1. Hari ina negai Iehova ena ura be dahaka?

 HARI ina negai, Dirava ena ura na Basileia sivarai namona na tanobada idoinai lalonai baita harorolaia. (Mar. 13:10; 1 Tim. 2:3, 4) Ina na Iehova ena ḡaukara, bona Natuna lalokauna ena heitatao henunai e atoa na mai anina bada. Ta dibamu Iesu ena heitatao namona henunai, dokona do sema neganai haroro ḡaukarana na Iehova ena ura heḡereḡerena be ḡuḡurumu.​—Mat. 24:14.

2. Ina atikol ai dahaka baita herevalaimu?

² Ina atikol ai, Iesu ese “hesiai tauna mai ena abidadama bona aonega” e ḡaukaralaiamu lauma aniani bae halasia dalana bona histri lalonai haroro ḡaukarana badana bae karaia dalana baita itaiamu. (Mat. 24:45, NWT) Danu, baita itaiamu ita ta ta be dahaka baita kara, Iesu bona hesiai tauna mai ena abidadama edia hahekau dalana baita badinaia.

3. Iesu be maoro e henia dahaka baine kara?

³ Haroro ḡaukara na Iesu ese e itaia taomu. Ede ta diba tomamu? Iesu do se dae gubai neganai, ena hahediba haida ida Galilea ororona ta ai e hebou. E hamaorodia: “Siahu idoinai guba ai bona tanobada ai vada eme henigu.” Una hereva murinai e gwauraia herevana mani a laloa: “Taunabunai baola, bese iboudiai hahediba ai ba halaodia.” (Mat. 28:18, 19) Una dainai, Iehova ese siahu Iesu e henia baine karaia ḡauna ta na, haroro ḡaukarana baine gunalaia.

4. Ede ta diba tomamu Iesu ese haroro ḡaukara na doini e itaia taomu?

 ⁴ Iesu na e gwa haroro bona hahediba ḡaukarana na “bese iboudiai” ediai bae karaia bona e gwa ia na “daba daba iboudiai” ena hahediba taudia ida baine noho “ela bona tanobada dokona.” (Mat. 28:20) Unu hereva ese e hahedinaraiamu, haroro ḡaukarana na Iesu ena hahekau henunai baine hesiriu ela bona hari iseda nega.

5. Edena dalai ita ese Salamo 110:3 ena peroveta herevana ena ḡuḡuru karana ta duruamu?

⁵ Iesu ese hari ina nega oromana lalonai ḡaukara taudia bae momo eiava lasi na se laloa. Ia na mai dibana salamo itorena tauna ena peroveta herevana na baine ḡuḡuru: “Emu tuari oreana na ororo helaḡadia ai ba hakaua lao dinana ai, emu orea taudia ese kunudia bae rahu pou,” eiava mai edia ura ida baela. (Sal. 110:3) Bema sivarai namona o harorolaiamu, oi na Iesu bona hesiai tauna mai ena abidadama edia hegunalai dalana o badinaiamu bona una peroveta herevana ena ḡuḡuru karana o duruamu. Ḡaukara na e heaumu, to hekwakwanai na be varamu.

6. Hari ina negai Basileia e harorolaiamu taudia ese e davariamu hekwakwanaina ta be dahaka?

⁶ Basileia e harorolaiamu taudia ese e davariamu hekwakwanaina ta na, daḡedaḡe. Aposteit taudia, tomadiho igunalaina taudia, bona politikol taudia ese eda ḡaukara na e sivarailaia kerere. Una dainai, bema varavarada, turada, bona ta ḡaukara heboumu taudia na unu hereva koikoidia bae abi dae, reana be koudamu Iehova basita hesiai henia bona basita haroro. Tano haida ai, una daḡedaḡe karana na haida ese be hagaridamu eiava ihamaseda daladia be karamu, pulisi ese be arestidamu, eiava be hadiburadamu karana amo be varamu. Unu bae vara na basita hoalai. Badina Iesu na e peroveta: “Lau ladagu dainai bese iboudiai ese bae inai henimui.” (Mat. 24:9) Unu be inai henida tomamu karana ese e hamomokaniamu Iehova ese ita na e lalonamo henidamu. (Mat. 5:11, 12) Unu daḡedaḡe karadia na Diabolo ena amo e maimu. To, Iesu ena siahu ese Satana ena siahu na e hereaia! Iesu ena heduru dainai, sivarai namona na bese idauidau taudia ese e kamonaiamu. Mani hahemomokani ḡaudia haida aita herevalai.

7. Dahaka ese e hamomokaniamu Apokalupo 14:6, 7 ena hereva na e ḡuḡurumu?

⁷ Basileia sivaraina ta harorolaiamu lalonai, ta davariamu hekwakwanaina ma ta na, gado na idauidau. Iesu ese mata-hanai ai aposetolo Ioane e hamaoroa gado idauidau ai sivarai namona baita harorolaia diba. (Apokalupo 14:6, 7 ba duahi.) Edena dalai? Dala ta karamu taunimanima momo herea baita durudia Basileia sivaraina bae kamonaia. Hari ina negai, tanobada heḡeḡemadai taunimanima ese Baibul e herevalaiamu pablikeisin-dia na eda jw.org websait ai bae duahi diba, badina una websait na gado 1,000 mai kahana ai e hahanaia! Gwaumaoro na de heni Mauri Ba Moalelaia Hanaihanai! bukana, una na eda hahediba ḡaukarana ai baita ḡaukaralaiamu stadi bukana, bae hahanaia bona gado 700 mai kahana ai vada e hahanaia! Lauma aniani na kudima taudia daidiai vidio ai e rekodidia, matakepulu taudia daidiai braille ai e karadia. Ta itaiamu Baibul ena peroveta herevadia na e ḡuḡurumu. “Gado idau-idau” taudia ese Baibul ena hereva momokani na “gado ḡoevadaena” ai e herevalaiamu. (Sek. 8:23; Sef. 3:9) Unu iboudiai na Iesu Keriso ena heitatao namona henunai e ḡuḡurumu.

8. Eda haroro ḡaukarana dainai, e vara ḡau namodia haida be dahaka?

⁸ Hari ina negai, tano 240 ai, taunimanima 8,000,000 mai kahana na Iehova ena orea e bamoamu, bona laḡani ta ta ai taunimanima tausen momo na e bapatisomu! Bapatiso  nambana ena bada na dia ḡau badana, to unu bapatiso matamata taudia ese Kristen kara namodia eiava “mauri matamatana” e badinaiamu karana hari mai anina bada. (Kol. 3:8-10, NWT) Idia momo ese matabodaḡa karadia, daḡedaḡe karadia, hahemaoro kerere karadia, bona bese iabi-isina karadia e rakatani. Isaia 2:4 ai e torea peroveta herevana na e ḡuḡurumu; idia ese ‘tuari daladia asie hahedibalai loumu.’ Ta ḡaukara goadamu mauri matamatana baita badinaia dainai, taunimanima na ta durudiamu Dirava ena orea ai e vareaimu, bona ta hamomokaniamu eda hegunalai tauna Keriso Iesu ta badinaiamu. (Ioa. 13:35; 1 Pet. 2:12) Unu na se vara kavamu. Badina Iesu ese ita iduruda ḡaudia na e henimu.

9. Mataio 24:45-47 ena hereva heḡereḡerena, Iesu be e gwa nega dokonai dahaka be varamu?

⁹ Mataio 24:45-47 (NWT) ba duahi. Iesu na e peroveta nega dokonai, ia ese “hesiai tauna mai ena abidadama bona aonega” baine abia hidi lauma aniani bae halasi totona. Una dainai, hari ina negai una hesiai tauna baine ḡaukara goada na namo. Idia na momokani e ḡaukara goadamu. E itada taomu tauna ese horoa oreana amo tatau haida na e ḡaukaralaidiamu nega korikori ai Dirava ena taunimanima bona kamonai taudia ‘adia malamala e henimu.’ Unu tatau ese Dirava e hesiai heniamu taudia edia abidadama na asie biaguamu. (2 Kor. 1:24) To, idia na mai dibadia Iesu Keriso na ena taunimanima “igunalaidia tauna” bona “edia lohia.”​—Isa. 55:4.

10. Laulau ai e ato pablikeisin-dia amo, edena ese oi e durumu Dirava ena hereva momokani ba dibaia totona?

¹⁰ Laḡani 1919 amo, abidadama hesiai tauna ese pablikeisin momo e heḡaeḡaelaidia, unu amo kamonai taudia matamatadia ese Dirava ena amo e maimu lauma aniani bae mamia matama diba. Laḡani 1921 ai, idia ese buka ladana, The Harp of God e heḡaeḡaelaia unu amo  kamonai taudia bae durudia Baibul ena hahediba hereva badadia bae diba totona. Laḡani ela lalodiai, pablikeisin matamatadia ma haida e heḡaeḡaelai. Edena pablikeisin ese oi e durumu Tamada gubai e nohomu o dibaia bona o lalokau henia matama? Ini buka amo, edena ese e durumu: “Let God Be True,” The Truth That Leads to Eternal Life, You Can Live Forever in Paradise on Earth, Knowledge That Leads to Everlasting Life, Baibul Ena Hahediba Maorodia be Dahaka?, What Can the Bible Teach Us?, eiava eda pablikeisin matamatana, Mauri Ba Moalelaia Hanaihanai! bukana? Unu pablikeisin idauidau e halasidia negadiai, ita na e duruda bada herea.

11. Dahaka dainai ita iboudai ese lauma aniani baita abi na mai anina bada?

¹¹ Dia kamonai taudia matamatadia sibodia mo ese lauma aniani eiava Baibul amo e maimu dibana bae abia. Ita iboudai danu. Aposetolo Paulo na e gwa: “A aniani korikori be taudia vada e lo taudia adia.” Paulo na ma e gwa unu lauma aniani eiava ta dibamu ḡaudia baita badinamu neganai, be durudamu ‘namo bona dika toadia baita dibamu.’ (Heb. 5:14) Hari ina negai, taunimanima ese taravatu ibadinana karana na asie laloa badamu dainai, Iehova ena taravatu ibadinadia na auka. To, Iesu na e ḡaukara goadamu unu lauma anianidia baita abi, unu amo baita goada diba. Unu lauma aniani na Dirava ena Hereva Baibul amo e maimu. Abidadama hesiai tauna ese Iesu ena hahekau henunai unu lauma aniani na e heḡaeḡaelaimu bona e halasimu.

12. Iesu heḡereḡerena, edena dalai Dirava ladana ena hairai, na ena gabu korikori ai ta atoa lou?

¹² Iesu heḡereḡerena, ita ese Dirava ladana ena hairai na gabuna ai ta atoa lou. (Ioa. 17:6, 26) Heḡereḡere laḡani 1931 ai, ita ese Baibul amo ina lada, Iehova Ena Witnes Taudia ta abia, unu amo ta hahedinaraia ita edai Dirava ladana na mai anina bada bona ta uramu bae  gwauraida Iehova ena Witnes taudia. (Isa. 43:10-12) Bona una laḡani tamona ai October huana amo ema bona hari, ina magasin ena rau ginigunana ai una lada na e hedinarai. Danu, New World Translation of the Holy Scriptures Baibul ai Dirava ladana na ena gabu korikoridia ai e atodia lou. Krisendom dubudia amo una na idau herea, badina idia ese e hahanaidia Baibul idauidau amo Iehova ladana na e kokia!

13. Dahaka ese e durumumu, bavabia dae hari inai negai Iesu ese “hesiai tauna mai ena abidadama bona aonega” e ḡaukaralaiamu? (Ioane 6:68)

¹³ Iesu na “hesiai tauna mai ena abidadama bona aonega” amo tanobada ai orea namo hereana ta e haginia bona una orea ese tomadiho momokanina na e gunalaiamu. Oi ese una orea be ede o laloa tomamu? Emu haere na reana aposetolo Petro ena hereva heḡereḡerena, ia ese Iesu e hamaoroa: “Ai be daika dekena baiala? Mauri hanaihanai herevadia na oiemu ai.” (Ioa. 6:68) Bema Iehova ena orea basitama dibaia, hari ita be da ede tama lao? Una orea amo, Keriso na dala e karamu lauma dalanai baita heubu totona. Bona eda hesiai ḡaukara baita karaia namonamo daladia e hadibadamu. Danu, e durudamu “mauri matamatana” baita badinaia, unu amo Iehova baita hamoalea diba.​—Efe. 4:24, NWT.

14. COVID-19 pandemic lalonai, ita na Iehova ena orea ai dainai, edena dala ai heduru ta abi?

¹⁴ Hekwakwanai negadia lalodiai, Iesu ese aonega daladia e hadibadamu. Unu aonega daladia edia namo na COVID-19 pandemic e hematama neganai, ta itadia. Tanobada taudia momo na e daradarava dahaka bae kara neganai, Iesu na dala e kara hahekau hereva namodia baita abi, unu amo hekwakwanai ai basita vareai. E hagoadada pablik gabudia ai  mask baita kara, bona taunimanima badibadidiai basita gini eiava basita raka. Elda taudia na e hagoadadia hanaihanai kongrigeisin taudia bae sekedia lauma dalanai bona tauanina dalanai idia be nanamo eiava lasi. (Isa. 32:1, 2) Gavanin Bodi update idauidau amo hahekau bona hahegoada herevadia ma haida ta abimu.

15. Pandemic lalonai eda hebou ikaradia bona haroro ḡaukara ikarana daladia ai ededia hahekau herevadia ta abi, bona una dainai dahaka e vara?

¹⁵ Ina pandemic lalonai danu, eda hebou ikaradia bona haroro ḡaukara ikarana daladia ai hahekau herevadia haida ta abi. Kara haraḡa, eda Kristen hebou maraḡidia bona badadia na videoconferencing eiava zoom amo ta abimu. Bona eda haroro ḡaukara ibounai na kahirakahira revareva bona telefon amo ta karaiamu. Iehova ese eda hekwarahi na e hanamoa. Brens momo ese edia pablisa nambana e badamu na e itaiamu. Momo na ina pandemic lalonai ekspiriens namodia momo eme davari.​—Maua ladana “ Iehova ese Eda Haroro Ḡaukara E Hanamoa” ba itaia.

16. Dahaka ta diba momokanimu be varamu?

¹⁶ Haida na e laloava orea na pandemic dainai e lalohekwarahi kava momova. To, pandemic lalonai e hedinarai ḡoevaḡoeva, ta abi hahekau herevadia na mai edia namo. (Mat. 11:19) Bona Iesu ese lalokau dalanai ena taunimanima e hakaudiamu karana baita laloa dobumu neganai, ta dibamu herevana vaira negai dahaka be varamu, Iehova bona Natuna lalokauna ese ita na basie rakatanidamu.​—Heberu 13:5, 6 ba duahi.

17. Emu hemami be ede bamona, Iesu ena hegunalai henunai o ḡaukaramu dainai?

¹⁷ Ta moale badamu badina Iesu ena hegunalai henunai ta ḡaukaramu! Eda orea na kastom, bese, bona gado idauidau ese basine koua diba. Dirava ena hereva amo lauma aniani ta abimu bona eda haroro ḡaukara baita karaia namonamo totona e hadibadamu. Ita ta ta na e durudamu mauri matamatana baita badinaia, bona ta ta baita helalokau heheni. Badi namodia momo dainai, igunalaida tauna Iesu baita heaḡilaia diba!