1. Filipi 2:3 ena sisiba be dahaka, bona baita badinaiamu ena namo be dahaka?

MAI manauda ida Iehova ena taravatu baita badinadia, badina Iehova na mai dibana dahaka ese ita baine duruda. (Efe. 4:22-24) Baita manaumu neganai, Iehova ena ura baita atoa gunamu bona ma haida baita lalodia badamu. Unu amo eda hetura karana Iehova bona tadikaka taihu ida na be namomu.​—Filipi 2:3 ba duahia.

2. Aposetolo Paulo be dahaka e lalopararalaia, bona ina atikol ai dahaka baita herevalaimu?

² Bema basita henari namonamomu, tanobada taudia edia hekokoroku bona sibodia e helalomu karana baita tohotohoamu. * Toana na Kristen taudia ginigunadia haida ediai una na hekwakwanai ta, badina aposetolo Paulo na Roma taudia e hamaorodia, eto: “Umui ta ta na haduamuimu, basio hekokoroku, a lalomui bae manau.” (Roma 12:3) Paulo na e laloparara siboda ese eda namo na baita lalo bada diba. To manau karana ese be durudamu lalohadai maorona baita abia totona. Ina atikol ai mauri ai e varamu ḡaudia toi baita herevalaimu, edena dala ai manau karana ese baine duruda basita hekokoroku totona. Unu na (1) headava, (2) iseda hesiai ḡaukara, bona (3) social media ta ḡaukaralaiamu neganai.

3. Dahaka dainai headava lalonai hekwakwanai e varamu, bona haida ese edena dala ai e hamaoromaorodiamu?

³ Iehova na e uramu headava taudia na bae moale. To idia  na dia ḡoevadae dainai ḡau haida na basie lalotamonalaimu. Momokani, Paulo na e gwa headava taudia na hekwakwanai haida be davarimu. (1 Kor. 7:28) Haida na nega momo adavadia ida e heaimu, bona e laloamu reana matamanai basiema headava na namo. Bema tanobada ena lalohadai be badinaiamu, be laloamu bae divos na namo. Bona be laloamu, ḡau badana na sibodia edia ura bae ato guna.

4. Edena lalohadai baita dadaraia na namo?

⁴ Headava baine dika lalohadaidia baita dadarai na namo. Baita helalotao, Baibul na e gwaumu badi tamona na matabodaḡa karana dainai ta na adavana ida bae divos diba. (Mat. 5:32) Paulo ena hereva heḡereḡerena, headava taudia ese hekwakwanai na be davarimu, to unu hekwakwanai e varamu neganai, siboda eda namo basita lalo bena baitato: ‘Adavagu ese lau e lalogumu, eiava? Adavagu ese lau e lalokau henigumu, eiava? Bema ta ma ba adavaiamu lau be hamoalegumu, eiava?’ Bema unu baita lalo tomamu, ita na siboda eda namo ta lalomu, to adavada edia namo na asita lalomu. Ina tanobada aonegana ese be dorimumu emu ura ba badinaia bona oi e hamoalemumu ḡaudia ba kara, ena be una ese emu headava na be hadikaiamu. Baibul na e gwaumu, “ta ta ena namo ena namo basio tahu, a bamomui edia namo ba tahu.” (Fili. 2:4) Iehova na e uramu emui headava na baine noho hanaihanai, to se uramu ba divos. (Mat. 19:6) Ia na e uramu ia bavatoa guna, dia oi sibomu.

5. Efeso 5:33 ena hereva bamona, headava taudia ese ededia kara bae hahedinarai?

⁵ Namona na tau bona hahine na bae helalokau heheni bona bae hemataurai heheni. (Efeso 5:33 ba duahia.) Baibul ese e hadibadamu, ḡau ihenina karana baita laloa bada, to dia ḡau iabina karana. (Apos. 20:35) Edena kara ese headava tau bona hahine baine durudia lalokau bona hemataurai bae hahedinarai? Una na manau  karana. E manaumu headava taudia na sibodia edia namo asie tahumu, to ‘dekena tauna ena namo danu e tahuamu.’​—1 Kor. 10:24.

6. Steven bona Stephanie edia hereva amo dahaka o dibamu?

⁶ Manau karana ese Kristen headava taudia momo e durudiamu edia headava bae moalelaia totona. Heḡereḡere, headava tauna ta ladana Steven na e gwa: “Bema oi bona adavamu na tim ta bamona o ḡaukara hebou namonamomu, hekwakwanai negadiai danu umui na bo ḡaukara heboumu. Basio lalo, ‘lauegu ai dahaka be namo?’ to ba lalo ‘aiemai ai dahaka be namo?’” Ia adavana Stephanie danu unu e lalo toma, e gwa: “Ta na se uramu inaina ida baine noho. Hekwakwanai ta e varamu neganai, ai ese una hekwakwanai badina a tahuamu. Bena a ḡuriḡurimu, eda pablikeisin haida a duahimu, bona ihamaoromaorona dalana a herevalaiamu. Asia heaimu, to a hekwarahimu una hekwakwanai baia hamaoromaoroa.” Headava tatau bona hahine na e moalemu bema asie laloamu ta ese ma ta na e hereaiamu.

7. Tadikaka ta na maduna ta e abiamu neganai, edena lalohadai maorona baine abia?

⁷ Dala idauidau ai Iehova ta hesiai heniamu na hahenamo badana. (Sal. 27:4; 84:10) Bema tadikaka ta na e uramu Iehova ena orea lalonai ḡaukara ma haida baine kara, una na namo herea. Momokani, Baibul na e gwaumu: “Tau ta ese heitatao dagina baine tahua, ia na dagi namona baine ura henia.” (1 Tim. 3:1) To bema maduna ta baine abia, basine laloa ia ese ma haida na e hereadiamu. (Luka 17:7-10) Iena ura ḡauna na mai manauna ida ma haida baine hesiai henidia.​—2 Kor. 12:15.

8. Diotrefe, Usia, bona Absalom sivaraidia amo dahaka ta dibamu?

⁸ Baibul lalonai sibodia e helalo bada taudia sivaraidia danu mimia, ita ihadibada totona. Diotrefe na se manau to kongrigeisin taudia bogaraḡidiai ‘sibona e heimodai.’ (3 Ioa. 9) Usia na e hekokoroku dainai e ura Iehova ese se henia ḡaukarana baine karaia. (2 Sis. 26:16-21) Absalom na koikoi dalanai taunimanima lalodia e veri badina e ura king dagina baine abia. (2 Sam. 15:2-6) Unu Baibul sivaraidia ese e hahedinarai ḡoevaḡoevamu, sibodia edia namo e tahumu taudia na Iehova ese se lalonamo henidiamu. (Her. 25:27) E hekokorokumu bona e uramu ma haida ese bae lalodia bada taudia na gabeai, hekwakwanai momo bae davari.​—Her. 16:18.

9. Edena dala ai Iesu na haheitalai namona?

⁹ To Iesu na dia unu hekokoroku taudia heḡereḡeredia. Baibul na e gwaumu: “Ena be Dirava anitarana e abia, ena be ia Dirava ida vada e heḡereḡere, to se haeroa una na baine dogoa tao ḡauna.” (Fili. 2:6) Iehova henunai Iesu na siahu tauna iharuana, to ia na se hekokoroku. Ena hahediba taudia e hamaorodia, eto: “Badina be umui bogaraḡimui ai maraḡi-herea tauna na bada.” (Luka 9:48) Painia taudia, hesiai taudia, elda taudia, bona seket taudia ida ta ḡaukara heboumu na hahenamo badana, badina idia na Iesu bamona manau karana e hahedinaraiamu. Bema baita manaumu, ma haida ediai lalokau baita hahedinaraiamu. Bona Iesu na e gwa Dirava ena hesiai taudia korikoridia na bae helalokau heheni.​—Ioa. 13:35.

10. Dahaka ba kara diba bema kongrigeisin ai hekwakwanai haida e varamu bona o laloamu elda ese dala maorona ai asie hamaoromaoromu?

¹⁰ Dahaka ba kara diba bema o itaiamu kongrigeisin ai hekwakwanai haida na e varamu, bona elda ese dala maorona ai asie  hamaoromaoromu? Basio maumau, to namona na mai manaumu ida elda taudia ba durudia. (Heb. 13:17) Unu ba kara toma totona, sibomu ba henanadai: ‘Ina be momokani hekwakwanai badana bona bae hamaoromaoroa haraḡa be namo, eiava? Ina be nega maorona una hekwakwanai bae hamaoromaoroa totona, a? Una be lauegu maduna baina hamaoromaoroa totona, a? Lau be na uramu kongrigeisin ai lalotamona baine mia, eiava na uramu sibogu ladagu baina abia isi?’

11. Efeso 4:2, 3 heḡereḡerena, mai manauda ida Iehova baita hesiai heniamu neganai, dahaka baine vara diba?

¹¹ Iehova ese taunimanima edia manau karana e laloa badamu, to dia edia diba, bona edia lalotamona karana e laloa badamu, o dia bae haḡuḡuru ḡaudia. Una dainai, ba ḡaukara goada mai manaumu ida Iehova ba hesiai henia. Unu bo kara tomamu neganai, oi ese kongrigeisin lalonai lalotamona bo havaraiamu. (Efeso 4:2, 3 ba duahi.) Haroro ḡaukarana ba goadalaia. Dala ba tahu ma haida ba kara namo henidia. Taunimanima iboudiai ediai heabidae karana ba hahedinaraia, kongrigeisin ai asi edia maduna taudia danu. (Mat. 6:1-4; Luka 14:12-14) Mai manaumu ida tadikaka taihu ida o ḡaukara heboumu neganai, idia na be itaiamu oi na dia mai emu diba mo, to mai anina bada ḡauna na be itaiamu oi na manau karana o hahedinaraiamu.

12. Baibul ese tura namodia baita abi dalana be ede e herevalaia tomamu?

¹² Iehova na e uramu turada bona eda ruma bese ida hebamo karana baita moalelaia. (Sal. 133:1) Iesu na mai turana  namodia. (Ioa. 15:15) Baibul ese tura korikoridia baita bamodia karana ena namo e herevalaia. (Her. 17:17; 18:24) Bona e hadibadamu dia namo turada baita hadaudaudia eiava siboda baita noho. (Her. 18:1) Momo na e laloamu social media e ḡaukaralaiamu neganai, turadia momo e davaridiamu, bena e hemamimu idia na dia sibodia. To, namona na social media amo ma haida ihereva henidia karana baita naria namonamo.

13. Dahaka dainai social media e ḡaukaralaiamu taudia haida na e mamiamu idia na asi turadia bona e lalohisihisimu?

¹³ Ripoti haida ese e hahedinaraimu social media ai laulau, vidio bona hereva itadia totona edia nega bada e ḡaukaralaimu taudia na e mamiamu idia na asi turadia bona e lalohisihisimu. Dahaka dainai? Badina nega momo taunimanima ese edia mauri ai e varamu ḡau namodia na social media ai e atomu. Heḡereḡere idia sibodia, turadia, bona gabu namodiai e loa laulaudia e atomu. Unu laulau e itamu taudia ese laulau e atomu taudia edia mauri bona sibodia edia mauri e haheḡereḡeremu, bena e lalomu edia mauri ai ḡau namodia na asie varamu. Kristen taihu ta laḡanina 19 na e gwa: “Asina moalemu badina na itaiamu ma haida be wikeni ai moale karadia e karamu, to lau be ruma ai mo noho.”

14. Edena dala ai Baibul ena sisiba 1 Petro 3:8 ai ese ita baine duruda social media baita ḡaukaralaia namonamo?

¹⁴ Momokani, social media na dala maorona ai baita ḡaukaralaia diba​—heḡereḡere, ruma bese bona turada baita hereva henidia. To, reana o itaiamu social media ai laulau, vidio bona hereva e ato taudia na e heaḡimu bona e uramu taunimanima ese idia bae itadia. Toana na e gwaumu, “Lau a itagu.” Danu, haida na sibodia eiava ma haida ese e atomu laulaudiai hereva mirodia e toremu. Baibul ese Kristen taudia na e hagoadadiamu, bae manau bona ma haida edia hemami bae lalo, una dainai social media unu bae ḡaukaralaia toma na dia namo.​—1 Petro 3:8 ba duahia.

15. Edena dala ai Baibul ese baine duruda ladada iabi isina karadia baita dadaraia?

¹⁵ Bema oi na social media o ḡaukaralaiamu, sibomu ba henanadai: ‘Lau ese na atomu herevadia, laulaudia bona vidiodia ese e hahedinaraimu lau be na heaḡimu, a? Una  kara dainai ma haida ese lau be mama henigumu, a?’ Baibul na e gwaumu: “Badina be tanobada ḡaudia iboudiai, tau-anina ena heḡahusi, mata-dika, mauri ena heaḡi kava, ini na dia Tamada ena amo, a tanobada ena amo e maimu.” (1 Ioa. 2:16) Baibul ma ta ese ina hereva, “mauri ena heaḡi kava” na ini bamona e gwauraia, “ta na e uramu baine hahedinaraia ia na lada bada tauna.” Dia namo Kristen taudia na bae laloa idia na lada bada taudia eiava ma haida ese bae heaḡilaidia. Idia ese Baibul ena sisiba bae badinaia, e gwaumu: “Basita hekokoroku; basita heai heheni; basita heḡahusi heheni.” (Gal. 5:26) Bema baita manaumu, ina tanobada taudia ese e hahedinaraimu hekokoroku bona lada iabi isina karadia na baita dadaraimu.

16. Dahaka dainai hekokoroku karana baita dadaraia na namo?

¹⁶ Namona na manau karana baita hahedinaraia badina hekokoroku taudia na asie ‘lalo manaumu.’ (Roma 12:3) Hekokoroku taudia na e hepapahuahu momomu bona e laloamu idia ese ma haida e hereadiamu. Nega momo edia lalohadai bona kara amo sibodia lalodia e hahisimu bona ma haida lalodia danu e hahisimu. Bema edia lalohadai basie haidaumu, Satana ese lalodia be hadiburamu bona be hadikaia dibamu. (2 Kor. 4:4; 11:3) To manau tauna ena kara na idau, ia na e lalo manaumu. Ia na se hekokorokumu, mai dibana haida ese ia na e hereaia. (Fili. 2:3) Bona ia na mai dibana “Dirava ese hekokoroku taudia e laodia ahumu, a manau taudia e harihari henidiamu.” (1 Pet. 5:5) Lalo manau taudia na asie uramu Iehova na inaidia ai bae halaoa.

17. Baita manau totona dahaka baita kara be namo?

¹⁷ Baita manau totona, namona na Baibul ena sisiba baita badinaia, e gwaumu: “Tau gunana mai ena dika vada o dokia oho, tau matamatana vada o hahedokilaia.” Unu baita kara toma totona baita ḡaukara goada. Namona na Iesu ena haheitalai baita stadilaia bona baita tohotohoa. (Kol. 3:9, 10; 1 Pet. 2:21) Bema unu baita kara tomamu hahenamo baita davarimu. Manau karana baita hahedinaraiamu neganai, iseda ruma bese maurina be namomu, kongrigeisin ai lalotamona be miamu, bona social media na basita ḡaukaralaia kereremu. To ḡau badana na Iehova ena hahenamo bona lalonamo baita abiamu.