1. Baibul o stadilaia matama neganai dahaka ḡau haida o diba?

 OI ESE Baibul o stadilaia matama neganai, o diba ḡaudia o lalodiataomu, a? Reana Dirava ladana o diba neganai o moale. Eiava o moale badina o diba Dirava ese taunimanima na hel lahina lalonai se hahisidiamu. Bona o moale badina o laloparara emu lalokau mase taudia na bo itadia loumu bona idia ida tanobada paradaisona ai bo nohomu.

2. Baibul ena hereva momokanidia o diba neganai, dahaka ḡau ma haida o kara? (Efeso 5:1, 2)

² Baibul o stadilaiava neganai, emu lalokau Iehova enai danu e bada e laova. Una lalokau dainai o diba ḡaudia na o badinadia. Baibul ena hahekau herevadia heḡereḡeredia ai abi hidi namodia o kara. Bona emu lalohadai bona kara o haidau, badina o ura Dirava ba hamoalea. Natu ta ese tamana o sinana lalokauna e tohotohoamu heḡereḡerena, oi ese Tamamu guba ai o tohotohoamu.​—Efeso 5:1, 2 ba duahidia.

3. Ededia henanadai na siboda ese baita lalodia?

³ Reana siboda baita henanadai: ‘Kristen tauna ai nala negana amo egu lalokau Iehova enai be na habadaiamu eiava? Lau na bapatiso negana amo tadikaka taihu na lalokau henidiamu ese e hahedinaraiamu, Iehova ena lalohadai bona kara na tohotohomu, a?’ Bema Iehova bona ma haida ediai o hahedinaraia ‘lalokauna’ na e keru, basio lalomanoka. Kristen ginigunadia ediai una na e vara. To Iesu ese idia na se dadaraidia, una heḡereḡerena ita danu basine dadaraidamu. (Apok. 2:4, 7) Ia na mai dibana hereva momokani ta dibaia matama neganai ta hahedinaraia lalokauna na baita hagoadaia lou dibamu.

4. Ina atikol ai dahaka baita herevalaimu?

⁴ Ina atikol ai, iseda lalokau Iehova bona ma haida ediai baita  hagoadaia dalana baita herevalaiamu. Bona eda lalokau baita habadaiamu neganai, ita bona ma haida ese baita abimu hahenamodia haida baita dibamu.

5-6. Paulo ena hesiai ḡaukara ai ededia hekwakwanai e davari, bona dahaka ese e durua Iehova dounu e hesiai henia?

⁵ Ena be aposetolo Paulo na mai moalena ida Iehova e hesiai heniava, to hekwakwanai momo e davari. Heḡereḡere, nega momo ia na gabu daudaudia e laova, bona unu negai laolao unu bamodia na mai hekwarahina. Iena laolao lalodiai, nega haida “sinavai ai” bona “dadidadi taudia” amo dika e davariva. Danu nega ma haida inaina ese e dadabaiava. (2 Kor. 11:23-27) Bona nega haida tadikakana ese iena heduru na asie lalo badava.​—2 Kor. 10:10; Fili. 4:15.

⁶ Dahaka ese Paulo e durua dainai dounu Iehova e hesiai henia? Paulo ese Toretore Helaḡadia bona enai e vara ḡaudia amo Iehova ena kara namodia e diba. Paulo na e abia dae momokani Iehova Dirava ese ia na e lalokau heniava. (Roma 8:38, 39; Efe. 2:4, 5) Una dainai ia ese Iehova na e lalokau henia bada. Paulo na hanaihanai ‘helaḡa taudia e durudiava’ karana amo ena lalokau Iehova enai e hahedinaraia.​—Heb. 6:10.

7. Iehova enai eda lalokau baita habadaia dalana ta be dahaka?

⁷ Eda lalokau Dirava enai baita habadaia dalana ta na, hanaihanai iena Hereva baita stadilaia. Baibul ai sivarai ta ta o duahimu neganai, unu sivarai ese Iehova ena kara e hahedinarai daladia ba lalo. Bena sibomu ba henanadai: ‘Ina sivarai ese edena dala ai e hahedinaraiamu Iehova ese lau na e lalokau henigumu? Dahaka badi daidiai Iehova baina lalokau henia?’

8. Edena dala ai ḡuriḡuri karana ese eda lalokau Dirava enai e habadaiamu?

⁸ Iehova enai eda lalokau baita habadaia dalana ma ta na, hanaihanai ia baita ḡuriḡuri henia bona eda hemami ibounai baita hamaorolaia. (Sal. 25:4, 5) Bena Iehova ese eda ḡuriḡuri na be haerelaimu. (1 Ioa. 3:21, 22) Asia ai, taihu ta na e gwa: “Matamanai lau na Iehova na dibaia dainai na lalokau heniava, to egu ḡuriḡuri e haerelai daladia na lalopararalai neganai, egu lalokau ia enai na e bada. Una dainai na ura ia ihamoalena karadia baina kara.” b

9. Paulo ena hereva ese ede e hahedinaraia toma Timoteo na ma haida e lalokau henidia?

⁹ Paulo na Kristen tauna ai ela, bena laḡani haida muridiai eregabe tauna Timoteo e hedavari henia. Timoteo ese Iehova bona taunimanima na e lalokau henidiava. Paulo ese Filipi taudia e hamaorodia, eto: “Dekegu ai ta lasi [Timoteo] heḡereḡerena; ta lasi umui baine reḡumui ia baine reḡumui heḡereḡerena.” (Fili. 2:20) Paulo na dia Timoteo ese ḡau e kara namonamova eiava tok e heni namonamova karana e herevalaia, to Timoteo ese tadikaka taihu e lalokau henidiava karana e herevalaia. Una dainai kongrigeisin taudia ese Timoteo ena vadivadi na e moalelaiava.​—1 Kor. 4:17.

10. Anna bona adavana ese tadikaka taihu ilalokau henidia karana be ede e hahedinaraia toma?

¹⁰ Ita danu dala idauidau ai eda Kristen tadikaka taihu baita durudia. (Heb. 13:16) Mani atikol 29 ai ta herevalaia taihuna, Anna aita laloa. Lai gubana ta murinai, ia bona adavana na Witnes ruma besena ta e vadivadia bona e davaria una ruma bese edia ruma guhina na  lai ese e hadikaia. Una dainai, edia dabua iboudiai na mai mirodia. Anna na e gwa: “Edia dabua a abidia, a huridia, a aeanidia, bona a lokudia, bena a henidia lou. Una na dia ḡaukara badana, to una dainai ema bona hari ai na tura namodia.” Anna bona adavana na tadikaka taihu e lalokau henidia dainai, ḡau haida e kara idia e durudia.​—1 Ioa. 3:17, 18.

11. (a) Haida ese eda lalokau karana be ede e laloa tomamu? (b) Hereva Lada-isidia 19:17 heḡereḡerena, eda lalokau dainai Iehova be dahaka be karamu?

¹¹ Ma haida ta kara namo henidiamu bona lalokau ta hahedinaraiamu neganai, be itaiamu ita na ta uramu Iehova baita tohotohoa. Bona idia ese eda kara namodia na be lalo badamu. Paragraf 8 ai tame herevalaia Asia taihuna ese ia e durua taudia na e lalodiataomu. Ia na e gwa: “Lau na, na moalemu badina taihu haida ese haroro ḡaukara ai e bamoguva. Edia motuka amo e udaguva, e boiriguva idia ida baia lansi, bena egu ruma ai e ha atoguva. Hari na lalopararamu idia na lau daiguai e hekwarahi bada. Bona e lalokau henigu dainai unu e kara toma.” Vaia, ta durudiamu taudia haida ese ita na basie tenkiu henidamu. Una taihu ese ia e durua taudia na ini e herevalaidia toma: “Egu ura na idia edia kara namodia daidiai baina tenkiu henidia, to asi dibagu hari idia be edekahai e nohomu. To, Iehova hari mai dibana, bona ia na noiamu idia baine hanamodia.” Taihu ena hereva na maoro. Iehova ese ma haida daidiai ta karamu kara namodia iboudiai na e itamu. Ia ese unu kara na e lalo badamu, unu na vaitani ia enai ta heni torehaimu bona ia ese davana baine haloua.​—Hereva Lada-isidia 19:17 ba duahia.

12. Tadikaka ese kongrigeisin taudia ediai lalokau be ede bae hahedinaraia toma? (Laulau danu ba itaia.)

¹² Bema oi na tadikaka, edena dala ai ma haida ediai lalokau ba hahedinaraia bona ba durudia?  Eregabe tadikakana ta ladana Jordan na elda ta e nanadaia kongrigeisin taudia be ede baine durudia toma. Una elda ese e hanamoa badina iena hesiai ḡaukara na e goadalaiamu bona e hagoadaia ḡau ma haida baine kara diba. Heḡereḡere, Jordan e hamaoroa Kingdom Hall ai baine kau haraḡa, unu amo ma haida baine hedavari henidia, hebou ai haere baine heni, ena haroro grup ida baine haroro hanaihanai, bona dala ma haida ai haida baine durudia. Jordan na unu e kara toma neganai, dia ḡau haida ikaradia dalana mo e diba, to tadikaka taihu ilalokau henidia karana danu e habadaia. Danu e laloparara tadikaka ta na hesiai tauna madunana e abiamu neganai, ia na dounu ma haida baine durudia.​—1 Tim. 3:8-10, 13.

13. Edena dala ai lalokau karana ese tadikaka Christian e durua elda madunana e abia lou?

¹³ To bema guna oi na hesiai tauna o elda madunana o abia to hari na lasi be ede bamona? Iehova ese guna o kara ḡaukaradia bona o hahedinaraia lalokauna na se laloaboiomu. (1 Kor. 15:58) Danu una lalokau dounu o hahedinaraiamu dalana na e itaiamu. Tadikaka ta ladana Christian na ena elda maduna e kokia neganai, e lalohisihisi. To, ia na e gwa: “Lalogu na hadaia lalokau dainai Iehova baina hesiai henia​—ena be elda maduna na abia eiava lasi.” Gabeai, ia na elda maduna e abia lou. Christian na e gwa: “Elda madunana na abia lou neganai, taina na gari. To na lalo bema una maduna na Iehova ena hebogahisi dainai na abia, namona na ḡaukarana baina karaia, badina Iehova bona tadikaka taihu na lalokau henidiamu.”

14. Georgia taihuna ta ena hereva amo dahaka o dibamu?

¹⁴ Iehova ena hesiai taudia na dekedia taudia danu e lalokau heniamu. (Mat. 22:37-39)  Heḡereḡere, Georgia ai, taihu Elena na e gwa: “Lau na Iehova na lalokau heniamu dainai haroro ḡaukara na karaiamu. To egu lalokau ia enai na habadaia neganai, taunimanima ilalokau henidia karana danu na habadaia. Edia hekwakwanai bona idurudia herevadia na lalodiava. Bona unu na kara toma loulouva dainai, na ura dikadika baina durudia.”​—Roma 10:13-15.

15-16. Laulau ai heḡereḡerena, ma haida ilalokau henidia karana amo dahaka hahenamo be varamu?

¹⁵ Ita ese tadikakada ediai lalokau baita hahedinaraiamu neganai, dia idia mo namo be davarimu. COVID-19 pandemic e matama murinai, tadikaka ta ladana Paolo bona adavana ese taihu burukadia momo e durudia edia fon, tablet o kompiuta amo bae haroro daladia e diba. Taihu ta na matamanai enai na e auka ena fon baine ḡaukaralaia, to gabeai iḡaukaralaina dalana e diba neganai, varavarana e vavedia Memorial baema. Idia 16 na videoconference amo una Memorial hebouna e abia. Momokani, Paolo bona adavana edia hekwarahi dainai, una taihu bona varavarana na namo e davari. Gabeai, una taihu ese Paolo e tore henia, eto: “Tenkiu ai burukamai o hadibamai dainai. Lau ese emui hekwarahi bona Iehova ese e lalomaimu karana na basina laloboiomu.”

¹⁶ Ekspiriens unu bamodia amo Paolo na mai anina bada ḡauna ta e dibaia. Ia na e diba lalokau ese diba iabina karana na e hereaia. Ia  na e gwa: “Lau na guna seket ḡaukarana na karaiava. Hari, na lalopararamu ena be pablisa ese egu tok na vada e lalodiaboio, to idia na durudiava karadia na doini e lalotaomu.”

17. Lalokau ta hahedinaraiamu neganai, daidia danu namo e davarimu?

¹⁷ Lalokau ta hahedinaraiamu neganai, asita lalomu daladiai namo ta davarimu. New Zealand ai e nohomu tadikakana Jonathan ese una na e hamomokania. Saturday adorahi ta ai, ia ese painia tadikakana ta e itaia sibona dala ai e harorova. Jonathan na lalona e hadaia Saturday adorahi ai una painia tadikakana ida bae ḡaukara hebou. Una neganai se laloparara una kara namona amo ia na namo baine davari. Jonathan na e gwa: “Egu mauri lalonai haroro ḡaukara na asina moalelaiava, to una negai una painia tadikaka ena hahediba dalana na kamonai bona ena hesiai ḡaukara ai e vara ḡau namodia na ita neganai, haroro ḡaukarana na moalelaia. Danu una tadikaka na turagu namona ai ela, bona ia ese e durugu lauma dalanai baina goada, egu hesiai ḡaukara baina moalelaia, bona egu hetura karana Iehova ida baina hagoadaia.”

18. Iehova be e uramu dahaka baita kara?

¹⁸ Iehova na e uramu ia bona ma haida ilalokau henidia karana baita habadaia. Ina stadi ai tame diba, Iehova enai eda lalokau baita habadaia dalana na, iena Hereva baita duahia bona baita laloa dobu, bona hanaihanai ia baita ḡuriḡuri henia. Danu, tadikaka taihu ediai eda lalokau baita habadaia dalana na, dala idauidau ai baita durudia. Eda lalokau be badamu neganai, iseda hetura karana Iehova bona tadikaka taihu ida na be goadamu. Bona unu hetura karadia na baita moalelai hanaihanaimu!