1-2. Edena dala ai Kristen tauna na bildin ta heḡereḡerena? (1 Korinto 15:58)

 LAḠANI 1978 ai, bildin lata hereana ta (60-story) na Tokyo, Japan ai e haginia. Una siti ai tano laga momo e varava dainai, taunimanima na e lalova bema una bildin na dounu be ginimu eiava. Una bildin basine moru totona e disainia taudia be dahaka e kara? Idia ese bildin badina e hadaia neganai, ia na baine gini auka bona tano laga negadiai basine moru diba. Kristen taudia na una bildin heḡereḡerena. Edena dala ai?

² Namona na Kristen tauna na hekwakwanai negadiai baine gini tutuka-tutuka bona lalohadai maorona baine abia. Namona na hanaihanai Iehova ena taravatu baine badinadia. (1 Korinto 15:58 ba duahia.) Ia na Dirava ena ‘hereva baine badinaia haraḡa’ bona hahetoho baine dadaraidia. To danu, baine “lalo maoromaoro” na namo. (Iak. 3:17, NWT) Unu e kara tomamu Kristen tauna na sibona ena taravatu basine ato bona ma haida edia hereva o lalohadai na basine abi dae kava. Ina atikol ai baita itaiamu, edena dala ai baita gini tutuka-tutuka. Bona Satana ese eda abidadama ihamanokana totona e ḡaukaralaimu daladia 5 bona baita dadarai daladia baita herevalaimu.

3. Aposetolo Edia Kara 15:28, 29 ai, Taravatu Ihenina Tauna Badana ese e gwaurai taravatudia haida be dahaka?

³ Iehova na Taravatu Ihenina Tauna Badana, bona e henimu taravatudia na ena taunimanima ese bae lalopararalai diba. (Isa. 33:22, NWT) Heḡereḡere, aposetolo edia negai gavanin  bodi na Kristen taudia ese bae badina taravatudia toi e gwaurai: (1) kaivakuku bae dadaraidia, to Iehova sibona bae tomadiho henia, (2) Iehova ena taravatu rara ai bae badinaia, bona (3) Baibul ai Iehova ena kara maoromaoro taravatudia bae badina. (Aposetolo Edia Kara 15:28, 29 ba duahidia.) Hari ina negai Kristen taudia ese unu dala toiosi be ede bae badinadia toma?

4. Edena dala ai Iehova sibona baita tomadiho henia? (Apokalupo 4:11)

⁴ Kaivakuku baita dadaraidia, to Iehova sibona baita tomadiho henia. Iehova ese Israel taudia e haḡanidia ia sibona bae tomadiho henia na namo. (Deu. 5:6-10) Bona Iesu na Diabolo ese e dibaḡania neganai, e hahedinaraia ḡoevaḡoeva namona na Iehova sibona baita tomadiho henia. (Mat. 4:8-10) Una dainai, ita ese kaivakuku na asita tomadiho henidiamu. Danu, tomadiho igunalaina taudia, politikol lohiadia, spot taudia, muvi ekta, bona miusik ai mai ladadia taudia na basita imodaidia o dirava ai basita halaodia. Ḡau badana na Iehova baita badinaia bona ia sibona baita tomadiho henia, badina ia ese ‘ḡau iboudiai e havara.’​—Apokalupo 4:11 ba duahia.

5. Dahaka dainai Iehova ena taravatu mauri bona rara ai baita badinaia?

⁵ Iehova ena taravatu mauri bona rara ai baita badinaia. Dahaka dainai? Badina Iehova na e gwaumu rara ese mauri e laulaulaia, bona una na iena harihari ḡauna namona ta. (Lev. 17:14) Matamana ai Iehova ese taunimanima e haḡanidia animal hidiodia bae ani neganai, raradia na basie ani. (Gen. 9:4) Ia ese Mose ena Taravatu na Israel taudia e henidia neganai, una haheḡani na ma e gwauraia lou. (Lev. 17:10) Bona aposetolo edia negai gavanin bodi amo Kristen taudia iboudiai e hamaorodia, eto, “rara . . . na basio ani.” (Apos. 15:28, 29) Namona na medikol dalanai abi hidi ta karamu neganai, una haheḡani na baita badinaia. b

6. Dahaka baita kara Iehova ena kara maoromaoro taravatudia baita badina?

⁶ Iehova ena kara maoromaoro taravatudia baita badina. (Heb. 13:4) Aposetolo Paulo na e gwa, tauanida ena ura dikadia iboudiai baita “hamase,” anina na baita hekwarahi baita kokidia vaitani. Matabodaḡa urana e havaraiamu ḡaudia basita ita bona karadia basita kara. (Kol. 3:5; Iobu 31:1) Hedibaḡani ta davarimu neganai baita dadaraia haraḡa na namo, badina asita uramu lalohadai dikana ta o kara dikana ta ese eda hetura karana Dirava ida baine hadikaia.

7. Dahaka baita kara na namo, bona dahaka dainai?

⁷ Iehova na e uramu “mai kudouda ibounai ida” ia baita badinaia. (Roma 6:17, NWT) Ia ese ena hahekau herevadia e henimu na iseda namo totona, bona iena taravatu na basita haidau diba. (Isa. 48:17, 18; 1 Kor. 6:9, 10) Namona na baita hekwarahi Iehova baita hamoalea, bona salamo itorena tauna ena lalohadai heḡereḡerena baita lalo, ia na eto: “Lalogu vada eme heḡaeḡae, emu taravatu karadia baina kara, nega iboudiai, ela bona dokona.” (Sal. 119:112) To, Satana na e uramu eda abidadama baine hamanokaia. Una dainai ia be dahaka ḡau haida ḡaukaralaimu?

8. Edena dala ai Satana na daḡedaḡe karadia amo eda abidadama e hamanokaia tohomu?

⁸ Daḡedaḡe. Diabolo ese daḡedaḡe karadia bona lalohekwarahi ḡaudia e ḡaukaralaimu eda abidadama baine hamanokaia totona. Ia na e uramu iseda hetura karana Iehova  ida baine hadikaia. (1 Pet. 5:8) Aposetolo edia negai, Kristen taudia edia abidadama na goada dainai, inaidia ese e hagaridia, e dadabadia bona e hamasedia. (Apos. 5:27, 28, 40; 7:54-60) Hari ina negai, Satana na doini daḡedaḡe karadia e ḡaukaralaimu. Russia bona tano ma haida ai tadikaka taihu e daḡedaḡe henidiamu o dala ma haida amo e hahisidiamu karana amo una ta dibaiamu.

9. Hehuni ai e varamu hahetohodia daidiai baita henahua toho sivaraina ta be dahaka?

⁹ Hehuni ai e varamu hahetohodia. Satana na “kara dibaka” o hehuni daladia e ḡaukaralaimu danu. (Efe. 6:11) Mani tadikaka ta ladana Bob ena sivarai aita laloa, ia na opereisin badana ta baine abia dainai hospele ai e noho. Ia ese dokta e hamaorodia rara na basine abi. Bona dokta ese ena abi hidi na e matauraia. To, opereisin do se abia hanuaboina ai, Bob ena ruma bese e lou murinai, dokta ma ta ese Bob e vadivadia. Bona e hamaoroa rara na reana basie ḡaukaralaiamu, to ia enai dahaka baine vara neganai rara bae henia. Reana una dokta na e lalo iena ruma bese na lasihidia dainai Bob na lalona be haidauamu. To Bob na dounu ena abidadama ai e gini goada, bona dokta e hamaoroa, herevana ia enai dahaka baine vara to rara na basine abi.

10. Dahaka dainai taunimanima edia lalohadai na idoa ta? (1 Korinto 3:19, 20)

¹⁰ Taunimanima edia lalohadai. Bema taunimanima edia lalohadai ai ḡau baita haeromu, Iehova bona ena taravatu na basita lalodiamu. (1 Korinto 3:19, 20 ba duahidia.) Nega momo “ina tanobada aonegana” ese taunimanima lalodia e verimu Dirava bae dadaraia. Kristen taudia haida na Peregamo bona Tuatira taudia edia matabodaḡa bona kaivakuku itomadiho henidia lalohadaidia e abi dae. Iesu ese unu kongrigeisin ruaosi na e sisiba henidia auka badina matabodaḡa karadia na se koudia. (Apok. 2:14, 20) Hari ina negai, taunimanima ese laloda e verimu, lalohadai kereredia baita abi dae. Eda ruma bese taudia bona turada ese be hamaorodamu eda taravatu na auka bona be doridamu Dirava ena taravatu baita utudia. Heḡereḡere, reana be gwaumu siboda eda ura baita haḡuḡuru na dia kerere, bona Baibul ena taravatu na gugunana.

11. Dahaka basita kara na namo?

¹¹ Nega haida, reana baita lalomu Iehova ena hahekau dalana ilalopararalaina na auka. Bona reana basita uramu “Buka Helaḡa ai e tore herevadia” baita badina. (1 Kor. 4:6) Iesu ena negai tomadiho igunalaina taudia na unu e kara toma. Idia na Taravatu latadiai sibodia edia taravatu e ato kauva, unu amo maduna metaudia na taunimanima ediai e atova. (Mat. 23:4) Iehova ena Hereva bona ena orea amo e henimu hahekau herevadia na hehedinararai. Bona hereva ma haida baita ato kau na asi badina. (Her. 3:5-7) Una dainai, Baibul ai e hetore herevadia baita badina, bona tadikaka taihu ese e abi hidimu ḡaudia ai siboda eda taravatu basita ato.

12. Edena dala ai Satana ese “lalo-hadai koikoidia” e ḡaukaralaimu?

¹² Lalohadai koikoidia. Satana ese “lalo-hadai koikoidia” bona “tanobada ena lalohadai badadia” amo taunimanima e hakaudia kereremu bona e hapararadiamu. (Kol. 2:8; NWT) Aposetolo edia negai, unu lalohadai haida bini: Taunimanima edia aonega, Iuda taudia edia hahediba hereva koikoidia, bona Kristen taudia ese Mose ena Taravatu bae badinaia auka hahedibana. Unu lalohadai ese taunimanima e koidiamu dainai aonega e henimu Tauna korikorina, Iehova, e dadaraiamu. Hari ina negai, Satana ese media o intanet amo politikol lohiadia edia lalohadai bona sivarai  koikoidia e halasimu. COVID-19 pandemic lalonai sivarai unu bamodia momo e halasi. c Iehova ena Witnes taudia na edia orea ena hahekau dalana e badinaia dainai asie lalohekwarahi, to sivarai koikoidia e abi dae taudia be e lalohekwarahi bada.​—Mat. 24:45.

13. Dahaka dainai lalo veri ḡaudia daidiai nahuada baita toho?

¹³ Lalo veri ḡaudia. Namona na “mai anidia bada ḡaudia” baita lalodia. (Fili. 1:9, 10; NWT) Lalo veri ḡaudia ese eda nega bona goada na bae haore diba. Bema vaevae mauri ai ta karamu ḡaudia, heḡereḡere aniani, inuinu, moale karadia, bona moni ḡaukara baita lalodia badamu, mai anidia bada ḡaudia na baita readiamu. (Luka 21:34, 35) Danu, dina ta ta ai taunimanima o gavamani edia heiriheiri sivaraidia momo ta duahimu bona ta kamonaimu. To unu ese laloda basie veri na namo. Bema basita henahua tohomu darada bona kudouda ai baita abi daemu. Satana na unu dala idauidau amo e uramu eda lalohadai maorona baine hadikaia. Satana baita dadaraia bona Iehova baita badinaia daladia mani aita herevalai.

14. Dahaka ese baine duruda Iehova baita badinaia tarika-tarika?

¹⁴ Emu gwauhamata bona bapatiso ba lalodia. Oi na unu kara ruaosi o kara badina o ura Iehova ba badinaia. Ba laloatao oi be dahaka ese e durumu bena o abia dae hereva momokani na vada o davaria. Iehova ena diba maoromaorona o abia dainai emu hemataurai bona lalokau ia enai na e bada. Emu abidadama o hagoadaia bona o helalo-kerehai. Kara dikadia o dadarai bona Dirava ena ura o badinaia. O laloparara Dirava ese emu dika e gwautao neganai o moale. (Sal. 32:1, 2) Kristen heboudia ola bona o diba ḡaudia namodia na ma haida ediai o herevalai. Oi na gwauhamata bona bapatiso Kristen tauna dainai, mauri e lao heniamu dalanai o rakamu, bona lalomu na o hadaia una dala ai dounu ba raka.​—Mat. 7:13, 14.

15. Dahaka dainai stadi bona laloa dobu na mai edia namo?

 ¹⁵ Dirava ena Hereva ba stadilaia bona ba laloa dobu. Au ta ramuna na tano ai e diho herea dainai e gini goadamu, una heḡereḡerena eda abidadama na Dirava ena Hereva ai baita hagoadaiamu neganai, baita gini goadamu. Au e tubumu neganai, ramuna na e diho momokanimu bona e momo hereamu. Baita stadimu bona baita lalo dobumu neganai, eda abidadama na be goadamu bona baita abia daemu Dirava ena dala na hereadae. (Kol. 2:6, 7) Iehova ena hereva, ena sisiba, bona ena hegima karana ese guna ena taunimanima e durudia dalana ba haeroa. Heḡereḡere, Esekiel na matahanai ta lalonai e itaia aneru ta ese dubu helaḡa e hahetohoa namonamo. Una matahanai ese Esekiel na e hagoadaia, bona una ese ita e hadibadamu Iehova ena taravatu tomadiho ḡoevana ai baita badinaia na ḡau badana. d (Esek. 40:1-4; 43:10-12) Ita danu namo baita davarimu bema nega baita atomu Dirava ena Hereva dobudia baita stadilaimu bona baita lalodia dobumu.

16. Edena dala ai Bob na lalona e hagoadaia karana ese e gimaia? (Salamo 112:7)

¹⁶ Lalomu na baine goada. King David na ena ane ai e hahedinaraia iena lalokau Iehova enai na goada, eto: “Dirava e, lau lalogu na auka.” (Sal. 57:7) Ita danu laloda baita hagoada, bona Iehova baita abidadama henia momokani. (Salamo 112:7 ba duahia.) Una ese matamanai ta herevalaia tadikakana, Bob e durua dalana mani a laloa. Dokta ese e hamaoroa bema ia enai ḡau ta baine vara neganai rara bae henia, to ia na e gwa bema idia na doini e uramu ia rara bae henia, ia na maoromaoro hospele baine rakatania. Gabeai, Bob na e gwa, “Asina daradara lau be dahaka baina kara bona egu ai baine vara ḡauna na asina lalohekwarahilaia.”

17. Bob ena sivarai amo dahaka ta dibamu? (Laulau danu ba itaia.)

¹⁷ Bob na ena abidadama ai e gini goada badina hospele do sela neganai, ia na abi hidi vada e kara Dirava baine badinaia tarika-tarika.  Ḡau ginigunana na, ia na e ura Iehova baine hamoalea. Iharuana na, ia ese Baibul bona iseda pablikeisin idauidau ai mauri bona rara e herevalai kahadia e stadilai namonamo. Ihatoina na, e diba momokani Iehova ena hahekau dalana be badinaiamu neganai, mia hanaihanai hahenamodia be abimu. Ita danu laloda na baine goada bona Dirava baita badinaia, herevana dahaka hahetoho baita davari.

18. Edena dala ai Barak ena haheitalai ese e hadibadamu Iehova baita abidadama henia? (Rau 1 laulauna ba itaia.)

¹⁸ Iehova bavabidadama henia. Mani Barak ese Iehova ena hahekau dalana e badinaia dainai e kwalimu dalana aita laloa. Ena be Israel taudia na asi edia kesi bona io, to Iehova ese Barak e hamaoroa Kanaan edia tuari biaguna Sisera mai ena orea ida baine hatuari henidia, unu Kanaan taudia na mai edia tuari kohudia momo. (Hah. 5:8) Peroveta hahinena Debora ese Barak e hamaoroa ororo amo baine diho taora kahana bena Sisera bona ena kariota 900 baine tuari henidia. Ena be Barak na mai dibana Israel taudia ediai na be aukamu taora ai e heau haraḡamu kariotadia bae tuari henidia, to ia ese Iehova ena hereva e badinaia. Tuari taudia na Taboro Ororona amo e diho neganai, Iehova ese medu bada herea e hadihoa. Sisera ena kariota na kopukopu ai e hepuni, bena Iehova ese Barak e durua e kwalimu. (Hah. 4:1-7, 10, 13-16) Una heḡereḡerena, bema Iehova enai baita tabekaumu bona ena orea amo e henidamu hahekau daladia baita badinamu, ita danu baita kwalimumu.​—Deu. 31:6.

19. Dahaka dainai o uramu Dirava ba badinaia tarika-tarika?

¹⁹ Ita na ina nega oromana dikana lalonai ta nohomu dainai, dounu baita hekwarahi Dirava baita badinaia. (1 Tim. 6:11, 12; 2 Pet. 3:17) Laloda baita hadai ini ḡau ese basie hamoruda: Daḡedaḡe, hehuni ai e varamu hahetohodia, taunimanima edia lalohadai, lalohadai koikoidia, bona lalo veri ḡaudia. (Efe. 4:14) To Iehova baita badinaia tarika-tarika, ia sibona baita tomadiho henia bona ena haheḡani baita badina. Danu, namona na baita lalo maoromaoro. Atikol gabena ai, baita itaiamu edena dalai Iehova bona Iesu na lalo maoromaoro karana ai haheitalai namona e hahedinaraia.