Iehova na e uramu headava taudia na bae moale, bona edia hetura karana na baine mia hanaihanai. (Mat. 19:4-6) Bema o uramu ba headava, bavadavaia tauna namona ta be ede ba davaria toma? Iehova na ita e karadia tauna dainai, ia na mai dibana edena dalai eda hetura karana bona headava ai baita moale. Una dainai ia ese e henida hahekau herevadia baita badinamu neganai, baita moalemu. Mani unu hahekau herevadia haida aita herevalai.

Ginigunana, namona na baita laloparara, “taunimanima lalodia na koikoi herea bona dika rohoroho.” (Ier. 17:9) Bema mero ta bona kekeni na e hedavarimu bona e hetura matamamu neganai, edia ura na e goadamu. Una dainai nega haida be aukamu abi hidi maorodia bae kara. Taunimanima rarua na edia hemami ese e biagudiamu bena e headava haraḡamu neganai, edia headava na asie moalelaiamu. (Her. 28:26) Una dainai, taunimanima rarua na e hetura matamamu neganai, aonega karana na edia hemami bae biagua bona gwauhamata na basie kara haraḡa ela bona raruosi bae hediba heheni namonamo.

Hereva Lada-isidia 22:3 na e gwaumu: “Lalo-parara tauna ese dika e itaiamu, bena e komumu; a lalo-duhu taudia na e raka e laomu, bena e hekwakwanaimu.” Intanet ai dating websait iḡaukaralaidia ena dika be dahaka? Haida na intanet ai asi dibadia taudia e hetura henidia, to gabeai e laloparara idia na e koidia. Danu, haida na lada koikoidia e ḡaukaralaimu bona taunimanima e koidiamu bena edia moni e henaomu. Nega haida unu koikoi taudia na e gwaumu idia na Witnes taudia.

Ena dika ma ta na ina: Dating websait haida na computer program e ḡaukaralaimu ta ese baine hetura henia tauna ta e tahuamu. To ḡau ta ese na se hamomokaniamu una dala na e ḡaukaramu. O laloamu taunimanima ese e kara computer program amo bavadavaia tauna ba tahua be aonega karana, a? Baibul ena hahekau herevadia ese computer program na e hereadia.​—Her. 1:7; 3:5-7.

Hereva Lada-isidia 14:15 ena hahekau herevana na ini e gwau tomamu: “Lalo-duhu tauna ese hereva iboudiai e abi daemu, a  lalo-parara tauna ese e rakalaiamu dalana na e raraia taomu.” Ta do so adavaia neganai, namona na ba dibaia namonamo. To intanet ai ta ba dibaia namonamo na auka. Ena be o hetura heniamu tauna ena infomeisen na bo ita dibamu, eiava nega momo bo meseij hehenimu, oi be bo gwau dibamu una o hetura heniamu tauna na mai dibamu, a? Haida na e laloamu intanet ai e hetura henidiamu taudia na edia lalokau korikori, to gabeai e hedavari henidiamu bena edia kara korikori e dibamu neganai, e lalohisihisimu.

Salamo itorena tauna na e gwa: “Koikoi taudia ida asina helaimu, bona boga-alaga taudia ida asina raka heboumu.” (Sal. 26:4) Momo na e laloamu taunimanima ese bae ura henidia totona, intanet ai infomeisen koikoidia bae ato na asi ena kerere. Idia ese intanet ai edia kara korikoridia na be hunimu. Reana haida na be gwaumu idia na Iehova ena Witnes taudia, to idia be momokani bapatiso Kristen taudia, a? Edia hetura karana Iehova ida be goada, a? Edia kongrigeisin ai tadikaka taihu ese e matauraidiamu, a? Eiava idia na haheitalai dikadia bona ‘hebamo dikana’? (1 Kor. 15:33, NWT; 2 Tim. 2:20, 21) Bona idia be Baibul ena hahekau herevana heḡereḡerena bae headava lou diba, a? Unu henanadai haeredia ba diba na namo, reana ia e dibaia namonamo Witnes tauna ta ba nanadaia diba. (Her. 15:22) Iehova e hesiai heniamu tauna na se uramu Dirava se kamonai heniamu tauna baine bamoa eiava baine adavaia.​—2 Kor. 6:14; 1 Kor. 7:39.

Dating websait na mai edia dika, to oi bavadavaia tauna ba dibaia namonamo totona, dala namodia haida na mimia. Bema dala e hekehomu neganai, Iehova ena Witnes edia kongrigeisin heboudia, hebou badadia, bona nega ma haida ai, tadikaka taihu ba bamodia bona ba dibadia namonamo.

Bema badi haida daidiai, heḡereḡere COVID-19 pandemic dainai, pablik gabudiai baita hebou na taravatu, ita na elektronik tulu haida amo kongrigeisin heboudia ta abimu. Una na nega namona singul tadikaka taihu baita hedavari henidia bona baita dibadia namonamo. Hebou ai tok bona haere e henimu amo edia abidadama e gwauraia hedinaraimu dalana bo itaiamu. (1 Tim. 6:11, 12) Danu hebou muridiai, breakout room ai ma haida ba hereva henidia diba. Bona video conferencing amo Witnes taudia ida o moale heboumu neganai, o ura heniamu tauna ese ma haida e kara henidiamu dalana ba itaia, unu amo ena kara korikori bo dibaiamu. (1 Pet. 3:4) O ura heniamu tauna bo dibaia namonamomu neganai, bo dibamu bema emui tahua ḡaudia na heḡereḡere bona headava tau bona hahine namona ai bo laomu.

Singul taudia na Baibul ena hahekau herevana heḡereḡerena ai bae adavaia tauna e tahuamu neganai, edia headava na be moalelaiamu. Una ese ina aonega herevana e hamomokaniamu, eto: “Bema tau ta na hahine namona e adavaiamu, ia na ḡau namona ta vada e davaria, bona ia ese Iehova ena lalonamo e abiamu.”​—Her. 18:22.