Tamagu na Canada edia United Church ena elda ta, una dainai wiki ta ta iboudiai lau bona tadigu na e siaimaiva baia Sunday skuli, bena daba 11 oklok ai ia ida a laova dubu ḡuriḡurina. Bona adorahi ai be sinagu ida a laova Kingdom Hall. Unu tomadiho ruaosi edia idau na a itadia.

Sinagu na Baibul amo e diba ḡaudia na turana namodia Bob bona Marion Hutcheson ediai e herevalai, bona idia danu hereva momokani e abia dae. Laḡani 1958 ai, tadikaka bona taihu Hutcheson ese lau bona natudia memerodia tatoiosi na e laohaimai, dina 8 Divine Will Intanesinol Hebouhebouna, New York ai. Na lalo loumu neganai, na dibamu idia na e hekwarahi lau danu bae laohaigu, to egu mauri lalonai una hebouhebou na asina laloaboiomu.

Ai na farm ai a nohova, unuseniai animal inaridia ḡaukarana na moalelaia. Bona na lalova animal edia dokta ai bainala. Sinagu ese egu lalohadai na emai kongrigeisin elda ta enai e herevalaia. Una elda ese e hamaorogu ita na “dina gabedia” ai ta nohomu, bona e nanadaigu bema laḡani haida lalodiai iunivesiti ba laomu, egu hetura karana Iehova ida be ede be hetomu. (2 Tim. 3:1) Una ese e durugu dainai lalogu na hadaia iunivesiti na basinala.

 To dounu na lalova, haiskul amo baina gradueit murinai be dahaka baina kara. Ena be wiken iboudiai na harorova to asina moalelaiava bona na lalova painia ḡaukara na basina karaia diba. Tamagu bona tadina na dia Iehova ena Witnes taudia bona idia ese e hagoadagu Toronto ai insurance kampani ta ai baina ḡaukara. Una kampani ai vavagu na dagi badana ta e dogoataova dainai, lau na una kampani ai na ḡaukara.

Toronto ai, lau na ovataim momo na karava bona dia Witnes taudia na bamodiava dainai, hebou bona haroro ḡaukara na, na readiava. Matamanai lau na tubugu tauna ida a nohova, ia na dia Witnes tauna, to e mase murinai lau na noho gabuna ma ta na tahua.

Laḡani 1958 hebouhebouna ai lau e laohaigu taudia, tadikaka bona taihu Hutcheson na vaitani lau tamagu bona sinagu. Idia ese e boirigu idia ida baina noho bona e durugu lauma dalanai na goada. Laḡani 1960 ai, idia natudia John ida a bapatiso hebou. John na painia ḡaukara e hamatamaia, bona una ese e hagoadagu egu hesiai ḡaukara baina habadaia. Kongrigeisin ai tadikaka ese e itagu lauma dalanai na goadava dainai, e abigu hidi Theocratic Ministry School baina naria. a

Laḡani 1966 ai, Randi Berge na adavaia, ia na painia goadana ta bona e ura dikadikava pablisa dia momo gabudiai baine haroro. Emai seket tauna ese e hagoadamai Ontario ai, Orillia kongrigeisin baia durua. Una dainai emai kohu a habou bena unu ala.

Orillia ai a kau bena se daudau, lau danu regula painia ḡaukarana na karaia. Randi e moale heḡereḡerena lau danu na moale! Painia namona ai bainala totona na ḡaukara goada, bona Baibul na ḡaukaralaiava bona taunimanima ese e lalopararalaiava neganai, na moale. Orillia ai tau ta mai adavana ida a durudia bona idia na edia mauri e haidaua bona Iehova ena Witnes taudia ai ela neganai, a moale bada.

Toronto ala neganai, lau ese Arnold MacNamara na hedavari henia, ia na Betele ai e ḡaukarava tadikakana ta. Ia ese e nanadaigu bema ai na a uramu baia spesol painia. Maoromaoro na gwa: “Oibe, a uramu! To dia Quebec baiala!” Unu na lalo toma badina English gado ai e herevava Canada taudia ese French gado ai e herevava Quebec taudia na e inai henidiava. Una negai, Quebec gavamanina na e urava Canada amo bae parara, bena sibodia bae henari.

Arnold na e gwa, “Ina hora ai, Brens ese spesol painia na Quebec mo e siaidia laomu.” Bena lalogu na hadaia baiala. Bona na diba Randi na be uramu unu baiala. Gabeai, na laloparara emai mauri lalonai una abi hidi na abi hidi namo hereana ta!

Wiki 5 lalodiai French gado skulina a abia murinai, lau, Randi bona tadikaka ta mai adavana ida na ala Rimouski, ena daudau notist Montreal amo na 540 kilomita heḡereḡerena. Emai hebou ta ai announcement haida na duahiva neganai, na diba French gado na dounu baia dibaia namonamo. Heḡereḡere, hebohebou na herevalaia neganai, lau be baina gwa, “Austria delegates” momo be maimu, to na vasi gwau kerere “ostrich delegates” momo be maimu.

Rimouski ai, ai taumai haniosi bona singul taihu goadadia hani na tadikaka bona taihu Huberdeaus mai natudia kekeni raruosi ida a nohova. Huberdeaus ese ruma ta e rentia, daiutuna na 7 bona una ruma na a gwauraia White House badina habana bona dudia na kukurokuro. Nega momo unukahai a nohova taumai na 12 eiava 14. Lau bona Randi na a spesol painiava dainai, daba, adorahi bona hanuaboi ai a harorova bona haida ese e bamomaiva neganai, una na a moalelaiava, ena be hanuaboi haida na snow negana.

Unu painia goadadia ida emai hetura karana na e goada bona idia na vaitani emai ruma bese. Nega haida ai na lahi a karava bena badinai a helaiva, eiava dina ta a abia hidiva pai baia kara hebou. Tadikaka ta na miusik igadaralaidia na mai dibana dainai, Saturday hanuaboi ai nega momo ane a abiva bona a mavaruva.

Rimouski ai momo na e ura Baibul bae dibaia! Laḡani 5 lalodiai, a moale badina Baibul stadi haida na e goada ela bona e bapatiso. Bona kongrigeisin ena pablisa nambana na e dae 35 bamona.

Quebec ai, treinin namona a abia sivarai namona baia harorolaia totona. Iehova ese emai hesiai ḡaukara ai bona emai dabu ḡaudia ai e durumai daladia na a ita. Danu, ai ese French gado e herevalaiava taudia, una gado, bona edia mauri dalana na a ura henia, unu amo ma haida edia mauri daladia danu a ura heni.​—2 Kor. 6:13.

Gabeai, brens ese e noimai Tracadie taonina baiala, una na New Brunswick ena ist kahana konenai. Emai ai na taina e auka badina ai na apatmen ta baia rentia kontrakana a sainia bona lau na skuli ta ai pat-taim hahediba ḡaukarana na karaiava. Dia una mo, to emai stadi taudia haida na pablisa matamata ai ela bona ai na Kingdom Hall ta a haginiava.

Wiken ai una na a ḡuriḡurilaia bona Tracadie a vadivadia, unuseniai taunimanima edia noho dalana na taina idau Rimouski taudia edia amo. To a lalo bema una na Iehova ena ura, namona na baiala. Iehova ena ura a badinaia neganai, a mamia ia ese emai metau ḡaudia ta ta na e kokidia. (Mal. 3:10) Randi ena hetura karana Iehova ida na goada, ia na sibona ena ura e dadaraia,  bona moale hahinena dainai, una taoni baiala na dia auka.

Emai kongrigeisin matamatana ai elda na tamona, ladana na Robert Ross. Ia bona adavana Linda na unuseniai e painiava bona natudia ginigunana e vara neganai, idia na lalodia e hadai unuseniai bae noho. Danu natudia e nariava lalonai, edia heabidae na namo herea bona haroro ḡaukara e goadalaiava, una ese lau bona Randi na e hagoadamai bada.

Tracadie ai laḡani rua a painia murinai, asia laloa hahenamona ma ta abia, una na seket ḡaukarana. Laḡani 7 lalodiai English gado teritoridia ai seket ḡaukarana a karaia murinai, ma e siaimai lou Quebec ai French gado teritorina ta ai seket ḡaukarana baia karaia. Quebec ai emai distrik inarina tadikakana, Léonce Crépeault na egu tok daidiai e tenkiu henigu. To gabeai e nanadaiguva, “Unu tok ese taunimanima be ede be durudia tomamu?” b Una henanadai ese e durugu egu hahediba karana baina hanamoa bona taunimanima ese na herevalaimu ḡaudia na bae lalopararalai.

Laḡani 1978 ena “Victorious Faith” Intanesinol Hebouhebouna Montreal ai na abia asainmen-na asina laloaboiomu. Una negai lau na Food Service kahanai na ḡaukarava. A lalo taunimanima 80,000 baema, bona iubudia dalana matamatana ta e heḡaeḡaelaia. Ḡau iboudiai na mamatamata, heḡereḡere nanadu masinidia, aniani, bona aniani iheḡaeḡaelaidia daladia. Frisa badadia na 20 heḡereḡerena, to nega haida na asie ḡaukarava. Hebouhebou dinana ginigunana do se matama neganai, ai na steidiem lalonai na asia vareai diba ela bona malo badina be spot gadarana ta e heabiva. Bona daba anianidia baia karadia totona dina do se daeva ai aveni na a kehodiava. Tauanimai na e hesiku, to volantia tadikakadia edia ḡaukara goadagoada, edia kara namodia bona moale toadia amo lau na ḡau momo na diba. Ema bona hari ai na doini tura namodia. Momokani, Quebec provins hebouhebouna na asina laloaboiomu. Una provins ai laḡani 1940 ela 1960 lalodiai daḡedaḡe bada herea e vara.

Montreal hebouheboudia ai, egu ovasia edia amo ḡau momo na diba. Laḡani ta ai, David  Splane ese hebouhebou e naria, hari ia na Gavanin Bodi ena memba ta. Murina hebouhebouna ta ai, tadikaka ese e abigu hidi hebouhebou baina naria neganai, David ese e durugu.

Laḡani 36 lalodiai seket ḡaukarana a moalelaia murinai, laḡani 2011 ai e boirigu Kongrigeisin Elda Edia Sikuli ai baina hahediba. Lau bona Randi na laḡani rua lalodiai gabu idauidau 75 ala bona ḡau namodia momo e vara. Wiki ta ta dokodia ai, elda taudia na e moaleva badina e itaia Gavanin Bodi ese elda taudia edia lauma dalana na e laloa bada.

Gabeai, lau na Basileia Evanelia Skulina ai na hahediba. Nega momo stiuden na ḡaukara momo daidiai tauanidia na e hesikuva bona e lalohekwarahiva; idia na hora 7 e skuliva, bona hanuaboi ai hora toi edia houmwek e karava bona wiki ta ta ai idia na asainmen 4 eiava 5 e karava. Lau bona instructor ma haida na idia a hamaorodiava Iehova ena heduru amo unu iboudiai na be kara dibamu. Basina laloaboiomu ḡauna na ina: Stiuden na e moale dikadika badina e diba Iehova enai e tabekauva dainai, e lalo basie haḡuḡuru ḡaudia na e haḡuḡurudia.

Sinagu ese ma haida e lalodia bada karana ese ena Baibul stiuden na e durudia lauma dalanai e goada bona tamagu danu e durua hereva momokani e ura henia. Sinagu e mase bena dina toi muridiai, ai na a hoa badina tamagu na Kingdom Hall ai pablik tok ta ikamonaina ema bona ia na laḡani 26 lalodiai hanaihanai hebou e laova. Ena be tamagu na se bapatiso to elda taudia ese e hamaorogu, wiki ta ta lalodiai ia na hanaihanai hebou ai e kau gunava.

Sinagu na ai natu emai ai haheitalai namona e hahedinaraia. Taihugu tatoisi bona adavadia na Iehova e hesiai henia goadagoadamu. Idia rarua na brens ofesi ai e ḡaukaramu​—ta be Portugal ai bona ma ta be Haiti ai.

Hari, lau bona Randi na Hamilton, Ontario ai spesol painia ḡaukarana a karaiamu. Seket ḡaukara a karaiava neganai, tadikaka taihu edia lou henia bona Baibul stadi ai a bamodiava na mai moalena. To hari, emai stadi taudia a itadiamu lauma dalanai e goadamu neganai a moalemu. Bona emai kongrigeisin matamatana ai tadikaka taihu ida a hebamo lalonai, nega namodia bona dikadia ai Iehova ese idia e durudiamu dalana a itaiamu neganai, una ese e hagoadamaimu.

Na lalo loumu neganai, tadikaka taihu momo ese ai e lalomai karana na, na moalelaiamu. Una dainai, ai danu ma haida a hagoadadiamu Iehova bae hesiai henia goadagoada. (2 Kor. 7:6, 7) Heḡereḡere, ruma bese ta lalonai, taihu bona natuna merona bona kekenina na painia ḡaukarana e karaiamu. Lau ese una taihu adavana na nanadaia bema ia na painia ḡaukarana e lalohadailaiamu. Ia na e gwa, idia tatoisi e durudiamu. Una dainai na nanadaia, “O laloamu idia o durudiamu karana ese Iehova ena heduru e hereaia, a?” Na hagoadaia idia e moalelaiamu ḡauna na ia ese danu baine moalelaia. Hua 6 muridiai ia na painia ḡaukarana e karaia.

Lau bona Randi ese “bae vara urudia” ediai Iehova ena “hoa karadia” na dounu baia gwaurai, bona a uramu idia ese iena hesiai ḡaukarana bae moalelaia, ai ese a moalelaiamu heḡereḡerena.​—Sal. 71:17, 18.