1. Adam bona Heva e kara dika murinai, Iehova be kara haraḡa dahaka e kara? (Genese 3:15)

 ADAM bona Heva e kara dika murinai, Iehova ese mai anina bada peroveta herevana ta amo edia bese na helaro e henidia. E gwauraia herevana na Genese 3:15 ai e torea.​—Ba Duahia.

2. Dahaka dainai ina peroveta herevana na idau herea?

² Una peroveta herevana na Baibul ena buka ginigunana ai e hedinarai. To, Baibul bukadia ma haida lalodiai e herevalai ḡaudia haida ese danu una peroveta herevana e herevalaia. Buka rauna iboudiai e haheboudiamu ḡauna ese buka ibounai e hatamonaiamu heḡereḡerena, Genese 3:15 ai e torea herevana ese Baibul bukadia iboudiai lalodiai e hetore ḡaudia anidia e hatamonaia, una na Dirava ese hahemauri Tauna ta baine siaia, Diabolo bona ena demoni dikadia iboudiai baine haoredia. * Iehova e lalokau heniamu taudia ediai una na hahenamo badana ta!

3. Ina atikol ai dahaka baita herevalaimu?

³ Ina atikol ai, ita ese ini henanadai Genese 3:15 ai e perovetalaia herevana totona baita haerelaimu: Una peroveta herevana ai daidia e herevalaidia? Edena dalai e ḡuḡuru?  Bona edena dalai una peroveta herevana dainai hahenamo ta abimu?

4. “Gaigai” be daika, bona ede ta diba tomamu?

⁴ Genese 3:14, 15 ese e gwauraidia taudia na “gaigai,” gaigai “garana,” “hahine,” bona hahine “garana.” Baibul ese be durudamu idia ta ta baita dibadiamu. * Mani “gaigai” aita herevalaia guna. Gaigai korikorina ese Eden imeana ai Iehova ese e gwauraia herevana na basinema lalopararalaia diba. Una dainai, Iehova ese ena hahemaoro e gwauraia neganai, ia ese mai aonegana tauna ta e hereva henia. Iehova be daika e hereva henia? Apokalupo 12:9 ese gaigai be daika na e hahedinaraia ḡoevaḡoeva. Una siri ai e hahedinaraia “idau negai gaigaina” na Satana Diabolo. To, gaigai garana be daidia?

5. Gaigai garana be daidia?

⁵ Baibul ese laulau dalanai tau ta “garana” e herevalaiamu neganai, ia garana na iena lalohadai bona ena kara e tohotohomu taudia. Una dainai, gaigai garana na, Satana heḡereḡerena Iehova Dirava e dadaraiamu bona Ena taunimanima e daḡedaḡe henidiamu anerudia bona taunimanimadia. Idia haida na Noa ena nega lalonai guba ai edia ḡaukara e rakatani anerudia, bona tamadia Diabolo ena kara e karamu kara dika taudia.​—Gen. 6:1, 2; Ioa. 8:44; 1 Ioa. 5:19; Iuda 6.

6. Dahaka dainai una “hahine” na dia Heva?

⁶ Hari “hahine” be daika, aita herevalaia. Ia na dia Heva e herevalaia. Dahaka dainai? Mani badi tamona aita herevalaia. Una peroveta herevana na e gwa hahine garana ese gaigai kwarana baine “huaria.” Da tame  herevalaia heḡereḡerena, gaigai na aneru dikana Satana, bona Heva natuna, dia ḡoevadae taudia ta na heḡereḡere ia kwarana baine huaria. Una dainai, Satana kwarana be daika ese baine huaria diba?

7. Apokalupo 12:1, 2, 5, bona 10 ena hereva heḡereḡerena, Genese 3:15 ai e herevalaia hahinena be daika?

⁷ Genese 3:15 ai e herevalaia hahinena na be daika, na Baibul bukana ginigabena ese e gwauraia hedinarai. (Apokalupo 12:1, 2, 5, 10 ba duahi.) Ia na dia hahine korikorina ta! Hua na ia aena badinai bona kwaranai e atoa koronana na hisiu 12 amo e karaia. Ia na beibi idauna ta e havaraia​—una na Dirava ena Basileia. Una Basileia na guba Basileiana dainai, una hahine danu guba ḡauna. Una hahine na Iehova ena orea guba ai e laulaulaia, una orea lalonai na abidadama anerudia iboudiai.​—Gal. 4:26.

8. Daika be hahine garana kahana ginigunana, bona ia be edena negai hahine garana ai ela? (Genese 22:15-18)

⁸ Dirava ena Hereva ese be durudamu danu hahine garana kahana ginigunana baita dibaia. Ia na Abraham besena amo baine vara. (Genese 22:15-18 ba duahi.) Una peroveta herevana heḡereḡerena, Iesu na una abidadama tauna ena bese amo e vara. (Luka 3:23, 34) To, una gara na taunimanima ai bainela mo na dia heḡereḡere, badina gabeai Satana Diabolo na ia ese baine haorea vaitani. Una dainai, Iesu laḡanina na e 30 neganai, Dirava ese lauma helaḡa amo e horoa Ia Natuna vara-edeana ai ela. Iesu e horoa neganai, ia na hahine garana kahana ginigunana ai ela. (Gal. 3:16) Iesu e mase bena e toreisi lou murinai, Dirava ese ‘hairai mai hemataurai ida’ na ‘kwarana e havavalaia,’ bona ‘siahu idoinai guba ai bona tanobada ai’ e henia, una dainai anina na “Diabolo ena kara dika baine ha-ore” siahuna danu e henia.​—Heb. 2:7; Mat. 28:18; 1 Ioa. 3:8.

9-10. (a) Daidia danu hahine garana, bona edena negai idia na hahine garana ai e laomu? (b) Ita be ma dahaka baita herevalaimu?

⁹ To hahine garana kahana iharuana danu noho. Aposetolo Paulo ese Iuda bona Idau Bese horoa Kristen taudia e hereva henidia neganai, una hahine garana kahana iharuana na e hahedinaraia, e gwa: “Umui Keriso ena dainai, umui danu Abraham garana bona gwauhamata dihina.” (Gal. 3:28, 29) Iehova ese lauma helaḡa amo Kristen tauna ta e horoamu neganai, ia na hahine garana ai vada e laomu. Una dainai, hahine garana na Iesu Keriso bona ia ida be lohia heboumu 144,000 taudia. (Apok. 14:1) Idia ese Tamadia, Iehova Dirava ena kara e tohotohomu.

¹⁰ Hari Genese 3:15 ai e herevalai taudia da tame diba dainai, mani Iehova ese una peroveta herevana e haḡuḡuruamu dalana bona una peroveta herevana dainai hahenamo ta abimu daladia aita herevalai.

11. Edena dalai hahine garana na aena geduna ai e tutu?

¹¹ Genese 3:15 ena peroveta herevana heḡereḡerena, gaigai ese hahine garana “aena geduna” baine tutua. Satana ese Iuda taudia bona Roma taudia e haḡanidia Dirava Natuna e hamasea neganai, una peroveta herevana na e ḡuḡuru. (Luka 23:13, 20-24) Ta aena geduna e totomu neganai, nega sisina lalonai se raka namonamomu heḡereḡerena, Iesu e mase neganai, ia na nega sisina lalonai ḡau ta se karaia bona gara ai dina toi e hekure.​—Mat. 16:21.

12. Edena dalai bona edena negai gaigai kwarana be huariamu?

¹² Genese 3:15 ena peroveta herevana baine ḡuḡuru totona, Iesu na gara ai na basine noho hanaihanai. Dahaka dainai? Badina peroveta herevana heḡereḡerena, hahine garana  ese gaigai kwarana baine huaria. Una dainai Iesu aena geduna totona baine namo lou na namo. Bona una toto na e namo! Iesu e mase bena dina ihatoina ai, e toreisi lou murinai basine mase diba aneruna ta ai ela. Dirava ena nega korikorina ai, Iesu ese Satana na be haorea vaitanimu. (Heb. 2:14) Keriso bona ia ida be lohia heboumu taudia ese tanobada ai Dirava e inai heniamu taudia​—gaigai garana, na be haoredia vaitanimu.​—Apok. 17:14; 20:4, 10. *

13. Edena dalai una peroveta herevana ena ḡuḡuru karana dainai hahenamo ta abimu?

¹³ Bema oi na o gwauhamata bona Dirava o hesiai heniamu, una peroveta herevana e ḡuḡuru karana dainai hahenamo na o abimu. Iesu na taunimanima ta bamona tanobada ema. Ia ese Tamana ena kara na e hahedinarai ḡoevaḡoeva. (Ioa. 14:9) Una dainai, iena amo Iehova Dirava ta dibaia bona ta lalokau heniamu. Danu hari ina negai Iesu ese Kristen kongrigeisin e hakauamu lalonai, ena hahediba herevadia bona hahekau daladia amo namo ta abimu. Ia ese e hadibada ede baita mauri toma, Iehova ena lalonamo baita abia totona. Bona ita iboudai na Iesu ena mase​—aena geduna itutuna karana amo namo baita abi diba. Edena dalai? Iesu e toreisi lou neganai, ia ese rarana na boubou ḡauna ḡoevadaena heḡereḡerena e heni, unu amo ‘eda dika iboudiai e huri oho.’​—1 Ioa. 1:7.

14. Ede ta diba tomamu Iehova ese Eden imeana ai e gwauraia peroveta herevana na dia una negai maoromaoro e ḡuḡuru? A gwauraia hedinarai.

¹⁴ Iehova ese Eden imeana ai e gwauraia herevana na nega daudau lalonai baine ḡuḡuru. Hahine na nega bae henia gwauhamata garana baine havaraia, Satana danu nega bae henia ia bae badinaia taudia baine haboudia, bena unu orea ruaosi padadiai heiriheiri baine vara. Una peroveta herevana na ta lalopararalaiamu dainai hahenamo ta abimu badina e hadibadamu Satana ese e biaguamu tanobadana ese Iehova e tomadiho heniamu taudia na be inai henidiamu. Iesu ese gabeai una na ena hahediba e hadibalaidia. (Mar. 13:13; Ioa. 17:14) Ita ese laḡani 100 vada e ore lalodiai una peroveta herevana ai, una kaha e ḡuḡurumu na ta itaiamu. Edena dalai?

15. Dahaka dainai tanobada ena inai karana na e bada e laomu, to dahaka dainai Satana garina baita gari na asi anina?

¹⁵ Laḡani 1914 ai Iesu na Mesia Pavapavana ai ela murinai, Satana na guba amo e tahoa dobi. Hari ia na da tanobada ai, bae haorea negana e nariamu. (Apok. 12:9, 12) To, una nega e nariamu lalonai ia na dia helai kava. Satana na e badu dikadikamu dainai, ena badu na Dirava ena taunimanima ediai e halasiamu. (Apok. 12:13, 17) Una dainai, tanobada ena inai karana Dirava ena taunimanima ediai na e bada e laomu. To ita ese Satana bona ia e badinaiamu taudia baita gari henidia na asi anina. Namona na aposetolo Paulo ena lalohadai heḡereḡerena baita lalo, ia na e gwa: “Dirava ese bema beiada, daika ese bema tuari henida?” (Roma 8:31) Iehova na baita abidadama henia momokani badina tame itaia heḡereḡerena, Genese 3:15 ai e torea peroveta herevana kahana badana na vada e ḡuḡuru.

16-18. Edena dalai Curtis, Ursula, bona Jessica ese Genese 3:15 e lalopararalaia dainai namo e abi?

¹⁶ Iehova ena gwauhamata Genese 3:15 ese be durudamu ta davarimu hahetoho iboudiai baita haheaukalai diba. Guam ai misinari ḡaukara e karaiamu tadikakana ladana Curtis na e  gwa: “Nega haida egu mauri ai e varamu ḡaudia ese egu abidadama Iehova enai na e tohoamu. To, Genese 3:15 ena peroveta herevana na laloa dobu karana ese e durugumu egu abidadama Tamagu gubai e nohomu enai baina hagoadaia.” Curtis na Iehova ese eda hahetoho iboudiai baine haoredia negana e nariamu.

¹⁷ Bavaria ai e nohomu taihuna ladana Ursula na e gwa, Genese 3:15 ilalopararalaina karana dainai e abia daemu, Baibul na Dirava ena lauma helaḡa ena heuda-roha amo e torea. Ia na e itaia peroveta herevadia ma haida na Genese 3:15 ena peroveta herevana ai e hekamokau, bona una dainai e hoa bada herea. Bona e gwa: “Iehova ese kara haraḡa eda helaro baine havaraia dalana e karaia, na diba neganai, kudougu na e hamarerea bada.”

¹⁸ Micronesia ai e nohomu taihuna ladana Jessica, na e gwa: “Hereva momokani na dibaia matama neganai na abia hemamina na doini na laloataomu! Genese 3:15 ai e torea peroveta herevana na vada e ḡuḡurumu. Una ese e durugu, baina helalotao hari ta davarimu hekwakwanaidia na dia mauri korikorina. Ina peroveta herevana dainai na abia daemu, hari Iehova na hesiai heniamu na mauri dalana namona bona vaira negai egu mauri na be namo hereamu.”

19. Dahaka dainai ta diba momokanimu Genese 3:15 ena peroveta herevana kahana orena na be ḡuḡurumu?

¹⁹ Tame herevalaia heḡereḡerena, Genese 3:15 na doini e ḡuḡurumu. Hahine garana bona gaigai garana na deme hedinarai ḡoevaḡoeva. Iesu, hahine garana kahana ginigunana, aena geduna berona na de namo, bona hari ia na basine mase diba Pavapavana ai dela. Hahine garana kahana iharuana iabi hididia karana danu da kahirakahira be oremu. Una peroveta hereva kahana na vada e ḡuḡuru dainai, gaigai kwarana ihuarina karana danu be vara momokanimu. Satana be haoreamu neganai, abidadama taudia na be moale dikadikamu! To una nega ta nariamu lalonai, basio hesiku. Eda Dirava na baita abidadama henia diba. Hahine garana amo, Iehova ese ḡau namodia momo herea na “tanobada besedia iboudiai” ediai be havaramu.​—Gen. 22:18.