danu namo baine davari diba. Bema Dirava se hesiai henia kara dika tauna na Iesu ese e laloa bada, Dirava e hesiai heniamu bapatiso Kristen tauna danu e laloa badamu. Ena be guna ta karava kara dikadia daidiai ta lalohisihisimu, to dahaka ese baine duruda bena baita abia dae Keriso ena boubou ḡauna amo namo baita davari?

Paulo na Iesu ese e henia hesiai ḡaukarana amo e diba Iesu na ia dainai e mase. Edena dala ai? Paulo na e gwa: “Siahu e henigu tauna, eda Lohiabada Keriso Iesu, na hanamoamu, badina  be e haerogu vada na momokani, bona e abigu hidi ena hesiai taugu. Ena be gunaguna na ere dikava, na daḡedaḡe heniava, ladana na hadikaiava.” (1 Tim. 1:12-14) Paulo na e laloparara Iesu ese e bogaia hisi, e lalokau henia bona e abidadama henia. Iesu ese ita ta ta danu hesiai ḡaukarana e henida. (Mat. 28:19, 20) Una ḡaukara amo ta dibamu Iesu na ita daidai danu ena mauri e heni.

Albert na laḡani 34 orea murimurinai e noho, to vanegai Iehova e lou henia. Ia na e gwaumu: “Egu kara dika gunadia na doini na lalomu. To na haroromu neganai, egu hemami na aposetolo Paulo bamona, Iesu ese lau na hesiai ḡaukarana ta e henigu. Una ese e hagoadagumu bona na moalemu badina na mamiamu Dirava ese egu dika na e gwautao bona mauri hanaihanai helarona e hagoadaiamu.”​—Sal. 51:3.

Allan na hereva momokani do se diba neganai ia na daḡedaḡe karadia e karava. Ia na e gwaumu: “Taunimanima na hahisidiava karadia na doini na lalomu. Una dainai nega haida na lalometaumu. To Iehova na tenkiu heniamu badina ia ese lau, kara dika taugu, e ḡaukaralaigumu sivarai namona na haida ediai baina harorolaia. Taunimanima ese sivarai namona e kamonaiamu neganai, na dibamu Iehova ena kara na namo bona lalokau Diravana. Na mamiamu ia ese lau na e ḡaukaralaigumu, kara dikadia e karamu taudia baina durudia.”

Ta haroromu neganai, ita na kara namodia ta hahedinaraimu bona lalohadai namodia ta abimu. Bona ta dibamu Iesu ese ita na e bogada hisimu, e lalokau henidamu bona e abidadama henidamu.

Satana ena nega oromana dikana do se ore lalonai, eda kara dika gunadia daidiai doini baita lalohisihisimu. Dahaka ese baine duruda hemami unu bamodia baita hanaidia?

Jean, eregabenai mauri daladia rua e badinava hahinena, na e gwaumu: “Na moalemu badina ‘Dirava ese ita laloda e hereadiamu.’” (1 Ioa. 3:19, 20) Ita danu ta moalemu badina ta dibamu Iehova bona Iesu na e lalopararamu ita na dia ḡoevadae. Baita helalotao, idia na mai lalokaudia ida mauri davana na kara dika amo e helalo-kerehaimu taudia daidiai e heni.​—1 Tim. 1:15.

Iesu ese kara dika e kara henidia dalana baita laloa dobumu bona baita hekwarahimu e henida hesiai ḡaukarana baita haḡuḡuruamu neganai, baita abia daemu mauri davana na ta laloa badamu. Unu bo kara tomamu neganai, Paulo heḡereḡerena, bo gwaumu: Iesu “ese e ura henigu bona sibona e heni, lau daigu ai.”