1. Ina hereva, “hereva momokani,” anina be dahaka?

“HEREVA momokani be ede o dibaia toma?” “Oi be hereva momokani lalonai o bada, a?” “Oi be laḡani hida hereva momokani lalonai do noho?” Reana haida ese unu e nanadaimu toma, eiava oi ese ma haida na unu o nanadaidia toma. To ina hereva, “hereva momokani,” anina be dahaka? Anina na (1) ta abi daemu herevadia, (2) Dirava ta tomadiho heniamu dalana, bona (3) iseda mauri dalana. “Hereva momokani lalonai” e nohomu taudia na mai dibadia Baibul ena hahediba herevadia be dahaka, bona edia mauri lalonai e badinadiamu. Una dainai, idia ese dubu koikoidia edia hahediba na e dadaraimu, bona mauri e moalelaiamu, ena be idia na dia ḡoḡoevadadae.​—Ioa. 8:32.

2. Ioane 13:34, 35 heḡereḡerena, edena kara ese ta lalona baine veria hereva momokani baine abia dae totona?

² Dahaka dainai oi ese hereva momokani o abia dae? Reana badina oi ese Iehova ena taunimanima edia kara namodia o ita. (1 Pet. 2:12) Eiava reana idia ese lalokau e hahedinaraia dalana o itaia. Momo na nega ginigunana hebou ela neganai, una na e itaia, ena be e kamonai herevadia na asie lalotao, to tadikaka taihu ese e hahedinaraia lalokauna hari e laloataomu. Asita hoamu badina Iesu na e gwa lalokau dainai taunimanima na bae diba daidia be iena hahediba. (Ioane 13:34, 35 ba duahi.) To eda abidadama baine goada totona ḡau ma haida danu baita kara na namo.

3. Bema tadikaka taihu ese Kristen lalokauna e hahedinaraiamu dainai Dirava ta abidadama heniamu, dahaka baine vara diba?

³ Dirava ena taunimanima ese Kristen lalokauna e hahedinaraia dainai hereva momokani ta abia dae, to una mo na dia heḡereḡere. Dahaka dainai? Bema tadikaka ta o taihu ta, reana ia na elda o painia, na kara dika badana ta e karaia. Eiava  bema tadikaka ta o taihu ta ese dala ta ai baine hahisimu. Eiava reana ta na aposteit ai bainela, bona baine gwa, ita na dia tomadiho momokanina. Bema unu baine vara toma neganai, unu ese oi be hahekwakwanaimumu, bona Iehova ihesiai henina karana bo hadokoamu, a? Ta dibamu ḡauna na ina: Bema oi na haida edia kara dainai Dirava o abidadama heniamu, to emu hetura karana Iehova ida na so laloa badamu, emu abidadama na basine goadamu. Iehova bona ena taunimanima o lalodiamu dalana ese emu abidadama baine hagoadaia, to danu Baibul ba stadilaia namonamo na mai anina bada, unu amo o dibadia ḡaudia ba lalopararalai bona ba hetahulai bena ba hamomokania unu na Iehova sivaraina momokanidia.​—Roma 12:2.

4. Mataio 13:3-6, 20, 21 heḡereḡerena, hekwakwanai negadiai haida edia abidadama be ede baine heto diba?

⁴ Iesu na e gwa haida na ‘mai moaledia ida’ hereva momokani be abia daemu, to hekwakwanai negadiai edia abidadama na be manokamu. (Mataio 13:3-6, 20, 21 ba duahi.) Reana asie lalopararamu Iesu murinai e rakamu taudia na hekwakwanai danu be davarimu. (Mat. 16:24) Eiava reana be laloamu Kristen tauna ai bo laomu neganai, emu mauri lalonai hekwakwanai na basio davarimu to hahenamo mo bo davarimu. To ina tanobada ai hekwakwanai na momo. Mauri lalonai ḡau haida na be idaumu bona nega haida unu ese eda moale na be hadikaiamu.​—Sal. 6:6; Koh. 9:11.

5. Edena dala ai tadikaka taihu momo na e abia daemu idia ese hereva momokani na e dibaia?

⁵ Tadikaka taihu momo na e abia daemu idia ese hereva momokani na e dibaia. Edena dala ai? Bema tadikaka ta o taihu ta ese e hahisidiamu eiava ta na Baibul ena taravatu e utuamu, una ese edia abidadama na se hamanokaiamu. (Sal. 119:165) Hekwakwanai e hanaidiamu negadiai edia abidadama na e goadamu. (Iak. 1:2-4) Edena dala ai eda abidadama na unu baine goada toma?

6. Edena dala ai Kristen taudia ginigunadia ese edia abidadama e hagoadaia?

⁶ Kristen taudia ginigunadia na Toretore Helaḡadia bona Iesu Keriso ena hahediba herevadia amo edia abidadama e hagoadaia. Unu na e gwauraidiamu “sivarai namo ena hereva momokani.” (Gal. 2:5) Hereva momokani na Kristen taudia ese e abi daemu herevadia iboudiai, heḡereḡere Iesu ena mauri idavalaina boubouna bona iena toreisi lou herevadia. Aposetolo Paulo na e abia dae unu hahediba herevadia na momokani. Dahaka dainai? Badina Toretore Helaḡadia amo e hamomokania “Keriso ena hisi-ani bona ena tore-isi-lou na mai badidia.” (Apos. 17:2, 3) Kristen taudia ginigunadia ese unu hahediba herevadia e abi dae bona Dirava ena Hereva bae lalopararalaia totona lauma helaḡa ena heduru ai e tabekau. Idia na sibodia ese e hamomokania unu hahediba herevadia na Toretore Helaḡadia amo e abi. (Apos. 17:11, 12; Heb. 5:14) Edia abidadama na dia hemami mo, bona idia na dia tadikaka taihu daidiai Iehova e hesiai heniava, to Dirava amo diba maorona e abia dainai edia abidadama e hagoadaia.​—Kol. 1:9, 10.

7. Bema iseda abidadama na Baibul ena hereva momokani ai baita haginia aukamu, ena namo be dahaka?

⁷ Baibul lalonai hereva momokanidia na e hesiriu hanaihanaimu. (Sal. 119:160) Heḡereḡere, tadikaka ta o taihu ta ese e hahisidamu eiava ta na kara dika badana ta e karaiamu, eiava hekwakwanai negadiai unu hereva momokani na asie idaumu. Una dainai, Baibul ena hahediba herevadia na baita dibadia namonamo bona baita hamomokania idia na hereva momokani. Bema iseda abidadama na Baibul ena hereva momokani ai baita haginia aukamu,  hekwakwanai negadiai eda abidadama na be goadamu, lai badana lalonai bouti na dogo ese e dogoatao aukamu heḡereḡerena. Edena dala ai ba hamomokania o abi daemu herevadia na hereva momokanidia?

8. 2 Timoteo 3:14, 15 heḡereḡerena, edena dala ai Timoteo na e hamomokania e abi dae herevadia na momokani?

⁸ Timoteo na e hamomokania e abi dae herevadia na hereva momokani. Ede e diba toma? (2 Timoteo 3:14, 15 ba duahi.) Ia na sinana bona tubuna ese “revareva helaḡadia” e hadibalaia. To ia sibona danu nega e atova unu revareva helaḡadia e stadilaiva. Una dainai e hamomokania unu hereva na hereva momokani. Gabeai Timoteo, ia sinana, bona tubuna hahinena ese Kristen hahediba herevadia e diba. Ta dibamu Timoteo na Iesu murinai e rakava taudia ese e hahedinaraia lalokauna na e laloa bada, bona e ura dikadika tadikaka taihu baine bamodia bona baine durudia. (Fili. 2:19, 20) Iena abidadama e hagoadaia badina na dia taunimanima e lalokau henidia, to Baibul amo e dibadia hahediba herevadia na momokani dainai, e ura Iehova turana ai bainela. Namona na oi sibomu ese danu Baibul ba stadilaia bona ba hamomokania Iehova e herevalaiamu herevadia na momokani.

9. Ededia hereva momokani badadia toi na sibomu ese ba hamomokanidia?

⁹ Namona na sibomu ese ini hereva momokani badadia toi ba hamomokanidia. Ginigunana, ba hamomokania Iehova Dirava na ḡau iboudiai e Havara Tauna. (Eso. 3:14, 15; Heb. 3:4; Apok. 4:11) Iharuana, ba hamomokania Baibul na Dirava ena hereva taunimanima ediai. (2 Tim. 3:16, 17) Bona ihatoina, ba hamomokania Iehova na mai ena orea, bona una orea taudia na Keriso ena hahekau henunai Dirava e toma henia dihomu, bona una orea ladana na Iehova ena Witnes. (Isa. 43:10-12; Ioa. 14:6; Apos. 15:14) Oi na dia Baibul ibounai ba dibaia ḡoevaḡoeva bena sibomu ese unu hereva momokani badadia ba hamomokanidia. To namona na o diba ḡaudia na ba haerodia namonamo unu amo ba hamomokania unu na hereva momokani.​—Roma 12:1.

10. Hereva momokani badadia ta dibamu neganai, dahaka baita kara na namo?

¹⁰ Bema o abia daemu Dirava, Baibul bona Dirava ena taunimanima e herevalaidiamu herevadia na momokani, namona na Baibul amo ma haida ba hadibalaidia. Dahaka dainai? Badina ita Kristen tauda eda maduna na, ta diba hereva momokanidia na ita bae kamonai henida taudia baita hadibalaidia. * (1 Tim. 4:16) Bona haida ta durudiamu Baibul ena hereva momokani bae diba neganai, una ese eda abidadama na e hagoadaiamu.

11. Edena dala ai Paulo ena hahediba dalana baita tohotohoa diba?

¹¹ Aposetolo Paulo na taunimanima e hadibadiava neganai, ia ese “Iesu herevana Mose ena taravatu bona peroveta taudia edia buka amo e gwauraia hedinarai.” (Apos. 28:23) Haida na hereva momokani ta hadibadiamu neganai, edena dala ai Paulo baita tohotohoa? Baibul ena hereva mo baita hadibalaidia na dia heḡereḡere. To danu, eda Baibul stadi taudia baita durudia Baibul amo e dibamu ḡaudia na bae lalodia bada unu amo Iehova turana ai baela. Ita na ta uramu idia ese hereva momokani bae abia dae, dia ita e matauraidamu dainai, to sibodia ese e hamomokaniamu idia e dibadiamu ḡaudia na eda lalokau Diravana e herevalaiamu hereva momokanidia.

12-13. Edena dala ai tama sina ese natudia bae durudia hereva momokani lalonai bae noho totona?

¹² Tama sina e, umui na o ura dikadikamu natumui na hereva momokani lalonai bae noho. Reana o laloamu bema idia na tadikaka taihu be bamodiamu, edia abidadama na be goadamu. To, bema o uramu natumu na baine hamomokania Baibul ena hahediba herevadia na momokani, tadikaka taihu mo bae bamodia na dia heḡereḡere. Namona na Dirava turana ai baela, bona sibodia ese bae hamomokania Baibul ena hahediba herevadia na momokani.

¹³ Bema tama sina na e uramu Dirava ena hereva momokani na natudia bae hadibalaidia, namona na bae hahedinaraia Baibul istadilaina karana ai idia na haheitalai namona. Tama sina na nega bae ato e dibamu ḡaudia bae lalodia dobu na namo. Unu amo natudia bae durudia unu bae kara toma. Tama sina ese natudia na eda Baibul stadi tuludia iḡaukaralaidia daladia bae hadibalaidia, edia Baibul stadi e hadibadiamu heḡereḡerena. Unu be kara tomamu neganai, natudia be durudiamu Iehova bae lalokau henia bona bae abia dae momokani Iehova ese “hesiai tauna mai ena kamonai bona kara maoromaoro” amo e durudamu Baibul baita lalopararalaia totona. (Mat. 24:45-47) Tama sina e, natumui na Baibul ena hereva  badadia mo ba hadibadia na dia heḡereḡere. Edia diba bona laḡanidia heḡereḡerediai “Dirava ena dobu ḡaudia” ba hadibalaidia, unu amo bo durudiamu edia abidadama bae hagoadaia totona.​—1 Kor. 2:10.

14. Dahaka dainai Baibul ena peroveta herevadia baita stadilai na namo? (Maua ladana “ Ini Peroveta Herevadia Anidia be Dahaka?” danu ba itaia.)

¹⁴ Baibul lalonai peroveta herevadia na mai anidia bada, unu ese be durudamu eda abidadama Iehova enai baita hagoadaia totona. Ededia peroveta herevadia ese emu abidadama e hagoadaia? Reana bo gwaumu “dina gabedia” e herevalaimu peroveta herevadia. (2 Tim. 3:1-5; Mat. 24:3, 7) To ededia peroveta herevadia, e ḡuḡuru ḡaudia, ese emu abidadama na baine hagoadaia diba? Heḡereḡere, Daniel karoa 2 bona Daniel karoa 11 ai e gwaurai peroveta herevadia e ḡuḡuru, bona e ḡuḡurumu daladia be ede bo herevalai tomamu? * Baibul amo o diba ḡaudia na emu abidadama badina ai bo halaomu neganai, emu abidadama na be goadamu. Tanobada Tuarina Iharuana lalonai, Germany ai daḡedaḡe bada e davari tadikaka taihu edia haheitalai mani aita laloa. Ena be una negai Baibul ai dina gabedia e perovetalai herevadia na asie lalopararalai namonamo, to Dirava ena Hereva na e abidadama henia.

15-17. Nazi gavamani ese eda tadikaka e daḡedaḡe henidia neganai, edena dala ai Baibul istadilaina karana ese tadikaka e durudia?

¹⁵ Germany ai, Nazi gavamani e lohiava neganai, tadikaka taihu tausen momo na dibura kamepadia e siaidia lao. Hitler bona SS Chief Heinrich Himmler ese Iehova ena Witnes taudia na e inai henidia bada. Taihu ta na e gwa dibura kamepana ta ai, Himmler ese eda taihu haida e hamaorodia eto: “Emui Iehova na gubai baine lohia, to ai be tanobada ai baia lohia! Baita itaiamu daidia be noho daudaumu, umui eiava ai!” Dahaka ese Iehova ena taunimanima e durudia dainai e haheauka?

¹⁶ Unu Bible Student taudia na e diba Dirava ena Basileia na laḡani 1914 ai e lohia  matama. Una dainai daḡedaḡe bada e vara neganai idia na se hoa. Iehova ena taunimanima na e diba momokani taunimanima edia gavamani ese Dirava ena ura baine ḡuḡuru karana na basie koua diba. Hitler ese tomadiho momokani na se haorea bona Dirava ena Basileia e hereaia gavamanina ta se haginia. Tadikaka taihu na e diba momokani Hitler ena lohia siahuna na baine ore.

¹⁷ Unu tadikaka taihu edia lalohadai na maoro. Laḡani haida muridiai, Nazi gavamanina na e moru. Heinrich Himmler, “tanobada ai baia lohia” herevana e gwauraia tauna, na e heau. Bena ia ese Tadikaka Lübke, guna dibura rumai e nohova tauna, e davaria. Himmler na mai dibana una tadikaka na Witnes ta. Himmler na e diba ia na se kwalimu, bona Tadikaka Lübke e nanadaia eto: “Bible Student, dahaka be varamu?” Tadikaka Lübke ese Himmler e hamaoroa, Iehova ena Witnes na e diba momokani Nazi gavamani na be morumu, bona idia na una gavamani amo be ruhadiamu. Himmler​—guna Iehova ena Witnes taudia e hadikadiava tauna ​—na una nega ai, hereva ma ta se gwauraia lou. Se daudau sibona e hemata. Unu amo dahaka ta dibamu? Baibul bona peroveta herevadia istadilaidia karana amo iseda abidadama Dirava enai baita hagoadaia, bona daḡedaḡe negadiai baita gini goada.​—2 Pet. 1:19-21.

18. Ioane 6:67, 68 heḡereḡerena, dahaka dainai Filipi 1:9 ai Paulo na e gwa, “diba maoromaorona bona laloparara korikorina” baita abia na namo?

¹⁸ Ita ta ta ese Kristen lalokauna baita hahedinaraia. To danu ita ese “diba maoromaorona bona laloparara korikorina” baita abia na namo. (Fili. 1:9, NWT) Unu amo taunimanima edia ‘hahediba herevadia lai na heto, taunimanima edia kara gageva-gagevadia bona koikoidia’ bona aposteit karana danu ese basie hakauda kerere. (Efe. 4:14) Aposetolo edia negai, hahediba momo ese Iesu e rakatania neganai, aposetolo Petro na e abia dae herevana e gwauraia, eto, “mauri hanaihanai herevadia” na Iesu enai. (Ioane 6:67, 68 ba duahi.) Ena be una negai Petro ese unu hereva iboudiai na se lalopararalai, to Iesu e badinaiava badina Keriso sivaraina momokanina na mai dibana. Oi danu, Baibul ena hahediba herevadia ai emu abidadama ba hagoadaia. Bema unu bo kara tomamu, nega aukadia ai emu abidadama na be goadamu, bona ma haida bo durudiamu edia abidadama bae hagoadaia totona.​—2 Ioa. 1, 2.