Ita ta ta eda nega na dia bada siboda eda stadi baita kara totona. To edena dala ai nega baita ḡaukaralaia namonamo? Ḡau ginigunana na, nega bavato o duahiamu ḡauna ba lalohadailaia. Sivarai kwadoḡina ta bo stadilaiamu neganai bo lalopararamu, to sivarai idauidau bo duahi haraḡa-haraḡamu neganai basio lalopararamu.

Ḡau iharuana na, mai anidia bada ḡaudia haida bavato guna. (Efe. 5:15, 16) Bae durumu ḡaudia haida be ini:

• Dina ta ta ai Baibul ba duahia. (Sal. 1:2) Eda wiki ta ta heboudia edia Baibul duahiduahi sediual ba badinaia.

• Gima Kohorona Stadi bona wiki lalonai ta abiamu hebouna totona ba heḡaeḡae. Bona hebou lalonai haere ba heni.​—Sal. 22:22.

• Bema mai emu nega, lauma anianidia ma haida, heḡereḡere pablik Gima Kohorona bona Awake! magasin, vidio idauidau, bona jw.org ai e halasimu ḡaudia ma haida ba duahidia bona ba itadia.

• Stadi projek ta ba karaia. Heḡereḡere, o davariamu hekwakwanaina ta ihanaina dalana, o laloamu henanadaina ta, eiava o uramu ba lalopararalaia namonamo Baibul topik ta ba hetahulaia. Oi baine durumu ḡauna ta na, jw.org ai ina kaha “Bible Study Activities” ba itaia.