Iesu na maino sivaraina e harorolaiava. To nega ta, ia ese ena hahediba e hamaorodia: “Lalomui na basieto maino tanobada ai baina mailaia totona nama; dia maino asina mailaia, a dare hari. Badina be lau nama tau ese tamana baine inai henia, bona kekeni ese sinana baine inai henia, bona eregabe hahinena ese ravana hahinena baine inai henia.” (Mat. 10:34, 35) Iesu ena hereva anina be dahaka?

Iesu na se ura ruma bese taudia baine hapararadia, to mai dibana ena hahediba herevadia ese ruma bese haida na baine hapararadia diba. Una dainai, namona na Keriso ena hahediba ai e uramu baela bona bae bapatiso taudia na bae laloparara edia abi hidi dainai hekwakwanai na be davarimu. Bema adavadia eiava edia ruma taudia haida ese be daḡedaḡe henidiamu, ediai na be aukamu Keriso ena hahediba herevadia bae badinadia.

Baibul ese Kristen taudia na e hagoadadiamu ‘taunimanima iboudiai ida bae noho mai mainodia ida.’ (Roma 12:18) To ruma bese haida ediai, Iesu ena hahediba herevadia na “dare” na heto. Una na baine vara diba, bema ruma bese lalonai ta na Iesu ena hahediba herevadia be abi daemu, to ma haida be unu hahediba herevadia na be dadaraimu. Una be varamu neganai, hereva momokani e dibaiamu tauna na ena ruma bese ese be ‘inai heniamu.’​—Mat. 10:36.

Keriso ena hahediba taudia e nohomu ruma besena lalonai haida edia tomadiho na idau. Una dainai nega haida be varamu ḡaudia ese edia lalokau Iehova bona Iesu ediai na be tohoamu. Heḡereḡere, murimuri varavaradia ese be doridiamu tomadiho edia holidei karana ta bae moalelaia. Hahetoho unu bamodia e davarimu neganai, idia be daika bae hamoalea? Iesu na e gwa: “Tamana eiava sinana baine ura henia bada, lau baine ura henigu maraḡi, tauna na egu ai basine heḡereḡere.” (Mat. 10:37) Momokani, Iesu na se gwa ta na ena hahediba ai bainela totona, tamana bona sinana ilalokau henidia karana na baine laloa maraḡi. To, ena hereva anina na, ta na ena mauri lalonai ḡau iboudiai baine lalodia maoromaoro. Bema murimuri varavara ese Iehova ta tomadiho heniamu karana bae koua, namona na dounu baita lalokau henidia, to baita helalotao, Dirava baita lalokau henia karana na ḡau ginigunana.

Ta dibamu, ruma bese edia daḡedaḡe karadia ese ita na be hahisida badamu. To, Iesu ena hahediba taudia ese iena hereva bae laloatao, eto: “Ena satauro basine abia isi, murigu ai basine raka, tauna na egu ai basine heḡereḡere.” (Mat. 10:38) Anina na, Kristen taudia na bae diba Keriso ena hahediba ese edia ruma bese amo e davarimu daḡedaḡe karadia na mai edia ura ida bae haheaukalai na namo. To danu, idia na e uramu edia kara namodia dainai, hereva momokani asie abia daemu ruma bese taudia ese lalodia bae haidau, bona Baibul ena hereva bae abia dae.​—1 Pet. 3:1, 2.