1. Edena dala ai Kristen taudia na au ta heḡereḡerena? (Laulau danu ba itaia.)

 “BAINE hebeu diba auna na lai ese basine hakwaidua diba.” Una hereva ese e hahedinaraiamu au bae goada bona bae mauri totona bae hebeu (flexible) na namo. Ita Kristen taudia na lauma dalanai baita goada totona, ḡau haida baita haidau na namo. Edena dala ai? Eda noho daladia e idaumu neganai, namona na baita abia dae bona baita manadalaia, danu haida edia lalohadai bona abi hidi baita matauraidia, unu amo ta hahedinaraiamu ita na ta lalo maoromaoromu.

2. Eda noho daladia e idaumu neganai ededia kara ese be durudamu, bona ina atikol ai dahaka baita herevalaimu?

² Ita na Iehova ena hesiai taudia dainai, ta uramu baita lalo maoromaoro. Danu namona na manau bona hebogahisi karadia baita hahedinarai. Ina atikol ai, baita itaiamu Kristen taudia haida edia noho daladia e idau neganai unu kara ese idia be ede e durudia toma. Bona unu kara ese ita be durudamu daladia baita herevalaimu. To, namona na lalo maoromaoro e hahedinaraia ḡoevaḡoeva taudia, Iehova bona Iesu, aita herevalaidia guna.

3. Ede ta diba tomamu Iehova na lalo maoromaoro Diravana?

³ Baibul ese Iehova na e gwauraiamu “Nadi-ginina,” badina iena dala na mamaoro-mamaoro bona se idaumu. (Deu. 32:4) To danu, ia na lalo maoromaoro Diravana. Ina tanobada ai mauri e idaumu lalonai, Dirava danu ḡau haida e haidaumu iena ura baine haḡuḡuru totona. Iehova ese ita na ia heida-idana e karada dainai, noho daladia e idaumu neganai ita ese  danu ḡau haida baita haidau diba. Ia ese Baibul ena hahekau herevadia e henida, unu amo abi hidi maorodia baita kara, herevana eda mauri ai dahaka bae vara. Iehova ena haheitalai bona ena hahekau herevadia amo ta dibamu, ia na “Nadi-ginina” bona lalo maoromaoro Diravana.

4. Edena dala ai Iehova na lalo maoromaoro karana e hahedinaraia? (Levitiko 5:7, 11)

⁴ Iehova ena dala na ḡoevadae bona maoromaoro. Ia ese taunimanima na e bogadia hisimu. Mani Israel taudia ediai hebogahisi e hahedinaraia dalana aita laloa. Ia na se gwa taḡa tauna ese baine heni diba boubou ḡauna na ogoḡami tauna ese danu baine heni. To ta ta edia noho daladia heḡereḡeredia ai boubou ḡaudia bae heni.​—Levitiko 5:7, 11 ba duahidia.

5. Iehova be edena dala ai manau bona hebogahisi karadia e hahedinarai?

⁵ Iehova na manau bona hebogahisi Diravana dainai, lalo maoromaoro karana e hahedinaraiamu. Heḡereḡere, Iehova na e ura Sodom hanuana baine hadikaia neganai, manau karana e hahedinaraia. Ia ese ena aneru amo Lot e hamaoroa ororo baine heau lao. Lot na e gari unu bainela. Una dainai Iehova e noia ena ruma bese ida hanua maraḡina ta, Soara baela; una na Iehova ese baine hadikaia hanuana ta. Iehova bema ura Lot bema hamaoroa ia e gwauraia ḡauna mo bae badinaia. To, ia ese Lot ena noinoi na e abia dae, bona Soara hanuana na se hadikaia. (Gen. 19:18-22) Laḡani handred haida muridiai, Iehova ese Nineve taudia ediai hebogahisi e hahedinaraia. Ia ese peroveta tauna Iona e siaia Nineve taudia baine hadibadia edia kara dika daidiai idia bona edia hanua na baine hadikadia ore. To Nineve taudia e helalo-kerehai neganai, Iehova ese e bogadia hisi bona se hamasedia.​—Iona 3:1, 10; 4:10, 11.

6. Edena dala ai Iesu ese Iehova ena lalo maoromaoro karana e tohotohoa? Mani haheitalai haida a gwaurai.

⁶ Iesu ese Iehova ena lalo maoromaoro karana e tohotohoa. Ia na e siaia “Israel besena ena dobi mamoedia” baine haroro henidia. To una ḡaukara e karaia neganai lalo maoromaoro karana e hahedinaraia. Haheitalai ta na, nega ta idau bese hahinena ta ese e noia, ia natuna kekenina, “lauma dikana ese a boloa” kekenina baine hanamoa. Iesu ese una hahine e bogaia hisi dainai ena noinoi na e abia dae bona una kekeni e hanamoa. (Mat. 15:21-28) Haheitalai ma ta na, Iesu ena hesiai ḡaukara matamana ai, ia na ini e gwau toma: “[Lau] baine ḡoregu tauna na lau ese . . . baina ḡorea.” (Mat. 10:33) To Petro ese nega toi Iesu e ḡorea neganai Iesu ese e dadaraia, a? Lasi. Iesu ese Petro ena helalo-kerehai bona abidadama e lalodia. Una dainai e tore isi lou bona Petro enai e hedinarai neganai, e hadibaia iena dika na vada e gwauatao bona ia na e lalokau henia.​—Luka 24:33, 34.

7. Filipi 4:5 ena hereva heḡereḡerena, ita be ta uramu taunimanima ese ede bae laloda toma?

⁷ Tame diba Iehova Dirava bona Iesu Keriso na lalo maoromaoro taudia. Una dainai  Iehova na e uramu ita danu idia baita tohotohodia. (Filipi 4:5 ba duahia.) Baibul ta ai Filipi 4:5 na ini e hahanaia toma: “Taunimanima na bae diba oi na lalo maoromaoro taumu.” Siboda baita henanadai: ‘Taunimanima ese lau e itagumu be na lalo maoromaoromu bona na manaumu, a? Eiava na kara aukamu bona asina uramu ta ena hereva baina kamonai? Lau be haida na doridiamu egu ura mo bae badinaia, a? Eiava haida edia lalohadai na kamonaimu bona edia ura na badinamu, a?’ Ita ese lalo maoromaoro karana ta hahedinaraiamu neganai, Iehova bona Iesu ta tohotohodiamu. Mani lalo maoromaoro karana baita hahedinaraia negadia rua aita herevalai: (1) eda noho daladia e idaumu neganai, bona (2) haida edia lalohadai bona abi hidi na ita eda amo e idaumu neganai.

8. Noho daladia e idaumu neganai, dahaka ese bae duruda? (Futnout danu ba itaia.)

⁸ Eda noho daladia e idaumu neganai, namona na baita lalo maoromaoro. Unu senisi daidiai asita lalomu hekwakwanaidia na be varamu. Heḡereḡere, gorere badana ta, moni ena hekwakwanai eiava gavamani edia heiriheiri karadia daidiai, eda mauri na be aukamu. (Koh. 9:11; 1 Kor. 7:31) Eiava eda asainmen e haidaumu bona gabu ta e siaidamu neganai, reana una baita abia daemu na auka. Herevana dahaka bae vara, to eda noho daladia e idaumu neganai ini poin 4 ese be durudamu: (1) Eda mauri ai e idaumu ḡaudia na baita abi dae, (2) vairai baita kara ḡaudia baita lalo, (3) ḡau namodia baita lalodia, bona (4) haida baita durudia. b Mani tadikaka taihu haida edia ekspiriens aita herevalai, idia na unu poin 4 e badinadia dainai namo e davari.

9. Emanuele bona Francesca ese e davari hekwakwanaidia be ede e haheaukalai toma?

⁹ Eda mauri ai e idaumu ḡaudia na baita abi dae. Emanuele bona Francesca na e siaidia tano ma ta ai misinari ḡaukara bae karaia. Gado matamatana bona kongrigeisin taudia e dibadia matamava lalonai, COVID-19 pandemic e vara, una dainai ediai na e auka tadikaka taihu bae bamodia. Se daudau Francesca sinana e mase, bona ia na e ura dikadika ena bese baine itadia, to pandemic dainai bainela na auka. Dahaka ese e durua una nega aukana e haheaukalaia? Ginigunana na, Emanuele bona Francesca na ḡuriḡuri amo Iehova enai aonega e noia, una nega aukana bae haheaukalaia totona. Iehova ese ena orea amo edia ḡuriḡuri na nega korikori ai e haerelaia. Heḡereḡere, vidio intaviu ta ai tadikaka ta ena hereva ese e hagoadadia, eto: “Eda noho dalana matamatana baita abi dae haraḡamu neganai, baita moalemu. Dia una mo, to baita hekwarahi una noho dalana matamatana baita manadalaia.” c Iharuana be, lalodia e hadai telefon haroro dalana bae manadalaia bona Baibul stadi ta e hamatamaia. Ihatoina be, edia kongrigeisin ai tadikaka taihu edia heduru bona lalokau karadia e abi dae. Taihu ta na idia e lalodiava dainai laḡani ta lalonai dina iboudiai Baibul sirina ta e siaiava. Ita danu eda noho dalana matamatana baita abia daemu neganai, baita kara dibamu ḡaudia daidiai baita moalemu.

10. Taihu ta be edena dala ai enai e vara ḡauna e abia dae?

¹⁰ Vairai baita kara ḡaudia baita lalo, bona ḡau namodia baita lalodia. Romania taihu ta  ladana Christina na Japan ai e nohomu, bona e lao heniava English kongrigeisin e koua neganai e lalohisihisi. To, se ura e vara ḡauna na baine laloa noho laloa noho. Una dainai, lalona e hadaia Japan gado kongrigeisin baine durua bona haroro ḡaukara na una gado ai baine karaia. Guna ia ida e ḡaukara hebouva hahinena e noia Japan gado baine hadibaia namonamo. Una hahine ese ena noinoi e abia dae bena Baibul bona Mauri Ba Moalelaia Hanaihanai! buklet amo Christina na Japan gado e hadibaia. Unu amo Christina na una gado e dibaia namonamo, to dia una mo, una hahine danu e ura Baibul baine dibaia namonamo. Bema vairai baita kara ḡaudia bona ḡau namodia baita lalomu, mauri ai ḡau haida be idaumu neganai, una ese asita lalomu hahenamodia be havaramu.

11. Edena dala ai tadikaka ta mai adavana ida na moni hekwakwanaina e haheaukalaia?

¹¹ Haida baita durudia. Eda haroro ḡaukara e taravatua tanona ta ai, moni hekwakwanaina e vara dainai, tadikaka ta mai adavana ida edia moni davari dalana na e auka. Idia be dahaka e kara? E karaia ḡauna ginigunana na, edia mauri lalonai ḡau momo asie hoiva. Iharuana be, edia hekwakwanai na asie laloa, to haroro ḡaukara e goadalaia unu amo ma haida e durudia. (Apos. 20:35) Tadikaka na e gwa: “Haroro ḡaukara ai a bisiva dainai asi emai nega hekwakwanai baia lalodia, to emai nega bada na Dirava ena ura baia karaia.” Eda noho daladia e idaumu neganai, namona na baita helalotao eda haroro ḡaukarana amo ma haida baita durudia na mai anina bada.

12. Haroro ḡaukara ai Paulo ena haheitalai ese ede baine duruda toma?

¹² Haroro ḡaukara ai, eda haroro daladia baita haidau na namo. Badina ta davaridiamu taudia edia mauri daladia, e abi daemu ḡaudia bona edia kara na idauidau. Aposetolo Paulo ese ena haroro daladia na e haidauva, bona iena haheitalai amo ḡau haida baita diba. Iesu ese Paulo na e abia hidi ‘aposetolo tauna bese idau-idau ediai” ela. (Roma 11:13) Una dainai, Paulo ese Iuda taudia, Grik taudia, aonega taudia, ogoḡami taudia, gavamani taudia, bona king e haroro henidia. Paulo na taunimanima idauidau iboudiai ‘edia ḡau idau-idau iboudiai ela,’ kudoudia baine hamarere totona. (1 Kor. 9:19-23) Ia ese taunimanima edia kastom, noho daladia, bona e abi dae ḡaudia e haerodia bona una heḡereḡeredia ai e haroro henidia. Ita danu ta haroro henidiamu taudia ta ta edia noho daladia baita haerodia bona una heḡereḡerena baita durudia.

13. Korinto Ginigunana 8:9 ena hereva heḡereḡerena, dahaka basita kara?

¹³ Lalo maoromaoro karana ese baine duruda ma haida edia lalohadai baita matauraidia. Heḡereḡere, taihu haida be makeup e atomu, a haida be lasi. Kristen taudia haida na alkahol taidia e inumu, a haida be lasi. Kristen taudia ta ta na tauanidia inaridia totona e abi hidimu ḡaudia na idauidau. Bema ta lalomu ita ta abi hidimu ḡaudia na hanaihanai mamaoro bona ma haida vairadiai baita herevalaidia momomu, idia baita hahekwakwanaidiamu bona kongrigeisin baine parara diba. To asita uramu unu baita kara toma. (1 Korinto 8:9 ba duahia; 10:23, 24) Baibul ena hahekau herevadia ibadinadia karana ese be durudamu, lalohadai maorona baita abia bona maino ai baita noho. Unu baita kara toma daladia rua mani aita lalodia.

14. Eda dabua bona heḡoeva daladia ai, ededia hahekau herevadia Baibul ai baita lalodia?

¹⁴ Dabua bona heḡoeva daladia. Eda heḡoeva daladia ai, Iehova na dia taravatu aukadia e  ato to hahekau herevadia e heni. Ita na Dirava ena hesiai taudia dainai, eda heḡoeva dalana amo baita hahedinaraia ta lalo maoromaoromu, ta manaumu, bona ta hematauraimu. (1 Tim. 2:9, 10; 1 Pet. 3:3) Ita na asita uramu eda heḡoeva dalana amo taunimanima na ita toada mo bae laloa. Baibul ena hahekau herevadia ese elda taudia be durudiamu, dabua bona heḡoeva daladia ai edia taravatu basie ato. Heḡereḡere, kongrigeisin ta ai elda taudia na e ura matamata tadikaka haida bae durudia, badina idia na tanobada taudia huidia e staelomu daladia e tohotohomu. Elda taudia ese idia be ede e durudia toma? Seket tauna ese elda taudia e hamaorodia tadikaka na ini bae hereva henidia toma, “Bema oi na pletfom ai tok o henimu, bona helai taudia na dia oiemu hereva e hakalaiamu to toamu e itaiamu, anina na oiemu dabua bona heḡoeva dalana ai ḡau ta na kerere.” Una hereva ese matamata tadikakadia e durudia bona e laloparara idia be dahaka bae kara, bona elda taudia na taravatu ta se atoa. d

15. Abi hidi ta karamu neganai, Baibul ai ededia taravatu bona hahekau herevadia ese be durudamu? (Roma 14:5)

¹⁵ Tauanida inarina karana. Namona na Kristen taudia ta ta na bae abi hidi idia sibodia tauanidia be ede bae naria toma. (Gal. 6:5) Kristen taudia ese medikol hedurudia ai abi hidi e karamu neganai, Baibul ai ini taravatu, heḡereḡere rara bona babalau karadia bae dadarai taravatudia, bae badina na namo. (Apos. 15:20; Gal. 5:19, 20) To gorere ihanamona daladia ma haida ai, sibodia edia abi hidi bae kara diba. Haida be hospele ai dokta edia heduru e tahumu, a haida be ma dala haida amo heduru e tahumu. Ena be baita lalomu gorere ihanamona ḡauna ta na namo eiava lasi, to namona na tadikaka  taihu ese e karamu abi hididia baita matauraidia. Una dainai, ini poin 4 baita lalodiatao: (1) Dirava ena Basileia sibona ese gorere iboudiai be hanamodiamu. (Isa. 33:24) (2) Namona na Kristen taudia ta ta na bae diba dahaka ese idia be durudiamu. (Roma 14:5 ba duahia.) (3) Haida basita hahemaoro henidia bona ihahekwakwanaidia ḡauna ta basita karaia. (Roma 14:13) (4) Kristen taudia ese lalokau bae hahedinaraia, bona bae laloparara kongrigeisin ena lalotamona karana na mai anina bada. (Roma 14:15, 19, 20) Unu poin 4 baita badinamu neganai, tadikaka taihu ida baita hebamo namonamomu bona maino ai baita nohomu.

16. Edena dala ai elda ta ese lalo maoromaoro karana baine hahedinaraia? (Laulau danu ba itaia.)

¹⁶ Lalo maoromaoro karana ai, elda taudia ese haheitalai namona bae hahedinaraia na namo. (1 Tim. 3:2, 3) Heḡereḡere, elda ta na basine laloa ia laḡanina na bada dainai iena lalohadai na ma elda haida ese bae abi dae. Ia na e lalopararamu Iehova ena lauma ese elda oreana ai ta ta be durudiamu edia lalohadai be gwauraimu, unu amo abi hidi maorona bae karaia. Bona bema una abi hidi na Baibul ena hahekau herevana ta se utuamu, e lalo maoromaoromu elda taudia ese bae abia dae na namo, ena be edia lalohadai na idau.

17. Lalo maoromaoro karana amo baita moalelaimu hahenamodia haida be dahaka?

¹⁷ Eda lalo maoromaoro karana amo hahenamo momo baita abimu. Heḡereḡere, eda tadikaka taihu ida hetura karana namona baita moalelaiamu, bona kongrigeisin na maino ai be nohomu. Baita moalemu badina Iehova e tomadiho heniamu taudia ida lalotamona ai baita nohomu, ena be edia kara bona kastom na idau. Bona mai anina bada ḡauna na, ta dibamu ita ese lalo maoromaoro Diravana, Iehova, ta tohotohoamu.