1. Dahaka dainai disasta ta do se vara ai baita heḡaeḡae na aonega karana?

 HEḠAEḠAE karana ese ta baine hamauria diba. Heḡereḡere, disasta ta e varamu neganai, e heḡaeḡae guna taudia na e roho maurimu bona ma haida e durudiamu. Europe ai, taunimanima e durudiamu oreana ta na ini e gwau toma: “E heḡaeḡae namonamomu taudia na dika amo e roho maurimu.”

2. Dahaka dainai hisihisi bada hereana do se vara ai baita heḡaeḡae na namo? (Mataio 24:44)

² “Hisi bada-herea” na be vara haraḡamu. (Mat. 24:21) To, una hisihisi bada hereana na idau disasta momo amo, badina ita na mai dibada una na be varamu. Laḡani 2,000 gunadiai, Iesu ese ia murinai e raka taudia e hadibadia una dina dainai bae heḡaeḡae. (Mataio 24:44 ba duahia.) Bema baita heḡaeḡaemu, una nega aukana ai baita haheaukamu bona ma haida baita durudiamu idia danu unu bae kara toma.​—Luka 21:36.

3. Edena dalai haheauka, hebogahisi bona lalokau ese be durudamu hisihisi bada hereana totona baita heḡaeḡae?

³ Hisihisi bada hereana dainai baita heḡaeḡae totona, bae duruda kara namodia toi mani aita lalodia. Bema bae hamaoroda hahemaoro hereva aukana baita harorolaia bona taunimanima ese bae daḡedaḡe henida neganai, ita be dahaka baita kara? (Apok. 16:21) Iehova baita badinaia totona baita haheauka na namo, bona baita abidadama ia ese ita na be gimadamu. Bema tadikakada edia kohu haida o iboudiai be haboiomu, ita be dahaka baita kara? (Hab. 3:17, 18) Hebogahisi dainai tadikakada edia dabu ḡaudia baita henimu. Bema tanobada gavamanidia iboudiai ese be tuari henidamu dainai tadikaka taihu ida gabu tamonai baita nohomu, ita be dahaka baita kara? (Esek. 38:10-12) Idia ta lalokau henidiamu dainai una nega aukana baita haheaukalaia heboumu.

4. Baibul ese e hagoadadamu dahaka baita kara?

⁴ Dirava ena Hereva ese e hagoadadamu, hanaihanai haheauka,  hebogahisi bona lalokau baita hahedinarai. Luka 21:19 na e gwaumu: “Emui haheauka dainai laumamui do bae mauri.” Kolose 3:12 e gwaumu: ‘Ina na ba hahedokilaia: hebogahisi.’ Bona 1 Tesalonika 4:9, 10 e gwaumu: “Dirava ese vada e hadibamui umui ta ta ba heura heheni. . . . to, varavaramai e, a noimuimu, una kara ba habadaia.” Unu hereva e tore neganai, hahediba taudia ese haheauka, hebogahisi bona lalokau na vada e hahedinaraiva. To, idia ese unu kara na dounu bae hahedinarai na namo, bona ita danu unu baita kara toma. Una baita lalopararalaia totona, Kristen ginigunadia ese unu kara ta ta e hahedinarai daladia mani aita lalodia. Bona baita itaiamu idia baita tohotohodiamu neganai, baita hahedinaraiamu ita na hisihisi bada hereana totona vada ta heḡaeḡae.

5. Kristen ginigunadia ese edia hekwakwanai be ede e haheaukalai toma?

⁵ Paulo ena negai Kristen taudia bae haheauka na namo. (Heb. 10:36) Idia e davariva hekwakwanaidia na taunimanima momo ese e davariva hekwakwanaidia heḡereḡeredia, bona idia na Kristen taudia dainai hekwakwanai ma haida danu e davari. Kristen taudia momo na Iuda tomadiho igunalaina taudia, Roma gavamanina, bona edia ruma bese ese e daḡedaḡe henidiava. (Mat. 10:21) Bona kongrigeisin lalonai, nega momo e hekwarahiva aposteit taudia bona edia hahediba koikoidia bae dadarai. (Apos. 20:29, 30) To, unu Kristen taudia na e haheauka. (Apok. 2:3) Edena dala ai? Idia ese Baibul ai haheauka karana e hahedinaraia taudia sivaraidia e lalodia dobu, heḡereḡere Iobu sivaraina. (Iak. 5:10, 11) Bona idia na Dirava enai goada e noi. (Apos. 4:29-31) Dia una mo to edia haheauka karana dainai Iehova amo bae abia ahuna e laloa.​—Apos. 5:41.

6. Merita ese daḡedaḡe karana e haheaukalaia dalana amo dahaka o dibamu?

⁶ Ita danu baita haheauka dibamu bema hanaihanai Dirava ena Hereva bona eda pablikeisin ai, haheauka karana e hahedinaraia taudia sivaraidia baita stadilaimu bona baita lalodia dobumu. Albania ai, taihu Merita na unu e kara toma dainai, ena ruma bese edia daḡedaḡe karana e haheaukalaia. Ia na eto: “Lau ese Baibul ai Iobu sivaraina na stadilaia neganai, una ese e hagoadagu bada. Ia na e hisihisi bada herea​—asi dibana daika ese ena hisihisi e havarava​—to ini e gwau toma: ‘Harihari ela bona baina mase, egu lalo-maoromaoro basina negea.’ (Iobu 27:5) Lau na laloparara Iobu ena hekwakwanai ese egu hekwakwanai na e hereaia, bona Iobu na asi dibana ena hekwakwanai be daika ese e havarava, a lau be mai dibagu egu hekwakwanai be daika ese e havaraiamu.”

7. Ena be hari ita na dia hekwakwanai badana ta lalonai, to dahaka baita kara be namo?

⁷ Dounu baita haheauka dalana ma ta na, mai momokanida ida eda lalohekwarahi ḡaudia na hanaihanai Iehova enai baita gwaurai hedinarai. (Fili. 4:6; 1 Tes. 5:17) Reana hari oi na dia hekwakwanai badana ta lalonai. To bema o lalohisihisimu, o daradaramu, eiava o lalohekwarahimu negadia ai, Iehova enai heduru o tahumu, a? Bema hari hekwakwanai maraḡidia lalodiai Dirava ena heduru o tahuamu, vaira negai hekwakwanai badadiai danu unu bo kara tomamu. Bona bo dibamu Iehova na mai dibana edena negai bona edena dalai oi be durumumu.​—Sal. 27:1, 3.

8. Edena dala ai Mira ena haheitalai ese e durudamu hari bona vaira negai baita haheauka? (Iakobo 1:2-4) (Laulau danu ba itaia.)

⁸ Bema hari hekwakwanai baita haheaukalaimu, hisihisi bada hereana lalonai baita haheauka dibamu. (Roma 5:3) Dahaka  dainai unu ta gwau tomamu? Tadikaka taihu momo na e gwaumu hekwakwanai ta ta e haheaukalaimu neganai, una ese e durudiamu hekwakwanai ma haida bae haheaukalai. Hekwakwanai ta e haheaukalaiamu neganai, edia abidadama na e goadamu bona e dibamu Iehova na noho heḡaeḡae mai ena ura ida idia baine durudia. Danu, una abidadama ese e durudiamu gabeai bae davaria hekwakwanaina bae haheaukalaia. (Iakobo 1:2-4 ba duahidia.) Albania ai, painia taihuna Mira na guna hekwakwanai e haheaukalaia karana ese e durua, hari e davarimu hekwakwanaidia baine haheaukalai. Ia na e gwa, nega haida e mamiamu ia sibona mo hekwakwanai momo e davarimu. To, Iehova ese laḡani 20 gunadiai e durua daladia e lalo lou neganai, sibona lalonai e gwa: ‘Iehova ba badinaia hanaihanai. Badina iena heduru amo hekwakwanai momo o haheaukalai.’ Oi danu Iehova ena heduru amo o haheauka dalana ba laloa. Namona na ba diba ia ese hekwakwanai ta o haheaukalaiamu negadia ta ta na e itamu bona be hanamomumu. (Mat. 5:10-12) Bena hisihisi bada hereana be matamamu neganai, oi na vada mai dibamu ede ba haheauka toma, bona lalomu bo hadaiamu dounu ba haheauka totona.

9. Antioka kongrigeisin taudia ese hebogahisi karana be ede e hahedinaraia toma?

⁹ Iudea ai doe bada e vara neganai Kristen taudia ediai e vara ḡauna mani a laloa. Antioka kongrigeisin taudia na una doe sivaraina e kamonai neganai, tadikakadia Iudea ai e bogadia hisi. Una dainai ḡau haida e kara idia bae durudia. Idia na lalodia e hadai “ta ta ena kohu ena kohu e abi heḡereḡeredia, edia harihari ḡauna bae siaia lao, varavara Iudea ai e nohova edia.” (Apos. 11:27-30) Ena be doe dainai e ogoḡami tadikakadia edia noho gabudia na daudau, to Antioka ai Kristen taudia na lalodia e hadai idia bae durudia.​—1 Ioa. 3:17, 18.

10. Disasta ai dika e davari tadikakadia ediai hebogahisi be ede baita hahedinaraia toma? (Laulau danu ba itaia.)

¹⁰ Ita danu hari ina negai disasta daidiai dika e davarimu tadikakadia ediai hebogahisi karana baita hahedinaraia. Unu baita kara toma daladia haida na, reana elda taudia baita nanadaidia bema projek ta ai baita heduru diba, eiava tanobada heḡeḡemadai ḡaukarana iduruna totona kontribiusin baita heni, o disasta amo dika e davari tadikakadia daidiai baita ḡuriḡuri. b (Her. 17:17) Heḡereḡere, laḡani 2020 ai, tanobada heḡeḡemadai ai Disaster Relief Committee 950 mai kahana e abidia hidi, COVID-19 pandemic ese edia mauri e hadikaia taudia bae durudia. Una relief committee lalonai e ḡaukara taudia na ta tenkiu henidiamu. Idia na tadikaka taihu e bogadia hisi dainai, tauanina dalanai idurudia ḡaudia e heni, lauma dalanai e hagoadadia, bona gabu haida ai be edia ruma bona tomadiho gabudia e hanamodia eiava e haginidia lou.​—2 Korinto 8:1-4 ba haheḡereḡerea.

11. Hebogahisi ta hahedinaraiamu neganai edena dala ai Tamada guba ai ta hanamoamu?

¹¹ Disasta ta murinai, tadikakada ediai hebogahisi karana ta hahedinaraiamu neganai, ma haida ese una na e itaiamu. Heḡereḡere, laḡani 2019 ai, Bahamas ai lai badana (Hurricane Dorian) ese Kingdom Hall ta e hadikaia. Tadikaka na una Kingdom Hall e haginia louva neganai, kontraka tauna ta​—dia Witnes tauna​—e noia ia ese baine kara ḡaukara davadia be hida idia baine hadibadia. Una tau ese tadikaka e hamaorodia: “Na uramu emui orea baina durua,  una dainai egu masini, ḡaukara taudia, bona kohu baina henimui ba ḡaukaralai asi davadia. Na moalemu badina umui ese turamui na o lalodia badamu.” Taunimanima momo na Iehova na asi dibadia. To idia momo ese Iehova ena Witnes edia kara na e itamu. Ta moalemu badina ta dibamu eda hebogahisi karana dainai, taunimanima na be uramu “hebogahisi-bada Diravana” bae dibaia namonamo.​—Efe. 2:4.

12. Edena dalai hebogahisi ta hahedinaraiamu karana ese hisihisi bada hereana totona e haheḡaeḡaedamu? (Apokalupo 13:16, 17)

¹² Dahaka dainai hisihisi bada hereana lalonai hebogahisi baita hahedinaraia na namo? Baibul ese e hahedinaraiamu politikol oreadia amo be gini sirimu taudia na hari bona hisihisi bada hereana lalonai hekwakwanai idauidau be davarimu. (Apokalupo 13:16, 17 ba duahidia.) Nega unu bamodia ai eda tadikaka taihu na edia dabu ḡaudia ai baita durudia. Bena eda King, Keriso Iesu, na hahemaoro totona bainema neganai, baine davaria ita na hebogahisi ta hahedinaraiamu, bona Basileia amo hahenamo baine henida.​—Mat. 25:34-40.

13. Roma 15:7 heḡereḡerena, Kristen ginigunadia ese lalokau be ede e hahedinaraia toma?

¹³ Lalokau na Kristen ginigunadia edia kara badana ta. To idia ediai una lalokau ihahedinaraina be haraḡa, a? Mani a laloa, Roma kongrigeisin taudia edia mauri daladia na idauidau. Heḡereḡere, idia haida na Mose ena Taravatu e hadibalaidia Iuda taudia, a ma haida be Idau Bese taudia, bona edia mauri dalana na ma idau. Kristen taudia haida be hesiai taudia, a haida be lasi. Bona ma haida be reana hesiai taudia biagudia. Ena be edia mauri daladia na idauidau to edia lalokau be ede e hahedinaraia toma? Aposetolo Paulo ese e haḡanidia, eto: “Ba heabi-dae heheni.” (Roma 15:7 ba duahia.) Una hereva anina be dahaka? Ina hereva “heabidae” anina na ta bavabia dae emu ruma ai eiava turana ai baola. Heḡereḡere, Paulo ese Filemon e hamaoroa, e heau boio tauna Onesimo na ‘baine abia dae.’ (File. 17) Bona Priskila bona Akula ese Apolo na edia ruma e hakaua lao, bena Dirava ena dala e hadibalaia namonamo. (Apos. 18:26) Ena be unu Kristen taudia edia mauri daladia na idauidau, to una ese na se koudia heabidae karana bae hahedinaraia.

14. Anna bona adavana ese lalokau be ede e hahedinaraia toma?

¹⁴ Ita danu tadikaka taihu baita lalokau henidia dalana na, turadia ai baitala bona nega baita ato baita bamodia. Bona idia ese danu ita edai lalokau be hahedinaraiamu. (2 Kor. 6:11-13) Mani Anna bona adavana edia ekspiriens aita laloa. Idia na edia misinari asainmen matamatana dainai West Africa ela murinai, COVID-19 pandemic e vara. Una dainai Kingdom Hall baela bona tadikaka taihu bae hedavari henidia na auka. To idia ese lalokau be ede e hahedinaraia toma? Idia na videoconferencing amo tadikaka taihu ida e herevahereva bona e hadibadia idia na e ura idia bae dibadia namonamo. Ruma bese ta ta na e moale dainai nega momo fon amo Anna bona adavana e rini henidiava bona meseij e siaiva. Dahaka dainai Anna bona adavana na e ura edia kongrigeisin matamatana ai tadikaka taihu bae dibadia namonamo? Anna na e gwa, “Tadikaka taihu ese nega namodia bona nega dikadia ai lau bona egu ruma bese emai ai e hahedinaraia lalokauna na asina laloa boiomu. Edia haheitalai ese e hagoadagu ma haida baina lalokau henidia.”

15. Vanessa ena haheitalai amo dahaka o dibamu? (Laulau danu ba itaia.)

¹⁵ Iseda kongrigeisin lalodiai tadikaka taihu edia mauri daladia bona kara na idauidau. Idia iboudiai baita lalokau henidia dalana na, edia kara namodia baita lalodia bada. New Zealand ai hesiai ḡaukara e karaiamu taihuna ta, ladana  Vanessa, enai na e aukava iena kongrigeisin ai ma haida baine bamodia. To gabeai lalona e hadaia baine bamodia, ena be idia haida edia kara na se moalelaiva. Una ese e durua Iehova ese idia e lalokau henidiamu badina e lalopararalaia. Ia na e gwa: “Lau adavagu na seket tauna ta dainai, tadikaka taihu idauidau ida a ḡaukara heboumu, bona egu ai na dia auka idia baina bamodia bona baina lalokau henidia. Iehova ese danu idia na e lalokau henidiamu badina ia ese taunimanima idauidau na e veridia maimu ia bae tomadiho henia.” Bema haida na Iehova ese e lalodiamu dalana heḡereḡerena baita lalodiamu, ta hahedinaraiamu idia na ta lalokau henidiamu.​—2 Kor. 8:24.

16. Hisihisi bada hereana lalonai dahaka dainai lalokau na mai anina bada? (Laulau danu ba itaia.)

¹⁶ Hisihisi bada hereana lalonai lalokau na mai anina bada. Una hisihisi be matamamu neganai, Iehova ese ita be ede be gimada tomamu? Idaunega Babulono na inaina ese e tuari henia neganai, Iehova ese ena taunimanima e hadibadia dahaka bae kara, eto: “Egu bese taumui e, emui daiutu ai ba raka vareai, iduaramui ba kou; nega taina ba komu, ela bona badu baine ore.” (Isa. 26:20) Toana na hisihisi bada hereana lalonai ita danu unu hahediba hereva tamodia baita badinamu. Ina hereva “daiutu” anina na reana eda kongrigeisin e herevalaidiamu. Hisihisi bada hereana lalonai, Iehova na ena gwauhamata heḡereḡerena be gimadamu bema tadikaka taihu ida lalotamona ai baita nohomu. Una dainai, namona na hari baita hekwarahi dia tadikaka taihu edia kara mo baita haheaukalai, to baita lalokau henidia danu. Unu amo baita roho mauri dibamu!

17. Bema hari baita heḡaeḡaemu, hisihisi bada hereana lalonai dahaka baita kara dibamu?

¹⁷ “Iehova ena dina badana” ai taunimanima ediai mauri na be auka hereamu. (Sef. 1:14, 15) Iehova ena taunimanima danu hekwakwanai idauidau be davarimu. To bema hari baita heḡaeḡaemu, basita lalohekwarahimu bona ma haida baita durudiamu. Baita davarimu hekwakwanaidia iboudiai baita haheaukalai dibamu. Eda tadikaka taihu na dika be davarimu neganai, hebogahisi dainai baita ḡaukara goadamu idia baita durudiamu bona edia dabu ḡaudia baita henimu. Bona bema hari eda tadikaka taihu baita lalokau henidiamu, vaira negai una lalokau na dounu baita hahedinaraiamu. Unu baita kara tomamu neganai, Iehova ese ina tanobada ai mauri hanaihanai be henidamu, unuseniai disasta bona hisihisi iboudiai na baita lalodia boiomu.​—Isa. 65:17.