1. 3 Ioane 3, 4 heḡereḡerena, dahaka ese ita e hamoaledamu?

APOSETOLO IOANE na e moale dikadika badina e kamonai ia ese e durudia hereva momokani e abia taudia na mai lalodia idoinai ida Iehova e hesiai heniava. Idia na hekwakwanai momo e davari, bona Ioane na e hekwarahi bada unu Kristen taudia edia abidadama baine hagoadaia totona. Idia na vaitani ia natuna na heto. Una heḡereḡerena, ita natuda eiava ta durudia hereva momokani e abia taudia edia mauri na Iehova enai e ḡwauhamatalaimu bona ia e hesiai heniamu neganai, ta moale dikadikamu.​—3 Ioane 3, 4 ba duahi.

2. Dahaka dainai Ioane ese unu revareva e toredia?

² Laḡani 98 C.E. ai, Ioane na Efeso lalonai eiava badinai e nohova. Ia na Patamo motumotu ena dibura ruma amo e lasi neganai, reana unu ela. Una nega ai, Iehova ena lauma helaḡa ese e hasiahua revareva toi baine toredia. Unu revareva e tore badidia na abidadama Kristen taudia bae durudia Iesu enai edia abidadama bae hagoadaia bona hereva momokani dalana ai dounu bae raka.

3. Ededia henanadai baita haerelaimu?

³ Una negai Ioane mo aposetolo tauna, bona hahediba koikoi taudia ese kongrigeisin e hakaua kerereva dainai ia na e lalohekwarahi. * (1 Ioa. 2:18, 19, 26) Unu aposteit taudia na e gwauva Dirava na mai dibadia, to idia ese Iehova ena haheḡani na asie badinava. Mani Ioane ese e gwauraia sisibana aita laloa. Ina atikol ai una sisiba baita herevalaiamu, bona ini henanadai toi baita haerelaimu: Hereva momokani ai baita raka anina be dahaka? Dahaka ese bae kouda diba?  Bona hereva momokani lalonai baita noho totona, edena dala ai baita heduru heheni?

4. 1 Ioane 2:3-6 bona 2 Ioane 4, 6 heḡereḡeredia, hereva momokani ai baita raka anina be dahaka?

⁴ Hereva momokani ai baita raka anina na, Dirava ena Hereva lalonai hereva momokanidia baita diba na namo. Danu, Iehova “ena haheḡani baita badina” na namo. (1 Ioane 2:3-6; 2 Ioane 4, 6 ba duahi.) Iehova ibadinana ai Iesu na haheitalai namona. Iehova baita badinaia dalana badana ta na, Iesu ena haheitalai baita tohotohoa.​—Ioa. 8:29; 1 Pet. 2:21.

5. Dahaka baita abia dae na namo?

⁵ Hereva momokani ai baita raka totona, namona na baita abia dae Iehova na Dirava momokanina, bona Baibul lalonai e tore herevadia iboudiai na momokani. Danu baita abia dae Iesu na e ḡwauhamatalaia Mesiana. Hari, momo na asie abia daemu Iesu na Dirava ese e horoa iena Basileia ena King ai e halaoa. Ioane na e gwa, “koikoi taudia hutuma” ese Iehova bona Iesu e herevalaidiamu hereva momokanidia asie abi daemu taudia na bae koidia diba. (2 Ioa. 7-11) Ioane na e gwa: “Koikoi tauna be daika? Iesu na dia Keriso e tomamu tauna, ani.” (1 Ioa. 2:22) Ma haida ese basie koida totona, dala tamona na Dirava ena Hereva baita stadilaia. Unu amo Iehova bona Iesu baita dibadiamu. (Ioa. 17:3) Bema unu baita kara tomamu, baita dibamu hereva momokani vada ta abia.

6. Dahaka ese Kristen memero kekeni baine koudia diba?

⁶ Kristen taudia iboudiai na bae henari namonamo, taunimanima edia hahediba herevadia ese basie hakaudia kerere. (1 Ioa. 2:26) To, Kristen memero kekeni na una kara ai bae henahua toho na namo. French taihuna ta, Alexia, * laḡanina na 25, na ini e gwa toma: “Ḡuna na skuliva neganai, taunimanima edia lalohadai bona evolusen hahedibana dainai, hereva momokani na daradaralaia. Nega haida, na lalova unu hahediba herevadia na maoro. To, na hemami dia namo skuli ai e hadibalaigu herevadia mo baina kamonai, bena Baibul amo na dibadia ḡaudia baina lalodia maraḡi.” Una dainai, Alexia ese Life​—How Did It Get Here? By Evolution or by Creation? bukana  e stadilaia. Wiki haida muridiai, ia ese e daradaralai ḡaudia haeredia e davari. Alexia na e gwa: “Sibogu ese na hamomokania Baibul ai e hetore herevadia na momokani. Bona na laloparara Baibul ena haheḡani baina badinadia neganai, una ese moale bona maino baine henigu.”

7. Edena kara baita dadaraia na namo, bona dahaka dainai?

⁷ Kristen taudia iboudiai, matamata bona buruka ese mauri daladia rua ibadinana karana bae dadaraia na namo. Ioane ese e hahedinaraia dia namo hereva momokani ai baita raka, bona mauri dala kererena baita badinaia. (1 Ioa. 1:6) Bema ita na ta uramu Iehova ese baine lalonamo henida, hanaihanai baita helalotao ta karamu ḡaudia iboudiai na Iehova ese e itamu. Ena be hehuni ai ta karamu karadia na haida ese asie itamu, to Iehova vairanai ḡau iboudiai na hehedinararai.​—Heb. 4:13.

8. Dahaka baita dadaraia na namo?

⁸ Tanobada taudia ese kara dika e laloamu dalana baita dadaraia na namo. Aposetolo Ioane na e gwa: “Ita baitato ita na asi eda kara dika, be siboda baita hekoi.” (1 Ioa. 1:8) Ioane ena nega ai, aposteit taudia na e gwauva ta na baine kara dika, to dounu Dirava turana ai bainela diba. Hari, ita na una lalohadai e badinaiamu taudia padadiai ta nohomu. Momo na e gwaumu idia na Dirava e abidadama heniamu, to Iehova ese kara dika e laloamu dalana na asie abia daemu, heḡereḡere mahuta hebou karana. Iehova ese mahuta hebou karadia haida na e gwauraidiamu kara dikadia, to taunimanima na e gwaumu bema ta na e uramu unu kara baine kara, una na asi ena kerere.

9. Kristen memero kekeni ese Baibul ena hereva be badinamu ena namo be dahaka?

⁹ Kristen memero kekeni ediai na be aukamu mahuta hebou karana bae laloa maoromaoro totona, badina e skulimu eiava e ḡaukaramu gabudiai taunimanima na Baibul ese mahuta hebou karana e herevalaiamu dalana na asie abia daemu.  Aleksandar enai unu bamona e vara. Ia na e gwa: “Skuli ai kekeni haida na lau lalogu e veriava idia ida baina mahuta hebou. Idia na e gwauva, lau na asi egu kekeni dainai, reana lau na geligeli.” Bema hahetoho unu bamodia bo davarimu, ba helalotao Baibul ena hereva bo badinamu neganai, emu hemami na be namomu, basio goreremu, basio lalohisihisimu, bona emu hetura karana Iehova ida na bo gimaiamu. Bona nega ta ta ai hahetoho bo hanaidiamu neganai, una ese be durumumu kara maorona ba karaia totona. Danu, ba helalotao, tanobada taudia ese mahuta hebou karana e laloamu dalana na Satana ena lalohadai heḡereḡerena. Una lalohadai bo dadaraiamu neganai, oi ese “dika tauna vada o hadarerea.”​—1 Ioa. 2:14.

10. Edena dala ai 1 Ioane 1:9 ese ita e durudamu mai laloda ḡoevana ida Iehova baita hesiai henia?

¹⁰ Ita na ta abia daemu Iehova na mai ena maoro baine gwa edena kara be kara dikana. Bona ta hekwarahimu kara dika ta basita karaia totona. To kara dika ta ta karaiamu neganai, ḡuriḡuri amo iseda dika na Iehova enai ta gwaurai hedinaraimu. (1 Ioane 1:9 ba duahia.) Bona bema kara dika badana ta ta karaiamu, namona na Iehova ese e abidia hidi elda taudia amo heduru baita abi. (Iak. 5:14-16) To, guna ta kara kara dikadia na basita lalodia loulou. Dahaka dainai? Badina Tamada lalokauna ese Natuna ena mauri davana amo iseda kara dikadia vada e gwautao. Iehova na e gwa helalo-kerehai taudia edia dika na baine gwautao, una na baine karaia momokani. Una dainai ḡau ta ese basine koudamu mai laloda ḡoevana ida Iehova baita hesiai henia totona.​—1 Ioa. 2:1, 2, 12; 3:19, 20.

11. Edena dala ai eda abidadama baine hadikaia hahediba herevadia dainai laloda baita gimaia na namo?

¹¹ Aposteit taudia edia hahediba herevadia baita dadarai na namo. Kristen kongrigeisin e matama negana amo Diabolo ese koikoi taudia momo e ḡaukaralaidiamu Dirava ena  hesiai taudia lalodia bae hadaradara totona. Una dainai, ita ese hereva momokani bona hereva koikoi edia idau baita dibadia na namo. * Ita inaida ese iseda abidadama Iehova enai bona eda lalokau tadikaka taihu ediai baine hadika totona, intanet amo sivarai koikoidia be halasimu. To, unu na Satana amo e maimu dainai baita dadaraidia.​—1 Ioa. 4:1, 6; Apok. 12:9.

12. Dahaka dainai ta diba hereva momokanidia ese iseda abidadama baine hagoadaia?

¹² Satana ena hahetoho baita dadarai totona, namona na Iesu bona Iehova ese Iesu e ḡaukaralaiamu Iena ura baine haḡuḡurua dalana baita abidadama henia. Danu, Iehova ese e ḡaukaralaiamu oreana mo baita abidadama henia na namo. (Mat. 24:45-47) Dirava ena Hereva istadilaina karana amo iseda abidadama baita hagoadaia. Bena iseda abidadama na au ta bamona, ramuna na tano lalonai e diho momokani. Paulo na Kolose kongrigeisin e tore henia neganai, hereva unu bamona ta e gwauraia. Ia na e gwa: “Taunabunai, Keriso Iesu vada o abia lava dae heḡereḡerena, ienai ba raka. Ia lalonai ba haheholo kau; ia latanai ba hahedai kau; ia abiabiraina ai ba hahegoada.” (Kol. 2:6, 7) Bema baita hekwarahimu iseda abidadama baita hagoadaiamu, Satana bona ia e duruamu taudia na asi siahudia ita bae kouda hereva momokani lalonai baita raka totona.​—2 Ioa. 8, 9.

13. Ita be dahaka ta dibamu, bona dahaka dainai?

¹³ Ita na ta dibamu tanobada taudia ese be inai henidamu. (1 Ioa. 3:13) Ioane ese e hadibadamu “tanobada idoinai na dika tauna imana ai.” (1 Ioa. 5:19) Ina nega dokona e lao heniamu lalonai, Satana na e badu dikadikamu. (Apok. 12:12) Ia ese hahetoho idauidau heḡereḡere, matabodaḡa karadia bona aposteit taudia edia hereva koikoidia e ḡaukaralaimu, dia unu mo to daḡedaḡe karadia danu e ḡaukaralaimu. Satana na mai dibana ena nega na kwadoḡi herea dainai, ia na be uramu iseda haroro ḡaukara baine koua, bona iseda abidadama baine hadikaia. Asita hoamu badina tano haida ai iseda ḡaukara na e koua eiava e taravatua. Ena be unu e vara tomamu, to iseda tadikaka taihu na dounu e haheaukamu. Satana na ḡau idauidau e karamu ita baine hamorudia, to ita na dounu baita kwalimumu!

14. Tadikaka taihu na hereva momokani ai bae noho totona, baita durudia dalana ta be dahaka?

¹⁴ Tadikaka taihu na hereva momokani ai bae noho totona, baita durudia dalana ta na, hebogahisi baita hahedinaraia. (1 Ioa. 3:10, 11, 16-18) Namona na baita helalokau heheni, dia nega namodia ai mo, to hekwakwanai negadia ai danu. Heḡereḡere, oi mai dibamu ta na ena lalokau tauna ta e mase dainai, heduru bona tauhalo baine abia na namo, a? Eiava o kamonai tadikaka taihu haida na disasta ai edia kohu e haboio, bona e uramu edia Kingdom Hall eiava ruma bae haginidia lou, a? Dia eda hereva ai mo, to ḡau badana na eda kara amo baita hahedinaraia tadikaka taihu na ta lalokau henidiamu bona ta bogadia hisimu.

15. 1 Ioane 4:7, 8 heḡereḡerena, dahaka baita kara na namo?

¹⁵ Ma haida ediai lalokau ta hahedinaraiamu neganai, ita ese eda lalokau guba Tamana ta tohotohoamu. (1 Ioane 4:7, 8 ba duahi.) Lalokau baita hahedinaraia dalana ta na, dika baita gwautao heheni. Heḡereḡere, ta ese laloda be hahisiamu, to gabeai ma be gwaumu, sori. Lalokau baita hahedinaraia dalana na ena dika baita  gwautao bona ena kerere na baita laloboio. (Kol. 3:13) Tadikaka ta ladana Aldo na hahetoho unu bamona ta e davaria, ia ese e matauraiava tadikakana ta na Aldo ena gabu taudia e gwauraidia dika neganai, Aldo na e lalohisihisi. Ia na e gwa: “Hanaihanai Iehova na ḡuriḡuri heniava baine durugu una tadikaka basina badu henia.” To Aldo na ma ḡau ta danu e karaia. Una tadikaka e noia bae haroro hebou. Haroro lalonai, Aldo na una tadikaka e hamaoroa edena dalai iena hereva ese ia na e hahisia. Aldo na e gwa: “Una tadikaka na e diba iena hereva ese e hahisigu neganai, e sori. Iena hereva dalana amo na diba, ia na e gwaurai herevadia dainai ena hemami na e dika. Una murinai ai na ma tura namodia ai ala, bona una hekwakwanai na a laloaboio.”

16-17. Laloda baita hadai dahaka baita kara totona?

¹⁶ Aposetolo Ioane ese tadikakana e lalokau henidia bada, bona e ura edia abidadama na bae hagoadaia. Ena revareva toi lalodiai e heni sisibana ese una na e hahedinaraia. Ta dibamu Keriso ida gubai bae lohia tatau bona hahine na Ioane heḡereḡerena, tadikakadia e lalokau henidiamu bona e lalodia badamu!​—1 Ioa. 2:27.

¹⁷ Tame herevalaia sisibana na baita laloatao. Namona na laloda baita hadai, hereva momokani ai baita raka, bona ta karamu ḡaudia amo baita hahedinaraia ita na Iehova ta badinaiamu. Iena Hereva baita stadilaia, bona baita abidadama henia. Iesu baita abidadama henia. Taunimanima edia lalohadai bona aposteit taudia edia hahediba herevadia baita dadarai. Mauri daladia rua na basita badina, bona kara dikadia na baita dadarai. Iehova ena taravatu ḡoevadia baita badina. Bona tadikakada edia dika baita gwautao bona heduru e uramu neganai baita durudia unu amo bae goada. Ena be hekwakwanai idauidau ta davarimu, to hereva momokani ai baita raka.