Lau na laḡani 1954 ai na vara, St. Paul, Minnesota, U.S.A. ai. Egu famili na Roman Catholic dubuna e laova. Ai iboumai na 5, bona lau be iharuana. Lau na Catholic elementary skulina ta ai na skuli, bona pris iduruna ḡaukaradia na karava. To, egu diba Baibul ai na maraḡi. Ena be na abia daeva ḡau iboudiai ihavaradia Diravana na e nohomu, to na dibava Catholic dubuna ese basine durugumu Ia baina tomadiho henia.

Laḡani ginigunana William Mitchell College of Law ai na skuliva lalonai, Iehova ena Witnes tauna ta bona adavana na egu ruma ema. Lau na egu dabua na huriva dainai, idia na mai hematauraidia ida e gwa gabeai bae lou mai. E lou mai neganai, lau ese henanadai rua na heni: “Dahaka dainai kara dika taudia na edia mauri e moalelaiamu, to kara namo taudia be lasi?” bona “Edena dala ai taunimanima ese moale korikorina bae davaria?” Lau ese ini buka, The Truth That Leads to Eternal Life bona New World Translation of the Holy Scriptures, grin ḡauna na abidia. Danu, Baibul stadi na abia dae. Una ese e durugu ḡau matamatadia momo na lalopararalai.  Na moalelaia ḡauna ta na, na diba Dirava ena Basileia na tanobada be lohiaiamu gavamanina. Lau ese na itaia taunimanima edia lohia dalana ese ḡau namona ta se havaraiamu, bona tanobada na hisihisi, kara gageva, bona dika amo e honu.

Laḡani 1982 ai, egu mauri na Iehova enai na gwauhamatalaia. Murina laḡanina ai, St. Paul Civic Centre ai “Kingdom Truth” Hebouhebouna ai na bapatiso. Wiki ta murinai, Civic Centre ma na lou lao bona Minnesota bar exam na karaia. October matamanai, e hadibagu egu maka na nanamo dainai lau na loea ḡaukarana baina karaia diba.

“Kingdom Truth” Hebouhebouna ai, Brooklyn Betele amo ela tadikakana Mike Richardson na hedavari henia, bona e hamaorogu hedkwota ai legal ofes ta e kehoa. Bena Aposetolo Edia Kara 8:36 ai, Etiopia eunuko tauna ena hereva na laloa bena sibogu na henanadai, ‘Dahaka ese e kougumu Legal Ofes ai baina ḡaukara totona?’ Una dainai Betele aplikeisin na atoa.

Iehova ena Witnes tauna ta ai nala neganai, tamagu bona sinagu na se moale. Tamagu ese e nanadaigu Betele ḡaukara ese egu loea ḡaukarana be ede be durua tomamu. Na hadibaia lau na volentia ḡaukarana ba karaiamu. Bona na hamaoroa lau na hua ta ta ai moni sisina ba abiamu, Betele taudia iboudiai ese e abimu heḡereḡerena.

Lau na kota rumana ai na karaiava ḡaukarana na haḡuḡurua murinai, laḡani 1984 ai Brooklyn, New York Betele ai na ḡaukara matama. Lau na Legal Ofes ai e atogu. Kota gabuna ai na ḡaukarava karana ese e haheḡaeḡaegu gabeai bae vara ḡaudia daidiai.

November 1983 ai, Jersey City, New Jersey ai, Stanley Theater e hoia. Tadikaka na una building ena paoa bona ranu paipadia bae hanamodia dainai e ura gavamani amo gwaumaoro bae abi. Tadikaka na gavamani taudia ida e hebou neganai, e gwa Stanley Theater na Iehova ena Witnes edia hebouhebou badadia totona bae ḡaukaralaia. To hekwakwanai ta e vara. Jersey City ena taravatu ta na, tomadiho rumadia na taunimanima e nohomu gabudia ai mo bae hagini na namo. Stanley Theater na siti ena bisnes gabuna ai dainai siti ofesa taudia na asie ura gwaumaoro bae heni. Una disisen dainai tadikaka ese appeal ta e atoa, to kota ese una na se abia dae.

Betele ai egu wiki ginigunana lalonai, orea ese una keis na distrik kota e laohaia. Lau na  laḡani rua St. Paul, Minnesota ena distrik kota ai na ḡaukara dainai, keis unu bamodia ikaradia na mai dibagu. Orea ena loea ta na kota lalonai e gwa, Stanley Theater na taunimanima ese moale karadia idauidau, heḡereḡere muvi bona miusik concerts ai, e ḡaukaralaia. To, dahaka dainai tomadiho totona baia ḡaukaralaia na taravatu? Distrik kota ese una e lalohadailaia murinai, e gwa Jersey City ese emai maoro tomadiho karadia ai na se matauraia. Kota ese gavamani na oda e henidia gwaumaoro bae heni. Na itaia Iehova ese iena orea e hanamoa dalana na legal office e ḡaukaralaia, unu amo iena ḡaukara baine habadaia. Na moale badina una ḡaukara na durua.

Tadikaka ese Stanley Theater ihanamona ḡaukarana e hamatamaia, bena hua haida muridiai, September 8, 1985 ai, Gilead Skuli ena klas namba 79 edia gradueisin na unuseniai e karaia. Lau na legal ofesi ai ma haida ida na ḡaukara hebou Basileia ḡaukaradia na durua karana na hahenamo ta, na mamia moalena ese guna na karaia loea ḡaukarana ena moale e hereaia. To, lau na asina diba Iehova ese hahenamo momo do baine henigu.

Laḡani 1980 lalodiai, Witnes taudia e noinoiva rara amo medikol heduru basie abi neganai dokta bona hospele momo ese una na se matauraiava. Rogorogo hahinedia na hekwakwanai badadia e davariva, badina judges na e gwauva hahine na asi edia maoro rara abi karana bae dadaraia. Judges na e gwauva bema hahine ta na rara basine abimu, ia na baine mase diba bena beibi na asi sinana.

December 29, 1988 ai, Taihu Denise Nicoleau na natuna merona e havaraia murinai, rara bada herea e negea. Iena hemoglobin na e diho 5.0 dainai dokta ese e noia gwaumaoro baine henia unu amo taihu ese rara baine abi. Taihu Nicoleau na se ura. Daba ai, hospele taudia ese judge ta e noia gwaumaoro bae heni, unu amo taihu na rara baine abi. Judge ese Taihu Nicoleau bona adavana edia lalohadai na se tahua, bona se hadibadia ia ese hospele taudia na gwaumaoro e henidia taihu na rara bae henia.

December 30, Friday ai, hospele taudia ese taihu Nicoleau na rara e henia, ena be adavana bona bese taudia haida ese una na asie abia dae. Una hanuaboi ai, pulisi ese taihu ena bese taudia haida bona elda ta o rua e arestidia, badina idia ese Taihu Nicoleau ena bedi e ginia heḡeḡe unu amo hospele taudia e koudia taihu na rara basie henia. December 31, Saturday daba ai, New York  City bona Long Island edia niuspepa, TV bona reidio ai una sivarai e halasia.

Monday daba ai, lau ese kota badana ta ena Judge Milton Mollen na hereva henia. Lau ese una keis na herevalaia bona na hamaoroa una judge ese taihu ena keis na se kamonaia, bona rara bae heni pepana e sainia. Judge Mollen ese e noigu una adorahi ai iena ofesi bainala bona una keis bona ena taravatu baia herevalaidia. Una adorahi ai, egu overseer, Philip Brumley ese e bamogu bena Judge Mollen ena ofesi ala. Judge ese hospele ena loea danu e boiria. Ai na a hepapahuahu. Una nega ai, Tadikaka Brumley na ena notepad ai ina hereva, “asio hereva auka” e torea, baina itaia totona. Una hereva ese e durugu badina lau na mai badugu ida na urava baina hamomokania hospele ena loea ena hereva na kerere.

Hora ta murinai, Judge Mollen e gwa, kerukeru dabai, una keis na baia karaia guna. Ai na Judge Mollen ena ofesi a rakataniava lalonai, ia na e gwa hospele ena loea na “kerukeru ḡaukara metauna” ta be karaiamu. Una anina na namona na kota ai hospele ena loea na baine hamomokania dahaka dainai Taihu Nicoleau e doria rara e abia karana na maoro. Na mamia Iehova na vaitani lau e hadibaguva una kota ai baia kwalimumu. Una ese e durugu baina manau, badina Iehova na ai e ḡaukaralaimaiva iena ura baia haḡuḡurua totona.

Ai na una hanuaboi ibounai lalonai a ḡaukara, kota ai baia herevalaia ḡaudia a heḡaeḡaelaiva. Kota rumana na dia daudau Brooklyn Betele amo, una dainai ai emai Legal Ofes taudia momo na e raka hanai. Judge foa ese emai hereva e kamonai murinai e gwa hospele taudia ese rara na basiema heni. Kota badana na Taihu Nicoleau ena kahai e gini, bona idia na e gwa ta ese gorere tauna ena hereva se kamonaiamu bena order ta e sainiamu karana ese taunimanima ta ena maoro taravatuna (constitutional rights) e utuamu.

Se daudau State of New York City ena kota badana ese e hamomokania Taihu Nicoleau na mai ena maoro rara abi karana baine dadaraia. United States ena kota badadia ai, rara basie heni karana ena keis foa amo, ina keis na ginigunana. Launa na moale badina unu keis lalodiai na heduru. (Maua ladana “Supreme Court ai Haida Na E Kwalimu”  ba itaia.) Danu, Betele ai loea ma haida ida na ḡaukara hebou keis haida a kara, heḡereḡere child custody, divorce, real estate, bona tano iḡaukaralaina bona ruma ihaginina edia taravatu.

Nega ginigunana adavagu Dawn ida a hedavari neganai, ia na e divos bona natuna na tatoi. Ia na moni ḡaukarana e karaiava bona e painiava. Iena mauri na auka, to Iehova e hesiai heniava karana dainai na ura henia. Laḡani 1992 ai, New York City ai, “Light Bearers” Distrik Hebouhebouna ala neganai, na nanadaia bema namo baia hebamo. Laḡani ta murinai a headava. Lau adavagu na lauma ḡaudia e lalo badamu, moale bona lalokau hahinena dainai na mamia ia na harihari ḡauna Iehova amo. Ai raruosi emai mauri lalonai, Dawn ese kara namodia e hahedinarai.–Her. 31:12.

Ai a headava neganai, ia natuna laḡanidia na 11, 13 bona 16. Lau na ura tama namona ai bainala dainai stepparent e herevalai pablikeisin na stadilaidia namonamo bona na badinadiava. Laḡani momo lalodiai na hekwarahi, to na moale badina Dawn natuna tatoiosi ese e abigu dae idia turadia namona bona tamadia lalokauna. Ai ese natumai turadia na emai ruma ai a abidia daeva bona matamata taudia ese emai ruma e hahonuava neganai ai na a moaleva.

Laḡani 2013 ai, lau bona Dawn na tamamai bona sinamai burukadia baia naridia totona Wisconsin ala. To, launa na hoa badina egu Betele hesiai ḡaukarana na se doko. E boirigu dounu iseda orea ena kota ḡaukaradia ai baina heduru.

September 2018 ai, na hemami na urava baina hereva negadiai na hua momova. Emai dokta ese e sekegu, to ḡau ta se davaria. Gabeai, dokta ma ta e gwa neurologist ta baina itaia. January 2019 ai, neurologist ese e hamaorogu lau na progressive supranuclear palsy (PSP) gorerena na abia bona una gorere ese taina ruana tauanigu be hadikaiamu.

Dina toi muridiai, lau ese na ura heniava gadarana (ice skating) ai na gadarava lalonai na moru bena imagu idibana (wrist) na e makohi. Una spot na egu mauri ibounai na gadara dainai na manada. Una nega amo na diba egu marere daladia na basina biagu dibamu. Lau na hoa badina una gorere na e bada haraḡa. Egu hereva, tauanigu ihamarerena dalana bona aniani ihadonona karana na e auka.

Lau ese loea ḡaukarana amo Iehova ena orea na durua na hahenamo badana. Bona na moalemu badina magasin haida (professional journals) ai atikol momo na toredia bona loea bona judge ese unu na e duahimu. Danu, tanobada heḡeḡemadai ai medicolegal seminars e heabiva negadiai, Iehova ena taunimanima edia maoro rara lasi opereisin bona medikol hedurudia bae abi hidi daladia na herevalaiva. To, Luka 17:10 ena hereva heḡereḡerena: ‘Lau na hesiai tauna dia namo, badina be e haduagu karadia mo vada na kara.’