1. Iehova be ita daidai dahaka e kara?

OI BE edena dalai Iehova ena Witnes ai ola? Ginigunana, readia “sivarai namona” na tamamu, sinamu, oi ida o ḡaukara heboumu eiava o skuli heboumu tauna ta amo, eiava ruma-ta-ruma-ta haroro ḡaukarana amo o kamonai. (Mar. 13:10) Bena ta na nega bada e heni oi baine stadi henimu. Una stadi lalonai, Iehova idibana karana amo ia o lalokau henia bona o diba ia danu oi e lalokau henimumu. Iehova ese oi na e verimu hereva momokani ba dibaia, bona hari, oi na Iesu Keriso ena hahediba tauna ta bona mauri hanaihanai helarona o abia. (Ioa. 6:44) Oi na Iehova o tenkiu heniamu badina ia ese ta e ḡaukaralaia oi e durumu hereva momokani o dibaia bona hari oi na iena hesiai tauna ta.

2. Ina atikol ai dahaka baita herevalaimu?

² Hari ita na da hereva momokani mai dibada dainai ita ese ma haida baita durudia mauri hanaihanai dalanai bae raka. Reana ita haida edai haroro ḡaukara na baita karaia diba, to ta hekwarahimu Baibul stadi ta baita hamatamaia. Oi danu unu o hemami tomamu, a? Bema oibe, ina atikol ese be herevalaimu heduru daladia na bo moalelaimu. Baita itaiamu dahaka ese be durudamu taunimanima na hahediba ai baita halaodia. Danu bema ta hekwarahimu Baibul stadi ta baita hamatamaia, unu hekwakwanai baita hanai daladia baita herevalaimu. Ginigunana, sivarai namona ta harorolaiamu bona ta hahedibalaiamu badina aita herevalaia.

3. Dahaka dainai ta haroromu?

³ Iesu tanobada ema neganai ena hahediba e haḡanidia ḡaukara rua bae kara. Ginigunana be, e hamaorodia Basileia  sivarai namona bae harorolaia, bona bae karaia dalana e hadibadia. (Mat. 10:7; Luka 8:1) Heḡereḡere, Iesu ese ena hahediba e hamaorodia dahaka bae kara bema ta na Basileia sivaraina baine abia dae eiava lasi. (Luka 9:2-5) Bona e hahedinaraia ena hahediba na gabu momo ai taunimanima momo bae haroro henidia. (Mat. 24:14; Apos. 1:8) Ena be taunimanima bae kamonai eiava lasi to Iesu ese ena hahediba e haḡanidia Dirava ena Basileia bona una Basileia ese baine havara ḡaudia bae harorolai.

4. Mataio 28:18-20 heḡereḡerena, dia Basileia sivaraina mo baita harorolaia to dahaka danu baita kara?

⁴ Iesu ese ena hahediba e haḡanidia bae karaia ḡauna iharuana be dahaka? Ia ese ena hahediba e hamaorodia taunimanima bae hadibadia ia ese e heni haheḡanidia iboudiai bae badina. Taunimanima haida na e gwaumu, Iesu ena haheḡani, haroro bona hahediba ḡaukarana na Kristen ginigunadia ese mo bae karaia. To una be momokani? Lasi, to Iesu na e gwa “ela bona tanobada dokona.” Anina na hari iseda negai danu una ḡaukara baita karaia. (Mataio 28:18-20 ba duahi.) Iesu na ena hahediba taudia 500 mai kahana ediai e hedinarai neganai, una haheḡani e heni. (1 Kor. 15:6) Ioane ena matahanai ai, Iesu ese e hahedinaraia ḡoevaḡoeva ia na e uramu ena hahediba taudia iboudiai ese ma haida bae durudia Iehova bae dibaia.​—Apok. 22:17.

5. Korinto Ginigunana 3:6-9 ai, Paulo ese haroro bona hahediba ḡaukarana be dahaka ida e haheḡereḡerea?

⁵ Aposetolo Paulo ese hahediba ihalaodia ḡaukarana na biru ḡaukarana ida e haheḡereḡerea, e hahedinaraia ita na dia uhe mo baita hado. Ia ese Korinto taudia e hadibadia, eto: “Lau ese na hadoa; Apolo ese e dairia; . . . umui na Dirava ena uma.” (1 Korinto 3:6-9 ba duahi.) Ita na “Dirava ena uma” ai ta ḡaukaramu tauda dainai ta haroromu neganai ita na vaitani uhe ta hadomu, bona ta hahedibamu neganai ita na vaitani uhe na ranu amo ta dairiamu. (Ioa. 4:35) To, ta lalopararamu Dirava sibona ese una uhe e hatubuamu, anina na ia ese taunimanima e veridiamu ia bae dibaia.

6. Taunimanima ta hadibadiamu neganai ta uramu baita durudia dahaka bae kara?

⁶ Ita na e “abidia hidi mauri hanaihanai” bae abia taudia ta tahudiamu. (Apos. 13:48) Hahediba ai baela totona baita durudia Baibul amo e dibamu ḡaudia na (1) bae lalopararalai, (2) bae abi dae, bona (3) bae badina. (Ioa. 17:3; Kol. 2:6, 7; 1 Tes. 2:13) Kongrigeisin taudia iboudiai ese Baibul stiuden bae durudia, hebou e maimu negadiai lalokau bae hahedinaraia bona bae welkam henidia. (Ioa. 13:35) Stadi e hakauamu tauna na reana nega bada be atomu stiuden be duruamu hahediba hereva koikoidia eiava karadia baine dadarai totona. (2 Kor. 10:4, 5) Reana ta na hua momo lalodiai unu sensi be karamu, unu amo gabeai baine heḡereḡere bapatiso baine abi. To una hekwarahi na mai ena namo.

7. Dahaka dainai haroro bona hahediba ihalaodia ḡaukarana ta karaiamu?

⁷ Dahaka dainai haroro bona hahediba ihalaodia ḡaukarana ta karaiamu? Ginigunana, ita ese Iehova ta lalokau heniamu dainai. Bema oi na haroro bona hahediba ihalaodia haheḡanina bo badinaiamu, o hahedinaraiamu oi ese Dirava na o lalokau heniamu. (1 Ioa. 5:3) Mani ina a laloa, Iehova o lalokau heniamu dainai oi ese taunimanima o haroro henidiamu. Una haheḡani ibadinana be auka, a? Reana lasi. Nega ginigunana haroro ḡaukarana o  karaia neganai reana o gari. To oi na o diba Iesu na e uramu una ḡaukara ba karaia, una dainai ena haheḡani o badinaia. Haroro ḡaukarana na o manadalaia dainai oiemu ai ikarana na haraḡa. To Baibul stadi ihamatamana karana be ede o laloa tomamu? Reana oi na o garimu. To bema Iehova bo noiamu goada baine henimu Baibul stadi ta ba hamatamaia, ia ese oi na be durumumu mai emu ura idoinai ida hahediba ihalaodia ḡaukarana bo karaiamu.

8. Mareko 6:34 heḡereḡerena, dahaka ese ita be durudamu ma haida baita hadibadia?

⁸ Iharuana be, dekeda taudia ta lalokau henidiamu dainai, hereva momokani na idia ta hadibadiamu. Nega ta, Iesu bona ena hahediba na haroro ḡaukara badana ta e karaia dainai e hesiku bada herea. Idia na e urava gabu ta ai bae laḡa-ani, to hutuma ese e davaridia. Iesu ese e bogadia hisi dainai ḡau momo e hadibadia matama. (Mareko 6:34 ba duahia.) Ena be e hesiku to e hahedibava. Dahaka dainai? Iesu na unu taunimanima edia hemami e laloa. Ia na e ura baine durudia badina e itaia idia na e hisihisiva bona e ura helaro baine henidia. Hari ina negai momo na hekwakwanai e davarimu, una dainai basitato edia mauri na e moalelaiamu. Idia na e raka boio mamoedia na heheto asi ireḡudia. Aposetolo Paulo na e gwa taunimanima unu bamodia na asi dibadia Dirava bona asi edia helaro. (Efe. 2:12) Idia na “mase gabuna e laomu” dalanai e rakamu. (Mat. 7:13) Eda teritori ai taunimanima ese Dirava bae dibaia dalana baita laloamu neganai, lalokau bona hebogahisi karana ese be doridamu idia baita durudia. Bona idia baita durudia dalana namona na idia ida Baibul baita stadilaia.

9. Filipi 2:13 heḡereḡerena, Iehova ese oi be ede be durumu tomamu?

⁹ Reana oi na basio uramu Baibul stadi ta ba hamatamaia badina mai dibamu nega bada bo henimu ba heḡaeḡae bona stadi ta ba karaia. Bema unu bamona emu hemami na Iehova ba hamaoroalaia. Ba noia baine durumu mai emu ura ida stadi ta ba davaria bona ba hamatamaia. (Filipi 2:13 ba duahia.) Aposetolo Ioane na gwa, Dirava ese Iena ura heḡereḡerenai ta gwauraimu ḡuriḡuridia na be haerelaimu. (1 Ioa. 5:14, 15) Una dainai ba diba Iehova ese oi na be durumumu taunimanima ihadibadia urana ba habadaia.

10-11. Dahaka dainai ita edai Baibul stadi ta ikarana na be aukamu?

¹⁰ Ta dibamu taunimanima ihadibadia ḡaukarana na mai anina bada, to reana hekwakwanai haida daidiai hahediba ḡaukarana baita karaia na auka. Mani unu hekwakwanai haida bona baita hanai daladia aita herevalai.

¹¹ Noho daladia e idaumu. Heḡereḡere, pablisa haida na buburuka eiava gogorere. Oiemu noho dalana danu unu bamona, a? Bema oibe, COVID-19 pandemic amo ta dibaia ḡauna ta mani aita laloa. Ita na ta diba fon eiava elektronik ḡauna ta amo Baibul stadi baita kara diba. Anina na emu ruma amo stadi ta ba karaia diba. Ena namo ma ta na ina, haida na e uramu Baibul bae stadilaia, to tadikaka e ha harorova negadiai rumai na asie davaridiava. Idia na reana dabai eiava hanuaboi ai bo davaridiamu. Nega unu bamodiai ta ida Baibul ba stadilaia diba, a? Iesu ese Nikodemo na hanuaboi ai e hadibaia, una na Nikodemo ese e abia hidi negana.​—Ioa. 3:1, 2.

12. Dahaka ese baine hagoadada diba hahediba taudia namodia ai baitala?

¹² Reana baita lalomu ita na dia heḡereḡere Baibul stadi ta baita karaia. Reana baita lalomu eda diba baita habadaia eiava  hahediba tauna namona ai baitala guna gabeai ta baita stadi henia. Bema unu o hemami tomamu, ini point toi ese be hagoadamumu. Ginigunana na, Iehova na mai dibana oi na heḡereḡere haida ba hadibadia. (2 Kor. 3:5) Iharuana be, Iesu, “siahu idoinai guba ai bona tanobada ai” vada e henia tauna, ese oi na e haḡanimumu ma haida ba hadibadia. (Mat. 28:18) Bona ihatoina be, ma haida amo heduru bavabi diba. Iesu na Tamana ese e hadibaia ḡaudia mo e gwauraiva, oi danu unu ba kara toma diba. (Ioa. 8:28; 12:49) Danu, haroro grup e nariamu tadikaka, eiava mai ena ekspiriens painia eiava pablisa ta ba noia baine durumu Baibul stadi ta ba hamatamaia bona ba karaia. Danu edia Baibul stadi ai ba helai vareai, badina una dala amo oi be durumumu hahediba tauna namona ai bo laomu.

13. Dahaka dainai dala idauidau ai baita hahediba?

¹³ Ta hekwarahimu dala matamatadia baita badina bona tulu matamatadia baita ḡaukaralai. Hari Baibul stadi baita kara daladia na e haidau. Eda stadi bukana, Enjoy Life Forever!, na stadi totona baita heḡaeḡaelaia namonamo bona stadi baita karaiamu dalana na dia guna heḡereḡerena. Baita duahimu paragraf na dia momo bona stiuden ida baita herevahereva namonamomu. Ta hahedibamu neganai vidio bona tulu ma haida, heḡereḡere JW Library^® baita ḡaukaralai momo. Bema oi na unu tulu iḡaukaralaidia dalana na asi dibamu mai dibana tauna ta ba noia tulu iḡaukaralaidia dalana baine hadibamu. Ita taunimanima na ta manadalai ḡaudia mo ta uramu baita kara. Una dainai nega haida na e aukamu dala matamatadia baita badina. To Iehova bona ma haida edia heduru amo unu dala matamatadia na bo dibamu bona taunimanima istadi henidia karana na bo moalelaiamu. Painia ta na e gwa, “stiuden bona ia e hadibaiamu tauna ese una stadi dalana matamatana na be moalelaiamu.”

14. Taunimanima asie kamonaimu teritoridia ai ta haroromu neganai dahaka baita laloatao, bona 1 Korinto 3:6, 7 ese ita be ede e hagoadada tomamu?

¹⁴ Reana ita ta nohomu teritorina ai Baibul stadi ihamatamana na auka. Taunimanima haida na asie uramu eda haroro herevana bae kamonai bona bae abia dae. Dahaka ese be durudamu unu amo baita abia dae taunimanima unu bamodia na be kamonaimu? Ba helalotao, ina hekwakwanai tanobadanai taunimanima edia noho daladia na e idau haraḡamu. Una dainai guna asie urava bae kamonai taudia na hari be uramu Dirava bae dibaia. (Mat. 5:3, NWT) Guna asie urava eda pablikeisin bae abi taudia na gabeai Baibul stadi e abia daemu. Danu mai dibada Iehova na uma Biaguna. (Mat. 9:38) Ia na e uramu uhe baita hadoa bona baita dairia hanaihanai, to Ia sibona ese anina baine havaraia. (1 Kor. 3:6, 7) Ita e hagoadadamu ḡauna na, baita helalotao ena be hari ita na asi eda Baibul stadi ta to Iehova ese be hanamodamu badina ta hekwarahimu taunimanima baita durudia. *

15. Ta ese Baibul stadi e abia daemu bona e dibamu ḡaudia e badinamu neganai, Iehova ena hemami be ede bamona?

¹⁵ Bema ta ese Baibul ena hereva momokani e abia daemu bona haida ediai e herevalaiamu, Iehova na e moalemu. (Her. 23:15, 16) Iehova na e itaiamu ena taunimanima na haroro bona hahediba ḡaukarana  e goadalaiamu neganai ia na e moale dikadikamu! Heḡereḡere, hesiai laḡanina 2020 lalonai, ena be tanobada heḡeḡemadai pandemic e vara, to pablisa ese Baibul stadi 7,705,765 e kara, idia amo 241,994 na Iehova enai edia mauri e gwauhamatalai bona bapatiso e abi. Bona ini hahediba taudia matamatadia ese Baibul stadi momo be karamu bona hahediba ai be halaodiamu. (Luka 6:40) Ta diba momokanimu, haida na hahediba ai ta halaodiamu neganai, Iehova na e moalemu.

16. Tahua ḡauna namona ta be dahaka?

¹⁶ Hahediba ihalaodia ḡaukarana na mai hekwarahina, to Iehova ena heduru dainai ita ese kamonai matamata taudia baita hadibadia Tamada gubai bae lalokau henia. Namona na tahua ḡauna ta baita atoa Baibul stadi ta baita hamatamaia bona baita karaia. Nega maorodiai baita davaridiamu taudia baita noidiamu bema idia na e uramu bae stadi, reana baita hoamu badina baita itaiamu idia na be uramu bae stadi. Bona ta diba momokanimu Iehova ese eda hekwarahi na be hanamoamu.

17. Baibul stadi ta baita karaiamu neganai eda hemami be ede bamona?

¹⁷ Taunimanima ediai hereva momokani ta harorolaiamu bona ta hahedibalaiamu na hahenamo badana. Una ḡaukara ese moale korikori e henidamu. Aposetolo Paulo ese Tesalonika ai momo e durudia hahediba ai ela neganai, ena hemami na ini e herevalaia toma: “Eda Lohiabada Iesu baine lou mai negana ai emai helaro, emai moale, emai heaḡi toana, ia vairanai be dahaka? Umui, ani! Emai heaḡi bona emai moale badidia na umui.” (1 Tes. 2:19, 20; Apos. 17:1-4) Hari ina negai momo edia hemami na unu bamona. Taihu ta ladana Stéphanie na adavana ida momo e durudia ela bona e bapatiso. Ia na ini gwau toma: “Taunimanima a durudiamu edia mauri na Iehova enai e gwauhamatalaiamu neganai ai na a moalemu.”